मत्ती 20

बारी रै मजदूरा रा उदाहरण

1 स्वर्गा रा राज्य एकी ज़मींदारा सांही सा, ज़ो दोथी-दोतियै आपणै अँगूरै रै बगीच़ै नौठा कि सौ तौखै मज़दूरा बै लाला। 2तेइयै मज़दूरा बै एक रोज़ा री धिहाड़ी पैंधै रखिया ते अँगूरा रै बगीच़ै बै कोम केरदै भेज़ै।

3 सौ लगभग नोऊ बाज़ै भी घौरा न निकलू होर तेइयै हेरू कि किछ़ लोका चौराहे न बेकार खड़ै सी। 4तैबै तेइयै तिन्हां बै बोलू, “तुसै भी मेरै अँगूरै रै बगीच़ै बै ज़ाआत्, मूँ तुसाबै ज़ो सही होला, सौ देणा।” 5तैबै ते बी बगीच़ै बै कोमा केरदै नौठै।

लगभग बारा बाज़ै होर त्रा बाज़ै भी तेइयै तैण्ढाऐ केरू। 6लगभग पौंज़ बज़णू आल़ै ती सौ भी घौरा न नौठा होर तेइयै भी किछ़ लोका बज़ारा न औरै-पौरै खड़ै हेरै, होर तिन्हां न पुछ़ू, तुसै औखै पूरी ध्याड़ किबै बेकार खड़ै रौहा सी? तिन्हैं तेइबै बोलू, किबैकि, आसै कौसियै ध्याड़ी पैंधै नी लाऐ।

7तेइयै तिन्हां बै बोलू, “तुसै भी मेरै अँगूरै रै बगीच़ै ज़ाआत् होर कोम केरा।”

8 “ज़ैबै सौंझ़ हुई ता अँगूरा रै बगीच़ै रै मालकै आपणै मुन्शी बै बोलू, मज़दूरा बै शाधिया ज़ो बादा न लाऐ ती तिन्हां न शुरू केरिया ज़ो पैहलै लाऐ ती तिन्हां सैभी री मज़दूरी चुकती केर।”

9 ज़ुणा मज़दूर लगभग पौंज़ आऐ ती, होर तिन्हां सैभी बै भी एकी रोजै री ध्याड़ी धिनी। 10तैबै ज़ुणा पैहलै आऐ ती, होर तिन्हैं सोच़ू कि आसाबै बोहू मिलणा पर तिन्हां हर एकी बै भी एकी रोज़ा री ध्याड़ी मिली। 11तिन्हैं सिक्कै ता लेऐ पर ते ज़मींदारा पैंधै कुड़कुड़ाइया बोलदै लागै, 12ज़ो बादा न लागै ती तिन्हैं सिर्फ़ एक घँटा कोम केरु, होर तैं तिन्हां बै बी एक रोज़ै री ध्याड़ी धिनी, ज़ैबैकि आसै पूरी ध्याड़ धूपै न मेहनत केरी।

13 तैबै ज़मींदारै तिन्हां न एकी बै ज़वाब धिना, “सैंघी मैं तौ सैंघै कोई हेर-फेर नी केरी। कि आसै ऐ गैल नी ती केरी ती कि मूँ तौभै एक रोज़ै री ध्याड़ी देणी? 14ज़ो तेरा बणा सा तेइबै नेह होर ज़ा। हांऊँ बादा न लागैदै मज़दूरा बै भी ऐतरी मज़दूरी देणा चाहा सा ज़ेतरी तौभै देणी लाई सा। 15कि मुँभै आपणै धना पैंधै हक नी ऑथि। हांऊँ शोभला सा तौभै ऐथा न जलन नैंई होंणी चेहिऐ।”

16 “पर ज़ो ऐबरै आपणै आपा बै बड़ै बणा सी, काल रोज़ ते होछ़ै केरिनै, होर ज़ो होछ़ै सी ते काल रोज़ बड़ै केरिनै। सैभ लोका परमेश्वरै हमेशा री ज़िन्दगी री तैंईंयैं शाधै सी, पर किछ़ तेइयै चुनै सी।”

आपणी मौऊती रै बारै न यीशु री त्रीजी भविष्यवाणी

17ज़ैबै यीशु आपणै बारा च़ेले सैंघै यरूश्लेम शैहरा बै ज़ाँदा लागा ती ता तेइयै ते सुनसान ज़ैगा बै नेऐ होर गैला ढूणदा लागा 18“शुणा, आसै यरूश्लेम शैहरा बै च़ौलै सी। तौखै मांहणु रा बेटा (यीशु) मुख्यपुरोहित होर शास्त्री रै हौथा न देइणा। तिन्हां तेइबै मौऊत री सज़ा देणी। 19तैबै सौ होरी ज़ाति रै हौथा न देइणा कि ते तेइरा मज़ाक उड़ालै होर तेइबै कोड़ै मारलै होर क्रूसा पैंधै च़ढ़ालै पर तेई त्रीज़ै ध्याड़ी भी ज़िन्दै होंणा।”

एक आमा री प्रार्थना

20तैबै जब्दी रै बेटै याकूब होर यूहन्ना री आमा आपणै बेटै सैंघै यीशु हागै आई होर तेइबै प्रणाम केरिया, तेईन किछ़ मुँगदी लागी।

21यीशुऐ तेसा न पुछ़ू, “तू कि चाहा सा?” तेसै बोलू, “मुँभै ऐ दै, कि मेरै ऐ दूई बेटै तेरै राज्य न एक दैहिणी धिरै होर एक बांऊँई धिरै बैशलै।”

22यीशुऐ ज़वाब धिना, “तुसै नी ज़ाणदै कि तुसै कि लागै सी मुँगदै? कि तुसै तेई दु:खा बै सौही सका सी ज़ुणी दुःखा बै हांऊँ सौहणु आल़ा सा?” तिन्हैं तेइबै बोलू, “हाँ आसै सौही सका सी।”

23 यीशुऐ तिन्हां बै बोलू, “तुसै कि मूँ सांही दु:ख सौही सका सी पर दैहिणै बाँऊऐ बेशणै रा हक देणु आल़ा हांऊँ नी ऑथि पर परमेश्वर पिता सा। तेइयै ज़ौसरी तैंईंयैं त्यार केरू सा ते बैशी सका सी।”

24ऐ शुणिया दस च़ेले याकूब होर यूहन्ना री झ़िक केरदै लागै 25तैबै यीशुऐ तिन्हां बै आपु हागै शाधिया बोलू, “तुसै ज़ाणा सी कि, ज़ुण दुज़ी ज़ाति रै अधिकारी बुझ़िया सी, ते तिन्हां पैंधै आपणा अधिकार च़ला सी होर तिन्हां मौंझ़ै ज़ुण बड़ै सी, तिन्हां पैंधै अधिकार रखा सी। 26पर तुसा बिच़ै न ऐण्ढा नी लोड़ी हुआ बल्कि तुसा मौंझ़ै ज़ो बड़ा बणना च़ाहला सौ तुसरा सेवक बणला। 27होर ज़ो कोई प्रधान बणना च़ाहला सौ तुसरा दास बणला। 28मांहणु रा बेटा तैबै नी आऊ, कि तेइरी सेवा केरी लोड़ी, पर तैबै आऊ कि सैभी री सेवा केरनी होर बोहू लौका बै छ़ुड़ाणै री तैंईंयैं।”

दुई कांणै रा उदाहरण

29ज़ैबै तै यरीहो नगरा हागै ज़ाँदै लागै ती, ता लोकै री बोहू बड़ी भीड़ तेई पिछ़ै च़ली। 30तौखै बौतै रै कनारै दूई कांणै भिखारी सड़का रै कनारै बेठै ती, ज़ैबै तिन्हैं शुणू कि तिसै यीशु ज़ाँदा लागा सा ता ते चिल्लाँदै लागै, “ओ प्रभु, राज़ा दाऊदै री औलाद आसा पैंधै दया केर।”

31पर भीड़ै रै लोकै तिन्हां बै धमकाइआ च़ुप रौहणै बै बोलू पर ते होर बी ज़ोरा सैंघै चिल्लाँदै लागै, “प्रभु! दाऊदै रै बेटै आसा पैंधै दया केर।”

32तैबै यीशु रुकु होर तिन्हां बै बोलू, “तुसै कि चाहा सी कि हांऊँ तुसरी तैंईंयैं कि केरनु?” 33तिन्हैं यीशु बै बोलू, “ओ प्रभु आसै हेरना चाहा सी।” 34यीशु बै तिन्हां पैंधै दया आई। यीशुऐ तिन्हरी औछ़ी छ़ुँगी होर ते एकदम हेरदै लागै होर ते यीशु पिछ़ै औंढदै लागै।

Currently Selected:

मत्ती 20: KFX-NT

Highlight

Copy