यूहन्ना 21

तिबिरियास झ़ीला रै बौड़ा च़ेले पैंधै प्रगट होंणा

1इन्हां गैला न बाद यीशु तिबिरियास झ़ीलै रै कनारै च़ेले रै सामनै आऊ, होर ऐण्ढी धिरै सामनै आऊ। 2शमौन पतरस, होर थौमा ज़ो दिदमुस बोलिया सा, गलीलै रै काना ग्राँ न नतनऐल, होर जब्दी रा बेटा होर तेइरै च़ेले न दुई होर मांहणु कठै हुऐ ती। 3शमौन पतरसै तिन्हां बै बोलू, “हांऊँ मैच्छ़ी डौकदा चौलू सा।” तिन्हैं तेइबै बोलू, “आसा भी तौ सैंघै ऐणा।” तैबै ते निकल़िया किश्ती पैंधै चढ़ै पर तेसा राती किछ़ भी नी ढौकु। 4आगलै रोज़ दोथ होन्देया यीशु कनारै पैंधै खड़ै हुऐ, तैबै भी च़ेले यीशु नी पछ़ियाणु कि ऐ यीशु सा।

5तैबै यीशुऐ तिन्हां बै बोलू, “ओ शोहरुओ कि तुसा हागै किछ़ खाँणै बै सा?” तिन्हैं ज़वाब धिना, “नैंई।”

6यीशुऐ तिन्हां बै बोलू, “किश्ती री दैईणी धिरै बै जाल शेटा ता, मिलणा।” तैबै तिन्हैं जाल शेटू, होर ऐबै मैच्छ़ी होंणै री बजहा सैंघै तिन्हरै जाल निसा खिंचुई।

7तैबै तेई च़ेले ज़ुणी सैंघै यीशु झ़ुरी डाआ ती, पतरसा बै बोलू, “ऐ ता प्रभु सा।” शमौन पतरसै ऐ शूणीया कि सौ प्रभु सा, चेकै न गाच़ी बौनी, किबैकि तेई बौगता तेइयै औधै टौलै लाये ती, होर नौई बै छलाँग धिनी। 8पर दुज़ै च़ेले किश्ती न मैच्छ़ी रा भौरुआन्दा जाल खिन्चदै लागै, किबैकि ते नौई रै कनारै न ज़ादा दूर नी ती ऑथि, पर लगभग दुई शौऊ हौथै री दुरी पैंधै ती। 9ज़ैबै ते कनारै पुज़ै ता तिन्हैं कोयलै री औगी पैंधै पकाइदी मैच्छ़ी डाई ती, होर रोटी हेरी।

10यीशुऐ तिन्हां बै बोलू, “ज़ो मैच्छ़ी तुसै ऐबै ढौकी सी तिन्हां न किछ़ आंणा।” 11ता शमौन पतरसै ढौन्गी पैंधै च़ढ़िया एक शौऊ त्रिऊजां बड़ी मैच्छ़ी, न भोरु होंदा जाल भौड़ा पैंधै बै खींच़ू, होर ऐतरी मैच्छ़ी होंदैआ भी जाल नैंई च़िरूआ। 12यीशुऐ तिन्हां बै बोलू, “एज़ा रोटी खा।” च़ेले न कोई बै हिम्मत नी हुई कि प्रभु न पुछ़ै, “तू कुण सा?” किबैकि ते ज़ाणा ती कि हो न हो ऐ प्रभु यीशु सा। 13यीशु आऊ होर रोटी आंणिआ तिन्हां बै धिनी, होर तैण्ढै मैच्छ़ी भी। 14ऐ त्रीजी घेरै ती कि प्रभु यीशु मौरू होंदै न जी उठणै न बाद च़ेले न हेरुआ।

यीशु होर पतरस

15रोटी खाँणै न बाद यीशुऐ शमौन पतरसा बै बोलू, “ओ शमौन, यूहन्ना रै बेटै, कि तू इन्हां न ज़ादा झ़ुरी मूँ सैंघै डाआ सा?” तेइयै यीशु बै बोलू, “जी प्रभु; तुसै ता ज़ाणा सी कि हांऊँ तुसा सैंघै झ़ुरी डाहा सा।” यीशुऐ तैबै बोलू, “मेरै मेमणु बै च़ार।”

16यीशुऐ दुज़ी बार भी बोलू, “ओ शमौन, यूहन्ना रै बेटै, कि तू मूँ सैंघै झ़ुरी डाआ सा?” तेइयै प्रभु बै बोलू, जी प्रभु जी तुसै ज़ाणा सी कि हांऊँ तुसा सैंघै झ़ुरी डाहा सा। प्रभुऐ तेइबै बोलू, “मेरी भेड़ै री पौहरी केर।”

17यीशुऐ त्रीजी बार भी बोलू, “ओ शमौन, यूहन्ना रै बेटै, कि तू मूँ सैंघै झ़ुरी डाआ सा?” पतरस दुःखी हुआ, कि प्रभुऐ त्रीजी बार ऐण्ढा बोलू, “कि तू मूँ सैंघै झ़ुरी डाहा सा?” होर तेइबै बोलू, “ओ प्रभु, तू ता सैभ किछ़ ज़ाणा सा कि हांऊँ तौ सैंघै झ़ुरी डाआ सा।” यीशुऐ तेइबै बोलू, “मेरी भेड़ा बै च़ार। 18हांऊँ तौभै सच़-सच़ बोला सा, ज़ैबै तू ज़ुआन ती, ता आपणा चेका बौनियाँ ज़ौखै चाहा ती तौखै फिरा ती, पर ज़ैबै तू खापरा होल्ला, ता आपणै हौथ फैलाणै, होर कोई दुज़ै तेरा चेका बौनियाँ ज़ौखै तू नैंई च़ाँहदा तौखै तू नेणा सा।” 19यीशुऐ इन्हां गैला लाईया इशारा केरू कि पतरसै कैण्ढी मौउती न परमेश्वरै री महिमा केरनी, होर तैबै यीशुऐ तेइबै बोलू, “मूँ पिछ़ै एज़।”

यीशु होर तेइरा प्यारा च़ेला

20पतरसै पिछ़ै हेरिया सौ च़ेला पिछ़ै ऐन्दा हेरू, ज़ुणी सैंघै यीशु झ़ुरी डाआ ती, होर ज़ुणियै फसह रै त्यौहारा री रोटी खाँदी घेरै यीशु री छाती धिरै टुँबड़ै होईया पुछ़ु ती, “ओ प्रभु तुसाबै ढौकणै धियाणु आल़ा कुण सा।” 21तेई हेरिया पतरसै यीशु बै बोलू, “ओ प्रभु, ऐईरा कि हाल होंणा सा?”

22यीशुऐ तेइबै बोलू, “अगर हांऊँ चाहनु कि सौ मेरै ऐणै तैंईंयैं ज़िन्दा रौहला, ता तौभै ऐईन कि? तू मूँ पिछ़ै औंढ।” 23तैबै ऐ गैल सैभी च़ेले न फैली कि तेई च़ेले नी मौरणा, तैबै भी यीशुऐ तेइबै ऐ नी बोलू कि ऐई नी मौरणा, पर ऐ भी कि, “अगर हांऊँ नी चाहनु कि ऐई मेरै ऐणै तैंईंयैं ज़िन्दा रौहणा, ता तौभै ऐईन कि?”

उपसंहार

24ऐ सौहै च़ेला ती, ज़ो इन्हां गैला री गुआही देआ सा, होर ज़ुणियै ऐ गैला लिखी सी, होर आसै ज़ाणा सी कि तेइरी गुआही सच़ी सा। 25होर बी बोहू कोम सी, ज़ो यीशुऐ केरै सी, अगर ते एक-एक केरिया लिखदे, ता हांऊँ समझा सा कि कताबा ज़ो लिखीणी ती तिन्हां दुनिया न बी नैंई ती औपड़ना।

Currently Selected:

यूहन्ना 21: KFX-NT

Highlight

Copy