Yohana 9

Yesuni ’ba osile mile kokoruri ma mile zizu

1 # ’Yeta 3:2; 14:8 Erini agaria, eri ndre agu osile mile kokoruri. 2#Luk 13:2; Efu 20:5’Ba erini imbale ’diyi zi eri tia kini, Rabi, a’di ezani ya, ’ba ’diri’i, kani ’ba eri tipi ’diyi ya, erini osile ani mile kokorurisi? 3#Yoh 11:4Yesu nga e’yo omvi, ’Ba ’diri ezani ku, ’ba eri tipi ’diyi ezani vini ku, te ’yeta Munguni ma ece yi ruania beni. 4#Yoh 5:17, 20; 11:9Le ama ma nga azi ’ba ma ti epepirini, de nga etu be ’do indi; inini ’ye emu emu, te ’ba aluni ecopi azi ngazaru inisini yo. 5#Mat 5:14; Yoh 8:12; 12:35De ma indi nyakua, ma diza nyakuni. 6#Mar 8:23Eri ka ’yo ’dini ’bo, eri wu cucu nyakua, eti odri cucusi, nga mileefini tri odrisi, 7eri nga ’yo eri tia, Mi mu, mi oji mi ’bile yini egazu ega Siloamuaria (efini ojazaru Ti Pezaru’i). Eri mu ani, nga i oji ra, erini emviria ri ji angu ndre si. 8’Ba eri vile jo ejelea ’diyi pi nga ’yo ani ’ba eri ndrepi oko erini afa a’iria ’diyi be, kini, ’Ba ’diri eri ’ba ndra ripi afa a’ipiri yo ya? 9’Ba azini kini, ’Di eri’i; ’ba azini kini, Yo, te si i eri be si si. Te eri ’yo ra, Eri ma’i. 10Yi nga di zi eri tia, Mi mileefi zi yi ngoni ngoni ya? 11Eri nga e’yo omvi, Agu omvele Yesu’iri eti odri, tri ma mileefi, ’yo ma tia, Mi mu Siloamua, mi oji mi; ’dini ma mu ani ra, te ma ka ma oji ’bo, ma ndre angu. 12Yi ’yo eri tia, Agu nderi ngoa ya? Eri kini, Ma nini ku.

’Ba Farisainini atiza nde ma e’yo ozizuri

13Yi nga ’ba drio mile kokori cii ’ba Farisaini vu. 14#Yoh 5:9Te isu o’du Yesuni odri etizu azini ’ba mile kokoruri ma mile zizuri eri o’du sabatoni. 15’Ba Farisaini nga e’yo zi eri tia dika kini eri angu mire ngoni ngoni ya. Eri ’yo yi tia; Eri ’ba odri ma mileefi dria, ma oji ra, ma nga angu ndre ani. 16#Yoh 3:2; 7:43; 9:31, 33E’yo ’disi ’ba Farisaini ’diyi ma azi ’yo ani, ’Ba ’diri eri engani Mungu vu ku, a’disiku erini o’du sabatoni inzile kurisi. Te ’ba azini yi ’yo ra, ’Ba azi onzi ’yepiri eco eceta ’diyile ’yezaru ngoni ngoni ya? Agata nga i ovu yi eselia. 17#Yoh 4:19Yi nga ’yo ’ba mile kokoruri ma tia dika, Mi ’yo ngoni eri ma e’yosi, erini mi mileefi zilerisi ya? Kini, Eri nabini.

18Te de nga yi omveni ’ba ’ba angu ndrepiri tipi ’diyi ku, ’ba Yahudini a’ini eri ma e’yo, kini osi ndra eri mile kokoru, nga di angu ndre ndo, ’diniri ku; 19yi zi yi tia kini, ’Di emi mvi, emini ’yole kini osi mile kokori’i ada ya? Ka’dini curu’do eri di angu ndre ngoni ngoni ya? 20’Ba eri tipi ’diyi yi nga e’yo omvi ’yo ra, Ama ni ’ba ’diri eri ama mvi’i, osi ndra eri mile, kokoru indi; 21te ama nini eri angu ndre curu’do ngoni ngoni yari ku ama nini vini ’ba eri ma mileefi zipiri a’di’i yari ku. Emi zi tinia; eri mba ’bo, eri nga i ma ngulupi ma e’yo nze ceni. 22#Yoh 7:13; 12:42; 16:2’Ba eri tipi ’diyi ’yo e’yo ’diyi ’dini yini ’ba Yahudini rulerisi; isu de ’ba Yahudini otu e’yo ’bo kini, ’ba azini ka eri e’da kini eri Kristo’i ’dini, ma dro eri ani pari ’bani yi okuzuriasi ra. 23E’yo ’disi ’ba eri tipi ’diyi nga ’yo ani, Eri mba ’bo; emi zi tinia.

24 # Yos 7:19 Yi omve ’ba ndra mile kokoruri pale iririsi, ’yo eri tia, Mi fe diza Mungu dri; ama ni ra ’ba ’diri eri ’ba onzi ’yepiri. 25Eri nga di e’yo omvi, Eri ka adri ’ba onzi ’yepiri yani ma nini ku; te ma ni mani e’yo alu, kini, ma ndra mile kokoru te curu’do ma angu ndre ra. 26Yi nga ’yo eri tia ani, Eri ’ye mi vu ngoni ya? Eri zi mi mile ngoni ngoni ya? 27Eri nga e’yo omvi yi tia, Ma ’yo te emi tia curu’do, te emi erini ku. Emi e e’yo eri dika a’disi ya? Emi indi, emi le ovu ’ba erini imbale ’diyiru ya? 28Yi nga eri o’da, nga ’yo kini, Mi ’ba erini imbaleri, te ama’i, ama ’ba Musani imbale ’diyi. 29Ama ni Mungu ’yo ndra e’yo Musa tia ra, te ama nini agu ’diri enga ngoa yari ku. 30Agu nde nga e’yo omvi ’yo yi ria, Te e’yo osutaruri ’di’i, kini emi nini pari erini gazuriku ’bo, te eri zi ma mile ra, 31#Isa 1:15; O’be 15:29; ’Yeta 10:35Ama ni ra Mungu erini ’ba onzi ’yepi ’diyi ku, te ’ba Mungu inzipi e’yo erini leleri ’yepiri, Munguni eri eri ra. 32Engazu drio nyakuni i ’bazurisi yi erini nga kini ’ba azini zini ’ba osipi mile kokoruri ma mile ra ’diniri ku. 33#Yoh 9:16’Ba ’diri ka enga Mungu vu ku, eri econi e’yo azini ’yezaru aluani ku. 34#Yoh 9:2; Zab 51:5Yi nga e’yo omvi ’yo eri tia, Mi osi cala e’yo onzi ma alia, mi ama imba mi’i? Yi ’be eri amve.

Mileako asiniri

35Yesu eri kini yi ’be eri amve; erini eri isuria, eri ’yo, Mi a’i Mungu ma M vini ra ya? 36Eri nga e’yo omvi kini, Opi, eri a’di’i ya, ma ma a’i eri beni? 37#Yoh 4:26; 10:25Yesu nga ’yo eri tia, Mi ndre eri ’bo, azini ’ba e’yo ’yopi mi beri bani eri’i. 38Eri ’yo ra, Opi, ma a’i ra; te eri inzi eri ra. 39#Mat 13:11-15Yesu nga ’yo ra, Ma emu nyaku ’diria e’yo liza ma e’yosi, ’dini ’ba angu ndrepi ku ’diyi ma ndre angu, azini ’ba angu ndrepi ra ’diyi ma oja yi mile kokoru. 40#Mat 15:14; 23:26’Ba Farisaini ’diyi ma azi ovupi eri vu ogogo ’diyi, yi eri e’yo ’diyi, yi ’yo eri tia, Ama’i, ama ovu mile kokoru indi ya? 41#O’be 26:12Yesu nga ’yo yi tia, Emi ka te ovu mile kokoru, te’do emi ovuni e’yo onzi be ku; te curu’do emi kini, Ama ndre angu ra; e’yo onzi eminiri di ovu ’di.

Currently Selected:

Yohana 9: LB66

Highlight

Copy