Chituwa 29

Kapatulidu ka sembe

(ŴaLevi 8.1-36)

1“Sono mukachitanga viyo kwaku wo pakuŵapatuwa, alinga ŵaŵe ŵazukuru ŵakunditeŵete. Mutonge kankhuzi kampupuka kamoza ndi ŵabira ŵaŵi ŵambura kalema, 2ndi chiŵande chambura mtupu, makeke ghambura mtupu ghakusazgana ndi mafuta, ndi tuviŵande twakuphapha twambura mtupu twakupakapo mafuta. Mukavibikanga ndi ufwa wakuti ng'ibu wa trigu. 3Ndipo mukaviŵikanga mu chise chimoza ndi kuza navyo mu chise, ndi mukazanga ndi nkhuzi yo ndi ŵabira wo ŵaŵi. 4Mukazanga ndi Aroni ndi ŵana ŵake ŵanthurumi ku khomo la hema lakuwunganamo, ndi kuŵasambika ndi maji. 5Ndipo mukatonga vyakuvwara ndi mukavwarikanga Aroni khoti ndi munjirira wa efodo, ndi efodo, ndi chapachifuŵa ndi kumumanga ndi lamba lakuwombeka, kwakuyana ndi lusu la efodo; 6ndipo mukamuvwarikanga mwakundu, pa mutu wake ndi mukavwarikanga mphumphu pachanya pa mwakundu. 7Ndipo mukatonga mafuta ghakupakiya, ndi mukaghadiranga pa mutu wake ndi kumupaka. 8Pavuli mukatonga ŵana ŵake ndi kuŵavwarika makhoti, ndipo mukaŵamanganga ndi ŵalamba ndi kuŵamangiliya ŵakapusi, 9ndipo uzukuru ukaŵanga wawo mwadangu lambura kumara lakulembeka. Viyo ndimo mukaŵamikiyanga Aroni ndi ŵana ŵake ŵanthurumi.

10“Pavuli mukatolenga nkhuzi yo paurongo pa hema lakuwunganamo Aroni ndi ŵana ŵake ŵanthurumi ŵakaŵikanga manja ghawo pa mutu wa nkhuzi yo, 11ndipo mukabayanga nkhuzi yo paurongo pa Ambuya, pa khomo la hema lakuwunganamo. 12Ndipo ukatonga chigaŵa cha ndopa za nkhuzi yo ndi kuziŵika pa masengwe gha chiguŵa cha sembe ndi munwe wako, ndipo ndopa zose zakujapo mukadiranga musina mu chiguŵa cha sembe. 13Ndipo mukatonga mafuta ghose ghakumata ku matumbo ndi mphafwa, ndi sana zo siŵi ndi mafuta gho ghakumata kwaku zo, ndipo muvyochenge pa jochero la sembe. 14Kweni nyama ya nkhuzi yo, ndi chikopa chake ndi busu lake mochenge ndi moto kubwalo kwa ugoŵi ndi mpasku wapa uheni.

15“Sono mukatonga yumoza wa ŵabira wo, ndipo Aroni ndi ŵana ŵake ŵanthurumi ŵakaŵikanga manja ghawo pa mutu wa bira yo. 16Ndipo mukabayanga bira yo, ndi kuto ndopa zake ndi kuziwazga kuchiri ku chiguŵa cha sembe kwakuzunguliya cho. 17Pavuli mukadumuwanga bira yo mathuŵi-mathuŵi, ndi kusuka matumbo ghake ndi vigha vyake ndi kuviŵika pamoza ndi mathuŵi ghake ndi mutu wake. 18Ndi mochenge bira pa chiguŵa cha sembe, ndi mpasku wakocha ku Ambuya; ndi fungu lakukondweska, mpasku wa moto ku Ambuya.

19“Mukatonga bira yo munyake; ndipo Aroni ndi ŵana ŵake ŵanthurumi ŵakaŵikanga manja ghawo pa mutu wa bira yo. 20Ndipo mukabayanga bira yo, ndi mukatonga ndopa zake zinyake ndi kuziŵika pa umari wa gutu lamarghe laku Aroni ndi pa umari wa makutu ghamarghe gha ŵana ŵake ŵanthurumi, ndi vikumbu vya manja ghawo ghamarghe, ndi pa vikumbu vya marundi ghawo ghamarghe; ndipo muwochenge ndopa zakujapo kuchiri ku jochero la sembe kwakuzunguliya lo. 21Sono mukatonga ndopa zinyake zo ze pa jochero la sembe, kutopo mafuta ghanyake gha kupakiya ndi kuviwazga paku Aroni ndi vivwalo vyake, ndi pa ŵana ŵake ŵanthurumi ndi pa vivwalo vyawo pamoza nayo; ndipo iyo ndi vivwalo vyake wakaŵanga wakupaturika, ndi ŵana ŵake ŵanthurumi ndi vivwalo vyawo pamoza nayo.

22“Mukatonga so mafuta gha bira, ndi muchiya wa mafuta, ndi mafuta ghaku matumbo ndi mafuta gha pachanya pa mphafwa ndi sana zo ziŵi pamoza ndi mafuta gha pachanya paku zo, ndi chigha chakumarghe pakuti ndi bira wakumikiya, 23ndi burunga limoza la chiŵandi, ndi keke yumoza wa chiŵandi pamoza ndi mafuta, ndi kachiŵandi kakweruka kamoza, kutuzga mu chise cha viŵandi vyambura mtupu vyo vye paurongo pa Ambuya; 24ndipo mukaŵikanga ivi vyose mu manja ghaku Aroni ndi mu manja gha ŵana ŵake ŵanthurumi, ndi kuvizungung'a kuŵa mpasku wakuzungung'a paurongo pa Ambuya. 25Pavuli mukavirondanga mu manja ghawo, ndi kuvyocha pa guŵa la sembe kusazgiyapo pa mpasku wakocha, nge nchafungu lakukondweska paurongo pa Ambuya, ndi mpasku wa moto ku Ambuya.

26“Ndipo mukatonga nganga ya bira yo ya pakumikika kwaku Aroni ndi kuyizungung'a kuŵa mpasku wakuzungung'a paurongo pa Ambuya; ndipo iyi yikaŵanga yinu. 27Ndipo mukapatuwanga nganga yo mpasku wa kuzungung'a, ndi chigha cho ncha ŵazukuru, cho chazungung'ika, chenicho nchakupereka kutuliya ku bira yo wakumikiya pakuti nchaku Aroni ndi ŵana ŵake ŵanthurumi. 28Chikaŵanga chamuyaya kutuwa ku ŵaYisraele chaku Aroni ndi ŵana ŵake ŵanthurumi; pakuti cho ncha ŵazukuru, chakusaskika ndi ŵaYisraele kutuwa ku mpasku wawo wachimangu: ndi mpasku wawo ku Ambuya.

29“Vivwalo vyakupaturika vyaku Aroni vikaŵanga vya ŵana ŵake ŵanthurumi pavuli paku iyo, kupakikiya mwaku vyo ndi kumikikiya mwaku vyo. 30Mwana munthurumi mweniyo ndi mzukuru mu malo ghake wakavivwalanga mazuŵa ghankhonde ndi ghaŵi; wachiza mu hema lakuwunganamo kuzachiteŵete mu malo ghakupaturika. 31“Mukatonga bira yo wakumikiya, ndi kubwatuska nyama yake mu malo ghakupaturika; 32ndipo Aroni ndi ŵana ŵake ŵanthurumi ŵakarghanga nyama ya bira yo ndi chiŵandi cho che mu chise, pa khomo la hema lakuwunganamo. 33Ŵakarghanga vinthu vyo vinguchitikiya mphepeska kuŵamika ndi kuŵapatuwa, kweni ŵakubwalo kuti ŵakavirghanga cha, pakuti vyakupaturika. 34Ndipo asani nyama ye yose ya pakumikika, pamwenga chiŵandi vijapo kufika mlenji, sono mukawochanga ndi moto vyakujapo vyo; vingarghikanga cha, pakuti vyakupaturika.

35“Viyo ndimo mukachitiyanga kwaku Aroni ndi ku ŵana ŵake ŵanthurumi, kwakuyana ndi vyose vyenivyo ndakulanguliyani; mukaŵamikanga mu mazuŵa ghankhonde ndi ghaŵi. 36Ndipo zuŵa ndi zuŵa mukapaskanga nkhuzi nge ndi mpasku wa uheni pa mphepeska. Ndipo so mukapaskanga mpasku wa uheni pa chifukwa cha jochero la sembe muchichita mphepeska paku cho, ndipo mukachipakanga ndi mafuta, kuchipatuwa. 37Mukachitanga mphepeska mazuŵa ghankhonde ndi ghaŵi chifukwa cha jochero la sembe, ndi kulipatuwa ndipo jochero la sembe likaŵanga lakupaturika kwakuruska; che chose chakukwaska jochero la sembe chikasandukanga kuŵa chakupaturika.

Sembe ya masiku ghose

(Maŵerengedu 28.1-8)

38“Sono ivi ndivyo mukapaskanga pa jochero la sembe: tumberere twa virimika viŵi, zuŵa ndi zuŵa kwambura kurekezga. 39Kamberere kamoza mukapaskanga ndi mlenji, ndi kamberere kanyake mukapaskanga ndi mazulo; 40ndipo pamoza ndi kamberere kakundanga, mweso wa umoza wa chumi wa ufwa wakuti ng'ibu wakusazga pamoza ndi chigaŵa cha chinayi cha supa ya mafuta ghakwenguwa, ndi chigaŵa cha chinayi cha supa ya vinyo, kuŵa chakupepeske. 41Ndipo kamberere kanyake mukakapaskanga ndi mazulo, ndipo mukapaskiyenge pamoza ndi mpasku wa ufwa ndi kupepeska kwake, uli ndi mlenji, kuŵa fungu lakukondweska, mpasku wapa moto ku Ambuya. 42Ukaŵanga mpasku wapa moto kwakukiyakiya mu migonezi yinu yose pa khomo la hema lakuwunganamo paurongo pa Ambuya, mwenimo ndikakumananga namwe, kwachikamba namwe mwenimuwa. 43Mwenimuwa ndikakumananga ndi ŵaYisraele, ndipo likapaturikanga ndi unkhankhu wangu. 44Ndikapatuwanga hema lakuwunganamo ndi jochero la sembe Aroni nayo ndi ŵana ŵake ŵanthurumi ndikaŵapatuwanga kuŵa ŵazukuru ŵakunditeŵete. 45Ndipo ndikajanga mukati mu ŵaYisraele, ndipo ndikaŵanga Chiuta wawo. 46Ndipo ŵakaziŵanga kuti ndine Ambuya Chiuta wawo, mweniyo wanguŵatuzga mu charu cha Egipiti alinga kuti ndizije mukati mwawo. Ndine Ambuya Chiuta wawo.

Currently Selected:

Chituwa 29: TongaMw

Highlight

Copy