Marako 5

Yesu ati Geraseou orindi onzi beri

1 # Mat 8:28-34; Luk 8:26-40 Yi nga ca miri tia ’aa’dasi, ’ba! Gerasini ’diyi ma angua. 2Eri ka fu oguru alia, perepere ’ba efupi angu nyadrinia orindi onzi beri nga dri fu eri be; 3agu nde adri la nyadri eselia, econi ’bani eri ombezaru ku, kani anziriku ayarusi ti; 4a’disiku yi ombe ndra eri pale kakau emve pisi anziriku be, te eri oce anziriku ra, eri onyo emve mgbiri mgbiri; ka’dini ’ba ecopi eri etalipini aluni yo. 5Etu be ini be rra, eri ovu nyadri eselia azini oni eselia, eri oyu uru ’dani, eri i ma rua oli onisi. 6Eri ka Yesuni ndre angu reria, eri nga nzu mu eri inzi; 7#Mar 1:24eri otre o’duko urusi kini, E’yo amani mi be ng-oni ya, mi Yesu, Mungu Uru Turi ma Mvi’i? Ma oyo so mi be Mungu rusi, mi ecandi ma ku. 8De Yesu ’yo te tinia ’bo, Mi efu agu ’di ma aliasi amve, mi orindi onziri’i! 9Yesu nga zi tinia kini, Mi ru a’di ya? Eri nga ’yo ra kini, Ma ru Kakau’i, amani ovule o’birurisi. 10Eri nga zi tinia matusi, kini ma pe yi ti fuzu angu ndeasi ku. 11Isu ezo karakarau ovu ndra iribi nyaria va oni tia ogogo; 12yi nga zi tinia ’yozu kini, Mi pe ama ti ezo ’diyi ma alia, ama ma fi yi ruaa ani. 13Eri nga a’i ra. Orindi onzi ’diyi nga fu amve, fi ezo ma alia ani; ezo ongulumuru nga nzu ri e’buti gulukurua miri alia, kalafeni ovu ekile alifu irile, yi nga aba avuzu yi alia.

14’Ba ezo ocepi ’diyi apa ra, ng’a e’yo olu aku nde ma alia, angu ndea indi. ’Ba nga efu ani e’yo i ’yepiri ndrezu. 15Yi nga emu Yesu vu, yindre’ba te ovupi orindi onzi beri erini riria bongo be ruaa, asi be alaru, ’di agu ndra orindi kakau beri’i; yi nga ovu ani urisi. 16’Ba te e’yo ndrepi ’diyi nga e’yo i ’yepi ’ba orindi onzi beri ma ruaari pi olu e’yo ezoniri be. 17Yi ’ba zi tinia matusi, kini, eri ma fu angu yiniasi ra. 18Erini firia oguru ma alia, ’ba te ovupi orindi onzi beri nga zi tinia ovuzu eri be. 19Te Yesu a’ini ku, te ’yo tinia kini, Mi mvi mi vile joa, ’ba mini vu, mi olu yi tia e’yo amboru Opini ’yele mi be, erini asi ndriza fezu mi driri. 20#Mar 7:31; Mat 4:25Eri nga mvi ra, nga ’ba e’yo olu Dekapoli ma alesi, e’yo amboru Yesuni ’yele eri beri dria; ’ba dria nga osu ambo.

Yairo zi pi oku Yesu ma bongo ti elapiri be

21Yesu ka zo ogurusi ’aa’dasi dika, ’ba ongulumuru nga yi tra vunia tu; eri ovu miri tia ogogo. 22#Mat 9:18-26; Luk 8:41-56’Ba ’wara alu, ’ba ’ba dri cepi pari ’bani yi okuzuriari nga emu ra, runi Yairo’i; erini eri ndreria eri nga i eco va eri ma palaa, 23#Mar 7:32eri nga matu ’ba tu, kini, Zamva mani eri ’ye dra dra. Mi emu mi dri ti drinia, ruani ma ati ra, eri ma oyu idriru beni. 24Yesu nga mu eri be. ’Ba ongulumuru mu vutinia tre, nga eri omi geria omi omi. 25Oku azini, arini adri ra ruania ’dani eli mudri drini iri, 26eri ecandi i ambo ojou o’biru dri, eri eza ndra afa erini dria ra, te eri isuni aza koza aluni ku, eri rua eca onzi aga ra, 27erini e’yo Yesuni eriria ’bo, eri nga fi ’ba ongulumuru ma eselia vutinia, nga eri vile bongo rua elo. 28Erini ’yole kini, ka bongo erini ma rua elo ra, i nga i pa ra-risi. 29Coti ari raza erini nga nzu ra, eri nga ni i rua ati dra ’disi ’bo. 30#Luk 6:19Yesu nga perepere ni i ma ngulupi ma alia kini okpo taliru efu i ruaasi ’bo, eri nga ti oja vile ’ba ongulumuru ma eselia, eri nga ’yo kini, A’di elo ma bongo ruani ya? 31’Ba erini imbale ’diyi nga ’yo tinia kini, Mi ndre, ’ba ongulumuru yi mi omi, mi di ’yo, A’di elo ma ruani ya? 32Eri nga ’ba olu, ’ba e’yo ’diri ’yepiri ndrezu. 33Oku ’dirini ovuria urisi, ruanirini yaria, erini e’yo i ’yepi eri ruaari niria, nga emu co va palania, eri nga e’yo adaruri olu eri tia dria. 34Eri ’yo tinia kini, Ma zi, a’ita mini pa mi ’bo; wi mvi asi anzuru be, mi ma ovu atizaru dra ’disi.

35De erini nga e’yo ’yoria, ’ba azini efu ’ba dri cepi pari ’bani yi okuzuriari ma joa, yi nga ’yo ra, Mi zi dra ’bo. Mi di ’Ba ’ba Imbapiri ecandi ’dani a’disi ya? 36Yesuni e’yo yini ’yoleri eriria, nga ’yo ’ba ’ba dri cepi pari ’bani yi okuzuriari ma tia kini, Mi ma ovu urisi ku, mi a’i kiri’i. 37Eri a’ini ’ba azini ma mu eri be ku, pe alu Petero pi, Yakobo pie, Yohana Yakobo ma adri pie. 38Yi nga eca ’ba ’ba dri cepi pari ’bani yi okuzuriari ma joa; eri nga yikiyi neire, azini ’bani wuria kakau, azini lulu garia uru. 39#Yoh 11:11Eri ka fi ’bo, eri ’yo yi tia kini, Emi yikiyi zo, emi awu wu a’disi ya? Zamva ’diri drani ku, eri o’du ko. 40Yi nga eri ogu ogu tu. Erini ’ba dria ofuria amve ’boria, eri nga zamva ma ati pi eji andri be, ’ba ovupi eri be ’diyi pie, yi nga fi pari zamvani lazuria. 41#Luk 7:14Eri nga zamva ma dri bi, nga ’yo tinia kini, Talita kumi; ka ti oja ra efini kini, Zamva wereari, ma ’yo mi tia, mi enga uru. 42Coti zamva nga perepere enga uru, eri aci aci; eli erini ovu de mudri drini iri. Yi nga osu tu. 43#Mar 1:44Eri azi yi tia okposi, kini ’ba azini ma ni e’yo ’diri aluni ku, azi vini kini ma fe eri dri nyaka nya.

Currently Selected:

Marako 5: LB66

Highlight

Copy