मत्ती 14

यूहन्ना बपतिस्मा दैणे वाले रा खून होणा

1उस बेल्ले गलील रे राज्जे हेरोदेस ने जां यीशु रे कम्मां रे बारे बिच सूणेया। 2तां तिसने अपणे नौकरांं जो बोल्लेया, ए यूहन्ना बपतिस्मा दैणे वाला है, जे मरी करी फिरी जिन्दा होई गेरा है, इधेरे तांइ ए चमत्कारी तिस बिच कम्म करेया करदी हिन।

3किजोकी ए ओई हेरोदेस थिया जिनिये यूहन्ना जो बन्धी बणाई करी, संगलां कन्ने बन्नी करी जेल्लां बिच पाई दित्तेया थिया ए उसने हेरोदियास रे बोलणे पर कित्तेया थिया, जे पैल्ले उसेरे भाई फिलिप्पुस री लाड़ी थी। 4किजोकी यूहन्ना तिसजो बोलदा रैहन्दा थिया, कि तिज्जो इस कने नी रैह्णा चाएदा। 5इधेरे तांइ हेरोदेस तिसजो मारी दैणा चांह्दा थिया, पर से लोक्कां का डरदा थिया किजोकी मणू यूहन्ना जो भविष्यद्वक्ता मनदे थिये।

6पर जां हेरोदेस रा जन्मदिन आया तां हेरोदियास री कुड़ी ने हेरोदेस अते तिसेरे परौणे रे अग्गे नच्ची करी तिन्हा जो इतणा खुस करी दित्तेया। 7कि हेरोदेस ने कसम खाई करी वचन दित्तेया, तू जे किच्‍छ भी मंन्गगी, मैं तिज्जो दिंगा। 8अते अपणी मां रे उकसाणे पर तिन्ने बोल्लेया, मेरे जो थाली बिच यूहन्ना बपतिस्मा दैणे वाले रा सिर देयो। 9इस गल्ल कने राज्जा बड़ा दुखी होया, पर अपणी कसम री अते अपणे परोणेयां री वजह कने तिसने तिसेरी जरुरत जो पूरा करणे रा हुकम देई दित्तेया। 10ते तिसने जेल बिच मणू भेज्जी करी यूहन्ना रा सिर कटवाई दित्ता। 11अते यूहन्ना रा सिर इक्क थाली बिच रख्खी करी लियाये अते कुड़ी जो देई दित्तेया ते से तिसजो अपणी मां का लेई गई। 12फिरी यूहन्ना रे चेल्‍ले आई करी लास जो लेई गे अते तिन्हा ने उस दब्बी दित्तेया अते फिरी तिन्हा ने जाई करी यीशु जो दस्सेया।

पांज्ज हजार मणूआं जो खुआणा

13जां यीशु ने ए सूणेया, तां से तित्ते का किस्ती बिच कुसकी सांत जगाह् पर किल्ले चली गे पर जां लोक्कां जो पता चलेया तां से अपणे सहरां का पैदल ही तिन्हेरे पीच्छे चली गे। 14यीशु जां किस्ती का निकली करी बन्ने आये तां तिन्हा लोक्कां री बड़ी बड्डी भीड़ दिख्खी तिन्हा जो तिन्हा पर बड़ा तरस आया ते तिन्हा ने बमारा जो खरा कित्तेया। 15जां सँझ होई तां तिन्हेरे चेल्‍लेयां ने यीशु का आई करी बोल्लेया, ए सुनसान जगाह् है ते बड़ी हाण भी होई गे री है, इधेरे तांइ मणूआं जो भेजी देयो, ताकि से ग्रां बिच जाई करी अपणे तांइ रोट्टी खरीदी लेंन। 16पर यीशु ने तिन्हा जो बोल्लेया, “इन्हा जो कुते जाणे री जरूत नी है: तुसा ही इन्हा जो खाणे जो देयो।”

17तिन्हा ने यीशु जो बोल्लेया, असा का सिर्फ पंज रोटियां ते दो मच्छियाँ हिन। 18यीशु ने बोल्लेया, तिन्हा जो इत्ते मेरे का लेई आओ।

19यीशु ने लोक्कां री भीड़ जो बोल्लेया कि तुसा घा बिच बेई जाओ फिरी यीशु ने पंज रोटियां ते दो मच्छियाँ जो लेया ते स्वर्ग पास्से दिख्खी करी परमेश्वर रा शुकर कित्तेया अते रोटियां रे टुकड़े तोड़ी-तोड़ी करी चेल्‍लेयां जो दित्ती अते चेल्‍लेयां ने मणूआं बिच बंड्डी दित्ती। 20सब खाई करी करी रज्जी गे तां चेल्‍लेयां ने बचे रे टुकड़ेयां कने भरी करी बाहरा टोकरे चुक्के। 21जनानियां अते बच्चेयां जो छड्डी करी तित्ते खाणे वाले कोई पाज्जं हजार आदमी थिये।

यीशु रा पाणी पर चलणा

22तां यीशु ने झट ही अपणे चेल्‍लेयां जो किस्ती पर चढ़ाया ते जां तांइ से भीड़ जो भेजदे, उन्हा जो गलील री झील रे पार अपणे का पैल्ले ही जाणे जो बोल्लेया। 23मणूआं जो भेजणे का बाद यीशु कल्ले ही प्रार्थना करणे तांइ पहाड़ पर चली गे सांज्ज होणे तिकर से कल्ले ही थिये। 24तिस बेल्ले किस्ती समुंदर बिच पाणी री छलारां कने डगमगाया करदी थी किजोकी सामणे का बजेया करदी थी।

25ते यीशु रात रे चौथे पहर समुंदर पर चलदे-चलदे तिन्हा का आए। 26जां चेल्‍लेयां ने तिन्हा जो झील रे उप्पर चलदे दिख्खेया तां से डरी गे ते अप्पु-मिते बोलणा लग्गे, ए तां कोई भूत है! अते डरे रे मारे चिन्डा मारणा लग्गे।

27पर यीशु ने उस्सी बेल्ले तिन्हा कने गल्ल कित्ती ते बोल्लेया, हिम्मत रख्खो! मैं है! डरो मत।

28तां पतरस ने यीशु जो बोल्लेया, प्रभु जी, जे तुसा हिन, तां मेरे जो पाणी पर चली करी अप्पु का आणे तांइ हुकम देयो।

29यीशु ने बोल्लेया, चली आ

अते पतरस किस्ती का निकली करी पाणी पर चलदे यीशु का चली पेया। 30पर तेज ब्यार जो दिख्खी करी से डरी गेया अते डूबणे लग्गेया ते लेरां मारदे बोलणे लग्गेया, प्रभु जी, मेरे जो बचाओ। 31यीशु ने झट ही तिसजो हत्थ दित्तेया ते संभाली लेया अते तिसजो बोल्लेया, तेरा विश्वास छोटा है, तू शक्क किजो कित्तेया थिया?

32अते जां से किस्ती पर चढ़ी आये तां ब्यार रुकी गई 33किस्ती पर जे मणू थिये तिन्हा यीशु री प्रणाम कित्ती अते बोल्लेया, तुसा वाक्केई परमेश्वर रे पुत्तर हिन।

गन्नेसरत बिच बिमारां जो ठीक करणा

34तां से झील रे पार गन्नेसरत जिले जो पूज्जे। 35अते तित्ते रे मणूआं ने जां यीशु जो पछाणेया तां तिन्हा ने अख्खी-बख्खी री सब जगाह् पर तिन्हेरे आणे रा सुब बसेख भेजी दित्तेया, अते मणू बिमारां जो तिन्हेरे का लेई आये। 36ते से तिन्हा कने बिन्ती करणा लगे कि से तिन्हा जो अपणे कपड़े जो ही छुणा देयो, अते जितणेया ने छुत्तेया, से पूरी तरह कने ठीक होई गे।

Currently Selected:

मत्ती 14: CDHNT

Highlight

Copy