लूका 1
1
भूमिका 1:1-4
लूका रा मकसद
1आदरणीय थियुफिलुस, ए सारी गल्लां जे असा रे बिच मझाटे बीत्ती, तिन्हा जो लिखणे बिच मते लोक्कां ने कोसीस कित्ते री है। 2यीशु री सेवकाई री सुरुआत रे बारे बिच से ही गल्लां लिख्खी जे तिन्हा ने तिन्हा लोक्कां का सुणी जिन्हा ने ए सब किच्छ अपणी हाख्खियां कने दिख्खेया थिया ते बाद बिच जे मणू मसीह रे सेवक भी बणी गे थिये। 3मैं भी इन्हा गल्लां रे बारे बिच ठीक तरिक्के कने जांच-पड़ताल कित्ते री है, ते मेरे जो ए ही खरा लग्गेया कि मैं ए सारी गल्लां तुसा जो क्रमनुसार लिख्खी करी भेज्जी देयां। 4मैं ए सारा किच्छ इधेरे तांइ करेया करदा है ताकि तुसा जाणी सको कि ए सब गल्लां किन्नी सच्ची हिन जे तुसा लोक्कां का सूणी। 5जां यहूदियां प्रदेश बिच राजा हेरोदेस रा शासन थिया, तां तित्ते जकरयाह नां रा इक्क पुरोत्त थिया जे पुरोत्तां रे इक्क दल बिच का थिया, जिस दल रा नां अबिय्याह याजक रे नां पर पेया थिया, अते जकरयाह ते तिसेरी लाड़ी रा नां इलीशिबा थिया ते से दोन्नों इस्राएल रे सबका पैल्ले पुरोत्त, हारून रे खानदान री थी।
यूहन्ना रे पैदा होणे री भविष्यवाणी
6जकरयाह अते इलीशिबा परमेश्वर री नजरां बिच धार्मिक थिये, ते प्रभु रे सारे हुक्मा ते विधियां पर चलणे वाले थिये। 7पर इलीशिबा इक्क ओत्तर जनानी थी, इधेरे तांइ तिन्हेरी कोई औलाद नी थी, अते से दोई जणे बड़े सियाणे भी होई गेरे थिये।
8इक्क दिन जां जकरयाह रे दल री वरी, मन्दिर बिच पुरोत्त रा कम्म करणे तांइ आई, अते से परमेश्वर री सेवा करणे तांइ तित्ते ही थिया। 9तां पुरोत्तां रे चलाये रे रीवाज रे हिसाब कने पर्ची जकरयाह रे नां री निकली, कि से परमेश्वर रे मन्दिर बिच जाई करी धूप बाले। 10जां धूप बालणे री वरी आई तां झुण्ड रे सारे मणू कठ्ठी करी बाहर मन्दिर रे अंगण बिच प्रार्थना करणा लगे। 11जकरयाह मन्दिर बिच ही थिया, कि तिस्सी बेल्ले परमेश्वर रा इक्क स्वर्गदूत धूप री वेदी रे सज्जे पासे आई खड़ा होया। 12जकरयाह स्वर्गदूत जो दिख्खी करी बड़ा डरी गेया, जिय्यां कि तिसेरे प्राण निकलणा लग्गी पे रे होण 13पर तिस्स स्वर्गदूत ने तिसजो बोल्लेया, जकरयाह, डरां मत! किजोकी परमेश्वर ने तेरी प्रार्थना सुणी लित्ती री है, अवे तेरी लाड़ी इलीशिबा ने, जे ओत्तर है, दुपराणी होणा, अते तिन्ने इक्क निक्के जो जमणा, अते तू तिस्स निक्के रा नां यूहन्ना रख्खे, 14तिसेरे पैदा होणे पर तिज्जो तां खुसी होणी ही, पर तिनिये मते लोक्कां री खुसी होणा, 15किजोकी तिन्ने प्रभु री नजरां बिच महान मणू होणा, तिसजो अंगूर रा रस्स या सराब पीणा मना है, अते से पैदा होणे का पैल्ले ही पवित्रात्मा कने भरपूर होणा। 16तिन्ने इस्राएल रे मते मणूआं का तिन्हेरे पाप्पां का तौबा कराणी अते तिन्हा जो प्रभु-परमेश्वर रे पास्से हटाई लाणा। 17तिन्ने एलिय्याह री आत्मा ते ताकत बिच भरपूर होई करी प्रभु रा रस्ता तैयार करणा, तिन्ने मां-प्यो जो अपणे निके-निकेयाँ कने प्यार करणा सिखाणा, अते अड़मण लोक्कां जो धार्मिक मणूआं री जिन्दगी जीणा सिखाणा ते तिन्हा परमेश्वर जोग्गी इक्क प्रजा बणने तांइ तैयार करणा।
18तां जकरयाह ने स्वर्गदूत जो पूच्छेया, कि मैं किय्यां मन्नी लेयां कि ए सब किच्छ जे तू बोल्लेया करदा है, सच होई जाणा? किजोकी, मैं तां बड़ा सियाणा मणू है, अते मेरी लाड़ी भी सियाणी है। 19तां स्वर्गदूत ने तिस्स जो बोल्लेया, मैं जिब्राईल है, मैं से स्वर्गदूत है, जे हर बेल्ले परमेश्वर रे सामणे खड़ा रैहन्दा मेरे जो परमेश्वर ने तेरे का इधेरे तांइ भेज्जेया कि ए सुब बसेख मैं तिज्जो दस्सी देयां। 20पर दिख्ख, अब्बे मैं जे किच्छ भी तिज्जो बोल्लेया, तिन्हा गल्लां पर तैं विश्वास नी कित्तेया, ईधेरी तांइ अवे जां तांइ तेरा निक्का पैदा नी होई जान्दा, तां तांइ तैं जल्ला रैह्णा। 21मन्दिर रे अंगण बिच खड़ित्ते रे सारे मणू जकरयाह रा बाहर आणे रा इतंजार करेया करदे थिये, ते हैरान होणा लग्गे कि तिसजो मन्दिर बिच इन्नी देर किजो लग्गेया करदी है। 22फिरी जां से बाहर आया, तां तिसका किच्छ भी बोल्ली नी होया अते तिसेरी हरकतां जो दिख्खी करी मणू समजी गे, कि इन्ने मन्दिर बिच जाई करी जरुर परमेश्वर रा कोई दर्शन दिख्खया होणा। 23फिरी जिस बेल्ले जकरयाह रे मन्दिर बिच सेवा करणे रा बेल्ला पूरा होई गेया तां से अपणे घरे जो हटी गेया।
यीशु रे पैदा होणे री भविष्यवाणी
24फिरी थोड़े रोज्जां बाद, इलीशिबा दुपराणी होई कने से पांज्ज महिन्ने तांइ मणूआं री नजरां का दुर रेह्ई, 25मणूआं बिच मेरी बेज्जती दुर करणे तांइ परमेश्वर ने इनां दिनां बिच अपणी रहमत कने इक्क बड्डा कम्म कित्ते रा है। 26एलीशिबा रे दुपराणी होणे रे छेम्मे महिन्ने अंदर परमेश्वर ने जिब्राईल स्वर्गदूत जो गलील सहर रे नासरत कस्बे बिच, 27इक्क कुंवारी कुड़ी का भेजेया, तिस्स कुंवारी कुड़ी रा नां मरियम थिया, जिसेरी मंगणी यूसुफ नां रे इक्क मणू कने होये री थी, अते से दाऊद राज्जे रे खानदान रा थिया। 28जिब्राईल स्वर्गदूत मरियम का आई करी बोलणा लगेया, “नमस्कार, तेरे पर परमेश्वर ने बड़ी दया कित्ती, ते परमेश्वर तुसा कने हिन।” 29स्वर्गदूत री इस गल्ल का घबराई करी मरियम इस सोच्चा बिच पेई गई कि इसेरी इन्हा गल्लां रा कै मतलब होई सकदा? 30तां स्वर्गदूत ने मरियम जो बोल्लेया, डरां मत, किजोकी परमेश्वर री दया तेरे पर होये दी है। 31अवे तैं दुपराणी होणा ते इक्क निक्के जो जमणा, जिसेरा नां तू यीशु रख्खेयां, 32से निक्का बड़ा महान होणा अते तिस्स जो मणूआं ने परमप्रधान परमेश्वर रा निक्का मनणा अते होर तां होर, परमेश्वर ने तिस्स जो तिसेरे पुरखे दाऊद राज्जे सांई राज्जा बनाणा, 33अते तिन्ने हमेसा तांइ याकूब रे खानदान पर राज करणा जे इस्राएल देस है अते तिसेरा राज कदी भी नी मुकणा। 34ए सुणी करी मरियम ने जिब्राईल स्वर्गदूत जो बोल्लेया, ए किय्यां होई सकदा, किजोकी मैं तां कुंवारी ही है। 35तां जिब्राईल स्वर्गदूत ने मरियम जो बोल्लेया, पवित्रात्मा ने तेरे पर उतरणा अते परमप्रधान परमेश्वर री ताकत ने तेरे पर छां करणी, अते से बच्चा जे तेरे का पैदा होणा, से पवित्र होणा, तिसजो परमेश्वर रा पुत्तर बोल्लेया जाणा, 36होर तां होर, तेरी रिस्तेदार इलीशिबा, जिस जो सब मणू ओत्तर समजदे थिये, से भी दुपराणी होई गे री है कने तिस्स जो इस बेल्ले छेम्मा महीन लग्गे रा है। 37किजोकी परमेश्वर किच्छ भी करी सकदे। 38फिरी मरियम ने बोल्लेया, दिख्ख, मैं ता परमेश्वर री नौक्कर है तू जिय्यां बोल्लेया तिय्यां ही मेरे कने हो तां फिरी स्वर्गदूत तित्ते का चली गेया।
मरियम रा एलीशिबा कने मिलणा
39थोड़े रोजां बाद मरियम यहूदियां नां रे इक्क पाह्डी ग्रां बिच जकरयाह रे घरे जो गई। 40अते तित्ते तिन्ने जकरयाह री लाड़ी, इलीशिबा जो प्रणाम कित्ती 41अते इय्यां होया कि जिस बेल्ले मरियम ने इलीशिबा जो प्रणाम कित्ती, तिस्सी बेल्ले इलीशिबा रे पेट्टा बिच निक्का उटकी पेया, अते इलीशिबा पवित्रात्मा कने भरपूर गई, 42अते से ऊच्ची अवाज बिच बोल्णा लग्गी, सारी जनानियां बिच तू धन्न है अते जिस निक्के जो तैं जमणा, से भी धन्न है। 43मैं बड़ी भाग्गा वाली है कि मेरे प्रभु री मां अप्पु चली करी मेरे कने मिल्णा मेरे घरे जो आई। 44किजोकी जिय्यां ही तुसा ने मेरे जो प्रणाम बोल्लेया, तिय्यां ही मेरे पेट्टा बिच निक्का खुसी कने उटकी पेया। 45तू धन्न है किजोकी तैं प्रभु री गल्लां रा भरोसा कित्ता।
मरियम रा परमेश्वर री तारीफ करणा
46तां मरियम ने बोल्लेया,
“मैं अपणे परमेश्वर री बड़ाई करदी,
47अते मेरी आत्मा मेरे छुटकारा दैणे वाले परमेश्वर का बड़ी वरी खुस है,
48तिन्हा ने अपणी दासी रे निम्तेपन पर नजर रख्खी, कने अब्बे का लेई करी जुग-जुगान्तर री पीढ़ियां ने मेरे जो बोलणा कि,
तू तां बड़ी धन्न है,
49किजोकी उस शक्तिसाली परमेश्वर ने मेरे तांइ बड़े बड्डे-बड्डे कम्म कित्ते रे हिन,
तिन्हेरा नां पवित्र है,
50अते तिन्हेरी दया उन्हा सबणी मणूआं पर है जे कि तिन्हेरा डर मन्दे, अते तिन्हा पर दया आणे वाली सारी पीढ़ियां तांइ बणी रैह्णी,
51परमेश्वर ने अपणी बड़ी ताकत कने बड्डे-बड्डे कम्म कित्ते रे हिन,
अते जे अपणे दिल बिच घमंड री गल्लां सोचदे थिये, तिन्हा रा घमण्ड तोड़ी दित्ता।
52तिन्हा ने ताकतवर मणूआं जो तिन्हेरे राज-पद का हटाई दित्ता,
अते निम्ते मणूआं जो आदर दित्ता,
53तिन्हा ने भुख्खेयां जो खरी खरी चीजां कने रजाया,
पर अमीरां जो खाली हत्थ हटाई दित्तेया,
54तिन्हा ने अपणे इस्राएली सेवकां री मदद कित्ती,
कि अपणी दया याद करे,
55जिय्यां कि तिन्हा ने असा रे पुरखे अब्राहम ते तिन्हेरे पूरे खानदान कने वादा कित्तेया थिया,”
56मरियम कोई त्रै महिन्ने तांइ इलीशिबा कने रेई फिरी तिसेरे बाद से अपणे घरे जो चली गई। 57फिरी इलीशिबा रा लोकिणे रा बेल्ला आई गेया अते तिसेरे घरे इक्क मुडां पैदा होया।
यूहन्ना बपतिस्मा दैणे वाले रा जन्म
58तिसेरे गुआन्ड अते रिस्तेदारां ने जिस बेल्ले ए गल्ल सुणी कि परमेश्वर ने तिस्स पर दया कित्ती, तां तिन्हा भी इलीशिबा कने मिली करी बड़ी खुसियां मनाई 59अते फिरी अठमे रोज्जे निक्के रे खतना तांइ जकरयाह रे रिस्तेदार तित्ते आये, अते से प्यो रे नां पर तिस निक्के रा नां जकरयाह ही रखणा लग्गी पे, 60तिस्सी बेल्ले तिसेरे मुंडे री मां इलीशिबा बोल्ली पेई, कि ना, इसेरा नां तां यूहन्ना रखणा है। 61तां तित्ते आये रे मणू बोल्णा लगे कि तेरे रिस्तेदारां बिच तां ए नां कुसेरा भी नी है। 62तां फिरी तिन्हा मणूआं ने जकरयाह जो इसारा करी के पूच्छेया, कि तू इसेरा कै नां रखणा चाह्ंदा? 63जकरयाह ने इस गल्ल जो बोलणे तांइ इक्क पट्टी मंगाई अते तिस्स पर लिख्खी दित्ता, इसेरा नां यूहन्ना रख्या जाए ए दिख्खी करी सब जणे हैरान होई गे 64तिस्सी बेल्ले जकरयाह री जिब्ब खुली गई अते मुँह खुलदे ही से परमेश्वर रा शुकर करणा लग्गी पेया। 65तिसेरे अख्खी-बख्खी जिन्ने भी मणू थिये, से सब ए दिख्खी करी बड़े डरी गे इस गल्ल री खाप्प यहूदियां रे सारे पहाड़ी कस्बे बिच पेई गई। 66जिन्हा ने भी ए गल्ल सूणी, से अपणे मनां बिच सोचणा लगे, कि ए निक्का कदेया होणा? किजोकी इस पर तां अप्पु परमेश्वर री ताकत है।
जकरयाह रा परमेश्वर री तारीफ करणा
67फिरी यूहन्ना रा प्यो, जकरयाह, पवित्रात्मा रे गलाए भविष्यवाणी करणा लगेया। 68कि इस्राएल रे प्रभु परमेश्वर री जै हो! किजोकी तिन्हा ने अपणे मणूआं जो बचाणे तांइ इक्क मददगार भेज्जेया, अते अपणे मणूआं जो पाप का छुड़ाया, 69तिन्हा ने असा तांइ अपणे नौक्कर, दाऊद राज्जा रे खानदान का असा जो इक्क बचाणे वाला उद्धारकर्ता दित्ता। 70जिय्यां कि परमेश्वर ने बड़े पैल्ले ही अपणे पवित्र भविष्यद्वक्ता रे जरिए बोल्लेया थिया, 71कि तिन्हा ने असा जो असा रे दुश्मणा का ते तिन्हा लोक्कां का बचाणा ते जे असा कने नफरत करदे। 72तिन्हा ने ए सब किच्छ असा तांइ इधेरे तांइ करणा किजोकी तिन्हा ने जे वादा असा रे पूरखां कने कित्तेया थिया, से तिसजो नी भुल्ले। 73अते से वादा जे परमेश्वर ने असा रे पुरखे अब्राहम कने कित्तेया थिया, 74कि से असा रे दुश्मणा रे हत्थां का असा जो बचाई लिन्गे, ताकि असी बगैर डरे रे परमेश्वर री सेवा करदे रैण। 75अते सारी उमर-भर, ते हर रोज, परमेश्वर रे अग्गे पवित्र अते धार्मिक बणी करी रेई सकण, 76इधेरे तांइ ओ मेरे बच्चे, यूहन्ना, अवे तैं परमप्रधान परमेश्वर रा भविष्यद्वक्ता बणना, किजोकी तैं प्रभु रे अग्गे-अग्गे चली करी तिन्हेरे आणे तांइ लोक्कां जो तैयार करणा। 77तैं प्रभु रे लोक्कां जो सिखाणा कि से अपणे पाप्पां का माफी रे जरिए से छुटकारा पाई सकदे। 78ए सब असा रे परमेश्वर री दया कने होणा, जिस तरिक्के कने इक्क नौआ दिन सुरु हुंदा, तिय्यां ही मसीह ने भी असा तांइ नौई चीजां करणी जां तिन्हा ने असा का स्वर्ग का आणा। 79जे मणू परमेश्वर जो नी जाणदे से इदेय हिन कि जिय्यां से मौत रे साये बिच बैठ्ठे रे हिन, ते हमेसा री मौत री खतरे बिच हिन जे कि नरक है, इधेरे तांइ परमेश्वर री रौसनी तिन्हा लोक्कां जो परमेश्वर रे सांती रे रस्ते पर लेई चलणा। 80जिय्यां-जिय्यां जकरयाह रा बच्चा, यूहन्ना, मुटिंदे गेया, तिय्यां ही से आत्मिक तरिके कने भी पक्का हुन्दा गेया, ते जां तांइ तिनिये इस्राएल रे लोक्कां सामणे आई करी प्रचार करणा सुरु नी कित्तेया, तां तांइ से बियाबान जगाह् बिच रेया।
Currently Selected:
लूका 1: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
