यूहन्ना 9

जन्म रे अन्ने जो लौ दैणा

1यीशु ने जान्दे होए इक्क मणू जो दिख्खेया, जे जन्म का अह्ना थिया। 2ते तिसेरे चेल्‍लेयां ने तिसजो पूच्छेया, ओ गुरु, कुसने पाप कित्तेया थिया कि ए अह्ना जम्मेया, इस मणू ने, या इसेरे मां-प्यो ने? 3यीशु ने जवाब दित्ता, ना इनिये ना इसेरे मां-प्यो ने पर ए इस तांइ अह्ना पैदा होया ताकि परमेश्वर रे चमत्कारी कम्म इसेरी वजह कने लोक्कां सामणे प्रकट होण। 4जिनिए मेरे जो भेज्जे रा है, असा जो तिन्हेरा कम्म दिन रैहन्दे ही करणा जरुरी है। 5जां तांइ मैं दुनिया बिच है, तां तांइ दुनिया री लौं है 6ए बोल्ली करी तिन्हा ने जमीन पर थूक्केया, ते तिस थूक्क कने मिट्टी सेड़ी, ते से मिट्टी तिस अन्ने री हाख्खियां पर लाई करी 7तिसजो बोल्लेया, जा, शीलोह #9:7 शीलोह (शीलोह रा मतलब भेज्जे रा है)रे तलाब बिच अपणा मुँह धोई लै उन्निए जाई करी धोया, ते दिखदे-दिखदे हटी आया। 8तां तिस आदमी रे पड़ोसी ते जिन्हा ने पैल्ले तिसजो भीख मगंदे दिख्खेया थिया, बोलणा लग्गे, कै ए से ही नी, जे बेई करी भीख मगेंया करदा थिया? 9किच्‍छ लोक्कां ने बोल्लेया, ए से ही है, दूज्जेयां ने बोल्लेया, नी, पर तिस सांई कोई होर है उन्निए बोल्लेया, मैं से ही है 10तां से तिसजो पूच्छणा लग्गे, तेरी हाख्खियां री रौसनी किय्यां ठीक होई गई? 11तिनिए जवाब दित्ता, यीशु नां रे इक्क मणू ने मिट्टी सेड़ी ते मेरी हाख्खियां पर लाई करी मेरे जो बोल्लेया, शीलोह रे त्ला बिच जाई करी धोई लै, अते मैं गेया ते धोया, ते मेरी हाख्खियां री रौसनी ठीक होई गई। 12तिन्हा ने तिसजो पूच्छेया, से मणू कुते है? तिनिये बोल्लेया, मेरे जो नी पता।

फरीसियां री चंगाई री जांच-पड़ताल

13जिस दिन यीशु ने मिट्टी सेड़ी करी तिसेरी हाख्खियां खोल्ली थियां, से विश्राम दिन थिया। 14मणू तिस आदमी जो पैल्ले अह्ना थिया, फरीसियां का लेई गे। 15फिरी फरीसी लोक्कां ने भी तिसका पूच्छेया कि तिसेरी हाख्खियां री रौसनी किय्यां ठीक होई गयी? तिन्निए फरीसी लोक्कां जो बोल्लेया, कि यीशु ने मेरी हाख्खियां पराल्ले मिट्टी लाई, फिरी मैं से धोई लित्ती, ते अवे दिख्खी सकदा। 16इस पर किच्‍छ फरीसी बोलणा लग्गे, ए मणू परमेश्वर रे पास्से का नी है किजोकी से विश्राम दिन नी मनदा, दूज्जेयां ने बोल्लेया, पाप्पी मणू इदेय चमत्कार किय्यां दिखाई सकदा? अते तिन्हा बिच फूट पेई गेई। 17तिन्हा ने तिस अन्ने जो फिरी बोल्लेया, तिन्निए तेरी हाख्खियां खोल्ली तू तिसेरे बारे बिच कै बोलदा? तिन्निए बोल्लेया, ए भविष्यद्वक्ता है। 18पर यहूदियां जो विश्वास नी होया कि से अह्ना थिया ते अवे दिखदा, जा तांइ तिन्हा ने तिसेरे, जिसेरी हाख्खियां खुली गई री थी, मां-प्यो जो सदी करी 19तिन्हा का नी पुछ‍छेया, कै ए तुसा रा पुत्तर, जिस जो तुसा बोलदे कि अह्ना जम्मेया थिया? फिरी अवे ए किय्यां दिखदा? 20तिसेरे मां-प्यो ने जवाब दित्ता, “असी तां जाणदे कि ए असा रा पुत्तर है ते अह्ना जम्मेया थिया।” 21पर असी ए नी जाणदे कि अवे किय्यां दिखदा, ते ना ही ए जाणदे की कुन्निए इसेरी हाख्खियां खोल्ली ओ समजदार है, तिसका ही पूच्छी लेयो ओ अपणे बारे बिच अप्पु ही बोल्ली सकदा। 22ए गल्लां तिसेरे मां-प्यो ने इस तांइ बोल्ली किजोकी से यहूदी अधिकारी का डरदे थिये, किजोकी यहूदी इक्क पास्से होई गेरे थिये कि जे कोई बोल्ले कि यीशु ही मसीह है, तां सभास्थल बिच का कड्डेया जाए। 23इस तांइ तिसेरे मां-प्यो ने बोल्लेया, से समजदार है, तिसका ही पूच्छी लेयो। 24तां उन्हा ने तिस मणू जो जे अह्ना थिया, दुई वरी सद्दी करी तिसजो बोल्लेया, परमेश्वर री कसम खाई करी सच बोल किजोकी असी तां जाणदे कि से मणू पाप्पी है। 25उन्निए जवाब दित्ता, मैं नी जाणदा कि से पाप्पी है या नी मैं इक्क गल्ल जाणदा कि मैं अह्ना थिया ते अवे दिख्खी सकदा। 26तिन्हा ने तिसजो फिरी बोल्लेया, तिनिए तेरे कने कै कित्तेया? ते किय्यां तेरी हाख्खियां खोल्ली? 27तिनिए तिन्हा जो बोल्लेया, मैं तां तुसा जो बोल्ली चुके रा है ते तुसा ने सूणेया नी अवे दुई वरी किजो सुनणा चाह्‍ंदे? कै तुसा भी तिन्हेरे चेल्‍ले बणना चाह्‍ंदे? 28तां से तिसजो बुरा भला बोलणा लग्गे, तू ही तिसेरा चेल्ला है, असी ता मूसा रे चेल्‍ले हिन 29असी जाणदे कि परमेश्वर ने मूसा कने गल्लां कित्ती पर इस मणू जो नी जाणदे कि ए कुते रा हैं? 30उन्निए तिन्हेरे जो जवाब दित्ता, ए तां हैरानी वाली गल्ल है कि तुसा नी जाणदे कि ओ कुते रा है, तां भी तिन्हा ने मेरी हाख्खियां खोल्ली दित्ती 31असी जाणदे कि परमेश्वर पाप्पियां री नी सूणदा, पर जे कोई परमेश्वर रा भक्त हो, ते तिन्हेरी मर्जी पर चलदा हो, तां से तिन्हेरी सूणदा 32दुनिया री सुरुआत का लेई अब्बे तिकर ए कदी सुनणे बिच नी आया कि कुसकी ने जन्म रे अन्ने री हाख्खियां खोल्ली होण। 33जे ए मणू परमेश्वर रे पास्से का नी हुन्दा, तां किच्‍छ भी नी करी सकदा 34तिन्हा ने तिसजो जवाब दित्ता, तू तां बिल्कुल पाप्पां बिच जम्मे रा है, तू असा जो कै सिखान्दा? ते तिन्हा ने तिसजो बाहर कड्डी दित्ता।

आत्मिक रुप कने अन्नापन

35“यीशु ने सूणेया कि उन्हा ने तिसजो बाह्र कड्डी दित्ते रा है, ते जां तिस कने मूलाकात होई तां बोल्लेया, ‘क्‍या तू मणू रे पुत्तर पर विश्वास करदा?’” 36उन्निए जवाब दित्ता, ओ प्रभु, परमेश्वर रा पुत्तर कुण है, कि मैं तिस पर विश्वास करां? 37यीशु ने तिसजो बोल्लेया, तैं तिसजो दिख्खे रा भी है, ते जे तेरे कने गल्लां करेया करदा है, से ओ ही है 38उनिये बोल्लेया, ओ प्रभु, मैं तुसा पर विश्वास करदा, ते तिन्हा जो प्रणाम कित्ता। 39तां यीशु ने बोल्लेया, मैं इस दुनिया बिच हिसाब-किताब करणे तांइ आए रा है, ताकि जे नी दिखदे से दिखण, ते जे दिखदे से अन्ने होई जाण। 40जे फरीसी उन्हेरे कने थिये तिन्हा ने ए गल्लां सुणी करी तिन्हा जो बोल्लेया, तुसा रे बोलणे रा मतलब ए है कि असी भी अन्न हिन? 41यीशु ने तिन्हा जो बोल्लेया, जे अगर तुसा अन्ने हुदें तां पाप्पी नी मन्ने जादें पर अवे बोलदे कि असी दिखदे, इस तांइ तुसा रा पाप माफ नी कित्ते गे।

Currently Selected:

यूहन्ना 9: CDHNT

Highlight

Copy