यूहन्ना 7
7
यीशु ते तिन्हेरे भ्याल
1इन्हा गल्लां रे बाद यीशु गलील प्रदेश बिच फिरदे रे, किजोकी यहूदी तिन्हा जो मारणे रा मौका थिये तोपदे, इस तांइ से यहूदियां प्रदेश बिच फिरणा नी चाह्ंदे थिये, 2फिरी यहूदियां प्रदेश रे तम्बू रा त्योहर नेड़े थिया। 3इस तांइ यीशु रे भ्यालां ने तिसजो बोल्लेया, असा जो छडी करी यहूदियां प्रदेश जो चली जा, ताकि जे चिन्ह-चमत्कार तू करदा है, से यहूदियां प्रदेश रे तेरे सारे चेल्ले भी दिखण। 4किजोकी इदेया कोई नी होणा जे मसहूर होणा चाए, फिरी लुकी करी चिन्ह-चमत्कार करे, पर जां तू ए कम्म करेया ही करदा है तां लोक्कां रे सामणे कर। 5किजोकी तिसेरे भ्याल भी तिस पर विश्वास नी करदे थिये। 6तां यीशु ने तिन्हा जो बोल्लेया, मेरे जाणे रा बेल्ला हल्ले नी आया, पर तुसा जाई सकदे। 7दुनिया रे मणू तुसा कने नफरत नी करी सकदे, पर से मेरे कने नफरत करदे, किजोकी मैं तिन्हेरे खिलाफ गवाई दिन्दा, कि दुनिया रे लोक्कां रे कम्म बुरे हिन। 8तुसा त्याहार बिच जाई आओ, मैं हल्ले इस त्याहार बिच नी जाणा, किजोकी हल्ले तिकर मेरे जाणे रा समय नी आए रा है। 9यीशु अपणे भ्यालां कने ए गल्लां करी के गलील प्रदेश अन्दर ही रेह्ई गेया।
झोपड़ियां रे त्यहार बिच यीशु
10पर जां तिसेरे भ्याल त्याहार बिच चली गे, तां से अप्पु ही चुपचाप लुक्दे-लुक्दे गेया।
11तां यहूदी त्योहर अन्दर यीशु जो ए बोल्ली करी तोपणा लगे, “से कुते है?” 12फिरी लोकां ने तिसेरे बारे चोरी-चोरी बड़ी गल्लां कित्ती थोड़े बोलदे थिये से खरा मणू है, ते थोड़े बोलदे थिये नां से मणूआं जो बैह्कांदा 13तां भी यहूदी अधिकारियां रे डरे रे मारे मते मणू यीशु रे हित बिच गल्ल नी करदे थिये।
त्यहार बिच यीशु रा उपदेस
14फिरी जां त्योहर रे अद्दा दिन बीती गे तां यीशु मन्दिर रे अंगण बिच जाई करी लोक्कां जो शिक्षा दैणा लग्गे।
15तां यहूदी अधिकारियां ने हैरान होई करी बोल्लेया, पवित्रशास्त्र जो जादा पढ़े बगैर इसजो इन्ना जादा ज्ञान किय्यां का आया? 16यीशु ने तिन्हा जो जवाब दित्या, कि मेरा उपदेस मेरा अपणा नी है, पर परमेश्वर रा है जिन्हा ने मेरे जो भेज्जे रा है। 17जे कोई मणू परमेश्वर री इच्छा पर चलणा चाए तिसने ए समजी जाणा कि मेरी शिक्षा परमेश्वर रे पास्से का है या मैं अपणी मर्जी कने बोलदा। 18जे कोई अपणे पासे का बोलदा से अपणी अप्पु ही बड़ाई करदा, पर जे अपणे भेजणे वाले री बड़ाई चाहन्दा, से ही सच्चा है, कने तिस बिच कोई ढोंग नी है। 19मूसा ने तुसा जो कानून दित्तेया पर तां भी तुसा बिच का कुसकी ने परमेश्वर रे कानून जो नी मन्नेया पर तुसा मेरे जो मारणे री कोसीस करेया करदे हिन। 20लोक्कां ने यीशु जो जवाब दिता, “तेरे बिच तां दुष्टात्मा है! कुण तुसा जो मारणा चाहन्दा?” 21यीशु ने तिन्हा जो जवाब दित्या, “मैं इक्क कम्म कित्तेया, ते तुसा सारे हैरान हिन।” 22इधेरे तांइ मूसा ने तुसा जो खतने रा हुकम दित्ता (ए नी की मूसा रे पासे का पर बाबे दादेया रे पासे का चली आई री परम्परा है), फिरी तुसा विश्राम दिन मणू रा खतना करदे 23जां विश्राम दिन पर मणू रा खतना कित्ता जान्दा ताकि मूसा रे कानून रा हुकम न टालो, तां तुसा मेरे पर किजो गुस्सा हुन्दे, कि मैं विश्राम दिन पर इक्क मणू जो पूरे तरिक्के कने ठीक कित्तेया। 24मुँह दिख्खी करी फैसला मत करो, पर सही-सही फैसला करो।
कै यीशु ही मसीह हिन?
25तां किच्छ यरुशलेम सहर रे मणू अप्पु अंदर बोलणा लग्गे “क्या ए से ही नी, जिस जो मारणे रा कोसीस यहूदी अधिकारी करेया करदे हिन?” 26पर दिखो, से तां सरेआम गल्लां करदा ते से तिसजो किच्छ नी बोलदे। कै असा रे अधिकारी समजी गेरे हिन कि ए ही मसीह हिन? 27इसजो ता असी जाणदे कि ए कुते रा हैं, पर मसीह जिस मौके आंगा, तां कोई नी जाण्गां कि ओ कुते रा है। 28तां यीशु ने मन्दिर रे अंगण बिच उपदेस दिंदे बेल्ले ऊच्ची अवाज बिच बोल्लेया, तुसा मेरे जो जाणदे ते ए भी जाणदे कि मैं कुते का है: मैं अपणे पास्से का नी आया पर मेरा भेजणे वाला सच्चा हैं, तिसजो तुसा नी जाणदे, 29पर मैं तिसजो जाणदा, किजोकी मैं तिसेरे पास्से का है ते तिसने मेरे जो भेज्जे रा हैं। 30इस पर तिन्हा यहूदी अधिकारियां ने यीशु जो गिरफ्तार करणा चाएया, पर तां भी कुसकी ने भी उन्हा पर हत्थ नी पाया किजोकी तिन्हेरा गिरफ्तार होणे रा वक्त हल्ले तिकर नी आया थिया। 31फिरी भी भीड़ बिच का मते लोक्कां ने यीशु पर विश्वास कित्ता, ते ए बोलणा लग्गे, मसीह ने जां आणा तां कै इसका बधी करी चमत्कार दिखाणे जे इन्हा ने दिखाए?
यीशु जो पकड़ने री कोसीस
32फरीसी ने लोक्कां जो उन्हेरे बारे बिच ए गल्लां लुकी करी करदे सुणेयां ते बड्डे पुरोत्तां ते फरीसी ने तिन्हेरे जो पकड़ने तांइ मन्दिर रे सिपाई भेज्जे।
33इस पर यीशु ने बोल्लेया, मैं थोड़ी होर देर तिकर तुसा कन्ने है, तां अपणे भेजणे वाले का हटी जाणा। 34तुसा मेरे जो तोपणा, पर मैं नी मिलणा, ते जित्ते मैं है, उत्ते तुसा नी आई सकदे 35इस पर यहूदियां अधिकारियां ने अप्पु बिच बोल्लेया, इन्हा ने कुते जाणा कि असी इन्हा जो तोपी नी सकदे? कै ए तिन्हा यहूदी लोक्कां का जांगा जे यूनानी लोक्कां बिच तित्तर-बित्तर होई करी रैहन्दे, ते यूनानी लोक्कां जो भी उपदेस दिंगा? 36ए कै गल्ल है जे उन्हा ने बोल्ली, कि तुसा मेरे जो तोपणा पर नी मिलणा ते जित्ते मैं है, उत्ते तुसा नी आई सकदे?
जिन्दगी-पाणी री नदियां
37त्योहर रे आखरी दिन पर, जे खास दिन है, यीशु खड़े होए ते हक्क मारी करी बोल्लेया, जे कोई प्यासा हो तां मेरे का आए ते पिए। 38जे मेरे पर विश्वास करगा, जिय्यां पवित्रशास्त्र बिच लिख्खे रा है, उसेरे दिल बिच का जिन्दगी रे पाणी री नदियां फूटी निकलणी जे हमेसा री जिन्दगी दिंदी। 39तिन्हा ने ए वचन पवित्रात्मा रे बारे बिच बोल्लेया थिया, जिस जो उन्हेरे पर विश्वास करणे वाले पाणे वाले थिये किजोकी आत्मा हल्ले तिकर नी उतरेया थिया, किजोकी हल्ले तिकर परमेश्वर ने यीशु री महिमा प्रकट नी कित्ती थी। 40तां भीड़ बिच का कुसकी-कुसकी ने ए गल्लां सुणी करी बोल्लेया, सच्ची ए ही भविष्यद्वक्ता है। 41दुज्जेया ने बोल्लेया, ए मसीह है पर किच्छ ने बोल्लेया, किजो? कै मसीह ने गलील प्रदेश का आणा? 42कै पवित्रशास्त्र बिच ए नी लिख्खे रा है कि मसीह ने दाऊद रे खानदान, ते बैतलहम ग्रां का आणा, जित्ते दाऊद रैह्ंदा थिया? 43अते तिन्हेरी वजह कने लोक्कां बिच फूट पेई गई। 44तिन्हा बिच का किच्छ मणू तिन्हा जो पकड़ना चाह्ंदे थिये, पर कुसकी ने उन्हा जो पकड़ेया नी।
यहूदी अगुवां रे विश्वास री कमी
45तां मन्दिर रे सिपाई बड्डे पुरोत्तां ते फरीसियां का हटी आए, तिन्हा ने उन्हा जो बोल्लेया, तुसा उन्हा जो किजो नी लयाए? 46मन्दिर रे सिपाहियां ने जवाब दित्ता, कुसकी मणू ने कदी इदेइ अनौखी गल्लां नी कित्ती। 47फरीसी मणूआं ने तिन्हा जो जवाब दित्ता, कै तुसा भी बैह्की गेरे हिन? 48कै सरदारा ते फरीसियां बिच का कुसकी ने भी उन्हेरे पर विश्वास कित्ता है? 49पर ए मणू जे मूसा रे कानून नी जाणदे, परमेश्वर रे पास्से का श्रापित हिन। 50नीकुदेमुस ने, जे पैल्ले यीशु का रात्ती बेल्ले आया थिया, ते तिन्हा यहूदी अधिकारियां बिच का इक्क थिया, तिसने बोल्लेया, 51“क्या मूसा रे कानून रे हिसाब कने ए सही है कि कुसकी मणू जो बगैर तिसेरी गल्ल सुणे ही तिसजो सजा देई दित्ती जाए?” 52नीकुदेमुस ने यीशु जो जवाब दित्ता, “क्या तुसा भी गलील प्रदेश रे हिन? अप्पु ही पवित्रशास्त्र बिच तोप्पि करी समजी जाओ कि गलील प्रदेश का कोई भविष्यद्वक्ता नी बणी सकदा।” 53तां सारे जणे अपणे-अपणे घरां जो चली गे।
Currently Selected:
यूहन्ना 7: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
