प्रेरितां रे कम्म 6

सत्त सेवकां रा चुणेया जाणा

1तिन्हा दिनां बिच जां प्रेरितां री गिनती मती बधणा लग्गी, तां यूनानी भाषा बोलणा वाले चेल्‍ले इब्रानी भाषा बोलणे वाले प्रेरितां पर कुड़कुडा़णा लग्गे, कि हर दिन री सेवकाई #6:1 इस जगाह् पर सेवकाई रा अर्थ मण्डली बिच आए रे लोक्कां री सेवा करणा है।बिच असा री विधवा जनानियां री खैर-खबर नी लिदें। 2तां तिन्हा बारां चेल्‍लेयां ने विश्वासी लोक्कां री मण्डली जो अपणे का सद्दी करी बोल्लेया, ए ठीक नी कि असी परमेश्वर रा वचन छड्डी करी खिलाणे-पिलाणे री सेवा बिच लग्गी रैह्ण। 3इस तांइ, ओ भाईयो, अपणे बिच का सत्त ठीक नां वाले मणूआं जो जे पवित्रात्मा ते समजदारी कने भरित्ते रे होण, चुणी लो कि असी तिन्हेरे जो इस कम्म पर ठहराई दैण। 4पर असी तां प्रार्थना बिच ते वचन री सेवकाई बिच लग्गी रैह्णा। 5ए गल्ल सारी मण्डली जो ठीक लग्गी, ते तिन्हा ने स्तिफनुस ना रे इक्क मणू जो जे विश्वास ते पवित्रात्मा कने भरित्ते रा थिया, ते फिलिप्पुस, ते प्रुखुरुस, ते निकाकोर, ते तिमौन, ते परमिनास, ते अन्ताकिया रे रैह्णे वाले निकुलाउस जे यहूदी मत बिच आई गे रा थिया, चुणी लित्ता 6इन्हा जो प्रेरितां सामणे खड़ेरेया ते तिन्हा ने प्रार्थना करी के तिन्हा पर हत्थ रख्खे ताकि से मणू तिस सेवकाई जो करण। 7परमेश्वर रा वचन फैलदा गेया ते यरुशलेम सहर बिच चेल्‍लेयां री गिनती मती बदद्धी गेई ते मते सारे पुरोत्तां ने भी मसीह बिच विश्वास करणे रे इस बसेख जो अपणाया।

स्तिफनुस री गिरफ्तारी

8स्तिफनुस अनुग्रह ते ताकत कने भरी करी लोक्कां बिच बड्डे अनौखे कम्म ते चिन्ह-चमत्कार दिखाया करदा थिया 9तां तिस सभास्थल बिच किच्‍छ मणू जे कुरेनी ते सिकन्दरिया सहर ते किलिकिया ते एशिया रे प्रदेश बिच का थिये ते “दास्तव मुक्त”#6:9 इस समुह रे मणू से यहूदी हिन जिन्हा जो 63 ईस्वी पूर्व में रोमी साम्राज्य रे द्वारा बंदी बणाई लित्तेया गेया थिया ते इन्हा जो गुलामां रे रुप बिच इस्तेमाल ते बेच्चेया जांदा थिया पर बाद बिच तिन्हा जो अजाद करी दित्तेया गेया थिया ते तिन्हेरे नां कने यरुशलेम सहर बिच इक्क सभास्थल है जिस जो दास्तव मुक्त बोल्लेया जांदा। समुह रे कहलांदे थिये, से मणू स्तिफनुस कने बैह्स करणा लग्गे। 10से मणू तिन्हा गल्लां रा जवाब नी देई सके जे स्तिफनुस बोल्लेया करदा थिया किजोकी पवित्रात्मा ने तिसजो समजदारी कने जवाब दैणे री ताकत दित्ती थी। 11इस पर “दास्तव मुक्त” समुह रे लोक्कां ने दूए होर लोक्कां जो स्तिफनुस रे खिलाफ झूठ बोलणे तांइ उकसाया, “से मणू बोलणा लग्गे, असी इसजो मूसा ते परमेश्वर री बेजती करदे सुणे रा है।” 12ते “दास्तव मुक्त” समुह रे लोक्कां ने दूए लोक्कां जो ते बुजुर्ग लोक्कां ते शास्त्रियां जो भड़काया ते तिन्हा ने स्तिफनुस जो पकड़ेया ते सभास्थल बिच लेई आए। 13ते झूठ्ठे गवाह खड़े कित्ते, जिन्हा ने स्तिफनुस पर इल्जाम लाया, “ए मणू इस पवित्र जगाह् ते मूसा रे कानून रे विरोध बिच बोलदा रैहन्दा।” 14किजोकी असी तिसजो ए बोलदे सुणे रा है कि ए ही नासरत कस्बे रे यीशु, ने इस मन्दिर जो ढाह्ई दैणा, ते तिन्हा रीतियां जो बदली दैणा जे मूसा ने असा जो सौंपी री हिन। 15तां सारे लोक्कां ने जे सभा बिच बैठ्ठे रे थिये, तिस पर नजरां टिकाई ते तिसेरा मुँह स्वर्गदूत सांई रौसनी कने चमकेया करदा थिया।

Currently Selected:

प्रेरितां रे कम्म 6: CDHNT

Highlight

Copy