YOHANI 13

Yesu atsuka manyalo a anyakufunzache

1Padasala kwene nsiku ibodzi kuti nsiku ya Phwando ya Paska ikwane. Yesu adadziwa kuti ndzidzi ukhadakwana wakuti aende kuna Baba kubuluka pansi pano. Iye akhadaafuna pikulu anthu ache a pansi pano, pontho adaafuna kufikirana pansiku yakumalisiraletu ya moyo wache pansi pano.

2Na mawulo Yesu na anyakufunzache akhadya, tenepo Satana akhadachitisa kale kuti Yudasi mwana Simoni Iskarioti anyerezere pyakupereka Yesu kuna anyamalwache.#13.2 Satana akhadachitisa…kuna anyamalwache: penu Satana akhadanyerezera kale kuti Yudasi mwana Simoni Iskarioti anapereka Yesu kuna anyamalwache. 3Yesu adapidziwa kuti Baba akhadampasa mphamvu monsene mwene; pontho adapidziwa kuti akhadabulukira kuna Mulungu, tenepo akhabwerera kuna Mulungu. 4Iye adalamuka pakhadyera iwo pale mbakunundula nguwo yache yakunja mbamanga mcheka m'chuno mwache. 5Kubuluka penepo adatsanyulira madzi m'phande mbatoma kutsuka manyalo a anyakufunzache mbaapukuta na mcheka ukhadamanga iye m'chuno ule. 6Iye adafika pana Simoni Peturo, ule adalonga kuna Yesu mbati, “Mbuya, kani munafuna kutsuka manyalo anga?”

7Yesu adatawira mbati, “Iwe nkhabe vesa chinchino pinthu pinachita inepi tayu, mbwenye unapivesa mphole m'tsogolo muno.”

8Peturo adalonga mbati, “Nee munatsukave manyalo anga tayu!” Yesu adamtawira mbati, “Ndingakhonda kukuchenesa, nee unati ukhaleve nyakufunzangabi.”

9Simoni Peturo adatawira mbati, “Mbuya, lekani tsuka kokha manyalo, mbwenye sambisani manja na msolo wanga ene!”

10Yesu adalonga mbati, “Munthu angasamba ambachena monsene mwene, iye nkhabe funika pontho kusamba kachiwiri kache tayu, mbwenye kutsuka kwene manyalo ache basi.#13.10 kutsuka kwene manyalo ache basi: Pyakulembwa pinango pyakale nkhabemo mafala enewa. Monsenene ndimwe akuchena, kupambula munthu mbodzi.” 11Yesu adadziwa kale munthu wakufuna dzampereka kuna anyamalwache; ndi thangwi yache adalonga mbati, “Monsenene ndimwe akuchena, kupambula munthu mbodzi.”

12Pidamala Yesu kutsuka manyalo awo, adavala pontho nguwo yache yakunja mbakakhala pambuto pache pale. Tenepo iye adavunza mbati, “Ayi imwe mwavesa pinthu pyakuchitirani ine chinchinopi?#Lk. 22.27. 13Imwe mumbandichemera ‘Mfunzisi’ pontho ‘Mbuya,’ mphyadidi kuchita tenepo thangwi ndine ene pano. 14Ine, Mfunzisi pontho Mbuyanu, ndamala kwene tsuka manyalo anu chinchino pano. Mphapo imwembo mwathema kutsukana manyalo unango na mwanzache. 15Ine ndakupangizani, towera imwe muchitembo ninga montho mwapichitira ine kuna imwe. 16Ndikukupangani pyakuonadi: nkhabe bitchu anapiringana mbuyache tayu, pontho nkhabe nyakutumwa anapiringana adamtuma ule tayu.#Mt. 10.24; Lk. 6.40; Yoh. 15.20. 17Podi imwe mwadziwa penepi chinchino, pichiteni, tenepo munakhala akutsanzaya!

18“Ine nee ndikulonga monsenene tayu; ine ndimbadziwa anthu asankhula ine ale. Mbwenye pikwane-kwane pidalonga Malemba pile kuti, ‘Munthu anadya na ine pabodzi mkate anati andisandukire.’#Mas. 41.9. 19Ndakupanganiletu ipyo pidzati chitika, towera pingachitika, mukhulupire kuti, ‘Ndine ene pano.’ 20Ndikukupangani pyakuonadi kuti munthu ambatambira anatuma ine ule, atambirambo na ine ene; pontho munthu ananditambirayo atambirambo na adandituma ene ule.”#Mt. 10.40; Mk. 9.37; Lk. 9.48; 10.16.

Yesu alongeratu kuti anaperekwa kuna anyamalwache

(Mt. 26.20-25; Mk. 14.17-21; Lk. 22.21-23)

21Pidamala Yesu kulonga penepi, adasanyika pikulu mumtima mwache mbalonga pakwecha mbati, “Ndikukupangani pyakuonadi kuti mbodzi pakati panupa anati andipereke kuna anyamalwanga.”

22Anyakufunza ale adayang'anizana mbamalwa nzeru, tenepo hadadziwe tayu kuti iye akhalonga ani. 23Nyakufunza unango mbodzi wapamtima pa Yesu, adakhala chifupi na Yesuyo. 24Tenepo Simoni Peturo adamkodola nyakufunza ule mbampanga mbati, “Avunze, analonga iwoyo mbani.”

25Tenepo nyakufunza ule adapendamira kuna Yesu mbavunza mbati, “Mbuya, mbani analonga imwe?”

26Yesu adatawira mbati, “Ndinafonda tchuwa ya mkate m'palato mbaindipasa munthu, munthu anapasa ine tchuwayo ngweneyo ene.” Tenepo pidafonda iye tchuwa, adaipereka kuna Yudasi, mwana Simoni Iskarioti. 27Sindzidzi pidatambira Yudasi tchuwa ile, Satana adapita mumtima mwache. Tenepo Yesu adalonga kuna iye mbati, “Chimbiza, ndoko kachite pinafuna iwe kuchitapyo!” 28Nee mbodzi pakhadya iwopo adavesa kuti thangwi ninji Yesu akhadalonga penepi kuna iye. 29Podi Yudasi akhali nyakukoya kobiri za kuthumba, anyakufunza anango akhanyerezera kuti Yesu akhadampanga kagula pyakufunikira pa phwandopo, penu kapereka pinthu kuna anthu akutcherenga.

30Yudasi adatambira tchuwa ile mbaenda pyache kabodzi kene. Wenewo ukhali mosiku.

Matongero achinchino

31Pikhadenda Yudasi, Yesu adalonga mbati, “Chinchino demelero ya Mwana Munthu ikuoneswa, pontho demelero ya Mulungu ikuoneswa kudzera muna Mwanayo. 32Ngakhala demelero ya Mulungu ikuoneswa kudzera muna iyeyo, Mulungu anaonesambo demelero ya Mwana Munthu muna iye ene mwenechiro, tenepo iye anapichita kabodzi kene. 33Ananga, nee ndinakhala namwe ndzidzi ukulu ene tayu. Imwe munandisaka-saka, kwache chinchino ndikukupangani pidapanga ine akadamu a Chiyuda kuti, ‘Imwe nkhabe kwanisa kwenda kunaenda ine tayu.’#Yoh. 7.34. 34Tenepo chinchino ndinakupasani matongero achinchino akuti funanani unango na mwanzache. Ninga mudakufunirani ine, imwe mwathema kufunana unango na mwanzache.#Yoh. 15.12, 17; 1Yoh. 3.23; 2Yoh. 5. 35Ngakhala munafunana unango na mwanzache, penepo anthu onsene anapidziwa kuti ndimwe anyakufunzanga.”

Yesu alongeratu kuti Peturo anamkhonda

(Mt. 26.31-35; Mk. 14.27-31; Lk. 22.31-34)

36Simoni Peturo adavunza mbati, “Mbuya, kunaenda imwe nkhupi?” Yesu adatawira mbati, “Imwe nkhabe kwanisa chinchino kunditewera kunaenda ine tayu, mbwenye munanditewera m'tsogolo muno.”

37Peturo adatawira mbati, “Mbuya, ndinakhonda kwanisa tani kukutewerani chinchino? Ine ndasasanyika na kufa kwene, thangwi ya imwe!”

38Yesu adatawira mbati, “Ayi iwe wasasanyikadi kufa thangwi ya ine? Ndikukupanga pyakuonadi kuti dzongwe mbadzati lira unati ulonge katatu kuti hunandidziwa tayu.”

Currently Selected:

YOHANI 13: SenaMw

Highlight

Copy