Luka 7

Yesuni ati’bo ’ba asikari turu alu ma driliarini atizu

1 # Mat 8:5-13 Eri ka de e’yo erini oluzu ’ba ma bilia dria ’bo, vilerisi eri fi Kaperinaumua. 2#Yoh 4:47Isu asikari amboru asikari turu alu ma driliari ma ati’bori azoru, eri ’ye dra dra, te eri le eri tu. 3Eri ka e’yo Yesuni eri ra, eri pe ’ba ’wara Yahudini ma ti eri vu, eri zizu eri ma emu ati’bo erini pazu. 4Yi ka emu Yesu vu ’bo, yi nga matu ’ba eri vu asi driasi, kini, Eri ’ba onyi beni, si te mini e’yo ’diri ’yezu eri dri ra, 5a’disiku eri le suru amani ra, eri ma ngulupi si jo ’bani yi okuzuri ama dri indi. 6Yesu mu yi be. Eri ka ca ogogo jo nde vu ’bo, ambo asikari turu alu ma driliari pe agyi erini ti eri vu, ’yozu eri tia kini, Opi, mi ecandi mi ku, ma funi dri mini fizu jo mania ku; 7e’yo ’disi ma egani vini ma fu dri emuzu mi vu ra ’dini ku. Te mi ’yo lu e’yo’i, ati’bo mani ma ruani nga ati ani. 8’Dini ma’i indi ma inzita fe ambo ma driliari dri, asikari indi yi inzita fe ma dri: ma adri ’yo ’ba aluri tia, Mi mu, eri mu ra ’ba aziniri ma tia, Mi emu, eri emu ra; ati’bo mani ma tia, Mi ’ye ’diri, eri ’ye ra. 9Yesu ka e’yo ’diyi eri ra, eri nga osu erisi, nga i oja ’ba ongulumuru i vuti bipi ’diyi vu, nga ’yo yi tia, Ma ’yo emi tia, ma isuni nga a’ita amboru ’donile ku, e, ka tro Israeli ma eselia ti. 10’Ba ti pele ’diyi ka mvi joa, yi isu ati’bo ma rua ati de ’bo.

Yesuni mva awuzini engazu Nainia

11Eri nga eca ’dini, o’du ’diri ma vutia were, eri nga mu aku omvele Naini’iria; ’ba erini imbale’diyi mu eri be tualu ’ba ongulumuru be kakau. 12#Luk 8:42; 1 Opi 17:17Eri ka eca aku nde ma kali tia ogogo, mi ndre, yi mva andrini tile ilipiliruri ma avu aro ji sazu, te andrini awuzini; ’ba kakau aku ndea ’diyi mu eri be indi. 13Opi ka eri ndre ra, yiki nga eri fu erisi, eri ’yo tinia, Mi wu ku. 14Eri nga si ogogo, nga aro avu ’duzuri ma rua do; ’ba eri jipi ’diyi yi oso pa. Eri ’yo, Karilau, ma ’yo; mi tia, mi enga uru. 15#1 Opi 17:23; 2 Opi 4:36Avu enga di, ri urulesi, eri ’ba e’yo ’yo indi. Eri fe eri andri dri. 16#Luk 1:68; 19:44Uri bi ’ba dria, yi inzu Mungu kini, Nabi amboru enga ama eselia ’bo azini kini, Mungu andri ’ba erini ’bo 17E’yo erini ’diri ku angu Yudiani ma alia dria, azini angu ageiniaria dria, Yohana baputizi jepirini ojiou ti pezu 18#Mat 11:2-19’Ba Yohanani imbale ’diyi olu e’yo ’diyi dria eri tia. 19#Zab 40:7; 118:26; Mal 3:1; Dan 9:26Yohana omve ’ba erini imbale ’diyi iri i vu, pe yi ti Opi vu, kini, Mi ’ba emupiri’i ya, kani ama ’ba azini te? 20’Ba nde ka eca eri vu, yi ’yo ra, Yohana ’ba baputizi fepiri pe ama ti mi vu, ’yozu, Mi ’ba emupiri’i ya, kani ama ’ba azini te? 21Etu ’dasi eri ati azo ’ba ruaa kakau, dra ndu ndu pie, orindi onzi pie, eri fe ’ba mileefi odraza be ’diyi kakauni angu luzu dika, 22#Isa 35:5-6; 61:1Eri nga e’yo omvi, ’yo yi tia, Emi mu afa emini ndrele azini erile ’diyi ma e’yo olu Yohana tia: ’ba mileefi odraza ’diyi angu lu dika, ’ba acozaru ’diyi ad aci, ’ba ofu be ’diyi ma rua eca alaru, ’ba bile dirinyaru yi e’yo eri, ’ba odrapi ’diyi enga idriru, yi e’yo bari olu ’ba alioru ma tia. 23’Ba abapi ma e’yosi kuri eri drilebaru. 24Ojiou Yohanani ka di mu ’bo, eri ’ba e’yo Yohanani ’yo ’ba ongulumuru ma tia ’dini kini: Emi fu mu angu roko dria a’di afa lu ya? Ozu i oyapi olisiri ya? 25Te emi fu mu la’di afa ne ya? Emi mu agupi bongo menemene supiri ndre ya? Mi ndre, ’ba bongo ndriza supi afa aluza nyapi ’diyi adri ovu opi ma akua. 26#Luk 1:76Te emi fu mu a’di afa ne ya? Emi fu nabi ndre ya? Awa’dini, ma ’yo emi tia, emi fu agu ’ba nabiru ’diyi agapiri ndre. 27#Mal 3:1’Ba ’diri eri ’ba yini e’yoni sile ’bori’i, kini,

Mi ndre, ma pe ojiou mani ma ti mi milia,

eri nga geri mini ede mi drilia.

28 # Luk 1:15 Ma ’yo emi tia, ’ba dria okuni josile ’diyi ma eselia, ’ba Yohanani agapini yo; te ’ba werearu tu suru Munguniari aga eri ambosi ra. 29#Mat 21:32; Luk 3:7, 12’Ba ongulumuru dria ka eri ’bo, ’ba musoro okupi ’diyi be,yi a’i kini Mungu eri kililiru ra, yini baputizi Yohanani feleri bilerisi. 30#’Yeta 13:46Te ’ba Farisaini piyi ’ba azita imbapi ’diyi be, yi ga yi ma ngulupisi e’yo amaza Munguni a’ikokoru si, yini baputizi Yohanani bile kurisi.

31Ma nga ’ba a’bianziru ’diyi o’bi eceta ngonilesi ya? Yi ovu a’di afale ya? 32Yi ovu kile anzi ripi pari afa ozizuria yi agyi omvepi ’diyile, yi ’yo kini,

Ama vu ejeleko emi dri, te emi tuni ongoni ku; ama ga lulu, te emi owuni ku.

33 # Luk 15:2 Te Yohana baputizi fepiri eca ra, nyani enya ku, mvuni patiefi ma su ku indi; te emi ’yo, Eri orindi onzi be. 34Mvi ’bani eca ra, nya ra, mvu ra; te emi kini vini, Mi ndre, agu anyamgboloru patiefi ma su mvupi turi’i, eri agyi ’ba musoro okupi ’diyi pini ’ba e’yo onzi ’yepi ’diyi be! 35Te ondua ovu ecezaru kililiru anzi ini driasi.

Yesuni ovuzu Simoni Farisairuri ma akua

36 # Luk 11:37 ’Ba Farisaini alu zi eri tia eri ma nya i be. Eri fi di ’ba Farisaini ma joa, nga ri va nyaka tia. 37#Mat 26:7-13; Mar 14:3; Yoh 12:3-8Te mi ndre, oku onziri indi aku nde ma alia; eri ka ni ra kini eri ri nyaka tia ’ba Farisaini ma joa, eri eji odu aji be arikariru lu’bu emveru ma alia, 38#Mat 26:7-13; Yoh 12:3-8erini pa soria eri ngukua panialeru awu be, eri ’ba mindre osu eri ma pa dria, nga ini dribi i ma driarisi, nga pani ndru, efizu odu aji be arikariru nderisi. 39Te ’ba Farisaini eri omvepiri ka ndre ra, eri ’yo i asia kini, ’Ba ’diri ka te nabini, eri te ni ra kini oku i ma rua elopiri eri a’di’i ya, azini eri oku ngonini ya, te eri oku onzini. 40Yesu nga e’yo omvi ’yo eri tia, Simoni, ma ovu e’yo azini be ’yozu mi tia. Eri kini, ’Ba ’ba Imbapiri, te di mi ’yo. 41’Ba iri nya ’ba azini ma afa mariru; aluri nya silingi turu towi, aziniri nya silingi kali towi. 42Afani ovule yi dri mari omvizu yorisi, eri nga mari nde ti adi yi dri iri tro. ’Ba iri ’diyi ma eselia a’dini nga ani eri le tunini ya? 43Simoni nga e’yo omvi, nga ’yo ra, Ma ega ’ba erini mari ti adizu eri dri turi’i. Eri ’yo eri tia, Mi li e’yo ’yeke. 44#E’do 18:4Erini i ojaria oku vu, eri ’yo Simoni tia, Mi ndre oku ’diri ra ya? Ma fi jo minia, te mi feni yi ma dri ma pa ojizu ku, te eri osu mindre ma pa dria, ini yi i dribisi. 45#Rum 16:16Mi zini ma ndrutasi ku, te eri’i, engazu mani efiria ’daa, kuni ma pa ndruzaru ku. 46Mi efini mizeitu odu ma dria ku, te eri efi ma pa odu aji be arikarirurisi. 47E’yo ’disi ma ’yo mi tia, ezata erini ovupi karakarau ’diyi ovu wuzaru, te eri le ma tu; te ’ba yini e’yo onzi wule drinia wereri, eri le were. 48#Luk 5:20, 21Eri di ’yo oku ma tia, E’yo onzi mini ovu di wuzaru. 49’Ba ripi eri be nyaka tia ’diyi ’ba e’yo ’yo yi asia, Agu nde e’yo onzi wupi ’diri a’di’i ya? 50#Luk 8:48; 17:19; 18:42Eri ’yo oku nde ma tia, A’ita mini pa mi ’bo; mi mvi asi anzuru be.

Currently Selected:

Luka 7: LB66

Highlight

Copy