Matthew 3

Enpataukanài John uya Wakù Itekale Yekamatok

(Mark 1.1-8; Luke 3.1-18; John 1.19-28)

1Màlà yattai Enpataukanài John uyàpùppù màlà molopai Wakù Itekale yekama pàk iwepyattàppù wontaik Judea yawon yau. 2“Amakuyi kon winàpai elattàtàk kon masapùla itepulu pe we'nàtok epùn po mei pùla man!” tukaik. 3John uchi mùkkàlà Katù Maimu yenpoikanài Isaiah uselupappù ipàk lùppù,

“Kappon nentaimeyan wontaik yau, ‘Itepulu Jesus ye'ma ikonekatàk kon iponaloppe! Tossalà asanta ikonekatàk!’ ” tesak ya yau. {Isa 40.3}

4John pon wechippù màlà camel pùpok yapai ikonekasak. Kamo pippà wechippù ipokùlùyi pe. Molopai iteipa wechippù kailau molopai yuk yawon wan. 5Kappon yamùk uyàpùppù màlà John piyak Jerusalem poi, Judea yawolon kon pata yamùk yapai, molopai tamù'nawolon pata yamùk tuna Jordan woino yapai. 6Tok uya tùmakuyi kon yekamappù molopai tok yenpataukappù ya Jordan kau.

7Tùse tukke Pharisee yamùk molopai Sadducee yamùk uyàpù tùpyak tenpataukatok kon pe yensak tùuya yau, John uya tok pàk “Àkài yamùk, ànùk ken uchi epetàk kon Katù we'naikatok nùyàssai'nùk winàpai nùkai àpàkù'nokon,” teppù ya. 8“Màlà yamùk ikuttàk kon amakuyi kon winàpai ewelattàsak kon yekamanài. 9Molopai ‘Abraham mùkkàlà ina kàipùnù’ kùkatàu. Tekamayaik àpàkù'nokon Katù uya nen sàlà yamùk tàk yanuku molopai Abraham munkà yamùk pe ikoneka ya.” 10“Wakka wekonekasak man yei pùlakun yamùk yattà pàk. Tamù'nawolon yei wakù pe itepelu tùwepetasen pen yattà màlà, molopai yenu'ma apok yak. 11Eyenpataukanài'nokon Iulà tuna ke, amakuyi kon winàpai ewelattàsak kon pàk. Tùse mùkkàlà uye'mappù pàk tùuyàssen uya màlà eyenpatauka kon Wakù Akkwalù ke molopai apok ke. Eke mùkkàlà uyentaino, ichapattuyi yalà uya yentaino. 12Kùyali pantakatok tùuya ipippà winàpai yesappe man. Ipilipù ya màlà kùyali yùwùk tak. Tùse ipippà lùppù pottà ya màlà tùusà'nùssen pen apok ke!” teppù ya.

Jesus Yenpataukatok

(Mark 1.9-11; Luke 3.21-22)

13Màlà yattai Jesus utàppù màlà Galilee poi Jordan pona, molopai iyàpùppù John piyak tenpataukatoppe ya. 14Tùse John wechippù Jesus uya tùusenumenkatok mùyakanmatoppe ikupùiche. “Usenpatauka làkku nen eppaino ewinà, tùse àuyàssak man upyak!” teppù ya. 15Tùse Jesus uya yeikuppù, “Masaichi sàlà kasa nechii sàlà pe, masapùla sàlà kasa nen uchi màlà tamù'nawolon iwalai Katù wettok iche kupù,” tukaik. Màlàpàk John uya, ewaik teppù, ikuttoppe tùuya.

16Asse'ne tenpataukasak yau, Jesus wepalùkappù màlà tuna kapai. Màlà yattai kulu epùn utakkokappù màlà. Molopai Wakù Akkwalù uttà wakokkwa kasa yeneppù ya màlà molopai iweleutappù ipona. 17Molopai nen uchi mayin uya epùn poi, “Pùsàlà mùkkàlà u'nùn kulu Umu, utauchinpatok kulu ipàk,” teppù.

Currently Selected:

Matthew 3: PNTR

Highlight

Copy