Matayo 28

Yesuni engazu ’ba drara ma eselia

1 # Mar 16:1-10; Luk 24:1-10; Yoh 20:1-18 O’du sabatonini deria, anguni ’baria atiria o’du alusi, Maria Magadaleni pi emu nyadri ndrezu Maria andiniri be. 2Mi ndre, oyakia amboru oya angu; malaika Opini esi va engazu ’bua, nga eca era gule tiari guzu amve, nga ri drinia. 3#Mat 17:2; ’Yeta 1:10Wura erini e’da i ovile, afa suza erini emveru sile 4Eri ma urisi ’ba angu agei tepi ’diyi ma rua ya, yi nga ofu ’ba drazale. 5Te malaika nga e’yo omvi ’yo oku tia kini, Emi ru ku; te ma ni ra emi Yesu ndra dile pati ruaari nda. 6#Mat 12:40; 16:21; 17:23; 20:19; ’Yeta 2:36Te eri ’doa yo; eri enga a ’bo, ekile erini ndra ’yolerile. Emi emu ’doa, pari te erini lazuri ndre. 7#Mat 26:32Emi mu mbele e’yo olu ’ba erini imbale ’diyi ma tia, kini, Eri enga a ’ba draza eselia ’bo, te mi ndre, eri mu emi drilia oko Galilia; emi nga eri ndre ’dale. Mi ndre, ma olu emi tia ’bo. 8Yi enga gule tiarisi mbele, urisi azini ayiko amborusi, yi nga nzu e’yo olu ’ba erini imbale ’diyi ma tia, 9Mi ndre, Yesu fu dri yi be, nga ’yo ra, Ma zi emi ci! Yi emu eri ma pa bi, eri inzizu. 10#Ebra 2:11; E’do 45:4; 50:19Yesu nga di ’yo yi tia, Emi ru ku; emi mu, lemi olu ma adripi tia kini yi ma mu Galilia, yi nga ma ndre ’dale.

Afa fele asikari ma ti razu

11Yini de muria, mi ndre, ’ba angu ma agei tepi ’diyi ma azini mu aku amborua, nga e’yo dria ovupi ’yezaru ’diyi olu kuhani amboru piyi ma tia. 12Yi ka yi ti oku tualu ’ba wara be, ka e’yo ede ’bo, yi fe silingi kakau asikari dri, 13#Mat 27:64kini, Emi ’yo kini ’Ba erini imbale ’diyi emu inisi avuni oguzu, de amani o’du koria. 14E’yo ’di ka nga ca gavena ma bi lia ra, ama nga eri imba eri ojazu, ama nga e’yo emi driari tru ra. 15Asikari nde nga silingi a’i, nga ’ye ’bani yi imbalerile; e’yo ’diri ku ’ba Yahudini ma eselia wakaka ecazu kpere andru.

Yesuni e’yo azizu ’ba mudri drini alu ’diyi ma tiari

16 # Mat 26:32; Mar 14:28; Mat 28:7 Te ’ba erini imbale mudri drini alu ’diyi nga mu Galilia, oni dria, pari Yesuni azile yi driria. 17Yi ka eri ndre ra, yi inzi eri; te ’ba azini a’ini ku. 18#Mat 11:27; Efe 1:20-22; Dan 7:14Yesu nga emu ’yo yi tia kini, Okpo dria ’bu pi ma alia nyaku beri ovu fezaru ma dri. 19#’Yeta 1:8; Mar 16:15, 16Emi mu ani, emi oja suru dria ’ba ma vuti bipiriru, emi fe baputizi yi dri ru Atanisi, Mvinisi, orindi Alatararunisi, 20#Mat 18:20; Yoh 14:23yi imbazu e’yo dria ndra mani azile emi tia ’diyi ta mbazu; te mi ndre, ma ovu lemi be o’du vusi dria, kpere angu wudrikuruni i deria.

Currently Selected:

Matayo 28: LB66

Highlight

Copy