Matayo 24

Dri jara hekaluni pi eceta ewu tini asizuri ecezu ’diyi be

1 # Mar 13:1-37; Luk 21:5-36 Yesu nga fu hekalua, mu geria; ’ba erini imbale ’diyi nga eca eri vu jo siza hekaluni ’diyi ecezu eri dri. 2#Luk 19:44Eri nga e’yo omvi, ’yo yi ria, Emi ndreni afa ’diyi dria ku ya? Ma ’yo emi tia ndi, oni aluni ngani ace ’doa adrozaru agyi dria asukokoru ku.

3Erini riria oni Mizeituni ma dria, ’ba erini imbale ’diyi nga eca eri vu de eri a’dule, kini, Mi olu ama tia, afa ’diyi nga ovu a’dungare ya? Azini emuta mini ma eceta, asiza angu wudrikuruniri be, nga ovu ngoni ya? 4Yesu nga e’yo omvi, ’yo yi ria, Emi te emi agei, ’ba aluni kazu emi icizu ku. 5#Mat 24:24; Yoh 5:43; ’Yeta 5:36, 37; 1 Yoh 2:18Te ’ba kakau yi nga emu ma rusi, ’yozu, Ma Kristo’i; yi nga ’ba kakau ici ra. 6#Dan 2:28Emi ka e’yo ombani pi eri e’yo kuza ombani be, emi ovu mile be emi asi ma oti ku, te e’yo ’diyi ngani ece emuzu ku; te asizani nga yo. 7#Isa 19:2; 2 Sur 15:6Te suruni nga enga omba ’dizu suru azini be, opi nyazani nga omba ’di opi nyaza azini be, liki pi nga ovu oyakia be angu ndu ma alia: 8te e’yo ’diyi dria nga candi ma eti e’dozuri.

9 # Mat 10:17, 22; Yoh 16:2 Yi nga di emi fe,nzata vu, ’ba nga emi fu ra; suru ria yi nga emi ngu onzi ma rusi. 10#Dan 11:41Ewu ’dasi ’ba kakau nga aba, yi nga yi fe ceni, yi nga yi nga yi ngu onzi eselia ceni. 11#Mat 7:15; 1 Yoh 4:1Te nabi inzoru kakau yi nga enga ra, nga kakau icie ra. 12#2 Tes 2:10; 2 Tim 3:1-5E’yo onzini gale trerisi, ba kakau ma letani nga ambi ra. 13#Mat 10:22; Eceza 13:10Te ’ba ovupiasi teza be cazu asizaniriari nga i pa ra. 14#Mat 28:19; 10:18Te e’yo bari suruni ’diri nga ovu oluzaru angu wudri kuru drisi dria, e’yo eti nzezu suru i dria dri indi; o’du asizaniri nga di eca ndo.

15 # Dan 9:27; 11:31; 12:11 Emi ka afa onzikanyaru ’ba dri jazu, nabi Danielini e’yoni ’yoleri ndre, erini pa soria pari alatararia (’ba waraga lapiri ma va e’yo ’diri), 16o’du ’dasi ba ovupi Yudia ’diyi ma apa di oni dria; 17#Luk 17:31’ba ovupi dria ururi ma si va afa jo inia ’diyi o’duzu ku; 18’ba ovupi amvuari ma emvi vile afa suza ini ’duzu ku. 19Te candi oku ovupi okporovuru ’diyi pi dri, ba fepi ’diyi be, o’du ’dayisi! 20#’Yeta 1:12Emi zi Mungu kini o’du emini apazuri ma ovu ewu egbenisi ku, kani sabatosi ku indi. 21#Dan 12:1; Eceza 7:14; Yoe 2:2Te ewu ’darisi inzata nga ovu amboru tu, drio engazu nyaku eti ’bazurisi ecazu kpere andru, ovuni ndra ’dini ku, vutinia ngani ovu vinil ’dinile dika ku indi. 22O’du ’dayi ka ovu lizaru ku, ’ba aluni econi te i pazaru ku; te ’ba opele ’diyi ma e’yosi, o’du ’dayi nga ovu lizaru ra. 23O’du ’dasi ’ba azini ka ’yo emi tia, Mi ndre, Kristoni ’doa, kani, ’Dia; emi ma a’i ku. 24#Mat 5:11; Azi 13:1-3; 2 Tes 2:8, 9A’disiku Kristo inzoru piyi nabi inzoru ’diyi be nga enga ra, yi nga eceta amboru ’ye tali be, ’dini, ka eco ra, yi ma ici ’ba opele ’diyi indi beni. 25Mi ndre, ma olu emi tia oka. 26#Luk 17:23-24’Dini yi ka nga ’yo emi tia, Mi ndre, eri roko dria, emi fu ku; Mi ndre, eri o jo aliza ma alia, emi ma a’i ku. 27Te ekile ovini gale etuni efurialeru, erini i e’dale kpere kala etuni ’derialeruriarile, Mvi bani ma emutani. 28#Yob 39:30; Hab 1:8; Luk 17:37Roko nga yi oku pari avuni ovuzuria ’daa.

E’yo Mvi ’banini ngazu emuzu dikari

29 # Isa 13:10; 34:4; Eze 32:7; Yoe 2:10; 3:4; 4:15; Eceza 6:12-13; 2 Pet 3:10 Te inzata o’du ’dayini ka i de ra, coti etuni nga ovu bizaru, mba ngani angu mve ku, ’bi’bio nga o’de ’buarisi ra, okpo ’bua ’diyi nga oya; 30#Dan 7:13; Zek 12:10-14; Eceza 1:7; 19:11; Mat 26:64o’du ’dasi Mvi ’bani ma ecetani nga i e’da ’bua, suru nyakua ’diyi dria nga di ovu lulu gaza be, yi nga Mvi ’bani ndre erini emuria iriti ’buari ma alia, Okposi azini diza amborube; 31#1 Kor 15:52; 1 Tes 4:16; Eceza 8:1, 2; Isa 27:13; Zek 2:6; Azi 30:4eri nga malaika erini ti ope guka ma awu amboru be, yi nga ’ba opele erini ’diyi oku oli kala sua ’diyi vusi, engazu ’bu ma kalati aluria cazu aziniri vu.

32Emi ma oni di e’yo o’beza elio patini: arakala ma drile ka eca aroru, pati bi odiru ka eri ’bo, emi ni kini eli eca ogogo. 33’Dinile indi emi’i, emi ka e’yo ’diyi ndre dria ra, emi ni kini eri ovu ogogo, va jotilia. 34Ma ’yo emi tia ndi, a’bianzi ewu ’dorini ngani yi de aluni ku de nga afa ’diyi dria ’yeni yi ku. 35#Mat 5:18’Bupi nyaku be nga yi de ra, te e’yo mani ngani i de aluni ku.

Ewuni pi etuni be, ’ba nini ku

36 # 1 Tes 5:1, 2 Te o’du ’dari pi ma e’yo etu ’dari be ’ba aluni nini ku, kani malaika ’bua ’diyi, kani Mvi’i ti, te Ata a’dule nini. 37#E’do 6:5-8; Luk 17:26, 27Te ekile o’du, Noanisirile, Mvi ’bani ma emutani nga ovu ’dinile. 38#2 Pet 3:5, 6; E’do 7:7Te ekile ’bani ndra ovule o’du yi tizani nga ecazu kuriarisile, yi nya, yi mvu, yi bi oku, yi fe oku, ecazu o’du Noani fizu maburuaria, 39#E’do 7:6-24yi nini afa azini ku, de nga yi tiza emuni yi o’duzu dria ku; Mvi ’bani ma emutani nga ovu ’dinile. 40#Luk 17:35, 36O’du ’dasi ’ba iri nga ovu amvua; aluri nga ovu ’duzaru, aziniri nga aceni. 41Oku iri nga ovu anya ’iria oni dria; aluri nga ovu ’duzaru, aziniri nga aceni. 42#Mat 25:13Emi ovu mile be, emini o’du Opi eminini emuzuri nile kurisi. 43#Luk 12:39-40Te emi ma ni ’di, jo e’i ka ndra etu oguouni emuzu kani ngoriari ni ra, eri ndra te mile be, ngani ndra a’i yini eri ma jo eti luzu ku. 44#Eceza 16:15Awa’dini emi ma ovu di edezaru ngonde; te Mvi ’bani nga emu etu emini egale kuria.

Ati’bo asi ada beri pi asi ada kokoruri be

45Ka’dini ati obi asi ada be, onduaru, opini ani ’bale ati’ba jo inia ’diyi ma drilia, nyaka fezu yi dri etu vusiri a’di’i ya? 46Ati’bo opini emule eri isule ’ye ’diniri eri drilebaru. 47#Mat 25:21, 23Ma ’yo emi tia ndi, eri nga eri ’ba afa erini ovuzu yi be ’diyi ma drilia dria. 48#Ekl 8:11Te ati’bo onzi ’dari ka ’yo i asia, Opi mani eri i dri ici ’dale, 49ka e’do ati’ba eri ma agyiru ’diyi co, ka afa nya, ka afa mvu ’ba ewa mvupi ’diyi be, 50opi ati’bo ’darini nga eca o’du erini egale kuria, azini etu erini nile’kuria, 51#Mat 8:12eri nga eri ale ali iri, eri nga eri ma e’yo ’ba ’ba lokiri be ’diyi be tualu; ’dale awu pi nga ovu si ciza beni.

Currently Selected:

Matayo 24: LB66

Highlight

Copy