MABASA 2

Anyakukhulupira adzazwa na Mzimu Wakuchena

1Pidafika Nsiku ya Pentekosti anyakukhulupira onsene adagumanyikana pabodzi m'nyumba.#Lev. 23.15-21; Deut. 16.9-11. 2Vumbu-vumbu kudaveka dungu ninga ya mphepo ikulu kubulukira kudzulu mbidzala nyumba yonsene mukhali iwo mule. 3Tenepo adaona pinango pyakuoneka ninga malulume a moto ule udabalalika mbuphamira anthu onsene mwenemo kada munthu. 4Iwo onsene adadzazwa na Mzimu Wakuchena mbatoma kulonga pilongero pyachilendo ninga mudaalongesera Mzimuyo.

5Penepo pakhali Ayuda akukhala mu Yerusalemu, anthu akugopa Mulungu ale akhadabwera kubulukira kumadziko onsene a pansi pano. 6Pidaveka dungu ile, anthu azinji pyakwanga adagumanyikana. Onsene adadodoma, thangwi onsene a iwo adava chilongero chache chene chikulongwa na anyakukhulupirawo. 7Iwo adadodoma mbamalwa nzeru, tenepo adalonga mbati, “Ayi anthu onsene analongawa si Agalilea enewa tayu? 8Mphapo pyakhala tani kuti tonsene tikuava akulonga na pilongero pya mtundu wathu ene? 9Ife tabulukira kumadziko a: Paritia, Media na Elamu; Mesopotamia, Yudea na Kapadokia; ku Ponto na Asia, 10ku Frigia na Pamfilia, ku Iguputo na nthemba za Libia chifupi na ku Kirene. Anango a ife abulukira ku Roma, 11Ayuda na anango ale ambateweza pya Chiyuda. Anango a ife ngaku Krete na ku Arabia; mbwenye tonsene tikuava akulonga m'pilongero pyathu pya pinthu pikulu pyachita Mulungu!” 12Onsene adadodoma mbamalwa nzeru, tenepo adavunzana unango na mwanzache mbati, “Penepi pikulonganji?”

13Mbwenye anthu anango adaadzeda mbati, “Anthu enewa aledzera!”

Kulalika kwa Peturo

14Tenepo Peturo adaimira pabodzi na anyakutumwa anango khumi na mbodzi ale. Iye adalonga kuna mwinji wa anthu onsene ule mwakugaluza fala mbati, “Imwe Ayuda na imwe monsene mumbakhala mu Yerusalemu muno, veserani kuno, ndikupangeni kuti penepi pikulonganji: 15Anthu enewa hadaledzere ninga munanyerezera imwe tayu, ano ndi machibese ene ora yachifemba. 16Mbwenye penepi mphile pikhadalongwa kale ene na mprofeti Yowele kuti,

17‘Mulungu adalonga kuti:

Ipi mphile pinafuna ine dzachita nsiku zakumalisa.

Ndinakhuthulira Mzimu wanga pana anthu onsene.

Ananu achimuna na achikazi analonga mphangwa zakubulukira kuna ine;

aphale anu anaona masomphenya,

pontho nkhalamba zanu zinalota ndoto.#Yow. 2.28-32.

18Ande, nsiku zenezo, ndinakhuthulira Mzimu wanga

pana anyabasanga, amuna na akazi ene,

tenepo analalika mphangwa zanga.

19Ndinachita pyakudodomesa kuthambo ya kudzulu

pontho na pidzindikiro pansi pano.

Panakhala chiropa, moto na utsi ukulu;

20dzuwa inaswipiswa na mdima,

pontho mwezi unasanduka wakufira ninga chiropa,

mbidzati fika nsiku ikulu yademelero,

Nsiku yakudza pontho kwa Mbuya ile.

21Penepo anthu onsene ale anachemera Mbuya kuti

aaphedze, anapulumuswa.’

22“Imwe, Aisraele anzanga, ngavani mafalawa! Yesu wa ku Nazareti akhali munthu ule adatsikimizirwadi na Mulungu kuna imwe na pyakudodomesa pontho pidzindikiro pyonsene pidachita Mulungu kudzera muna iye. Imwe mukupidziwa kale, thangwi pidachitika pakati panu. 23Na kufuna kwa Mulungu pontho na kudziwiratu kwache, Yesu adaperekwa m'manja mwanu. Imwe mudampha pakumpereka kuna anthu akuipa towera amkhomere pamtanda.#Mt. 27.35; Mk. 15.24; Lk. 23.33; Yoh. 19.18. 24Mbwenye Mulungu adamulamusa kuimfa, mbamsudzula panyatwa zikulu za imfa, thangwi pikhali pyakuchimwanika kuti imfa imkhazike paunyaperezo.#Mt. 28.5, 6; Mk. 16.6; Lk. 24.5. 25Davite adalonga pya iye mbati,

‘Ndidamuona Mbuya pamaso panga,

iye ali chifupi na ine ndzidzi onsene,

natenepo ine nkhabe dzatekenyeka tayu.#Mas. 16.8-11.

26Natenepo mtimanga wakomerwa,

pontho lulume yanga yasekera,

na manungo anga ene anakhala m'chidikhiro,

27thangwi imwe nkhabe dzandisiya kudziko ya anthu akufa,

penu kuleka nyabasanu wakukhulupirika

kuti avunde m'masiye tayu.

28Mwandionesa njira zakundiendesa kumoyo,

pontho munandidzaza na kusekera pamaso panu.’

29“Abale anga, ndinakwanisa kulonga namwe pakwecha pya kholo wathu wakudziwika Davite. Iye adafa mbafikhirwa, tenepo nthumbi yache ili kuno na lero. 30Iye akhali mprofeti, tenepo adadziwa pidampanga Mulungu: Mulungu adadumbira kuti mbodzi mwa pidzukulu pyache ndiye anapita ufumu wache.#Mas. 132.11; 2Sam. 7.12, 13. 31Davite adaona pile pikhafuna dzachitika kutsogolo, tenepo adalonga pya kulamuka kwa Khristu kuimfa mbati,

‘Iye hadasiyiwe kudziko ya anyakufa tayu;

pontho manungo ache hadavunde m'masiye tayu.’

32“Yesu ontho-onthoyu adalamuswa na Mulungu kuimfa mbakhala na moyo. Tonsenembo ndife mboni za penepi. 33Iye adakwizwa mbakakhala kudzanja yamadyo ya Mulungu mbatambira Mzimu Wakuchena ule akhadadumbira Babache kuti anampereka. Tenepo iye adatikhuthulira mtukwa unaona imwe na kuuva chinchino. 34Si Davite adakwira kwenda kudzulu tayu, mbwenye iye adalonga mbati,

‘Mbuya adalonga kuna Mbuyanga kuti:

Khala pano kumadyo kwanga#Mas. 110.1.

35kufikirana ndiikhe anyamalwako

ninga chakusanjikirapo manyalo ako.’

36“Natenepo Aisraele onsene apidziwedi kuti: Yesu adakhomera imwe pamtanda ule, Mulungu amuikha kukhala Mbuya pontho Khristu.”

37Pidava anthu penepi, pidaalasa mtima, tenepo adavunza Peturo na anyakutumwa anango ale mbati, “Abale, tinachita tani ife?”

38Penepo Peturo adaapanga mbati, “Monsene muleke pyakudawa pyanu mbamubatizwe na dzina ya Yesu Khristu. Tenepo Mulungu analekerera pyakudawa pyanu mbakupasani mtukwache, Mzimu Wakuchena. 39Mulungu adumbira kuti iye anachita penepi kuna imwe na ananu na kuna anthu onsene akutali, onsene ale anachemerwa na Mbuya Mulungu wathu.”

40Peturo adalonga kuna iwo mafala anango azinji mbaadembetera mbati, “Pipulumuseni mwekha ene kunyatwa zile zinabwera pana anthu akuipawa!” 41Tenepo anthu ale adatawira mphangwa zache adabatizwa. Nsiku yonthoyo anthu pikwi pitatu adathimizirika pagulu pawopo. 42Iwo adavera chifunziso cha anyakutumwa mbakhala akuphatizana, kumenya mkate pabodzi kukumbuka Mbuya, pontho na kupemphera pabodzi na mtima onsene.

Makhaliro a anyakukhulupira akutoma

43Anthu onsene adadzazwa na mantha, thangwi ya pyakudodomesa na pidzindikiro pizinji pile pikhachitwa na anyakutumwa. 44Anyakukhulupira onsene adathimiza kukhala mukuphatizana mbagawana pinthu pyawo pyonsene unango na mwanzache.#Mab. 4.32-35. 45Akhagulisa nyumba zawo na pinthu pikhali na iwo, towera agawize kobirizo kuna munthu onsene malingana na kusowa kwache. 46Nsiku na nsiku adagumanyikana pabodzi m'Nyumba ya Mulungu, mbamenya mkate pabodzi m'misa mwawo kudyerana na mtima wakukomerwa na wakupichepesa, 47mbakuza Mulungu. Tenepo anthu onsene adakomerwa nawo. Nsiku zonsene Mbuya akhathimizira gulu yawoyo na anthu akhapulumuswa ale.

Currently Selected:

MABASA 2: SenaMw

Highlight

Copy