MATEO 4

Yesu ayeswa na Satana

(Mk. 1.12-13; Lk. 4.1-13)

1Tenepo Mzimu Wakuchena adamtsogolera Yesu kwenda kuthando yatchetcha kayeswa na Satana.#Aheb. 2.18; 4.15. 2Pidamala Yesu nsiku makumanayi akupimana kudya mosiku na masikati, iye adava njala. 3Tenepo Satana adadza kuna iye mbalonga mbati, “Ngakhala ndiwedi Mwana Mulungu, tonga miyalayi isanduke mikate.” 4Mbwenye Yesu adamtawira mbati, “Malemba akulonga kuti, ‘Munthu nkhabe khala na moyo na mkate okha tayu, mbwenye na mafala onsene analonga Mulungu.’ ”#Deut. 8.3.

5Kubuluka penepo Satana adendesa Yesu ku Yerusalemu, Mzinda wakuchena, mbamkwirisa pachisusu cha Nyumba ya Mulungu 6mbalonga kuna iye mbati, “Ngakhala ndiwedi Mwana Mulungu, piponye wekha ene pansi, thangwi Malemba akulonga kuti:

‘Mulungu anatonga angelo ache pya iwe;

iwo anakugampha m'manjawo,

towera na manyalo ako ene aleke kuwazika na miyala.’ ”#Mas. 91.11, 12.

7Yesu adatawira mbati, “Malemba akulonga pontho kuti, ‘Leka yesa Mbuya Mulungu wako.’ ”#Deut. 6.16.

8Tenepo Satana adakwata Yesu mbakwira naye paphiri yakulapha pyakwanga mbamuonesa maufumu onsene a padziko yapansi na demelero yache yonsene. 9Tenepo Satana ule adalonga kuna Yesu mbati, “Pyonsene pinaona iwepi ndinakupasa kuti pikhale pyako, ngakhala unagodama pansi mbundipembedza.” 10Tenepo Yesu adatawira mbati, “Choka Satana! Malemba akulonga kuti, ‘Upembedze na kutumikira Mbuya Mulungu wako ene basi.’ ”#Deut. 6.13.

11Natenepo Satana ule adamsiya Yesu; tenepo angelo adadza mbamphedza.

Yesu atoma basache m'nthemba ya Galilea

(Mk. 1.14-15; Lk. 4.14-15)

12Pidapiva Yesu kuti Yohani aikhwa m'perezo, adabwerera ku Galilea.#Mt. 14.3; Mk. 6.17; Lk. 3.19, 20. 13Iye hadakhalemo muluwani ya Nazareti tayu, mbwenye adenda kakhala mu Kafaranao, luwani ya m'khundu mwa nyanza ya Galilea kunthemba za Zebuloni na Nafitali.#Yoh. 2.12. 14Tenepo penepi pidachitika kuti pikwane-kwane pidalonga mprofeti Yesaya kuti:

15“Nthemba ya Zebuloni na nthemba ya Nafitali,

panjira yakwendera kunyanza kumtunda unango wa mkulo wa Yorodani,

Galilea, nthemba ya anthu okhonda khala Ayuda!#Yes. 9.1, 2.

16Anthu akukhala mumdima anaona cheza chikulu;

kuna alembo ambakhala kumbuto zamthunzi wa imfa,

cheza chinaamwinikira.”

17Kubulukira pa ndzidzi wenewo Yesu adatoma kulalika mphangwa zache mbati, “Lekani pyakudawa pyanu, thangwi Mulungu ali chifupi kukhazikisa Ufumu wache.”#Mt. 3.2.

Yesu achemera amisiri a nsomba anayi

(Mk. 1.16-20; Lk. 5.1-11)

18Pikhafamba Yesu pagombe ya nyanza ya Galilea, adaona amisiri a nsomba awiri ubaleawo. Simoni wakuchemerwa Peturo na mbaleache Andrea, akupha nsomba m'nyanza na chavi. 19Yesu adalonga kuna iwo mbati, “Nditewereni, ndinakusandusani kukhala anyakumedza a anthu.” 20Kabodzi na kabodzi iwo adasiya pyavi pyawo mbamtewera.

21Iye adathimiza kwenda mbaona pontho amuna anango awiri ubaleawo, Yakobo na Yohani, ana Zebedeo. Iwo akhali m'mwadiya pabodzi pene na babawo Zebedeo kusasanyiratu makokotawo. Yesu adaachemera, 22tenepo kabodzi kene iwo adasiya makokotawo na babawo m'mwadiya mule mbatewera Yesu.

Yesu afunzisa, kulalika na kuwangisa anthu

(Lk. 6.17-19)

23Yesu adenda m'nthemba yonsene ya Galilea kufunzisa m'nyumba zakupemphereramo, kulalika Mphangwa Zadidi za Ufumu wa Mulungu, pontho na kuwangisa anthu ale akhali na utenda wa mtundu onsene, pontho na nyatwa zakusiyana-siyana.#Mt. 9.35; Mk. 1.39. 24Mbiri yache idaveka m'dziko yonsene ya Siria mwakuti anthu akhadza kuna iye na atenda ale akhali na utenda onsene wakusiyana-siyana na akuva kupha m'manungo; anthu akuphatwa na mizimu yakuipa, anjiri-njiri na anyamfutete, tenepo Yesu adaawangisa onsenewo. 25Anthu azinji akubulukira ku Galilea na ku Maluwani Khumi,#4.25 Maluwani Khumi: Ndi dzina ya maluwani khumi a kumabulukiro dzuwa kwa Nyanza ya Galilea. akubulukira ku Yerusalemu, Yudea pontho na nthemba ya kumtunda unango wa kumkulo wa Yorodani, adamtewera.

Currently Selected:

MATEO 4: SenaMw

Highlight

Copy