यूहन्ना 12
12
यीशुये दे पैरां च इत्तर पाणा
(मत्ती 26:6-13; मरकुस 14:3-9)
1यीशु फसह दे त्योहारे दे छे दिन पैहल्लैं बैतनिय्याह ग्रांऐ च आया, जित्थु लाजर था, जिसियो यीशुयैं मरेयां ते जिन्दा कित्या था। 2तित्थु तिन्हां तिस तांई राती दा खाणा बणाया, कने मार्था तिसदी सेवा करा दी थी, कने लाजर तिन्हां च इक्क था, जेह्ड़ा तिस सौगी खाणा-खाणा बैठेया था। 3ताह़लू मरियमा जटामानसिया दा लगभग अधा लीटर कीमती खुसबुदार इत्तर लेई नैं यीशुये दे पैरां पर मल़ेया, कने अपणे बाल़ां नैं तिसदे पैर पुंज्जे, कने इत्तरे दिया खुसबुया नैं सारा घर खुसबुदार होई गेआ। 4अपर तिसदे चेलेयां च यहूदा इस्करियोती नांऐ दा इक्क चेला जेह्ड़ा तिसियो पकड़ुआणे आल़ा था, ग्लाणा लग्गा, 5“एह़ कीमती इत्तर त्रै सौ दीनार च बेची नैं गरीबां जो क्जो नीं दित्ता?” 6तिन्हीं एह़ गल्ल इसतांई नीं ग्लाई कि तिसियो गरीबां दी फिकर थी अपर इसतांई कि सैह़ चोर था, कने तिस अल्ल तिन्हां दे पैसेयां दी झोल़ी रैंह्दी थी, कने तिसा च जेह्ड़ा कुच्छ पांदे थे, सैह़ कड्डी लैंदा था। 7यीशुयैं ग्लाया, “इसायो परेसान मत करा, कने जेह्ड़ा करा दी इसायो करणा देआ, क्जोकि एह़ मेरे अन्तिम संस्कार दी त्यारी तांई ऐ, 8क्जोकि गरीब तां तुहां सौगी हमेसा रैंह्दे हन, अपर मैं तुहां सौगी हमेसा नीं रैंह्गा।”
लाजरे जो जान्नी ते मारने दी साजस
9जाह़लू यहूदी लोकां दिया भीड़ा जो पता लग्गी गेआ कि सैह़ तित्थु ऐ, तां सैह़ ना सिर्फ यीशु दिया बज़ाह ते आये अपर इसतांई भी कि लाजरे जो भी दिक्खणा आये, जिसियो तिन्हीं मरेयां च जिन्दा कित्या था। 10ताह़लू प्रधान याजकां लाजरे जो भी मकाणे दी साजस रची। 11क्जोकि तिसदिया बज़ाह ते मते यहूदी लोक चली गै, कने यीशु पर बसुआस कित्ता।
यरूशलेम सैहरे च विजय - प्रवेश
(मत्ती 21:1-11; मरकुस 11:1-11; लूका 19:28-40)
12दूँये दिने मते सारे लोकां जेह्ड़े त्योहारे च आएयो थे, एह़ सुणी करी, कि यीशु यरूशलेम सैहरे च औणां लगेया ऐ। 13इसतांई तिन्हां खजूरे दियां डाल़िआं लियां कने तिस नैं मिलणा चली पै, कने जोरे नैं ग्लाणा लग्गे, “परमात्मे दी स्तुति करा जेह्ड़ा सुअर्गे च ऐ। धन ऐ इस्राएले दा राजा, जेह्ड़ा प्रभु दे नांऐ ते ओआ दा ऐ।”
14जाह़लू यीशुये जो गधे दा इक्क बच्चा मिल्ला; तां सैह़ तिस पर बेई करी यरूशलेम सैहरे जो आई गेआ, जिंआं पवित्रशास्त्रे च लिख्या ऐ।
15“हे यरूशलेम सैहरे दे लोको,
मत डरा;
दिक्खा, तुहां दा राजा गधे दे बच्चे पर सवारी करी नैं ओआ दा ऐ।”
16यीशुये दे चेले पैहल्लैं इन्हां गल्लां जो नीं समझेयो थे, अपर जाह़लू यीशु दी महिमा प्रगट होई, तां तिन्हां जो याद आया कि एह़ गल्लां तिसदे बारे च लिखियां थियां; कने लोकां तिस नैं इस तरांह दा बर्ताब कित्ता था। 17ताह़लू भीड़ा देयां लोकां जेह्ड़े तिस बग्त तिस सौगी थे एह़ गवाही दित्ती, जाह़लू तिन्हीं लाजरे जो कब्रा ते सद्दी नैं, मरेयां च जिन्दा कित्या था। 18इसा बज़ाह ते लोक तिस नैं मिलणा चली आएयो थे क्जोकि तिन्हां सुणेया था कि तिन्हीं एह़ चमत्कार दस्सेया ऐ। 19ताह़लू फरीसी माणु अप्पु च ग्लाणा लग्गे, “दिक्खा, तुहां लोक कुच्छ नीं करी सकदे हन; सुणा, सारा संसार तिस पचांह़ चली पेआ ऐ।”
यूनानी माणुआं दा यीशुये जो तोपणा
20जेह्ड़े लोक तिस त्योहारे च अराधना करणा आएयो थे तिन्हां च कुच्छ यूनानी लोक थे। 21तिन्हां गलील प्रदेसे दे बैतसैदा सैहरे दे रैहणे आल़े फिलिप्पुसे अल्ल आई नैं तिस नैं विणती कित्ती, “श्रीमान, अहां यीशुये नैं मिलणा चांह़दे हन।” 22फिलिप्पुसैं आई नैं अन्द्रियासे नैं ग्लाया, ताह़लू अन्द्रियासे कने फिलिप्पुसे जाई नैं यीशुये नैं ग्लाया। 23इसा गल्ला पर यीशुयैं तिन्हां नैं ग्लाया, सैह़ बग्त आई गेआ ऐ, कि माणुये दे पुत्तरे दी महिमा होयैं। 24मैं तुहां नैं सच्च-सच्च ग्लांदा ऐ, कि जाह़लू तिकर कणका दा दाणा जमीना च पेई नैं मरी नीं जांदा, ताह़लू तिकर इक्क ई रैंह्दा ऐ। अपर जाह़लू मरी जांदा ऐ, तां मते दाणेयां जो पैदा करदा ऐ, तिंआं ई मिन्जो सौगी भी हुंगा। 25जेह्ड़ा अपणे प्राणा जो प्यारा जाणदा ऐ, सैह़ तिन्हां जो गुआई दिंदा ऐ; कने जेह्ड़ा इस संसारे च अपणे प्राणा जो प्यारा नीं जाणदा ऐ, सैह़ सदा दी ज़िन्दगी तांई तिसदी रखवाल़ी करगा। 26जे कोई मेरी सेवा करणा चां, तां सैह़ मेरा चेला बणैं; कने जित्थु मैं ऐ, तित्थु मेरा चेला भी हुंगा। जे कोई मेरी सेवा करैं, तां पिता तिसदा आदर करगा।
अपणिया मौत्ती दे बारे च भविष्यवाणी
27“हुण मेरा जी बड़ा बेचैन ऐ। इसतांई हुण मैं क्या ग्लां? ‘हे पिता, मिन्जो इस दुखे दे बग्ते ते बचा?’ अपर मैं इस संसारे च तां आया कि दुख झेलैं कने अपणे प्राण दैं। 28हे पिता, अपणे नांऐ दी महिमा कर।” ताह़लू परमात्मैं सुअर्गे ते एह़ ग्लाया, “मैं तिसदी महिमा कित्ती ऐ, कने भिरी भी करगा।” 29ताह़लू जेह्ड़े माणु खड़ोई नैं सुणा दे थे तिन्हां ग्लाया कि अम्बर गरजेया ऐ। होर ग्लाणा लग्गे, “कोई सुअर्गदूत तिस नैं गल्लां करा दा ऐ।” 30इस गल्ला पर यीशुयैं ग्लाया, “एह़ उआज़ मिन्जो तांई नीं, अपर तुहां तांई आईयो ऐ। 31हुण इस संसारे दा न्याय हुंदा ऐ, हुण इस संसारे दा अधिकारी कड्डी दित्ता जांगा ऐ; 32कने मैं जे धरतिया ते ऊचिया जगाह चढ़ाया जांगा, तांजे सबना जो अप्पु अल्ल लेई ओंगा।” 33इआं ग्लाई नैं तिन्हीं एह़ दस्सी दित्ता कि सैह़ कदेई मौत्त मरगा। 34इसा गल्ला पर लोकां तिस नैं ग्लाया, “अहां सास्त्रां दी एह़ गल्ल सुणी ऐ कि मसीह हमेसा जींगा, भिरी तू क्जो ग्लांदा ऐ, कि माणुये दे पुत्तरे जो ऊंचे पर चढ़ाया जाणा जरूरी ऐ? एह़ माणु दा पुत्तर कुण ऐ?” 35यीशुयैं तिन्हां नैं ग्लाया, “जोत्ती हुण थोड़ी देर तिकर तुहां सौगी ऐ। जाह़लू तिकर जोत्ती तुहां सौगी ऐ ताह़लू तिकर चली रेह्आ, इआं नीं होयैं कि नेहरा तुहां जो आई नैं घेरी लैं; जेह्ड़ा नेहरे च चलदा ऐ सैह़ नीं जाणदा कि कतांह चलेया ऐ। 36जाह़लू तिकर जोत्ती तुहां सौगी ऐ, जोतिया पर बसुआस करा तांजे तुहां जोत्ती दी औलाद बणन।” एह़ गल्लां ग्लाई नैं यीशु चली गेआ कने तिन्हां ते दूर रेह्आ।
यहूदियां दा बेबसुआसे च बणी रैहणा
37तिन्हीं तिन्हां सामणै इतणे चमत्कार दस्से, तमी तिन्हां तिस पर बसुआस नीं कित्ता; 38तांजे यशायाह भविष्यवक्ता दा वचन पूरा होयैं जेह्ड़ा तिन्हीं ग्लाया:
“हे प्रभु अहां दे सुसमाचारे पर कुणी बसुआस कित्ता ऐ?
कने प्रभु दी बांई दा जोर कुणी दिख्या ऐ?”
39इसा बज़ाह ते सैह़ बसुआस नीं करी सके, क्जोकि यशायाह एह़ भी ग्लाया;
40“तिन्हीं तिन्हां दियां अखीं अन्नियां,
कने तिन्हां दा मन कठोर करी दित्यो हन;
कुत्थी इआं नीं होयैं कि सैह़ अखीं नैं दिक्खन
कने मने नैं समझन, कने फिरन,
कने मैं तिन्हां जो ठीक करैं।”
41यशायाहें एह़ गल्लां इसतांई ग्लाईयां कि तिन्हीं तिसदी महिमा दिक्खी, कने तिन्हीं यीशुये दे बारे च गल्लां कित्तियां।
42तमी अधिकारियां च भी मतेआं तिस पर बसुआस कित्ता, अपर फरीसी माणुआं दिया बज़ाह ते नीं मनदे थे, तांजे इआं नीं होयैं कि सैह़ आराधनालय ते कड्डी दित्ते जान; 43माणुआं दिया तरफा ते तारीफ तिन्हां जो परमात्मे दिया तारीफा ते जादा बधिया लगदी थी।
यीशुये दे वचन न्याय दी बुनियाद
44यीशुयैं भीड़ा दे लोकां जो जोरे नैं ग्लाया, “जेह्ड़ा मिन्जो पर बसुआस करदा ऐ, सैह़ मिन्जो पर नीं अपर मिन्जो घल्लणे आल़े पर बसुआस करदा ऐ। 45कने जेह्ड़ा मिन्जो दिक्खदा ऐ, सैह़ मेरे घल्लणे आल़े जो दिक्खदा ऐ। 46मैं संसारे च जोत्ती बणी नैं आया ऐ, तांजे जेह्ड़ा कोई मिन्जो पर बसुआस करैं सैह़ नेहरे च नीं रैंह्। 47जे कोई मेरे वचनां जो सुणी नैं नीं मने, तां मैं तिसियो अपराधी नीं ठैहरांदा; क्जोकि मैं संसारे जो अपराधी ठैहराणे तांई नीं, अपर संसारे दे लोकां दा उद्धार करणे तांई आया ऐ। 48जेह्ड़ा मिन्जो तुच्छ जाणदा ऐ कने मेरियां वचनां जो नीं अपनांदा ऐ तिसियो अपराधी ठैहराणे आल़ा तां इक्को ई ऐ; मतलब जेह्ड़ा वचन मैं ग्लाया ऐ, सैई पिछले दिनां च तिसियो अपराधी ठैहरांगा। 49क्जोकि मैं अपणिया तरफा ते गल्लां नीं कित्तियां; अपर पिता जिन्हीं मिन्जो घल्लेया ऐ, तिन्हीं मिन्जो हुक्म दित्या ऐ कि क्या-क्या ग्लां कने क्या-क्या बोलें? 50कने मैं जाणदा ऐ, कि तिसदा हुक्म सदा दी ज़िन्दगी दिंदा ऐ। इसतांई मैं जेह्ड़ा कुच्छ ग्लांदा ऐ, सैह़ जिंआं पितैं मिन्जो नैं ग्लाया ऐ तिंआं ई ग्लांदा ऐ।”
Currently Selected:
यूहन्ना 12: XNR
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
