Matayo 20

’Ba ari ngapi amvua ’diyi

1 # Mat 21:33 Te suru ’buari si i ekile agu jo e’iru fupi o’bitisi drio ’ba azi ngapi ’diyi ayuzu, ejizu amvu ini zabibuni ma aliarile. 2Ka ede e’yo ’ba ayua ’yepi ’diyi be kini yi nga dinari alu a’i o’du alu alusi ’bo, eri pe yi ti amvu iru zabibuniria. 3Eri fu etu na, eri nga ’ba azini ndre; pa soria cuua azi kokoru; 4eri ’yo ’ba nde ’diyi tia, Emi mu amvu zabibunia indi; ma nga afa fe emi dri kililiru. Yi mu ra. 5Eri fu dika etu azia azini etu oromi, eri nga ’ye ’dinile tro. 6Eri fu sawa mudri drini alu, eri nga ’ba azini isu pa soria; nga ’yo yi tia, Emi so pa ’doa azi kokoru o’du alu pi a’disi ya? 7Yi nga ’yo eri tia, ’Ba aluni ama ayule kurisi. Eri ’yo yi tia, Emi’i indi, emi mu amvu zabibunia. 8#Lev 19:13; Azi 24:15Etu ka ’de ra, ’ba amvu zabibuni ma e’i nga ’yo ’ba erini azi ma driliari ma tia, Mi omve ’ba ayua ’yepi ’diyi, mi ofe oya yini, mi e’do ’ba vile ’diyisi cazu ’ba oko ’diyi vu. 9’Ba te fipi sawa mudri drini alusi ’diyi emu ra, yi a’i dinari alu. 10’Ba oko ’diyi ka eca ra, yi osu yi nga afa a’i aga ra; te yi’i indi, yi a’i dinari alu. 11Yini eri a’iria yi one jo e’i dri, 12yi ’yo ra, ’Ba vile ’diyi nga azi etu alu a’dule, te mi ’ba yi ama be tro, ama’i ’ba andepi kai azi okporu o’du aluni pisi etu driza be ’diyi. 13Te eri nga e’yo omvi, ’yo ’ba alu yi ma eseliari ma tia, Ma agyi, ma ’yeni mi onzi ku; mi edeni e’yo ma be dinari alu a’izu ku ya? 14Mi ’du miniri, mi mvi; ma le ’ba vile ’diri ofe ekile mani mi ofelerile. 15#Rum 9:16, 21; Mat 6:23Econi mani ’yezaru afa maniri be mani lelerile ku ya? Kani mi mile onzi mani ovule onyirurisi ya? 16#Mat 19:30; Mar 10:31; Luk 13:30’Dini ’ba vile nga ovo’ba oko diyiru;’ba oko ’diyi ’ba vile ’diyiru.

Yesuni drata ini ma e’yo ecezu pale nari

17 # Mar 10:32-34; Luk 18:31-33 Yesuni turia Yerusalemua, eri nga ’ba erini imbale mudri drini iri ’diyi ’du kalaa, nga ’yo yi tia geria oyokolosi, 18#Mat 16:21; 17:22, 23Emi ndre, ama tu Yerusalemua; yi nga Mvi ’bani fe kuhani amboru piyi dri ’ba waraga sipi ’diyi be, ’ba ’diyi nga e’yo li drinia eri fuzu, 19yi nga eri fe ’ba jururu ’diyi vu eri ecandizu, eri cozu, eri dizu pati ruaa, te o’du nasi eri nga enga ra.

E’yo Yakobo pini zile Yohana be Yesu tiari

20 # Mar 10:35-45 # Mat 10:2 Vutinia anzi Zebedayoni ma andri nga eca eri vu anzi erini be, nga kumuti osi tinia, e’yo azini a’izu eri dri. 21#Mat 19:28Eri nga ’yo eri tia, Mi le a’duni ya? Eri nga ’yo eri tia, Mi azii anzi mani iri ’diyi ma ri, alu mi dri adaria, alu mi dri ejiria, suru mini, ma alia. 22#Mat 26:39; Yoh 18:11; Luk 12:50Te Yesu nga e’yo omvi, nga ’yo ra, Emi nini e’yo emini a’ileri ku. Eco emini mvuzaru ejea mani ngazu mvuzurisi ra ya? Yi ’yo eri tia, Ama eco ra. 23Eri nga ’yo, yi tia, Ejea mani mvuzurisi emi nga mvu ra ada; te rizu ma dri adaria azini ma dri ejiriari, fezaniri eri e’yo mani yo, te eri ’ba ma Atani eri edele ngonde yi dri ’diyini. 24#Luk 22:24-26’Ba mudri ka e’yo ’diri eri ra, yi ovu aokosi adripi iri ’diyi vu. 25#Luk 22:25-26Te Yesu nga yi omve i vu, nga ’yo ra, Emi ni ra ’ba ’ba juru dri cepi ’diyi adri yi ma drilia opiru, ’ba amboru yini adri yi ayu okposi. 26#Mat 23:11; Mar 9:35; Luk 22:26Te eri ngani ovu ’dinile emi eselia ku; te ’ba ka le ovu ’ba amboru emi eselia, eri ma ovu ’ba emi ma aza kopiriru, 27te ’ba ka le ovu ’ba okoriru emi eselia, eri ma ovu ati’bo emini; 28#Luk 22:27; Fil 2:7; 1 Tim 2:6’dinile Mvi bani eri aza kozu azisi ’dini ku, te ’ba aza kozu, azini idri ini fezu ’ba kakau onzezu.

’Ba nile koko iri ’diyini angu ndrezu

29 # Mar 10:46-52; Luk 18:35-43 Yini furia Yerikoarisi, ’ba ongulumuru kakau bi eri vuti. 30#Mat 15:22Mi ndre, ’ba mile draza be iri yini riria geri kalaa, yi ka eri kini Yesuni agani, yi otre uru kini, Opi, mi ovu yikisi ama vu, mi Daudi mvi la! 31’Ba ongulumuru ega yi ma dria, kini yi ma ovu ciri; te ’ba ’diyi otre uru aga ra, ’yozu kini, Opi, mi ovu yikisi ama vu mi Daudi mvi la! 32Yesu nga pa so ci, nga yi omve, nga ’yo ra, Emi le ma ’ye emi dri a’duni ya? 33Yi nga ’yo eri tia, api, mile amani ma ovu zizaru fo! 34Yesuni ovuria asi ndriza be, nga yi ma mile elo; coti yi ndre angu ra, yi nga eri vuti bi.

Currently Selected:

Matayo 20: LB66

Highlight

Copy