लूका 13

मन बदला या नास होआ

1तिस बग्त कुच्छ लोक आई पुज्जे, कने यीशुये नैं तिन्हां गलील प्रदेसे दे लोकां दी चर्चा करणा लग्गे, क्जोकि पिलातुसैं तिस प्रदेसे दे कुच्छ लोकां दा जिन्हां दा मंदरे च बलिदान चढ़ाया तिन्हां दा खून कित्या था। 2एह़ सुणी करी तिन्हीं तिन्हां नैं ग्लाया, “तुहां क्या समझदे हन, कि एह़ गलीली लोक बाक्कि गलीली लोकां ते जादा पापी समझदे थे, जिन्हां सौगी एह़ सब कुच्छ होएया? जिसदिया बज़ाह ते इन्हां पर ऐदई मुसीबत आई।” 3मैं तुहां नैं ग्लांदा ऐ, इआं नीं ऐ; अपर जे तुहां मन नीं बदलगे तां तुहां भी सारे इस तरीके नैं नास हुंगे। 4या, क्या तुहां समझदे हन कि शीलोहे दा खम्भा पोणे ते जेह्ड़े ठारा माणु दबोई करी मरी गै, सैह़ यरूशलेम सैहरे दे कने सारे रैहणे आल़ेआं ते जादा पापी थे? 5मैं तुहां नैं ग्लांदा ऐ कि नीं; अपर जे तुहां मने नीं बदलगे तां तुहां सारे ई इस तरीके नैं नास हुंगे।

फल़ां बगैर धूड़े दे रूखे दा उदारण

6भिरी यीशुयैं तिन्हां जो इस उदारण दे जरिये समझाणा सुरू कित्ता; “इक्की माणुये अंगूरा दे बागे च इक्क धूड़े दा रूख लगया था। सैह़ तिस च फल़ तोपणे तांई हर साल ओंदा था, अपर नीं मिलदा था। 7ताह़लू तिन्हीं बागे दे मालिये नैं ग्लाया, ‘सुण मैं त्रीं साल्लां ते इस धूड़े दे रूखे च फल़े दिया आसा च ओंदा ऐ अपर मिन्जो अह्ल्ली तिकर कोई फल़ नीं मिल्ला। इसियो बड्डी दे क्जोकि इन्हीं बेकार च खरी जमीन रोकियो ऐ।’ 8तिन्हीं तिस जो जवाब दित्ता, हे मालक, इसियो इक्क साल होर दिक्खी लेआ, मैं इसदे अक्खे बक्खे खुणी नैं खाद पाई दिंदा। 9जे अगले साल फल़ दिंगा तां ठीक ऐ, नीं तां इसियो बड्डी दिंगे।”

सब्ते आल़े दिन कुबड़िया जणासा जो खरा करणा

10बिस्रामे आल़े दिनैं यीशु इक्की आराधनालय च सिक्षा दै दा था। 11तित्थु इक्क जणांस थी जिसा जो ठारा साल ते इक्क अपंग करणे आल़ी बुरी आत्मा चिमड़ियो थी, कने सैह़ कुबड़ी होई गियो थी, कने कुस भी तरीके नैं सिध्धी नीं होई सकदी थी। 12यीशुयैं तिसा जो सद्देया कने ग्लाया, “हे नारी, तू अपणिया इसा बमारिया ते छुटी गेई ऐ।” 13ताह़लू यीशुयैं तिसा पर अपणा हत्थ रखेया, कने इकदम सिध्धी होई गेई, कने परमात्मे दी महिमा करणा लग्गी। 14इसतांई कि यीशुयैं बिस्रामे आल़े दिन तिसा जणासा जो खरा कित्या था, एह़ दिक्खी करी आराधनालय दा सरदार गुस्सा करी नैं लोकां नैं ग्लाणा लग्गा, “हफ्ते दे छे दिन हन, जिन्हां च कम्म करणा चाइदा, इन्हां दिनां ई चंगाई लेणी चाइदी ना कि बिस्रामे आल़े दिने।” 15एह़ सुणी नैं प्रभु यीशुयैं जवाब दित्ता, “हे पाखंडी माणुओ, क्या बिस्रामे आल़े दिनैं तुहां च हर इक्क अपणे दांदे या गधे जो घराल़ा ते खोली करी पाणी पियाणा नीं लेई जांदा? 16तां एह़ जणांस जेह्ड़ी अब्राहमे दे वंशे ते ऐ, कने जिसा जो सैताने ठारा साल्लां ते बन्नी रखेया, क्या बिस्रामे आल़े दिने तिस बंधने ते छड्डाणा ठीक नीं था?” 17जाह़लू यीशुयैं एह़ गल्लां ग्लाईयां, तां तिसदे सारे बरोधी सर्मिंदा होई गै, सारी भीड़ यीशुये दे जरिये कित्यो सामर्थी दे कम्मां जो दिक्खी करी खुस होई।

राईया दे दाणे दा उदारण

(मत्ती 13:31-32; मरकुस 4:30-32)

18भिरी यीशुयैं इक्क होर उदारण देई नैं ग्लाया, “परमात्मे दा राज्ज कुस साइआं ऐ? कने मैं तिसदी तुलणा कुस नैं करैं? 19सैह़ राईया दे इक्की दाणे साइआं ऐ, जिसियो माणुयैं लेई करी अपणे बागे च बाया, कने सैह़ बधी करी रूख बणी गेआ; कने अम्बरे दे पंछियां तिसदियां डाल़िआं पर बसेरा कित्ता।”

खमीरे दा उदारण

(मत्ती 13:33)

20यीशुयैं दुवारी भिरी उदारण देई नैं ग्लाया, “मैं परमात्मे दे राज्जे दी तुलणा कुस नैं करैं? 21सैह़ तिस खमीरे साइआं ऐ, जिसियो कुणकी जणासा लेई नैं तीई किलो आटे च मलाई दित्ता कने हुंदे-हुंदे सैह़ सारा आटा खमीर बणी गेआ।”

संगड़ा दरवाजा

(मत्ती 7:13,14,21-23)

22यीशु सैहरे-सैहरे, कने चेलेयां सौगी ग्रांऐ-ग्रांऐ च होई नैं सिक्षा दिंदा-दिंदा यरूशलेम सैहरे दे पास्से जा दा था, 23तां तित्थु इक्की माणुये तिसते पुछया, “हे प्रभु, क्या थोड़े ई लोक उद्धार पांगे?” एह़ सुणी करी यीशु तिस नैं ग्लाणा लग्गा, 24“तुहां परमात्मे दे राज्जे च संगड़े दरवाजे ते अंदर जाणे दी कोसस करा, क्जोकि मैं तुहां नैं सच्च ग्लांदा ऐ, कि मते अंदर जाणा तां चांह़गे, कने सैह़ अंदर नीं जाई सकगे। 25जाह़लू परमात्मा जेह्ड़ा घरे दा मालक ऐ, उठी नैं दरवाजे बंद करी दैं, कने तुहां बाहर खड़ोई करी रोंदे पीटदे दरवाजे खोलणे जो ग्लान, ‘हे प्रभु, अहां तांई दरवाजे खोली देआ,’ कने सैह़ जवाब दिंगा, मैं तुहां जो नीं जाणदा, तुहां कुत्थू दे हन? 26ताह़लू तुहां ग्लाणा, ‘अहां कने तिज्जो सामणै खादा पीता कने तैं अहां दे बजारां च सिक्षा दित्ती।’ 27अपर सैह़ ग्लांगा, मैं तुहां नैं ग्लांदा ऐ, ‘मैं नीं जाणदा तुहां कुत्थू ते हन। हे बुरे कम्मां करणे आल़ेयो, तुहां सारे मिन्जो ते दूर हन।’ 28जाह़लू तुहां अब्राहमे जो, इसहाके जो, याकूबे जो कने सारे भविष्यवक्तां जो परमात्मे दे राज्जे च बैठेयो, कने अपणे आप्पे जो बाहर कड्डदे होये दिक्खगे; जित्थु रोणा कने दंद पीणा हुंगा। 29ताह़लू सारे संसारे ते दूईआं जातिआं दे लोक परमात्मे दे राज्जे च आई नैं धामा च अपणी जगाह लैणां ओंगे। 30कने दिक्खा, जेह्ड़े इस संसारे च अपणे आप्पे जो म्हान समझदे हन, सैह़ परमात्मे दिया नजरा च नीच हुंगे; कने जिन्हां जो संसारे दे लोक नीच समझदे हन, सैह़ परमात्मे दिया नजरा च म्हान हुंगे।”

हेरोदेस राजे दी दुशमणी

31तिस बग्त कुच्छना फरीसियां आई नैं तिस नैं ग्लाया, “ऐत्थु ते निकल़ी करी चली जा, क्जोकि हेरोदेस राजा तिज्जो मारी दैणा चांह़दा ऐ।” 32यीशुयैं तिन्हां नैं ग्लाया, “तिस माणुये नैं जेह्ड़ा लोमड़िया साइआं चलाक ऐ, जाई नैं ग्लाई देआ, कि दिक्ख, मैं अज्ज भी कने कल भी दुष्टआत्मां जो कड्डदा कने बमारियां जो ठीक करदा ऐ, कने त्रीये दिने अपणा कम्म पूरा करगा। 33भिरी भी एह़ जरूरी ऐ, कि मैं अज्ज कने कल कने परसुं सफर करैं, क्जोकि एह़ होई नीं सकदा कि कुसी भी भविष्यवक्ता दा खून यरूशलेम सैहरे ते बाहर होयैं।

यरूशलेम सैहरे तांई विलाप

(मत्ती 23:37-39)

34“हे यरूशलेम सैहरे दे लोको। तुहां जेह्ड़े भविष्यवक्तां मारी दित्ते हन, कने जेह्ड़े तुहां अल्ल घल्लेयो, तिन्हां पर पत्थर मारदे हन। कितणी ई बरी मैं एह़ सोचेया कि जिंआं कुक्ड़ी अपणे बच्चेयां जो अपणे पंखा थल्लैं किठ्ठा करी नैं सम्भाल़ी करी रखदी ऐ, तिंआं मैं भी तुहां दे जागतां जो किठ्ठा करी सम्भाल़ी लैं, अपर तुहां लोकां नीं चाया। 35दिक्खा, तुहां दा घर तुहां तांई उजाड़ छड्डी जांदा ऐ, कने मैं तुहां नैं ग्लांदा ऐ जाह़लू तिकर तुहां नीं ग्लांगे, धन हन सैह़, जेह्ड़े प्रभु दे नांऐ ते ओंदे हन, ताह़लू तिकर तुहां मिन्जो भिरी कदी भी नीं दिक्खगे।”

Currently Selected:

लूका 13: XNR

Highlight

Copy