Machitidu gha Ŵakutumika 4

Petro ndi Yohane paurongo pa upu wa ŵazukuru

1Ndipo ŵachirongoro iwo ndi khamu lo, ŵanguziya paku wo ŵazukuru ndi nduna ya kasopi ndi ŵaSaduki, 2ŵakutundiya chifukwa kuti ŵasambizganga khamu, ndi ŵatauliyanga mwaku Yesu chiyuka cho chaku ŵakufwa. 3Ndipo ŵanguŵako, ŵanguŵaŵika mu ulinda mpaka mlenji, chifukwa sono kwenga mazulo. 4Kweni ŵanandi ŵaku wo ŵangughavwa mazu ŵanguvwana; ndipo unandi wa ŵanthurumi ungufika akhumba vikwi vinkhonde (5,000). 5Ndipo kunguŵa ndi mlenji, kuti ŵarongozgi ŵawo ndi ŵara ndi ŵalembi#4.5 ŵalembi: uku ndiku kuti ŵasambizgi ŵa marangu. aŵa nguwungana pamoza mu Yerusalemu; 6ndipo wanguŵapo Anase, mzukuru mura yo, ndi Kayafa, ndi Yohane, ndi Alekezandara, ndi wose wo ŵenga ŵamu mbumba ya mzukuru mura, 7ndipo ŵati ŵaŵamika mukati mo, ŵafumbanga, “Mu nthazi uli, pamwenga zina uli, mwachitiya chenichi?” 8Sono Petro wakuzazika ndi Mzimu Wakupaturika, wanguti kwaku wo, “Mwaŵarongozgi ŵa khamu, ndi mwaŵara ŵaku Yisraele, 9asani le titeruzgikiya ifwe panchitu yamampha yapa munthu waunthomboru kuti, ndi mu nthazi uli munthu uyu wataskikiya, 10kuziŵikwe kwaku mose, ndi ku khamu lose laku Yisraele, kuti mu zina laku Yesu Kristu waku Nazarete, mweniyo imwe mungupayika, Mweniyo Chiuta wanguyuska ku ŵakufwa, mwaku iyo munthu uyu watuma paurongo pinu wakuchizgika. 11Mweniyo ndi mwa wo unguyeyeka ndi imwe mwa ŵazengi-nyumba, wo waŵa mutu wa nyondu. 12Ndipo kuti mwe utaski mu munyake cha, chifukwa chingana nkhuti kwe zina lamwenga cha pasi pa kuchanya, lakupaskika mu ŵanthu, mwaku lenilo tingataskikiya.”

13Ndipo pakuwona chiganga chaku Petro ndi Yohane, ndi pakuthoŵa kuti ŵenga ŵanthu ŵambura kusambira ndi ŵaŵaka, ŵazizwanga ndipo ŵaŵateskanga kuti ŵaŵanga pamoza ndi Yesu. 14Ndipo pakuthoŵa munthu wakuma pamoza nawo wakuchizgika, ŵengavi kanthu kakususkapo. 15Kweni ŵati ŵaŵalanguliya kuturiya kubwaro kwa upu wo, ŵangufumbana, 16ŵakuti, “Tichitengenji kwaku wo ŵanthu? Chifukwa kuti chisimikizgu chakuziŵikwa cho chachitikiya mwaku iwo chawoneka kwaku wose ŵakuja mu Yerusalemu; ndipo kuti tiziŵa kuchikana cha. 17Kweni alinga kuti chingawandiya kwakuruska mu khamu lo cha, tiŵachenjezgenge kurongoro so cha mu zina lenili, chingana nkhu munthu yumoza.” 18Ndipo ŵati ŵaŵadana, ŵanguŵalanguliya chingana nkhukamba chingana nkhusambizga mu zina laku Yesu kosekose cha. 19Kweni Petro ndi Yohane, pakuŵamuka, ŵanguti, “Asani nkhwakurunjika paurongo paku Chiuta kuvwiya imwe kwakuruska Chiuta, yeruzgani; 20chifukwa ifwe kuti tiziŵa cha kureka kurongoro vyenivyo tawona ndi tavwa.” 21Ndipo ŵati ŵaŵachenjezga so, ŵanguŵafwatuwa, kwambura kubowozga mo ŵangaŵalanguliya, chifukwa cha khamu lo; pakuti wose ŵakankhuskanga Chiuta paku cho chinguŵapo. 22Chifukwa munthu yo wenga navyo virimika kwakuruska machumi ghanayi, mweniyo changumuŵiya chisimikizgu chenichi cha mchizgu.

23Ndipo ŵanguti ŵafwaturika ŵanguza ku ŵanasi ŵawo ndipo ŵangukonkhoma vyo vyose ŵazukuru ŵara ndi ŵara ŵanguŵanene, 24ndipo ŵachivwa iwo, ndi mtima umoza ŵangusamphuskiya mazu kwaku Chiuta, ndipo ŵanguti, “Ambuya, ndimwe mwata kuchanya ndi panupasi ndi nyanja ndi vyose vya mwawo, 25mwaŵakukambiya ndi Mzimu Wakupaturika mu mlomo wa auskefwe, mteŵeti winu Davidi.

‘Chifukwa chine yingukalipa Mitundu,

ndi makhamu ghangurunguruka vyaŵaka?

26Ŵangujindandaliska ŵakaronga ŵa charu,

ndipo nduna zo zinguwungana pamoza,

pa Ambuya ndi pa Wakupakika wawo.’

27“Chifukwa mu msumba uno ŵanguwungirana pa Muŵanda winu Wakupaturika Yesu, yo mungupatuwa, Herode ndi so Pontio Pilato, pamoza ndi Mitundu ndi makhamu ghaku Yisraele, 28kwachichitiya vyo vyose janja linu ndi khumbu linu linguteme limu kuŵapo. 29Ndipo sono, Ambuya, lereskanipo pa mafingu ghawo: ndi paskani ku ŵateŵeti ŵinu kurongoro ndi chiganga chose mazu ghinu, 30muchitambasuwa janja linu kwachichizga; ndi kuti visimikizgu ndi vyaminthondwi vichitikiye mu zina la Muŵanda winu Wakupaturika, Yesu.” 31Ndipo ŵati ŵaromba, ghanguyaghayika malo mwenimo ŵanguwungana ndipo ŵanguzazika wose ndi Mzimu Wakupaturika, ndipo ŵarongoronga mazu ghaku Chiuta ndi chiganga.

Ŵakuvwana ŵasangana mausambasi ghawo

32Ndipo wenga umoza mtima ndi mzimu wa urapasi waku wo ŵanguvwana, ndipo pengavi so yumoza yo wakambanga kuti kanthu kaku vyo wenga navyo, kenga kaku yija; kweni vyawo vyose vyenga vyamasanga. 33Ndipo ndi nthazi yikuru ŵakutumika ŵapaskanga ukaboni wa chiyuka cho cha Ambuya Yesu, ndipo wezi ukuru wenga paku wo wose. 34Chifukwa kwengavi so mwaku wo yumoza msauchi: chifukwa wose ŵeneko ŵa vyaru pantwenga zinyumba ŵangusaska, ndi ŵangutole mitengu ya misasku yo, 35ndipo ŵaŵikanga pa marundi gha ŵakutumika: ndipo ŵagaŵiyanga kwaku yose uli ndimo munthu yose wakavukiyanga. 36Ndipo Yosefe, wakutamulika ndi ŵakutumika Barnaba (lenilo ling'anamuwa kuti, Mwana wa masangu), mlevi, Mkupro pa kawi pakuŵa ndi munda, 37wanguwusaska, ndi wanguto ndrama, ndipo wanguziŵika pa marundi gha ŵakutumika.

Currently Selected:

Machitidu gha Ŵakutumika 4: TongaMw

Highlight

Copy