Chituwa 15

Sumu yakukankhuskiya Ambuya

1Sono Mosese ndi ŵaYisraele ŵangumba sumu iyi ku Ambuya, ŵanguti,

“Ndikambanga ku Ambuya, pakuti apunda kwakutumbwa;

ŵakavalo ndiŵakukwerapo ŵake apong'a mu nyanja.

2Ambuya ndi nthazi yangu ndi sumu yangu,

ndipo aŵa iwo utaski wangu:

mweniyo ndi Chiuta wangu, ndipo ndikamurumbanga,

Chiuta wa ada, ndipo ndikamukuzganga.

3Ambuya ndi munthu wa nkhondo;

Ambuya ndilo zina lawo.

4“Magareta ghaku Farao ndi liŵanja lake la nkhondo ataya mu nyanja;

ndipo ŵara ŵake ŵankhondo ŵakusankhika, ŵabira mu Nyanja Yiyera.

5Mweza utiŵavimba;

ŵangusere pasi pa ndimba uli ndi mwa.

6Janja linu lakurghiya, Ambuya mwe, lakutumbwa mu nthazi,

janja linu lakurghiya liphwanya ŵamawongo, Ambuya mwe.

7Mu ukuru wakutumbwa kwinu kwa ukaronga muphwanya ŵakupindikana ŵinu,

mutuma ukari winu, utuŵargha uli ndi mbuwa.

8Ndi mvuchi wa mphunu zinu, maji ghanguwunjikika,

ndipo mweza wa maji unguma ndundo;

ndimba zingukhoma mukati mwa nyanja.

9Wamawongo wanguti,

‘Ndikandondoloskanga, ndikaŵakonga,

ndikagaŵanga vyakuskowa,

khumbo langu likagutiskikanga ndi vyenivi,

ndikawewepuwanga lipanga langu,

janja langu likaŵamaranga.’

10Munguphuta ndi mphepo yinu, nyanja yinguŵavimba;

ŵangudodome pasi uli ndi ndolo mu maji ghanthazi.

11“Njani yo we nge ndimwe, Ambuya mwe, mukati mu ŵachiuta?

Njani yo we nge ndimwe, wakutumphulika mu utuŵa,

wakofya pakuchita unkhankhu, wakuchita vyakuziziswa?

12Mungutambaruwa janja linu lakurghiya,

ndipo charu chinguŵameza.

13“Mwarongozga ŵanthu ŵinu mu chifundu chinu; ŵanthu ŵeniwo imwe mwawombo,

mwaŵarongozga ndi nthazi yinu kuya ku chakujamo chinu chakupaturika.

14Makhamu gha ŵanthu ghavwa, ngakutenthema;

urwirwi waŵako ŵakuja mu Filistia.

15Sono mafumu ghamu Edomu ghadika nthazi:

ŵarongozgi ŵa Moabu kwaŵako kunjenjeme,

wose ŵakuja mu Kanani ŵasongonoka.

16Chofyu ndi chitenthe vyaŵa paku wo;

chifukwa cha ukuru wa janja linu, ŵachetama ulaka ndi mwa,

mpaka penipo ŵanthu ŵaporotamo Ambuya,

mpaka ŵanthu ŵinu ŵaporota wo mwagula.

17Imwe mukaŵaserezganga

ndi kuŵapanda pa phiri laku mwaŵeni

malo gho mwaghachita kuŵa chakujamo chinu, Ambuya mwe,

malo ghakupaturika gho manja ghinu ghajarika, Ambuya mwe.

18Ambuya akausanga muyaya ndi muyaya.”

19Pakuti penipo ŵakavalo ŵaku Farao ndi magareta ghake, ndi ŵakukwera pa ŵakavalo ŵake ŵangusere mu nyanja, Ambuya anguwezge maji gha nyanja paku wo; kweni ŵaYisraele ŵangwenda pa mtunda uyumu mukati mu nyanja. 20Sono Miriamu mchimi muthukazi mzichi waku Aroni wangutole kang'oma mu janja lake, ndipo ŵanthukazi wose wanguruta pavuli pake ndi tung'oma, ndi kuvina. 21Ndipo Miriamu wanguŵambiya:

“Mbaninga ku Ambuya chifukwa apunda ndikutumbwa;

kavalo ndi wakukwerapo wake apong'a mu nyanja.”

Maji ghaku Mara

22Sono Mosese wangurongozga ŵaYisraele kutuwa ku Nyanja Yiyera, ndipo ŵanguruta mu bozwa la Shuru ŵangwenda mazuŵa ghatatu, ndipo kuti ŵangusaniya maji cha. 23Ŵanguti ŵaza ku Mara#15.23 Mara: mu chi Hebere ndiku kuti kuŵaŵa. kuti ŵanguziŵa kumwa maji ghapa Mara cha chifukwa ghenga ghakuŵaŵa: chifukwa chenichi zina lake lingudanika Mara. 24Ndipo ŵanthu ŵangudinginikiya Mosese, ŵanguti, “Tikamwanganji?”

25Ndipo wanguliriya ku Ambuya, ndipo Ambuya angumurongo muti, ndi wanguupong'a mu maji, ndipo maji ghangusanduka ghakunowa.

Penipo Ambuya anguŵachitiya chakukombo ndi dangu ndipo penipo anguŵesa, 26anguti, “Asani nyengo zose mukavwiyanga mazu gha Ambuya Chiuta winu, ndi kuchita cho nchakurunjika pa maso pake, ndi kuphwere malangulu ghake ndi kusunga vyakukombo vyake vyose kuti ndiŵikengepo nthenda nanga njimoza pinu cha, zenizo ndikuŵika paŵa Egipiti, pakuti ndine Ambuya, ŵakukuchizga.”

27Sono ŵanguza ku Elimi, penipo penga visima vya maji ghakubwibwituka chumi ndi viŵi (12) ndi miti ya kanchindu machumi ghankhonde ndi ghaŵi (70) ndi ŵangugoŵa penipa pafupi ndi maji.

Currently Selected:

Chituwa 15: TongaMw

Highlight

Copy