लूका 15

राहुईदी भेड़ा रा उदाहरण

1सारै च़ुँगी लेणु आल़ै होर पापी मांहणु यीशु हागै तिन्हरी गैला शुणदै एज़ा केरा ती। 2तैबै किछ़ फरीसी होर शास्त्री आपु न कुड़कुड़ाइया बोलदै लागै, “ऐ ता पापी मांहणु सैंघै मिला सा होर तिन्हां सैंघै बैशिया खा-पीया सा।” 3तैबै यीशुऐ तिन्हां बै ऐ उदाहरण दैसु। 4“तुसा मौंझ़ै कुण फुआल ऐण्ढा सा ज़ुणी हागै शौऊ भेड़ा सी होर तिन्हां मौंझ़ै न एक भेड़ राहइली, ता सौ तिन्हां नढ़ीनुऐ भेड़ा बै बौणा न छ़ौड़िआ तेसा राहुइदी भेड़ा बै तैबै तैंईंयैं नी तोपला ज़ैबै तैंईंयैं सौ तेइबै नी मिलदी। 5होर ज़ैबै तेई फुआला बै सौ भेड़ मिला सा ता सौ फुआल ऐतरा खुश होईया तेसा भेड़ा बै आपणै कौन्हा पैंधै च़का सा। 6होर घौरा एज़िया आपणै सैभी सैंघी होर पड़ेशी बै कठा केरिया बोला सा, ‘मूँ सैंघै खुशी मनात्, किबैकि मेरी एक भेड़ राहुईदी ती होर ऐबै सौ मुँभै मिली।’ 7हांऊँ तुसाबै बोला सा, ज़ैबै एक पापी मांहणु आपणै पाप छ़ौड़िआ मन बदलिया परमेश्वरा धिराबै एज़ा सा ता स्वर्गा न तेई पापी मांहणु री तैंईंयैं ऐतरी खुशी मनाईया सा ज़ेतरी कि नढ़ीनुऐ धर्मी मांहणु री तैंईंयैं नी मनाँइदी।

राहुऐदै सिक्के रा उदाहरण

8 “तुसा मोंझ़ै कुण ऐण्ढी बेटड़ी सा ज़ौस हागै दस सिक्कै सी होर तेथा न एक सिक्का राहिला होर सौ बेटड़ी लाम्प पकेइया होर घौरा बै झाड़ी-बुहारिया तेई सिक्कै बै ताँ तैंईंयैं नी तोपली ज़ाँ तैंईंयैं कि सौ नी मिलला। 9हेरा ज़ैबै तेसा बेटड़ी बै सौ सिक्का मिला सा, ता सौ आपणी सैंघणी होर पड़ेशी बै कठा केरिया बोला सा, ‘मूँ सैंघै खुशी मनात् किबैकि मेरा एक सिक्का राहुआदा ती होर ऐबै सौ मुँभै मिलू।’ 10हांऊँ तुसाबै बोला सा ठीक ऐण्ढै तैरहै पाप छ़ौड़िआ मन बदलनू आल़ै एकी पापी मांहणु री तैंईंयैं परमेश्वरै रै स्वर्गदूता सामनै खुशी मनाँइणी।”

बिगड़ेदै बेटै रा उदाहरण

11तेथा न बाद यीशुऐ तिन्हां लोका बै एक होर उदाहरण दैसू, एकी मांहणु रै दुई बेटै ती। 12तिन्हां मोंझै न होछ़ै बेटै आपणै बापू बै बोलू, ओ बापू ज़ी, ज़ायज़ादा न ज़ो मेरा हिस्सा बैणा सा तेई तुसै मुँभै दैआत्। तैबै तेई बापूऐ आपणै दुही बेटै बै आपणी ज़ायज़ाद बोंडिया धिनी। 13किछ़ रोज़ा बाद होछ़ै बेटै आपणी सारी ज़ायज़ाद बैच़ी होर घौर छ़ौड़िआ सारै ढैबुऐ कठा केरिया दूर देशा बै नौठा। तौखै तेइयै आपणै सारै ढैबुऐ मौऊज़ मस्ती होर बुरै-बुरै कोमा न खर्च़ केरै। 14ज़ैबै तेइरै सारै ढैबुऐ खत्म हुऐ ता तेई देशा न रूड़ पौई होर सौ भूखै मौरदा लागा। 15तैबै सौ शोहरू तेई देशै रै एकी सेठा हागै कोम मुँगदा नौठा होर तेई सेठै सौ शोहरू आपणै छेता बै सूँगर च़ारदा भेज़ू। 16किबैकि तेइबै बोहू भूख लागी ती होर सौ चाहा ती कि ज़ुणा फ़ौल़ी बै सौ सूँगरा बै खाँणै बै देआ ती तिन्हां खाईया आपणा पेट भौरला होर तेइबै कोई किछ़ नी ती देंदा। 17ज़ैबै सौ शोहरू आपणी होशी न आऊ, तैबै सौ सोच़दा लागा कि मेरै बापु रै घौरा न केतरै मज़दूर सी ज़ुणिबै कि ज़रूरती न ज़ादा खाँणै बै मिला सा होर हांऊँ औखै भूखै मौरदा लागा सा, 18ऐबै मूँ उठिया आपणै बापू रै घौरा बै ज़ाणा होर तिन्हां बै बोलणा, बापू ज़ी मैं परमेश्वर होर तुसरै खिलाफ़ पाप केरू सा। 19ऐबै हांऊँ तुसरा बेटा बोलणै रै लायक नी रौहू। मुँभै तुसै आपणै घौरा न नोकरा सांही रखा।

20 तैबै सौ उठिया, आपणै बापू रै घौरा बै च़लू। हाज़ी सौ आपणै घौरा न थोड़ी दूर ती, कि तेइरै बापूऐ सौ हेरू होर बापू बै तेई पैंधै दया आई, तैबै सौ बापू ठोर मारिया आपणै बेटै रै गौल़ै मिलू होर तेइबै माँकी धिनी। 21तैबै तेई बेटै बापू बै बोलू, ओ बापू ज़ी, ऐबै हांऊँ तुसरा बेटा बोलणै रै लायक नी रौहू किबैकि मैं परमेश्वर होर तुसरै खिलाफ़ पाप केरू सा। 22पर तेई बापूऐ आपणै नोकरा बै बोलू, शोभलै न शोभलै झिकड़ै आंणा होर ऐईरै लाआत्। ऐईरी हौथा न खानदानी मुँदड़ी होर ज़ोंघा न शोभलै बूट लाआत् 23होर धाचुएदै सैभी न शोभलै मोटै ज़ेही बौकरै बै आंणा होर काटा ताकि आसै सैभ मिलिया खालै होर खुशी मनालै। 24किबैकि मेरा ऐ बेटा मूँआ ती होर ऐबै ज़िन्दा हुआ सा। ऐ राहुआदा ती पर ऐबै मिलू सा। तैबै ते सबै खुशी मनाँदै लागै।

25 “ऐथा मौंझ़ै तेइरा बड़ा बेटा छेता न ती। ज़ैबै सौ घौरा बै आऊ ता तेइयै घौरा हागै पुजिआ बड़ी गिता-बाता शुणी। 26तैबै बड़ै बेटै एकी नोकरा न पुछ़ू, ऐ कि होंदा लागा सा? 27नोकरै एज़िया बोलू, ‘तुसरा भाई सही-सलामत घौरा बै वापस आऊ सा, होर बापूऐ तेइरै ऐणै री खुशी न बड़ी धाम त्यार कराई सा, होर आसै सैभ खुशी मनाँदै लागैदै सी।’ 28ऐसा गैल शुणिया बड़ा भाई झ़िकुआ होर सौ भीतरा बै नी नौठा। तैबै तेइरै बापूऐ सौ बाहरै एज़िया समझ़ाऊ होर आँध्रै ऐणै री तैंईंयैं अर्ज़ा केरी। 29तेइयै आपणै बापू बै ज़वाब धिना, ‘हेरा; हांऊँ ऐतरी बौर्षा न तुसरी सेवा केरदा लागा सा, होर तुसरी हरेक हुक्मा बै मनदा लागादा सा पर तैबै बी तुसै मेरी तैंईंयैं एक गौभु तैंईंयैं नी धिना कि हांऊँ आपणै सैंघी सैंघै खुशी मनाँदा। 30पर ज़ैबै तुसरा ऐ होछ़ा बेटा आपणी सारी धन-दौलता बै बुरै-बुरै कोमा न खत्म केरिया आऊ ता तुसै ऐईरी तैंईंयैं सैभी न शोभला मोटा ताज़ा बौकरा काटू होर लोका न धाम ख्याई।’ 31तैबै बापूऐ तेइबै बोलू, ओ मेरै प्यारे, बेटैआ तु ता हमेशा मूँ सैंघै रौहा सा होर ज़ो किछ़ मेरा सा सौ सैभ किछ़ तेराऐ ता सा। 32पर आसा ऐई रोज़ा न खुशी मनाणी किबैकि तेरा ऐ भाई ज़ो मूँआदा ती ऐबै ज़िन्दा हुआ सा; होर ज़ुण कि राहुआदा ती ऐबै मिलूदा सा।”

Currently Selected:

लूका 15: KFX-NT

Highlight

Copy