मत्ती 24

मन्दिर रे विनास होणे रे बारे बिच भविष्यवाणी

1जां यीशु मन्दिर का बाहर जाया करदे थिये, तां तिन्हेरे चेल्‍ले तिन्हेरे जो मन्दिर रा निर्माण दसणे तांइ तिन्हा का आए। 2तिन्हा ने तिन्हेरे जो बोल्लेया, तुसा ए सारा किच्‍छ दिख्खेया करदे हिन? मैं तुसा जो सच बोलदा, इत्ते इक्क बट्टे पर बट्टा भी नी बचणा जे ढाया नी जाणा।

दु:ख ते मुसीबतां

3जां से जैतून पहाड़ पर बैठ्ठे रे थिये, तां चेल्‍लेयां ने किल्ले बिच तिन्हेरे का आई करी बोल्लेया, असा जो दस्सो ए गल्लां कधाड़ी होणी? तुसा रे आणे रा ते दुनिया रे खतम होणे री कै निशानी होणी? 4यीशु ने तिन्हेरे जो जवाब दित्तेया, चौकन्ने रेयो! कोई तुसा जो भड़काई ना सके, 5किजोकी मते सारे इदेय होणे जिन्हा ने मेरे नां कने आई करी बोलणा, मैं मसीह यीशु है, ते मते जणेया जो भड़काणा। 6तुसा लड़ाईयां ते लड़ाईया री गल्लां सूणनी, तां डरी मत जादें किजोकी इन्हेरा होणा पक्का है, पर तिस बेल्ले खातमा नी होणा। 7किजोकी जाति पर जाति, ते राज पर राज ने हमला करणा, ते जगाह्-जगह अकाल पैणे, ते भुकम्प होणे। 8ए सारी गल्लां दुख-मुसीबतां री सुरुआत होणी। 9तां तिन्हा लोक्कां ने जे तुसा रे खिलाफ हिन तुसा जो सताणे तांइ पकड़वाणा, ते तिन्हा ने तुसा जो मारी रखणा, ते मेरे पीच्छे चलणे री वजह कने सारी जातियां रे लोक्कां ने तुसा कने नफरत रखणी। 10तां मते जणेया ने विश्वास का पीच्छे हटी जाणा ते इक्क-दूए जो पकड़वाणा, ते इक्क-दूए कने नफरत रखणी। 11मते सारे झूठ्ठे भविष्यद्वक्ता आणे, ते मते जणेया जो भटकाणा। 12अधार्मिक रे बधणे री वजह कने मते जणेया ने इक्क-दूए प्यार नी रखणा, 13पर जे कोई अपणी जिन्दगी रे आखर तक मेरे पर विश्वास रखगा, तिसेरा ही छुटकारा होणा। 14ते स्वर्ग राज रा ए सुब बसेख सारी दुनिया रे सारे लोक्कां बिच सूणाई जाणी, ताकि सारी दुनिया रे लोक्कां जो मनणे रा मौक्का मिल्ले, तां दुनिया रे मुकणे रा समय आई जाणा।

सबका बड्डी मुसीबत री सुरुआत

15इधेरे तांइ जां तुसा तिस उजाड़ने वाली तिस घटिया चीज जो दिख्खो जिसेरी गल्ल दानिय्येल भविष्यद्वक्ता रे जरिए सुणे री थी, पवित्र जगाह् पर खड़ित्ते रे दिख्खो (जे पढे, से समजे)। 16तां जे यहूदियां बिच होणे से पहाड़ां पर नह्सी जाण। 17जे छत पर होणे, से अपणे घरे का समान लैणे तांइ ना उतरे। 18ते जे खेतरां बिच होणे से अपणे कपड़े लैणे तांइ वापस ना मुड़े। 19तिन्हा दिनां बिच जे दुपराणी ते दूद्द पुआणी वाली होणी, तिन्हेरे तांइ हाय, हाय। 20प्रार्थना करेया करो की तुसा जो सरदी रे मौसम बिच या विश्राम दिन पर दौड़णा ना पेयो। 21किजोकी तिस बेल्ले इदेया वरी दुख होणा, जदेया दुनिया री सुरुआत का अब्बे तिकर होया ते ना कदी होणा। 22अगर से दिन घटाए ना गेरे हुदें तां मणू ही नी बचदा, पर चुणे रे लोक्कां री वजह कने से दिन घटाए जाणे। 23तिस बेल्ले जे कोई तुसा जो बोल्ले कि मसीह यीशु इत्ते है! या उत्ते है! तां विश्वास मत करदे। 24किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण। 25दिख्खो मैं पैल्ले का ही तुसा जो सब किच्‍छ दस्सी रख्खे रा है। 26इस तांइ, जे से तुसा जो बोल्ले, दिख्खो से जगंल बिच है, तां बाहर मत निकली जादें या दिख्खो से कोठरियां बिच है, तां विश्वास मत करदे। 27किजोकी जिय्यां बिजली पूरब का लेई करी पश्चिम तकर चमकदी, तिय्यां मणू रे पुत्तर, जे मैं ही है रा आणा भी होणा। 28जित्ते लास हो, सारे लोक्कां जो ए इय्यां पता लग्गी जाणा कि ए कुते होणा जिय्यां कि इल्लणां रे कठीणे पर लास रा पता चलदा।

मणू रे पुत्तर रा दोबारा वापस आणा

29तिन्हा दिनां रे दुखां रे बिल्कुल बाद बिच ही स्वर्ग न्याहरा होई जाणा, ते चाँद री रौसनी चली जाणी, ते तारें आसमान का डिग्गी पैणे ते स्वर्ग री ताकतां हिलाई जाणी। 30तां मणू रे पुत्तर, जे मैं ही है री निशानी आसमान बिच दिसणी, ते तां दुनिया रे सारे कुल रे लोक्कां ने अपणी छाती कुटणी ते मणू रे पुत्तर, जे मैं ही है जो बड़ी ताकत ते महिमा कने बदलां पर आदें दिखणा। 31तिन्हा ने तुरही री बड़ी अवाज कने अपणे स्वर्गदूतां जो अग्गे भेजणा, ते तिन्हा आसमान रे इस कुणे का लेई करी तिस कुणे तिकर, चारों पास्से का तिन्हेरे चुणे रे लोक्कां जो कठेरणा।

अंजीर रे बूट्टे रा उदारण

32अंजीर रे बूट्टे रे उदारण कने ए गल्ल सिख्खो: जां तिसेरी डालां नरम होई जादीं ते पत्ते निकलणा लगदे, तां तुसा समजी जादें की गरमी रा मौसम नेड़े है। 33इसी तरिक्के कने जां तुसा इन्हा गल्लां जो हुदें दिख्खो, तां समजी जायो की से नेड़े है, बल्कि दरवाज्जे पर ही है। 34मैं तुसा जो सच बोलदा की जां तिकर ए सारी गल्लां पूरी ना होई जाण, तां तिकर इस पीढ़ी रा अन्त नी होणा। 35आसमान ते जमीन टली जाणे पर मेरी गल्लां बगैर पूरे होए नी टलणी।

जागदे रेयो

36तिस दिन ते तिस घड़ी रे बारे बिच कोई नी जाणदा, ना स्वर्गदूत ते ना पुत्तर, पर सिर्फ प्यो। 37जदेय नूह रे दिन थिये, तिय्यां ही मणू रे पुत्तर, जे मैं ही है रा भी आणा होणा। 38किजोकी जिय्यां जल-प्रलय रे पैल्ले रे दिनां रे दिनां बिच, जिस दिन तिकर नूह जहाज पर नी चढ़ेया थिया, तिस दिन तांइ मणू खादें-पिदें, ते तिन्हा बिच ब्याह हुदें थिये। 39ते जां तिकर तिन्हा जो रुढ़ाई करी लेई ना गेया, तां तिकर तिन्हेरे जो किच्‍छ भी पता नी चलेया तिय्यां ही मणू रे पुत्तर, जे मैं ही है रा आणा भी होणा। 40तिस दिन दो जणे खेतरां बिच होणे, इक्क लेई लित्ता जाणा ते दुआ छड्डी दित्ता जाणा। 41दो जनानियां चक्की पिस्सेया करदी होणी, इक्क लेई लित्ती जाणी ते दुई छड्डी दित्ती जाणी। 42इधेरे तांइ जागदे रेयो ते किजोकी तुसा नी जाणदे तुसा रा प्रभु कधाड़ी आणे वाला है। 43पर ए जाणी लेयो की जे मालक जाणदा की चोर ने कुस बेल्ले आणा तां से जागदा रैहन्दा, ते अपणे घर बिच तिसजो बढ़ना नी दिंदा। 44इधेरे तांइ तुसा भी तैयार रेयो, किजोकी जिस घड़ी रे बारे बिच तुसा सोचदे भी नी होणे, तिसी घड़ी मणू रे पुत्तर, जे मैं ही है ने आई जाणा।

भरोसेमदं नौक्कर ते बुरा नौक्कर

45अते से भरोसेमदं ते समजदार दास कुण है, जिस जो मालक ने नौकरांं-चाकरां पर सरदार ठैहराया की ठीक-ठीक समय पर तिन्हेरे जो रोटी देय? 46धन्न है से दास, जिस जो तिसेरा मालक आई करी इय्यां ही करदे पाए। 47मैं तुसा जो सच बोलदा, तिनिये तिसजो अपणी सारी दौलत पर अधिकारी ठैहराणा। 48पर जे से बुरा दास सोचणा लगे कि मेरे मालक रे आणे बिच देर है, 49ते अपणे कन्ने वाले नौकरांं जो कुटणा लग्गी पेय, ते पियक्कड़ा कने खाए-पिए। 50तां तिस दास रे मालक ने ऐसे दिन हटणा, जा से तिसेरी भाल बिच ना हो, ते इक्क इदेयी घड़ी जिस जो से जाणदा ना हो, 51तां तिनिये तिसजो वरी सजा दैणी ते तिसेरा हिस्सा ढोंगियां कने ठेहराणा: उत्ते रोणा ते दांद्द पिह्णा होणा।

Currently Selected:

मत्ती 24: CDHNT

Highlight

Copy