यूहन्ना 19

1ऊँई पैंधै पिलातुसै यीशु बै कोड़ै लाणै धियाऐ। 2सिपाईयै कौन्डै रा मुकट बणाईया यीशु री मुँडी न लाऊ, होर बैंजनी टौला लाऊ, 3होर यीशु हागै एज़ी एज़िया बोल्दै लागै, “हे यहूदियै रै राज़ा, नमस्कार!” होर प्रभु बै थप्पड़ भी मारै। 4तैबै पिलातुसै भी बाहरै निकल़िया लोका बै बोलू, “हेरा, हांऊँ तेइबै तुसा हागै फिरी आंणा सा, कि तुसै ज़ाणलै कि हांऊँ ऐईन किछ़ भी दोष नैंई पान्दा।” 5तैबै यीशु कौन्डै रा मुकुट होर बैंजनी रंगा रा टौला लाऊ होंदा बाहरै आंणु, होर पीलातुसै तेइबै बोलू, “हेरा, ऐई मर्दा बै।” 6ज़ैबै मुख्यपुरोहिते होर पौहरैदारै सौ हेरू ता लेरा पाईआ बोलू, “ऐईबै क्रूसा पैंधै च़ढ़ा क्रूसा पैंधै च़ढ़ा!” पिलातुसै तिन्हां बै बोलू, “तुसै ऐईबै नेइया क्रूसा पैंधै च़ढ़ा, किबैकि हांऊँ ऐईन किछ़ भी दोष नैंई पांदा।”

7यहूदी नेतै तेइबै बोलू, “आसरा बी कनून सा होर तेस कनूनै रै मुताबक ऐ मारणै रै सांही सा, किबैकि ऐईयै आपु बै परमेश्वरा रा बेटा बोलू सा” 8ज़ैबै पिलातुसै ऐ गैला शूणी ता सौ होर बी बोहू डौरू। 9होर फिरी गढ़ा आँध्रै बै नौठु, होर यीशु बै बोलू, “तू कौखला सा?” पर यीशुऐ तेइबै किछ़ भी ज़वाब नैंई धिना। 10तैबै पिलातुसै यीशु बै बोलू, “मुँभै किबै नैंई दसदा? कि तू नैंई ज़ाणदा, कि तौभै छ़ौड़नै रा अधिकार मुँभै सा, होर तौभै क्रूसा पैंधै च़ढ़ाणै रा अधिकार भी मुँभै सा।”

11यीशुऐ बोलू, “अगर तौभै परमेश्वरा री तरफा न नैंई धिनु होंदा, ता तेरा मूँ पैंधै किछ़ भी अधिकार नैंई ती होंणा, तैबै ज़ुणियै हांऊँ तेरै हौथा न धिना सा तेइरा पाप तौ न ज़ादा सा।”

12तैबै पिलातुसै यीशु छ़ौड़ी देणा चाहू, पर यहूदियै ज़ोरै-ज़ोरै सैंघै बोलू, “अगर तू ऐईबै छ़ौड़ी देला, ता तू महाराज़ै रा सैंघी नी ऑथि, ज़ो कोई आपणै आपा बै राज़ा बणा सा सौ महाराज़ै रा बरोध केरा सा।”

13ऐ गैला शूणीया पिलातुसै यीशु बाहरै आंणु होर तेसा ज़ैगा न एक चबूतरा ती ज़ो इब्रानी न गब्बता बोलिया ती होर तौखै न्याय री ज़ैगा पैंधै बेठा। 14ऐ फसह री त्यारी रा रोज़ ती, होर ऐ लगभग धयाडी ती। तैबै तेइयै यहूदियै बै बोलू, “हेरा तुसरा राज़ा।”

15पर ते लेरा पाईआ बोलै, “नेया! नेया! ऐईबै क्रूसा पैंधै च़ढ़ा!” पिलातुसै तिन्हां बै बोलू, “कि मूँ तुसरा राज़ा क्रूसा पैंधै च़ढ़ाणा?” मुख्यपुरोहिते बोलू, “महाराज़ै बै छ़ौड़िआ आसरा होर कोई राज़ा नी ऑथि।” 16तैबै तेइयै यीशु तिन्हरै हौथा न धिना कि सौ क्रूसा पैंधै च़ढ़ाई जाला।

क्रूसा पैंधै च़ढ़ाणा

17तैबै तिन्हैं यीशु नेये, होर यीशु आपणा क्रूस च़किया तेस ज़ैगा तैंईंयैं बाहरै नौठै ज़ो खोपड़ी री ज़ैगा बोलिया ती होर इब्रानी न गुलगुता। 18तौखै तिन्हैं प्रभु यीशु सैंघै होर दुई मांहणु भी क्रूसा पैंधै च़ढ़ाऐ, एक एकी धिरै होर दुज़ी धिरै, होर बिच़ा न प्रभु यीशु।

19पिलातुसै एक दोषा री चिट्ठी लिखिया क्रूसा पैंधै लाऊ, होर तेथा न ऐ लिखू होंदा ती, “यीशु नासरी यहूदियै रा राज़ा।” 20ऐ दोष चिट्ठी बोहू यहूदियै पौढ़ी किबैकि सौ ज़ैगा ज़ौखै यीशु क्रूसा च़ढ़ाऊ ती यरूश्लेम शैहरा रै नेड़ ती, होर चिट्ठी इब्रानी होर लतीनी होर यूनानी न लिखू होन्दी ती। 21तैबै यहूदियै रै मुख्यपुरोहिते पिलातुसा बै बोलू, “यहूदियै रा राज़ा, मत लिख पर ऐ लिख कि तेइयै बोलू, हांऊँ यहूदियै रा राज़ा सा।” 22पिलातुसै ज़वाब धिना, “मैं ज़ो लिखू सा, सौ लिखू सा।” 23ज़ैबै सपाईये यीशु क्रूसा पैंधै च़ढ़ाऊ ती, यीशु रै टौलै लेइया च़ार हिस्से केरै, सैभी सपाई री तैंईंयैं एक हिस्सा, होर कुरता भी नेऊ, पर कुरता बिना सिउं होंदा ती ऊझै न पोर हेठै तैंईंयैं बुणू होंदा ती। 24तैबै तिन्हैं आपु न बोलू, “आसा ऐ नी चिरणा पर ऐथा पैंधै चिट्ठी भौरनी कि ऐई कुणी रा होंणा।” ऐ तैबै हुआ कि पबित्र शास्त्रा न ज़ो बोलू ती, सौ पूरा होला, “तिन्हैं मेरै टौलै आपु न बौन्डै होर मेरै टौलै पैंधै चिट्ठी भौरी।” 25तैबै सपाईये तैण्ढाऐ केरू, यीशु रै क्रूसा हागै तिन्हरी आमा होर तिन्हरी आमै री बैहण मरियम, क्लोपासे री लाड़ी होर मरियम मगदलीनी खड़ी ती। 26ज़ैबै यीशुऐ आपणी आमा होर सौ च़ेला ज़ो ज़ुणी सैंघै यीशु झ़ुरी डाआ ती नेड़ खड़ा हेरू ता आपणी आमा बै बोलू, “आमा हेर, ऐ तेरा बेटा सा।” 27तैबै तेइयै च़ेले बै बोलू, “हेरा, ऐ तेरी आमा सा।” होर तेई बौगतै च़ेला सौ आपणै घौरा बै नेयी।

यीशु री मौऊत

28तेथा न बाद यीशुऐ ऐ ज़ाणिया कि ऐबै सैभ किछ़ पूरा हुआ सा, तैबै कि पबित्र शास्त्रा न ज़ो बोलू ती सौ पूरा होला, बोलू, “हांऊँ शौखा सा।” 29तौखै सिरकै सैंघै भोरू होंदा एक भाँडा डाऊ ती, तैबै तिन्हैं सिरकै न शौगु होंदा स्पंज डँडै न रखिया तेइबै चुसाऊ। 30ज़ैबै यीशुऐ सौ सिरका लेऊ ता बोलू, “पूरा हुआ।” होर मुँडी टुँबड़ी केरिया प्राण छ़ौड़ै।

भालै सैंघै बिनणा

31तैबै कि सौ त्यारी रा रोज़ ती, यहूदियै पिलातुस आगै अर्ज़ा केरी, कि तिन्हरी टाँगा चोड़ा होर हेठै खोला, किबैकि बशाँ रै ध्याड़ै ते क्रूसा पैंधै नी डाहणै किबैकि सौ बशाँ रा ध्याड़ा बड़ा ध्याड़ा ती। 32तैबै सैनिकै सपाईये एज़िया तिन्हां मांहणु न पैहलै री टाँगा चोड़ी, तैबै दुज़ै री भी, ज़ो यीशु सैंघै क्रूसा पैंधै च़ढ़ाई ती। 33पर ज़ैबै यीशु आगै एज़िया हेरू कि सौ मुँआन्दा सा, प्रभु री टाँगा नी चोड़ी। 34पर सैनिका न एकियै बरछै लाइया प्रभु यीशु रा पेट बिन्नू, होर तेथा न तैबै लोहू होर पाणी निकतू। 35ज़ुणियै ऐ हेरू तेइयै गुआही धिनी, होर तेइरी गुआही सच़ी ती, होर सौ ज़ाणा ती कि सौ सच़ बोला सा तुसा भी बशाह केरा। 36ऐ गैला तैबै हुई कि पबित्र शास्त्रा न ज़ो लिखू ती कि सौ पूरा होला, “तेइरा कोई भी हाड़का नी सा चोड़ना।” 37तैबै पवित्र शास्त्रै री एकी होरी ज़ैगा पैंधै लिखू सा, “ज़ुण तिन्हैं बिन्हू सा, तेई पैंधै तिन्हां हेरणा सा।”

यीशु रा पौथिणा

38इन्हां गैला न बाद अरिमतियाह ग्राँ रा रौहणु आल़ा ज़ो यीशु रा च़ेला ती, पर यहूदियै रै डौरा न सौ ऐसा गैला बै गज़ेईया रखा ती, पिलातुस हागै अर्ज़ा केरी कि-कि सौ यीशु री लाशा बै नेई सका सा। पिलातुस तेइरी अर्ज़ा शुणी होर तेइयै एज़िया यीशु री लाश नेयी। 39निकुदेमुस भी, ज़ो पैहलै यीशु हागै राती बै नौठा ती, पजाह सेरा रै (लगभग तीह किलो) बराबर, मिलाऊ होंदा गन्धरस होर एलुवीरा रा खुशबूदार तेल होर धूप आंणु। 40तैबै तिन्हैं यीशु री लाश आंणी, होर यहूदियै रै पौथणै री कनूनै रै मुताबक यीशु खुशबूदार तेला लाइया कफना न लपेटू। 41तेसा ज़ैगा पैंधै ज़ौखै यीशु क्रूसा पैंधै च़ढ़ाऊ ती, एक बगीच़ा ती, होर तेई बगीच़ै न एक नौंऊँईं कब्र ती, ज़ुणीन कैधी भी कोई नी ती रखू। 42तिन्हैं यीशु री लाश तेई कब्रा री गुफा न रखी, किबैकि सौ कब्र नेड़ ती, होर यहूदियै री बशाँ रै ध्याड़ै रा त्यारी रा रोज़ ती।

Currently Selected:

यूहन्ना 19: KFX-NT

Highlight

Copy