Luka 16

E’yo o’bele ’ba ala agei tepi lokirisirisiri

1Eri ’yo ’ba erini imbale ’diyi ma tia indi, Agu alu indi eri afa e’ini, eri ovu ’ba afa erini ma agei tepiri be; yi su asu ’ba ’diri ma ruaa eri vu kini eri afa erini eza. 2Eri nga eri omve, nga ’yo tinia, E’yo mani erile mi ruaa ’diri ngoni ya? Mi la afa mini ageini tele ’diyi ma kalafe, te mi econi ovuzaru ’ba afa agei tepiriru dika ku. 3’Ba afa agei tepiri nga ’yo i asia, Ma nga di ’ye ngoni, opi manini ma nzele azi afa agei tezuri ma aliarisi ya? Amvu ’yazasi ma okpo yo; afa a’izari ma dri drinzaru. 4Te ma ni afa mani ngale ’yeleri ra, ’dini ka ma nze azi afa agei tezuriasi ’bo, ’ba ma a’i ma jo yinia beni. 5Eri nga di ’ba opi ini ma mari nyapi ’diyi omve alu alu i vu, eri ’yo ’ba okori ma tia, Mari mini opi mani vuri ngopi ya? 6Eri ’yo ra, Odu lu’bua tre tre turu. Eri nga ’yo tinia, Mi ’du waraga mini, mi ri va mbele mbele, mi si kali towi, 7Eri ’yo vini ’ba aziniri ma tia, Te mi’i, mari miniri ngopi ya? Eri nga ’yo ra, ’Du abaka alia tre tre turu. Eri nga ’yo eri tia, Mi ’du waraga mini, mi si kali aro. 8#Efe 5:8; 1 Tes 5:5Opi nga ’ba afa erini agei tepi kililiru kuri inzi erini ’yele ondua berisi; a’disiku anzi ewu ’dorini ovu ondua be ’ba yini ovuzu yi ma anziaziru ’diyi ma eselia aga anzi dizani ra. 9#Luk 14:14; Mat 6:20; 10:40; 19:21Te ma ’yo emi tia, Emi oja ’ba ovuzu emi agyiru, lonyi nyakuni kililiru kurisi, ’dini lonyi nderi ka i de ra, yi ma a’i emi pari ’bani ovuzu ’dani ’dani ’diyi ma alia.

10 # Luk 19:17 ’Ba ovupi asi adaru be afa wereasiri ovu asi adaru be afa amborusi indi; azini ’ba ovupi kililiru afa wereasi kuri ovuni kililiru afa amborusi ku indi. 11Emi ka ovu asi adarusi lonyi kililiru kurisi ku, a’dini nga asi ’ba lonyi adaruri kuzu emi drini ya? 12Emi ka ovu asi adarusi lonyi ’ba azininisi ku, a’dini nga lonyi emi ma ngulupiniri i fe emi drini ya? 13#Mat 6:24Ati’bo aluni ecopi azi ngazaru opi iri drini yo; te eri nga aluri ngu onzi, nga aziniri le’i, kani eri nga i ebi aluri be, nga aziniri ’ba aparakaru. Econi emini azi ngazaru Mungu pi dri, lonyi nyakuari be iritro ku.

14 # Mat 23:14 ’Ba Farisaini, ’ba silingi lepi to ’diyi, yi eri e’yo ’diyi ra, yi nga eri onzi onzi. 15#Luk 18:9-14; Mat 23:28; Zab 7:9; O’be 6:16, 17Eri nga ’yo yi tia, Emi’i, emi ovu ’ba lepi emi ngulupi e’dapi kililiru ’ba ma milia’i te Mungu ni asi emini ra; a’disiku afa inzile uru ’ba ma eseliari’i eri ovu afa ngule onzikanyaru Mungu ma miliari.

Azita pi suru Munguni be

16 # Mat 11:12-13 Azita pi nabi be yi indi kpere ewu Yohanania; engazu ewu nde ’dasi yi e’yo bari suru Mungunini olu, ’ba dria kinakina yi fi alenia okposi indi. 17#Mat 5:18’Bu pi nyaku be eco yi dezaru ewa kokoru, te e’yo alu gakandiaru azitani dule nyuri econi i dezaru ku.

Imbata Yesuni oku droza ma e’yosiri

18 # Mat 5:32; 19:9; 1 Kor 7:10-11 ’Ba dria alu oku ini dropi andini jepiri, eri ’di ali o’ba; azini ’ba oku agupini droleri jepiri, eri ’di vini ali o’ba indi.,

Ba afa e’i pi Lazaro be

19Isu ’ba afa e’ini alu indi, eri adri bongo okalakokalari pi su i ruaa bongo mile nyiriari be, eri adri toke nyaka alupi turi nya’i etuzu inzizaru tu. 20Yi ’ba ’ba afa a’ipiri alu runi Lazaro’i kali erini ma tilea, bile ga ruania tre tre, 21#Mat 15:27eri le tra nyaka o’depi ’ba afa e’i vile mesa ma etiarisi; azini vini oce ma ada emu bile erini ma mile mbezuni. 22Eri nga eca ’dini, ’ba afa a’ipiri nga dra ra, malaika nga eri ’du ji ’ba Iburahimu ma agatia. ’Ba afa e’iruri nga dra indi, sa eri ra; 23erini ovuria Pari ’ba drazaniria eri enga i mile uru, erini i ecandilerisi, nga Iburahimuni ndre re ’dale Lazaro be eri agatia. 24Eri nga oyu uru nga ’yo, Ata Iburahimu la! mi ovu yiki be ma vu fo, mi pe Lazaro ma ti ma su i dridrile yi alia, ma andrei ma ambi ani; mani ovule rua suza be tu aci veza ’diri ma aliarisi. 25Te Iburahimu nga ’yo, Mva, mi ma dro asisile mini kini ndra mini ovuzu idrirurisi mi a’i ndra afa mini onyiru ’diyi ra, azini ’dinile Lazaro a’i ndra ini afa onzi ’diyi’i; te curu’do, eri ovu asi omiza be, te mi’i, mi ovu rua suza be tu. 26#Mat 10:37; Azi 33:9, 10; Luk 18:29, 30; Yoh 12:25Te e’yo ’diri ma driasi, ama eselia emi be ’bile amboru indi, ’dini ’ba lepi engapi ’doa agapi emi vu ’diyi econi ku, azini ’ba engani ’dale ezozu ama vu ’dole ku indi. 27Te eri ’yo, Ata, ka adri ’dini, ma zi mi tia, kirikiri mi pe eri ti ma ati vile joa fo! 28te ma adripi yi towi, eri ma mu e’yo ma eti nzezu yi dri yi kazu emuzu pari inzata be ’diri ma alia indi ku. 29#2 Tim 3:16Te Iburahimu nga ’yo, Musa pi nabiyi be yi vu ’daa indi; yi ma eri di e’yo yini’i. 30Te eri nga ’yo, Ata Iburahimu, ’dini yo fo! te ’ba azini engapi ’ba draza eseliari ka nga mu yi vuni, yi nga yi asi oja ra. 31#Yoh 11:45-53Te eri ’yo eri tia, Yi ka Musa pi ma e’yo eri nabi be ku, yi ngani a’i yi asi ojazu ku, ka tro ’ba azinini engale ’ba draza eseliarisi ti.

Currently Selected:

Luka 16: LB66

Highlight

Copy