Matthew 8

Jesus Uya Àsà Ipippà Leprosy Pokon Ipittà

(Mark 1.40-45; Luke 5.12-16)

1Jesus uttàppù màlà wùk poi, màlàyau tukkan kon kappon yamùk utàppù ya'là. 2Màlàyau àsà ipippà leprosy pokon uyàpùppù màlà ipyak, tese'muyok iwenappù itemlotopo, molopai, “Uyepulu, uyipittàpai ewechi yau, uyipittà auya,” teppù ya. 3Jesus uya temyatù yenkappù iwinàkàik molopai yappàtùppù ya. “Eyipittàpai wessaik. Wakù peichi enakà,” tukaik yeikuppù ya. Tewinanpa màlà yattai àsà ipippà wenappù wakù pe. 4Màlàyau Jesus uya ipàk, “ Ànù'là pàk kùsekamai, tùse tossalà paatele piyak itàkà eyentoppe ya. Molopai Moses nekamappù lùppù àntùlù pe itùtà euchipittàsak yekama pe nen uchi tamù'nawolon kon pàk,” teppù.

Jesus Uya Roman Soichayi Yamùk Yepulu Yapyoto Ipittà

(Luke 7.1-10)

5Jesus welepansak pata Capernaum pona yau, Rome pon soicha yamùk yesak uya iwakkàtùppù molopai Jesus pawanattàppù ya tùpùikattàtoppe ya. 6“Uyepulu, uyapyoto sa' e'neppe man itokkassak pata po. Molopai ipla kulu nùtaimelunpayan,” tukaik. 7“Utà màlà ipittàse,” teppù Jesus uya ipàk. 8“Kane tàwà, Uyepulu, uyùwùk tak àuyàpù pa wakù pen Iulà, italumayippù tàwà. Eselupakà neken molopai uyapyoto wena màlà pàli'yau,” teppù ya Jesus pàk. 9“Iulà nàlà mùkkàlà eke ton yapàikketù yokoik itùsak lùppù, molopai soicha yamùk molo man uyo'non kon. Pùsà yapyontànài Iulà, ‘Itàkà!’ tukaik, molopai tùutàsen mùkkàlà. Mùkklà pàk, ‘Àikkà!’ tawon Iulà, molopai tùuyàssen mùkkàlà. Molopai uyapyoto pàk, ‘Sà ikukkà,’ tawon Iulà, molopai iku'nài mùkkàlà,” teppù ya Jesus pàk. 10Jesus usenumenkasak wechippù màlà sàlà yetasak tùuya yau, molopai ta'lon kon pàk, “Ailon kulu sàlà, sàlà yekkwa ailon tetok yensak uya pùla man ànù'là yau Israel po. 11Sàlà mùttutàik! Tukkan kon uyàpù màlà wei wepakkatok winàpai molopai wei wewontok winàpai molopai Itepulu pe we'nàtok epùn po yau tok weleuta màlà ata'lettàsse Abraham, Isaac, molopai Jacob tawonnan pokonpe. 12Tùse mùkyamlo itepulu pe we'nàtok epùn po yau tùwessan yek yenu'ma màlà ewalupàttak polopona, molo tok kalawà màlà molopai tùyà kon kàlàlài'ma tok uya,” teppù Jesus uya. 13Molopai Jesus uya soicha yamùk yesak pàk, “Emeikkà, molopai ailon mùkayai'nùk wekkupù màlà àponaloppe,” teppù. Molopai itapyoto uchipittàppù, màlà yattai kulu.

Jesus Uya Tukkan Kon Ipittà

(Mark 1.29-34; Luke 4.38-41)

14Jesus utàppù màlà Peter yùwùk tak, molopai molo itewoppù wechi e'neppe tekkwek po yeneppù ya, iwàkkàmi'masak. 15Jesus uya itemyatù yappàtùppù màlà, màlàyau iwàkkàmi'makapùppù. Molopai iwe'wuluukappù, tok yeipa konekappù ya.

16Pata uko'mansak yau, kappon yamùk uya tukkan kon àli akkwalù yamùk yen ton nepùppù Jesus piyak. Àli akkwalù yamùk yenpakkappù ya màlà tùmaimu ke molopai tamù'nawolon kon e'netton ipittàppù ya. 17Sàlà kupùppù ya màlà Katù Maimu yenpoikanài Isaiah uselupappù kasa iwekkuttoppe.

“Mùkkàlà uya ina ye'netù yanùmùppù molopai ina yepalan yalàppù ya màlà,” {Isa 53.4} teppù ya kasa.

“Jesus Ya'lon Pe We'nà Yeselu,” tawonnan

(Luke 9.57-62)

18Jesus uya tukke kappon yamùk yensak tùuya tùwoi yau, tuna latoi pona tùutàtok kon pe yekamappù ta'lon kon pàk. 19Law pàk enupanài uyàpùppù màlà Jesus piyak, “Enupanài, aya'là utà màlà i'nailà là àutà yau,” teppù ya. 20Jesus uya yeikuppù, “Maikan yamùk mùkyamlo teuta kenan kon, molopai tolon yamùk mùkyamlo tùpon kenan kon, tùse Kàyik Mumu mùkkàlà iwàlàkkattok patassek pùn,” tukaik. 21Tùulon kàyik ya'lonnà uya, “Uyepulu, masa wapiya utàiche ukàipùnù wu'nattàse,” teppù. 22“Uya'là àikkà, tàwà iwelichak kon tàkàpù kon wu'nattài,” tukaik Jesus uya yeikuppù.

Jesus Uya Meluntà Assetun Yeleutanùpù

(Mark 4.35-41; Luke 8.22-25)

23Jesus wenukuppù màlà kanau yak, molopai ya'lon kon utàppù ya'là. 24Asse'ne àsà pe assetun utasse'nùmùppù màlà tuna po, molopai chipachipa uya kanau waputtàppù. Tùse Jesus we'nùnsak wechippù màlà. 25Ya'lon kon utàppù màlà ipyak molopai yenpakappù tok uya. “Ina ipùikattàkà, ina Yepulu! Weli'nà'nokon pe man!” teppù tok uya Jesus pàk. 26“Yà'là peichi iwechi pàk ewettalipasak kon màlà? Attu'mùla kulu ailon tetok auya'nokon man!” tukaik Jesus uya yeikuppù. Màlàyau iwe'wuluukappù molopai assetun molopai chipachipa weleutatoppe ikupùppù ya, molopai iwàttù'nàkapùppù màlà. 27Tamù'nawolon kon usenumenkasak wechippù màlà. “Yà'là yekkwa là ken uchi pùsàlà kàyik? Assetun nà molopai chipachipa là wettok imaimu yawàlà!” teppù tok uya.

Asa'lon kon Àli akkwalù Yen

(Mark 5.1-20; Luke 8.26-39)

28Jesus uyàpùppù màlà Gadara pona pata tuna latoi winon yak, molopai asa'lon kon kàyik yamùk uluwaik yamùk yapai màlà yailà iwepakkasak kon uya iwakkàtùppù màlà. Pùsamlo kàyik yamùk yau àli akkwalù yamùk wechippù màlà, molopai àsà pe tok wechippù, màlàpàk ànù'là utà màlà asanta tawà yeselùkek pùla iwechippù. 29Asse'ne kulu tok wentaimeppù, “Yà'là pe ina wechi iche messan, Katù Mumu? Ina talumattàse na' àuyàssak màlà ina weyu wapiya?” tukaik. 30Mei kulu pùla tukkan kon puluku yamùk wechippù màlà tùuta'lettà kon pàk. 31Àli akkwalù yamùk uya Jesus pawanattàppù màlà, “Ina yenpakka auya yau, ina yeunokkà puluku yamùk yak,” tukaik. 32“Itàtàk kon,” teppù Jesus uya. Màlàpàk tok utàppù molopai tok wewomùppù puluku yamùk yak. Tamù'nawàlà puluku yamùk utàppù aitun pe aiko yai tuna kak molopai tok unalàppù.

33Puluku yamùk mainanpannannùssan utàppù màlà aitun pe pata pona, molo tok uya màlà tamù'nawàlà ipantomù lùppù yekamappù, molopai nàlà mùkyamlo kàyik yamùk àli akkwalù wechippù yau lùssan nà pantomù. 34Màlàpàk tamù'nawolon kon màlà pata yawon kon utàppù Jesus wakkàsse. Molopai yensak tùuya'nokon yau Jesus pawanattàppù tok uya tùpata kon nàntoppe ya.

Currently Selected:

Matthew 8: PNTR

Highlight

Copy