ZEKARIA 13
13
Kucheneswa kuna pyakudawa
1“Pandzidzi wenewo mphuno yamadzi inabaulwa kuna dzinza ya Davite na kuna anyakukhala mu Yerusalemu kuachenesa kuna pyakudawa pyawo, pontho kukhonda chena kwawo pamaso pa MBUYA.
2“Pandzidzi wenewo ndinafudziratu na madzina ene a mifanikizo ya m'dzikomo, tenepo ipyo nkhabe dzakumbukwave tayu. Ndalonga ndine MBUYA Wamphamvu zonsene. Ndinabulusa maprofeti na mizimu yakuipa m'dzikomo. 3Tenepo ngakhala munthu anathimiza kulonga basi mphangwa zauprofeti, babache na mache, anyakumbala ale, analonga kuna iye kuti, ‘Iwe wathema kufa, thangwi iwe waphatisa basa dzina ya MBUYA kutinamiza.’ Iye angalonga mphangwa zauprofeti, makolo ache maka ndiye anafuna dzamulasa na mpeni.
4“Pandzidzi wenewo mprofeti onsene anachita manyadzo na masomphenyache aona iye. Iye nkhabe dzavala nguwo zauprofeti zaubweya tayu kuti anamize anthu. 5Iye analonga kuti, ‘Si ine mprofeti tayu. Ndine pyanga nyakulima. Ine ndaphata basa yakulima kutomera uphale wanga.’ 6Ngakhala unango anamvunza kuti, ‘Apo pironda pili m'manungo mwakombopi mphyanji napyo?’ Iye anatawira kuti, ‘Pirondapi ndidapikwata kumusa kwa ashamwali anga.’ ”
Kupha makabuswa, mabira kubalalikana
7MBUYA Wamphamvu zonsene akulonga kuti,
“Lamuka iwe, talasada,
phata basako pana makabuswanga,#13.7 makabuswanga: (Yang'anani 11.4).
pana munthu ule ali chifupi na ine.
Khamwadza makabuswa,
tenepo mabira anabalalikana,
kubuluka penepo ndinatchunyusa anabirawo.”#Mt. 26.31; Mk. 14.27.
8MBUYA akulonga kuti,
“M'dziko monsenemo makhundu mawiri
pa makhundu matatu anaphiwa;
kwache khundu ibodzi inasiyiwa na moyo mwenemo.
9Khundu yachitatuyi ndinaidzesa pamoto
mbandiabulusa masepu-sepu ninga siliva,
pontho ndinaayesa ninga golidi.
Iwo anachemera dzinanga,
tenepo inembo ndinaatawira;
ndinalonga kuti,
‘Iwo mbanthu anga,’
iwombo analonga kuti,
‘MBUYA ndi Mulungu wathu.’ ”
Currently Selected:
ZEKARIA 13: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi
