LUKA 3

Kulalika kwa Yohani Nyakubatiza

(Mt. 3.1-12; Mk. 1.1-8; Yoh. 1.19-28)

1Chaka chakhumi na chishanu cha Tiberia, Mfumu wa Roma; Pontio Pilato akhali mkulu wa boma wa nthemba ya Yudea; Herodi akhatonga nthemba ya Galilea; mbaleachembo Filipi akhatonga nthemba ya Iturea na nthemba ya Trakoniti; Lisanio akhatonga nthemba ya Abileni; 2Anasi na Kayafa akhali Anyansembe Akulu. Pandzidzi wenewo Mulungu adalonga kuna Yohani, mwana Zekaria, m'thando yatchetcha. 3Tenepo Yohani adenda kunthemba yonsene ya kumkulo wa Yorodani mbalalika kuna anthu mbati, “Lekani pyakudawa pyanu mbamubatizwe, tenepo Mulungu analekerera pyakudawa pyanu.” 4Penepi pidachitikadi ninga mudalemberwa ipyo m'bukhu ya mprofeti Yesaya kuti,

“Munthu akukhuwa m'thando yatchetcha, akulonga kuti,

‘Msasanyireni njira Mbuya,

ndendemezani njira towera iye afambemo.#Yes. 40.3-5.

5Maphedi onsene afikhirwe,

nthunda na mapiri pyonsene pimwalazwe.

Njira zakugongonyeka zindendemezwe,

pontho njira zamakolong'ondo zisalazwe.

6Anthu onsene konsene kwene anaona chipulumuso cha Mulungu!’ ”

7Mwinji udadza dzabatizwa na Yohani. Iye adalonga kuna iwo mbati, “Imwe ana a nyoka! Mbani akupangani kuti munakwanisa kuthawa kutchunyuswa kunafuna dzatumiza Mulungu?#Mt. 12.34; 23.33. 8Phatani pinthu pyakuonesa kuti mwalekadi pyakudawa pyanu. Lekani kupilonga mwekha ene kuti Abrahamu ndi kholo wanu. Ndikukupangani kuti Mulungu anakwanisa kusandusa miyalayi kukhala pidzukulu pya Abrahamu.#Yoh. 8.33. 9Mbadzo yasasanyika kugwanda miti pamitsitsi; muti onsene okhonda bala nsapo zadidi unagwandwa mbuponywa pamoto.”#Mt. 7.19.

10Mwinji ule udavunza kuti, “Tinachita tani mphapo?”

11Yohani adaatawira mbati, “Munthu ana mayala mawiri, apasembo abodzi mwanzache wakusowa mayala, pontho munthu ana kudya akugawe.”

12Anyamisonkho adadza dzabatizwa mbamvunza Yohani mbati, “Mfunzisi, ifembo tinachita tani?”#Lk. 7.29.

13Iye adaapanga mbati, “Lekani khomesa msonkho mwakupinza kupiringana mudatongerwa imwe.”

14Anyankhondo anango adamvunzambo mbati, “Apo ifembo tinachita tani?”

Iye adaapanga mbati, “Lekani kukwata kobiri za munthu mwakumthusa penu kupambizira anthu. Kobiri zinapagalwi imwe mungaphata basa mukwane nazo.”

15Chidikhiro cha anthu chidatoma kukula, onsenembo adatoma kupinyerezera mumtima mwawo kuti penu Yohani akhali Khristu. 16Tenepo Yohani adaapanga anthu onsene ale mbati, “Ine ndimbakubatizani na madzi, mbwenye unango wamkulu pyakwanga kupiringana ine pano akubwera. Ine sidatheme na kusudzula kwene nkhwaira zache tayu. Iye anakubatizani na Mzimu Wakuchena pontho na moto. 17Iye ana chisero m'manja mwache chakupepetera nacho mapira. Tenepo anagumanya mapira pambuwapo kaaikha m'chikwa mwache, mbwenye anapisa makupu-kupu pamoto okhonda thima.”

18Yohani adalalika Mphangwa Zadidi kuna anthu njira zizinji zakusiyana-siyana mbaapanga kuti asanduze makhaliro awo. 19Mbwenye Yohani adasumulula Herodi mkulu wa boma thangwi adasemba Herodia, mkazi mbaleache, pontho na pinthu pinango pizinji pyakuipa pikhadachita iye.#Mt. 14.3, 4; Mk. 6.17, 18. 20Kubuluka penepo Herodi adathimiza kudawa kukulu pakuikha Yohani m'perezo.

Kubatizwa kwa Yesu

(Mt. 3.13-17; Mk. 1.9-11)

21Pidamala batizwa anthu onsene, Yesu adabatizwambo. Pikhapemphera iye, kudzulu kudafunguka, 22pontho Mzimu Wakuchena wakuoneka ninga nkhangaiwa adatchithira pana iye. Tenepo fala idaveka kubulukira kudzulu kuti, “Iwe ndiwe mwananga wapamtima. Ndakomerwa nawe pyakwanga pene.”#Kut. 22.2; Mas. 2.7; Yes. 42.1; Mt. 3.17; Mk. 1.11; Lk. 9.35.

Makolo a Yesu

(Mt. 1.1-17)

23Pikhali Yesu ninga pyaka makumatatu adatoma basache. Anthu akhanyerezera kuti akhali mwana Yosefe, ule akhali mwana Eli, 24mwana Matati, mwana Levi, mwana Meleki, mwana Yanai, mwana Yosefe, 25mwana Matatia, mwana Amose, mwana Nahumu, mwana Hesili, mwana Nagai, 26mwana Mahati, mwana Maati, mwana Semeni, mwana Yoseke, mwana Yoda, 27mwana Yohanani, mwana Resa, mwana Zerubabele, mwana Shealatiele, mwana Neri, 28mwana Meleki, mwana Adi, mwana Kosamu, mwana Elimadama, mwana Eri, 29mwana Yoswa, mwana Eliezere, mwana Yorimu, mwana Matati, mwana Levi, 30mwana Simioni, mwana Yuda, mwana Yosefe, mwana Yonamu, mwana Eliakimu, 31mwana Melea, mwana Mena, mwana Matata, mwana Natani, mwana Davite, 32mwana Yese, mwana Obedi, mwana Boazi, mwana Salimoni, mwana Nashoni, 33mwana Aminadabu, mwana Adimini, mwana Arini, mwana Hezironi, mwana Perezi, mwana Yuda, 34mwana Yakobo, mwana Isake, mwana Abrahamu, mwana Tera, mwana Nahori, 35mwana Serugi, mwana Reu, mwana Pelege, mwana Eberi, mwana Shela, 36mwana Kainani, mwana Aripakisadi, mwana Semu, mwana Nowa, mwana Lameki, 37mwana Metusela, mwana Enoki, mwana Yaredi, mwana Mahalalele, mwana Kenani, 38mwana Enosi, mwana Seti, mwana Adamu, mwana Mulungu.

Currently Selected:

LUKA 3: SenaMw

Highlight

Copy