Chituwa 17

Maji ghatuwa mu jarawi lapa Horebe

(Maŵerengedu 20.1-13)

1Mpingu wose wa ŵaYisraele ungusama kutuwa ku bozwa la Sini limanalimana, uli ndi langulu la Ambuya, ndipo ŵangugoŵa pa Refidimu, kweni pengavi maji ghakuti ŵangamwa ŵanthu, 2Chifukwa cho ŵanthu ŵangusaniya kafukwa ndi Mosese ndi ŵanguti, “Utipaske maji timwenge.” Ndipo Mosese wanguti kwaku wo, “Chifukwa nchine pakulimbana ndi ine? Chifukwa nchine mutuŵesa Ambuya?” 3Kweni ŵanthu ŵangukoreka ndi nyota, ndipo ŵanthu ŵangudinginikiya Mosese ŵanguti, “Chifukwa chine ungutituzga mu charu cha Egipiti, kuzachitibaya ndi ŵana ŵidu ndi ng'ombe zidu ndi nyota?” 4Viyo Mosese wangubongole ku Ambuya, “Ndichitenje nawo ŵanthu yaŵa? Mbakulongosoreka kundidina ndi mya.” 5Ndipo Ambuya anguti kwaku Mosese, “Ruta paurongo pa ŵanthu, ndipo ujitore pamoza nawe ŵaraŵara ŵanyake ŵa ŵaYisraele, mu janja lako utolemo ndodo yeniyiya ungupumiya Nile, ndipo rutaninge. 6Ehe, ine ndikamanga paurongo pako penipa pa jarawi lapa Horebe, ndipo iwe ukapumanga jarawi lo, ndipo maji ghakatuwanga mwaku lo, alinga kuti ŵamwenge ŵanthu.” Ndipo wanguchita viyo, ŵachiwonako ŵaraŵara ŵa ŵaYisraele. 7Ndipo wangudana zina la malo gha Masa ndi Meriba,#17.7 Masa ndi Meriba: ndi kuti malo gha mphindano. chifukwa cha kutundula kwa ŵana ŵaku Yisraele; ndi chifukwa ŵangwesa Ambuya pakukamba kuti, “Kumbi Ambuya ŵe mukati mwidu, pamwenga awa?”

ŴaYisraele ŵathereska Amaleke

8Sono ŵanguza Amaleke, ndi ŵangurwa ndi ŵaYisraele pa Refidimu. 9Ndipo Mosese wanguti kwaku Yoswa, “Utisankhiye ŵanthu, ndipo utuwe ukarwane ndi Amaleke; la mawa Ine ndamukuma pachanya pa kamtunthu ndi ndodo yaku Chiuta mu janja langu.” 10Viyo Yoswa wanguchita uli ndimo Mosese wangumunene ndipo ŵangurwana ndi Amaleke, ndipo Mosese, Aroni, ndi Huru angukwere pachanya pa kamtunthu, 11nyengo yose yeniyo Mosese wangusoska janja lake, ŵaYisraele ŵangupunda, ndipo penipo wangusiska janja lake, Amaleke ŵangupunda. 12Kweni manja ghaku Mosese ghanguvuka. Viyo ŵanguto mwa, ndi ŵanguwuŵika pasi pake, ndi wanguja paku wo, ndipo Aroni ndi Huru ŵangusoska manja ghake yumoza kuchiri kumoza ndi munyake kuchiri kunyake; viyo manja ghake ghangulimba mpaka kusere kwa lumwi. 13Ndipo Yoswa wangupupiya pasi Amaleke ndi ŵanthu ŵake ndi wuyi wa lipanga.

14Ndipo Ambuya anguti kwaku Mosese, “Lemba ichi nge nchikumbusku mu buku, ndipo uchikambe mu makutu ghaku Yoswa kuti ndisisistiyanga limu chikumbusku chaku Amaleke mu charu chose chapasi.” 15Ndipo Mosese wanguzenga jochero la chisopo ndi wangulidana zina lake Ambuya ndi mbendera yangu. 16Wanguti, “Koni mbendera ya Ambuya. Ambuya akarwanga ndi nkhondo ndi Amaleke mu mgonezi wose.”

Currently Selected:

Chituwa 17: TongaMw

Highlight

Copy