Marako 15

Yesuni Pilato ma drilia

1 # Mat 27:1-2; Luk 22:66; 23:1; Yoh 18:28 O’bitisi coti, kuhani amboru piyi ’ba ’wara pie, karania pie, ’ba e’yo amapi ’diyi pie dria nga yi ti otu tualu, nga Yesuni ’i ji fe Pilato dri. 2#Mat 27:11-30; Luk 23:2-25; Yoh 18:29–19:16Pilato nga zi tinia kini, Mi Opi ’ba Yahudini ya? Eri omvi e’yo, ’yo tinia kini, Mi ’yo ra. 3Kuhani amboru yi nga asu su ruani: kakau. 4Pilato nga zi tinia dika cini, Mi omvini e’yo ku ya? Mi ndre, yi asu su mi ruaa ’dopi ’doni. 5#Mar 14:61; Isa 53:7Te Yesu omvini e’yo dika ku; Pilato nga osu ani osu osu.

Li Yesu ma e’yo drazu ra

6Omu nya ngare vusi eri adri ’ba aruru alu tru yi dri, ’ba yini zileri’i, 7Ombe ’ba azini arujoa, runi Baraba’i, eri ’ba omba ’uapi opi be, ’ba ’ba ’dipi omba nde alia ’diyi ma azi. 8’Ba ongulumuru tu di vunia, e’do zi tinia eri ma ’ye erini adrile i’yelerile. 9Pilato nga e’yo omvi yi tia kini, Emi le ma tru emi dri Opi ’ba Yahudini ya? 10#Yoh 11:48; 12:19; Mat 21:38Erini vale kini kuhani amboru yi fe eri i dri ma’yalasirisi. 11Kuhani amboru nga ’ba ongulumuru ma bile imba, ’kini bani eri ma tru yi dri Barabani’i. 12Pilato nga e’yo omvi yi tia dika kini, Ma nga ’ye ngoni ’ba emini omvele Opi ’ba Yahueliniri be ya? 13Yi nga otre uru dika kini, Ma di eri pati ruaa! 14Pilato nga ’yo yi tia kini, A’disi ya? Onzi erini ’yeleri ngoni ya? Te yi nga otre uru aga ra, kini ma di eri pati ruaa. 15Pilato, erini leria ayiko fezu ’ba ongulumuru dri, nga Barabani tru yi dri ani; te eri ka Yesuni co ’bo, eri fe eri yi dri dizu pati ruaa.

16Asikari nga eri ji oli riidri ma alia, adani opijo omvele Praitoriori’i; yi nga asikari ongulumuru omve dria tualu. 17Yi nga bongo ondralakondralaru su ruania, yi oci ekila okuru, nga su drinia. 18Yi ’ba eri zi, kini, Mi zi mi ci ci, Opi ’ba Yahudini lou! 19Yi nga eri dri ogba ozusi, yi nga cucu wu ruania, nga kumuti osi tinia, nga eri inzi ra. 20#Mat 27:31-56; Luk 23:26-49; Yoh 19:16-30Yi ka eri dri inza ’bo, yi nga bongo ondralakondralaru nderi tiri eri ruaasi, nga eri vile bongori su’i. Yi nga di eri ofu amve, ji dizu pati ruaa.

Yesuni dizu pari ruaa

21 # Rum 16:13 Yi nga ’ba agapi geria engapi aseari omi okposi pati alaza eriniri ’duzu; eri Simoni ’ba Kureneni, Alegezanda pi ma ata Rufusi beri’i. 22Yi nga eri eji pari omvele Gologotaria (efini pari dri falaniri’i). 23#Zab 69:21Yi nga eri dri patiefi ma su osazaru aro beri fe, te eri mvuni ku. 24#Zab 22:18Yi nga eri di ra, nga bongo erini awa awa, yini yi ’beria odrisisi, ’ba alu aluni isu ngoni yari nizu. 25Eri etu na, yi nga eri di pati ruaa. 26E’yo eri tozuri ma e’yo siza si i uru ’dini, OPI YAHUDINIRI’I. 27Yi eli oguo iri pati ruaa eri be indi, alu dri ndiria, alu dri ejiria. 28#Isa 53:12E’yo siza ’ye i i paria ’yeke, kini, La eri ’ba e’yo ezapi ’diyi ma aziru. 29#Zab 22:7; Zab 109:25; Mar 14:58; Yoh 2:19’Ba agapi geria ’diyi ri eri o’da o’da, yini yi dri oyaria, kini, Ha! Mi ’ba hekalu anzupi eri sipi o’du nari mi’i, 30mi pa mi ngulupi, mi si pati ruaarisi va! 31’Dinile kuhani amboru, yini eri oguria yi eselia karania be, nga ’yo kini, Eri opa ndra ’ba azini ’diyi ra, te econi erini i ngulupi pazaru ku. 32#Mat 16:1, 4Kristo Opi ’ba Israeliniri ma esi pati ruaarisi va cucuru’do, ama ma ndre, ama ma nga eri a’i ani beni! ’Ba yini dile pati ruaa eri be ’diyi ede eri ’dini indi.

33 # Amo 8:9 Etu ka eca azia, angu nga bi inicici oro dri dria kpere etu oromi. 34#Zab 22:1Etu oromisi Yesu nga oyu: o’duko urusi, kini, Eloi, Eloi, lama sabakitani? efini kini, Mungu mani, Mungu mani, mi ku ma ’bo a’disi ya? 35’Ba azini pa osopi ageinia ’diyi ka eri ra, yi ’yo ra, Mi lu, eri Eliyani omve. 36#Zab 69:21’Ba alu nga nzu ezekeze su patiefi ma su drazari ma alia, erini i tozu alenia tre, nga eri ’ba ozu sia, nga fe eri mvu ani, kini, Emi ku nga, ama ndre kani Eliyani emu eri ’du va yani. 37Yesu nga oyu o’duko urusi, nga ku i avani fuzu ra. 38#Efu 26:31-33Bongo hekalu ale alizuri nga i asi iri, engazu uru kpere ele, 39Mbasa asikari turu alu ma drilia pa sopi i otipi eri beri ka ndre erini kuria i avani furia ’dini, eri nga ’yo kini, Adada de ndra agu ’diri Mungu ma Mvi’i!

40 # Luk 8:2-3 De mira oku azini yi indi, ri eri ndre re; yi ma eselia Mariamu Magadaleni pi, Mariamu Yakobo wereri pi ma andriru Yose beri pie, Salome be; 41oku ’diyi eri vuti bipi azi ngapi eri dri erini ovuria Galilia ’dale ’diyi; oku azini be kakau tupi eri be Yerusalemua ’diyi.

Yesu ma avu sazu

42 # Mat 27:57-61; Luk 23:50-55; Yoh 19:38-42 Ka eca ondresi, erini ovule o’du Edezanirisi, ’di o’du sabato driliari’i, 43Yusufu ’ba Arimateaari eri ’ba e’yo amapi ’bani inzile turi, eri indi suru Munguni ma mile gapiri, eri nga emu ra, nga fi uri ’kokoru Pilato vu, nga Yesu ma avu a’i. 44Pilato anga osu osu kani eri ’de ’bo yani; erini mbasa asikari turu alu ma driliari omveria i vu,i nga zi tinia kani eri ’de te drio ’bo yani. 45Eri ka e’yo ni mbasa tia ’bo, eri nga a’i avuni fe Yusufu dri. 46Eri nga di mu bongo emveru je, nga avuni e’du va, nga eri ombe ’bongo emveru ndesi, nga eri ’ba gule yini gale oni aliari ma alia; eri i nga era amboro gu gule tilia ci, 47Mariamu Magadaleni pi Mariamu Yose ma andriruri be yi nga pari yini eri ’bazuri ndre indi.

Currently Selected:

Marako 15: LB66

Highlight

Copy