मरकुस 14

ईशूए खलाफ छ़ल़

(मत्ती 26:1-5; लुका 22:1,2; युहन्ना 11:45-53)

1दूई धैल़ै बाद आसा त ओवार्णैओ थैर और आखरी रोटीओ थैर हणैं आल़अ, और बडै परोहित और शास्त्री तै एसा गल्ला लोल़ै लागै दै कि किहअ करै छ़ल़-कपट करी करै पाणअ त ईशू मारी। 2पर तिंयां बोला तै इहअ बी कि ओवार्णे थैरे धैल़ी निं हाम्हां इहअ करनअ, इहअ निं हआ कि लोगा मांझ़ै होए च़िक-फणाटी।

बेतनियाह गराऊंऐं ईशूए सीख

(मत्ती 26:6-13; युहन्ना 12:1-8)

3ईशू आसा त बेतनियाह गराऊंऐं शमौने घरै ज़ुंण ईशू कोल़्हे बमारी का ठीक किअ त। ज़ांऊं सह रोटी खांदअ बेठअ ता तिधी आई एक बेटल़ी। तेसा आणअ संगमरमरे भांडै दी जटामांसीओ किम्मती खुशबूदार तेल और सह तरैल़अ ईशूए मुंडै।

4पर कई लागै आपणैं मनें रोशै मारै बोलदै कि अह एतरअ किम्मती तेल किल्है किअ एसा बरैबाद? 5किल्हैकि एऊ खुशबूदार किम्मती तेला सका तै चिई शौआ च़ंदीए सिक्कै का बी खास्सी किम्मती बेच़ी गरीबा लै बांडी। तिंयां लागै तेसे बारै इहअ बोलदै कि एसा किअ अह गलत।

6ईशू दैनअ ज़बाब, “एसा छ़ाडा, एसा किल्है करा तम्हैं तंग? ऐहा किअ मुल्है भलअ।

7 “गरीब रहणैं कबल्लै तम्हां ई संघै तम्हैं ज़ेभै च़ाहे तेभै सका तिन्नां लै दैई, पर हुंह निं तम्हां संघै कबल्लअ च़ाल्लअ रहई। (बधान 15:11) 8ज़ुंण बी अह करी सका ती और ज़ुंण एसा किअ, एसा मल़अ मुंह दाबणा लै पैहलै ई मेरी देही लै तेल।

9 “हुंह खोज़ा तम्हां का सत्त कि सारै संसारै ज़िधी बी मेरै बारै खुशीओ समाद प्रच़ार होए तिन्नां लोगा खोज़णअ एसरै बारै बी कि एसा मुल्है किज़ै किअ।”

यहूदो छ़ल़-कपट

(मत्ती 16:14-16; लुका 22:3-6)

10तैबै करोती गराऊंओ यहूदा ज़ुंण तिन्नां बारा च़ेल्लै मांझ़ै एक त, सह नाठअ बडै परोहिता सेटा लै इहअ बोलदअ कि हुंह करूं थारी ईशू ढाकणा लै मज़त। 11इहअ शूणीं करै हुऐ तिंयां बडै भारी खुश और तेऊ लै मनैं तिन्नैं खास्सै ढबै दैणैं ता सह रहअ तेऊ ढाकणें मोक्कै न्हैल़अ लागी।

च़ेल्लै संघै खिरीओ भोज़

(मत्ती 26:17-25; लुका 22:7-14,21-23; युहन्ना 13:21-30)

12दूई धैल़ै बाद, आखरी रोटीए थैरे पैहली धैल़ी, ज़ेभै तिंयां ओवार्णे करना लै होछ़अ गाभू काटी बल़ीदान करा तै, ईशूए च़ेल्लै पुछ़अ तेऊ का, “तूह किधी च़ाहा कि हाम्हैं ताल्है ओवार्णे थैरो भोज़ बणांए?” (लुआह 12:6; 15)

13तेऊ छ़ाडै आपणैं च़ेल्लै मांझ़ै दूई ज़ण्हैं इहअ बोली करै, “नगरी लै डेओआ तिधी भेटणअ तम्हां एक मणछ तेऊ हणअ पाणींओ घल़अ च़कअ द, तम्हैं लागै तेऊ पिछ़ू हांढदै।

14 “तेखअ सह ज़हा घरा लै डेओए तेऊ घरे मालका लै बोलै तम्हैं कि गूरू बोला इहअ कि तेरी पाहुंणेंए पांड किधी आसा? ज़िधी हुंह आपणैं च़ेल्लै संघै ओवार्णे थैरो भोज़ खाई सकूं। 15तेऊ रहैऊंणीं तम्हां का एक सज़ाऊई दी पांड, तिधी बणांऐं तम्हैं ओवार्णे थैरो भोज़।”

16ता च़ेल्लै बी पुजै नगरी और ज़िहअ ईशू तिन्नां का बोलअ त तिन्नां भेटअ तिहअ ई और तिन्नैं बणांअ ओवार्णे थैरो भोज़।

17ज़ांऊं सान्ह पल़ी ता ईशू आअ तिधा लै आपणैं बारा च़ेल्लै संघै। 18ज़ांऊं तिंयां रोटी खांदै बेठै ता ईशू बोलअ तिन्नां लै, “हुंह खोज़ा तम्हां का सत्त कि तम्हां मांझ़ै आसा एक इहअ ज़ुंण मुंह संघा इधी रोटी खांदअ बी आसा बेठअ द, तेऊ बझ़ैल़णअ हुंह ढाकणैं।” (भज़न 41:9)

19तिंयां हुऐ बडै भारी दुखी, और तिंयां लागै एक-एक करी करै बारी-बारी तेऊ का पुछ़दै, “हे गूरू सह हुंह किनी आसा?”

20ईशू दैनअ तिन्नां लै ज़बाब, “सह आसा तम्हां बारा मांझ़ै एक, ज़ुंण मुंह संघै म्हार थाल़ू का डबेऊई करै खाआ।

21 “किल्हैकि हुंह मणछो शोहरू ता मरनअ तेऊ ई साबै ज़िहअ मेरै बारै पैहलै ई आसा लिखअ द; पर तेऊ मणछा लै आसा घोर सज़ा ज़हा हुंह ढाकणैं बझ़ैल़णअ। तेऊ लै त भलअ इहअ ई कि तेऊओ ज़ल्म ई नांईं हंदअ।”

प्रभू भोज़

(मत्ती 26:26-30; लुका 22:14-20; 1 कुरिन्थी 11:23-25)

22ज़ांऊं तिंयां रोटी खांदै बेठै ता ईशू परमेशरो शूकर करी करै रोटी चोल़ी और तिन्नां लै दैई करै बोलअ, “हुंज़ा, अह आसा मेरी देही।”

23तेखअ ईशू अंगूरे रसा करै भरअ द बतिल्लू हाथै लई करै परमेशरो शूकर किअ और तिन्नां लै दैनअ और तिन्नैं सोभी झुटअ तेता का।

24तेखअ बोलअ ईशू तिन्नां लै, “अह आसा मेरअ लोहू, ज़ुंण खास्सै लै बहाऊंणअ अह आसा परमेशरे मणछा लै करार। (लुआह 24:8; जकर्याह 9:11) 25हुंह खोज़ा तम्हां का सत्त कि अह अंगूरो रस निं मुंह तेभै तैणीं झुटणअ, ज़ेभै तैणीं हुंह परमेशरे राज़ा दी नऊंअ अंगूरो रस निं झुटूं।”

26तेखअ नाठै ईशू और तेऊए च़ेल्लै ओवार्णे थैरे गिहा बोलदी बागै जैतून धारा लै।

पतरसे हुधणें बारै गल्ला प्रगट करनी

(मत्ती 26:31-35; लुका 22:31-34; युहन्ना 13:36-38)

27तैबै बोलअ ईशू तिन्नां लै, “तम्हैं ठुहर्नै सोभ मुंह छ़ाडी, किल्हैकि शास्त्रा दी आसा मेरै बारै इहअ लिखअ द कि

‘मुंह पाणअ फुआल मारी

और भेडा छिंघणीं ओरी-पोरी।’

28 “पर हुंह डेऊणअ ज़िऊंदअ हई करै तम्हां का पैहलै गलील लाक्कै लै।”

29पतरसै बोलअ ईशू का, “होर लागे ताह छ़ाडी ठुहर्दै पर हुंह निं ताह छ़ाडदअ।” 30ईशू बोलअ तेऊ लै, “हुंह खोज़ा ताखा सत्त कि आझ़ एसा ई राची मुर्गै दूई बारी बाशणैं का पैहलै हुधणअ तूह मेरै बारै चिई बारी।”

31पर पतरसै बोलअ होर बी ज़ोर दैई करै कि, ज़ै मुंह ताह संघै मरनअ बी लागे, ता; तैबी बी निं हुंह तेरै बारै हुधदअ। इहअ ई बोलअ तिन्नैं होरी सोभी ज़ण्हैं।

गतसमनीं बगिच़ै दी प्राथणां

(मत्ती 26:36-46; लुका 22:39-46)

32तेखअ आऐ तिंयां गतसमनीं नांओंए एकी ज़ैगा लै और ईशू बोलअ आपणैं च़ेल्लै लै, “इधी रहा बेशी, ज़ेभै तैणीं हुंह प्राथणां करूं।”

33तेऊ निंयैं पतरस, याकूब और युहन्ना आप्पू संघा और सह हुअ बडअ भारी दुखी और नर्तान। 34तेऊ बोलअ इहअ, “मेरअ ज़िऊ आसा बडअ दुखी इहअ कि मेरै च़ाल्लै ज़िहै प्राण निखल़ी, तम्हैं खल़्हिया इधी और बिहुदै रहा।” (भज़न 42:5)

35तेखअ नाठअ ईशू धख आजू ज़िहअ। तिधी लागअ सह धरनीं उटी बाखा पल़ी करै एही प्राथणां करदअ,

“हे परमेशर ज़ै हई सके ता; तै कर मुखा एसा घल़ी एऊ दुखा दूर। 36हे मेरै बाप्पू ताखा सका सोभै गल्ला हई, एऊ दुखे बतिल्लू च़क मुंह सेटा का पोर्ही। पर तैबी बी ज़िहअ हुंह च़ाहा तिहअ निं लोल़ी हुअ। पर ज़िहअ तूह च़ाहा तिहअ लोल़ी हुअ।”

37तेखअ आअ ईशू तिन्नां चिई च़ेल्लै सेटा और तिंयां सुत्तै दै भाल़ी करै, पतरसा लै बोलअ, “शमौन, तूह सुत्तअ द आसा? तूह एकी घल़ी बी निं बिहुदअ रही सकअ?” 38बिहुदै रहा और प्राथणां करदै रहा लागी, कि तम्हैं परिक्षा दी पल़ी करै पाप नां करे, आत्मां ता आसा तैर पर देही आसा दुबल़ी।

39तेखअ नाठअ सह भी प्राथणां करदअ तेऊ की तेही ई प्राथणां ज़ेही तेऊ पैहलै की ती। 40तेखअ आअ सह भी आपणैं च़ेल्लै सेटा लै और तेऊ भाल़ै तिंयां घणीं निंजा सुत्तै दै ज़ांऊं तेऊ तिंयां झ़ैऊऐ ता तिन्नां निं समझ़ पल़ी कि तेऊ लै कै ज़बाब दैणअ।

41तेखअ आअ ईशू चिऊथी बारी प्राथणां करी तिन्नां सेटा लै और बोलअ; अज़ी बी तम्हैं सुत्तै दै आसा? बतेर्है सुत्तै ऐबै! भाल़ा, सह घल़ी गई एछी; हुंह मणछो शोहरू लाअ पापी मणछे हाथै ढाकी। 42खल़ै उझ़िआ, च़ाल्ला, हेरा, ज़ुंणी हुंह ढाकी आसा लाअ द सह गअ एछी।

ईशू धोखै करै ढाकणअ

(मत्ती 26:47-56; लुका 22:47-53; युहन्ना 18:3-12)

43ईशू त इहअ बोलदअ ई लागअ द कि यहूदा, ज़ुंण तिन्नां बारा मांझ़ै एक त, सह गअ आप्पू संघा बडै परोहित, शास्त्री, मुखियै संघै खास्सै लोग तलबारा और शोठै पाई तेभी तिधी पुजी।

44करोती गराऊंओ यहूदा त तिन्नां लै इहअ डाहअ द बोली कि ज़हा लै हुंह माख्खी दैंऊं, सह ई आसा ईशू तेऊ करै तम्हैं कैद। 45सह आअ तेभी और तेऊ बोलअ ईशू सेटा डेऊई तेऊ लै, “हे गूरू”, और तेऊ लै दैनी माख्खी।

46तिन्नैं होरी किअ ईशू कैद। 47ईशू नेल़ खल़्हुऐ दै च़ेल्लै मांझ़ै काढी एकी आपणीं तलबार और तेऊ बाही माहा परोहिते टैहलू लै ता तेऊओ कान शोटअ धरनीं।

48ईशू बोलअ तिन्नां लै, “तम्हैं कै हुंह डाकू समझ़अ कि मुंह ढाकदै आसा तलबारा और शोठै पाई निखल़ै दै?” 49हुंह ता हर धैल़ै तम्हां संघा मांदरै शिक्षा दैआ त, तेभै किल्है निं हुंह तम्हैं ढाकअ? पर अह हुअ तै कि पबित्र शास्त्रा दी लिखी दी गल्ला पूरी होए।

50ज़ुंण तिधी ईशू संघै तै तिंयां सोभ च़ेल्लै ठुर्है तिधा तेऊ छ़ाडी ओर्ही-पोर्ही। 51ता एक ज़ुआन मणछ लागअ आपणीं घेरी दी सिधअ च़ादरू पल़ेटी करै तेऊ पिछ़ू हांढदअ और लोगै ढाकअ सह। 52पर सह छ़ुटअ तिन्नां का और सह ठुर्हअ च़ादरू तिधी छ़ाडी करै नांगअ ई।

माहा सभा दी ईशू

(मत्ती 26:57-68; लुका 22:54,55,63-71; युहन्ना 16:13,14,19-24)

53तेखअ निंयं तिन्नैं ईशू माहा परोहिता सेटा लै, और होर बडै परोहित, शास्त्री और मुखियै बी हूऐ तिधी सोभै ज़ण्हैं कठा। 54पतरस नाठअ तिन्नां पिछ़ू-पिछ़ू माहा परोहिते खोल़ै तैणीं और लोगा मांझ़ै बेठअ माहा परोहिते घरे पहरी संघै आगी नैथदअ।

55बडै परोहित और सारी यहूदी सभा आल़ै तै पैहलै ई इहै लोगा लोल़ै लागै दै ज़ुंण ईशूए खलाफ झ़ुठी गवाही दैए। ताकि तिंयां तेऊ मारी पाए पर तिंयां निं इहअ करी सकै।

56किल्हैकि कई तै लागै दै तेऊए खलाफ झ़ुठी गवाही दैंदै, पर तिन्नें गवाही बी नांईं ती एकी रंगे आथी। 57तैबै दैनी कई खल़ै उझ़ुई करै एही झ़ुठी गवाही कि 58“हाम्हैं शूणअ अह इहअ बोलदअ कि मुंह पाणअ अह हाथा करै बणांअ द मांदर ढोल़ी और चिई धैल़ै बाद बणांणअ दुजअ मांदर, ज़ुंण हाथा करै नांईं होए बणांअ द।” 59एसा गल्ला लै बी नांईं ती तिन्नें गवाही एकी रंगे ती।

60तैबै माहा परोहितै मांझ़ै खल़ै हई करै ईशू का पुछ़अ, “तूह ज़बाब किल्है निं दैंदअ? ईंयां लोग भाल़ तेरै खलाफ किज़ै बोला?” 61पर ईशू रहअ च़ुप्पी, और तेऊ निं किछ़ै ज़बाब दैनअ; माहा परोहितै पुछ़अ तेऊ का एकी बारी भी, “तूह कै परमेशरो शोहरू मसीहा आसा?”

62ईशू बोलअ, “हाँ, हुंह आसा, तम्हां भाल़णअ हुंह मणछो शोहरू सर्वशक्तिमान परमेशरे दैहणै बेठअ द और सरगै बादल़ा संघै एछदअ।” (दानिएल 7:13; भज़न 110:1)

63तैबै माहा परोहितै आपणैं च़ोल़अ धैल़ी करै बोलअ, “ऐबै निं हाम्हां कोही गवाहीए ज़रुरत आथी? (मत्ती 26:65) 64तम्हैं सोभी बी हेरी अह गल्ला शूणीं कि अह बोला आप्पू लै परमेशर और इहअ करै की एऊ परमेशरे निंदा! तम्हां होरीए कै राऐ आसा?” (लेबी बधान 24:16)

तिन्नैं होरी बोलअ, “अह आसा मारनै ई जोगी।”

65तैबै कई पाअ तेऊए मुंहैं थुकी, संघा लागै कोऐ तेऊए आछी ढोपी करै धमुक्कै बाहंदै। तेखअ लागै तेऊ लै इहअ बोलदै, “ऐबै कर आजू हणैं आल़ी गल्ला प्रगट!” ज़ुंण तिधी जोधै मणछ तै, तिन्नैं बाही तेऊ लै च़ैंडै।

पतरसो हुधणअ

(मत्ती 26:69-75; लुका 22:56-62; युहन्ना 18:15-18)

66पतरस त खोल़ै बेठअ द, तिधी आई माहा परोहिते टैहलू मांझ़े एक बेटल़ी। 67पतरसा आगी सेटा नैथदअ भाल़ी करै लागी सह तेऊ कोहरी भाल़ी संघा बोलअ तेऊ लै, “तुबी त तेऊ नासरत गराऊंए ईशू संघै भाल़ी?”

68पतरस हुधूअ संघा लागअ इहअ बोलदअ, “मुखा निं थोघै और मुंह निस्सी समझ़ पल़ी कि तूह किज़ै बोला?” तेखअ नाठअ सह बागै डेहल़ा सेटा और मुर्गअ बी बाशअ।

69तेखअ लागी सह टैहलू बेटल़ी तेऊ भाल़ी करै तिन्नां का बोलदी ज़ुंण तिधी नेल़ तै, “अह आसा तिन्नां मांझ़ै कोई एक ज़ण्हअ।” 70पर पतरस हुधूअ भी।

थोल़ी घल़ी बाद बोलअ तिन्नैं बी ज़ुंण तेऊ नेल़ तै खल़्हुऐ दै, “तूह आसा पाक्कै दी तिन्नां ई मांझ़ै कुंण एक किल्हैकि तेरी गल्ला का ज़ाण्हिंआं कि तूह आसा गलील लाक्कै का?”

71ता पतरस लागअ हुधदअ और सोह काढी करै बोलदअ कि, “तम्हैं ज़हा मणछे गल्ला करा, हुंह निं तेऊ बछ़ैणदअ बी आथी।” 72तेभी बाशअ दुजी बारी मुर्गअ और

पतरसा फिरी सह गल्ल आद ज़ुंण ईशू तेऊ लै बोली ती, “मुर्गै दुजी बारी बाशणैं का पैहलै हुधणअ ताह मेरै बारै चिई बारी।” एसा गल्ला सोठी करै लागअ सह लेरा लांदअ।

Currently Selected:

मरकुस 14: OSJNT

Highlight

Copy