मत्ती 21
21
ज़िती करै येरुशलेम नगरी लै डेऊणअ
(मरकुस 11:1-11; लुका 19:28-40; युहन्ना 12:12-19)
1तिंयां पुजै येरुशलेम नगरी नेल़ जैतून धारा ज़ुंण बेतफगे गराऊंआं सेटा। ईशू छ़ाडै आपणैं दूई च़ेल्लै गराऊंआं लै। तिन्नां लै बोलअ तेऊ इहअ 2“आपणैं सम्हनै एऊ गराऊंऐं डेओआ। तिधी पुजधी भेटणीं तम्हां एक गाधी बान्हीं दी। तेसा संघै भेटणअ तम्हां तेसो एक बच्च़अ। तेऊ आणै तम्हैं खोल्ही करै मुंह सेटा लै। 3ज़ै तम्हां का कुंण पुछ़े, ता तम्हैं बोलै इहअ कि प्रभू पल़ी एते पगर। तेखअ हेरनअ तेऊ सह तम्हां लै दैई।”
4अह हुअ तै कि परमेशरे गूरै याशायाह ज़ुंण बोलअ त सह लोल़ी पूरअ हुअ कि
5“सियोने शोहरी लै बोला इहअ कि हेर,
तेरअ राज़ आअ ताह सेटा लै,
सह आसा शरीफ और सह आसा गाधै दी बेठअ द;
इधी तैणीं कि लादू गाधै प्रैंदै।”
6च़ेल्लै बी किअ तिहअ ई ज़िहअ-ज़िहअ ईशू तिन्नां लै बोलअ त। 7तिन्नैं गाधी और तेसो बच्च़अ आणी करै तिन्नां प्रैंदै आपणैं च़ादरू पाऐ, और ईशू बेठअ गाधू प्रैंदै।
8ता कई लोगै छ़ैऐ आपणैं झिकल़ै बाता और कई छ़ैई खज़ूरे बूटा का नरम डाल़ी चोल़ी करै बाता। 9ज़ुंण बडै भारी खास्सै लोग आजू-पिछ़ू हांढदै तै लागै दै, तिंयां लागै ज़ोरै-ज़ोरै बोलदै दै
“राज़ै दाबेदे लुआदा ज़ै-ज़ैकार;
परमेशर ज़ुंण स्वर्गै आसा सह दैआ तेऊ लै बर्गत ज़ुंण तेऊए नांओंऐं एछा
परमेशरे ज़ै-ज़ैकार ज़ुंण स्वर्गै आसा।”
10ज़ांऊं ईशू येरुशलेम पुजअ, ता सारी नगरी मच़अ हाल्लअ-गोल्लअ और लोग लागै बोलदै कि अह कुंण आसा? 11तेखअ बोलअ लोगै, “अह आसा गलील लाक्के नासरत गराऊंऐं परमेशरो गूर ईशू।”
मांदरा का बपारी दरल़ाऊंणै
(मरकुस 11:15-19; लुका 19:45-48; युहन्ना 2:13-22)
12ईशू काढै परमेशरे मांदरै डेऊई करै तिंयां सोभ बागा लै। ज़ुंण मांदरा भितरी ढबै-धेल्लै बदल़ी लैण-दैण करदै तै लागै दै। संघा सर्फिए मेज़ और पालल़ी और भेडा बाकरी बेच़णैं आल़े थल़्ही पाई ढोल़ी। 13ईशू बोलअ तिन्नां लै, “शास्त्रा दी आसा लिखअ द ‘मेरअ घर हणअ प्राथणां करने कोठी पर तम्हैं लोगै बणांईं अह ज़ैगा बणांईं च़ोरा-डाकू कठा हणें ज़ैगा।’”
14तेखअ आऐ कांणै और लाट्टै मांदरै ईशू सेटा लै और तेऊ किऐ तिंयां सोभ राम्बल़ै। 15पर ज़ांऊं बडै परोहितै और शास्त्री ईंयां नुआहरै और च़मत्कारे काम ज़ुंण ईशू किऐ तै और लान्हैं मांदरा दी ईशू लै, “राज़ै दाबेदे लुआदा लै ज़ै-ज़ैकार” बोलदै भाल़ै ता तिंयां लागै ईशू लै रोशै इहअ बोलदै, “ताखा शुणिआं बी कि ईंयां किज़ै बोला?” 16ईशू बोलअ तिन्नां लै, “हाँ, तम्हैं कै इहअ पहल़अ निं लान्हैं शोहरूए खाखा का की तंऐं स्तोती सिध्द।” 17तेखअ नाठअ ईशू तिन्नां छ़ाडी नगरी बागै बेतनियाह गराऊंआं लै और राच काटी तिन्नैं तिधी।
फल़ा बाझ़ी फेडूओ बूट
(मरकुस 11:12-14,20-24)
18दोती ज़ांऊं सह नगरी लै बापस फिरअ ता ईशू आई भुखै। 19बाते बाढै भाल़अ ईशू एक फेडूओ बूट; ईशू नाठअ तेऊ बूटा सेटा लै, पर तेथ निं पाचा छ़ाडी होर किछ़ आथी त, इहअ भाल़ी बोलअ ईशू तेऊ फेडूए बूटा लै, “ऐबै निं एभा पोर्ही लोल़ी ताह दी कधि फल़ लागणै।” सह फेडूओ बूट शुक्कअ तेभी। 20इहअ भाल़ी हुऐ च़ेल्लै रहैन और तिंयां लागै बोलदै, “अह फेडूओ बूट किल्है शुक्कअ?”
21ईशू दैनअ तिन्नां लै ज़बाब, “हुंह खोज़ा तम्हां का सत्त कि, ज़ै तम्हैं विश्वास करी करै बोले और बैहम नां करे, ता तम्हैं सका इहअ करी ज़ुंण एऊ फेडूए बूटा संघै किअ। ज़ै तम्हैं एसा धारा लै बी बोले कि इधा का डेऊ पेछ़ुई करै समुंदरा लै ता इहअ बी जाणअ हई। 22ज़ेभै तम्हैं परमेशरा का प्राथणां करी करै किज़ै मांगे, ज़ै तम्हैं विश्वास करे कि परमेशरा हेरनी ईंयां गल्ला मुल्है दैई; तै जाणीं तिंयां गल्ला तम्हां तेऊ का भेटी।”
ईशूए हको सुआल
(मरकुस 11:27-33; लुका 20:1-8)
23तेखअ नाठअ ईशू मांदरे खोल़ै लै। ज़ांऊं सह लोगा लै शिक्षा दैंदअ त लागअ द, तेऊ सेटा लै आऐ तिधी बडै परोहित और मुखियै, संघा लागै तिंयां तेऊ का इहअ पुछ़दै “ताल्है कुंणी बोलअ इना कामां करना लै? ज़ुंण तंऐं हिझ़ इधी किअ, ताल्है कुंणी दैनअ तेतो हक।”
24ईशू बोलअ तिन्नां लै, “हुंबी पुछ़ा तम्हां का एक गल्ल; ज़ै तम्हैं मेरी गल्लो ज़बाब दैए, तै खोज़णअ मुंबी तम्हां का कि मुल्है इना कामां करनैओ हक कुंणी दैनअ। 25युहन्ने डुबकी कसा बाखा का आसा ती? स्वर्गा बाखा का कि संसारे मणछा बाखा का?”
तिंयां लागै तेखअ आप्पू मांझ़ै इहै हठल़दै, “ज़ै हाम्हैं इहअ बोले कि स्वर्गा का, तै एऊ बोल़णअ हाम्हां लै इहअ कि तै तम्हैं तेऊओ विश्वास किल्है निं किअ? 26ज़ै हाम्हैं इहअ बोले कि संसारे मणछा बाखा का, तै ईंयां लोग हणैं म्हारै खलाफ किल्हैकि ईंयां मना युहन्ना परमेशरो गूर।” 27तिन्नैं बोलअ ईशू लै इहअ, “हाम्हां का निं थोघै कि युहन्ना कसा का भेटअ तेतो हक।”
ईशू दैनअ तिन्नां लै ज़बाब, “तम्हैं निं मेरै सुआलो ज़बाब दैनअ आथी, हुंबी निं तम्हां लै एसा गल्ला खोज़दअ कि मुल्है हिझ़ इना कामां करनैओ हक कुंणी दैनअ।
दूई शोहरूए कथ्या
28 “तम्हैं एते बारै किज़ै समझ़ा? एकी मणछे तै दूई शोहरू; तेऊ पैहलै शोहरू सेटा डेऊई करै बोलअ, ‘शोहरूआ, आझ़ कर तूह आसा लागअ अंगूरे बगिच़ै दी काम।’ 29तेऊ दैनअ ज़बाब कि ‘हुंह निं च़ाल्लअ’ पर बादा का हुअ तेऊ पछ़ताअ और सह नाठअ बगिच़ै लै कामां करदअ। 30तेखअ तेऊ दुजै शोहरू लै ढेअ किअ कि ‘शोहरूआ, तूह कर आझ़ अंगूरे बगिच़ै दी काम’ तेऊ बोलअ ‘हाँ बाप्पू हुंह च़ाल्लअ एभी डेऊई’ पर सह निं नाठअ।
31 “इना दूई मांझ़ै कुंणी की आपणैं बाप्पूए मरज़ी पूरी?”
तिन्नैं दैनअ ज़बाब, “पैहलै”। तेखअ बोलअ ईशू तिन्नां लै, “हुंह खोज़ा तम्हां का सत्त कि साबा का बाधू कारै मांगणैं आल़ै बूरै और कंज़री पुजणैं तम्हां का पैहलै परमेशरे राज़ा दी। 32किल्हैकि युहन्ना आअ धर्में बाता खोज़दअ तम्हां सेटा लै। पर तम्हैं निं तेऊओ भरोस्सअ किअ। पर तिन्नैं बूरै कारै मांगणैं आल़ै और कंज़री किअ तेऊए गल्लो भरोस्सअ। पर तम्हैं निं इहअ भाल़ी करै बादा का बी पछ़ताअ हुअ कि तेऊओ भरोस्सअ करे।”
कदुष्ट ज़िम्मींदारे कथ्या
(मरकुस 12:1-12; लुका 20:9-19)
33 “एक होर कथ्या शूणां, एक बारी आसा त एक घर मालक। तेऊ लाअ अंगूरो बगिच़अ और तेता फेर लाऐ बाल़ और मांझ़ै बणांईं अंगूरे रसा लै कोफर और होरी ज़िम्मींदारा का डाहअ सह बगिच़अ ठेकै दी दैई और आप्पू नाठअ परदेसा लै। 34ज़ांऊं अंगूरा काढणें ऋत नेल़ आअ, ता तेऊ छ़ाडै आपणैं टैहलू अंगूरा चोल़दै तिन्नां ज़िम्मींदारा सेटा। 35पर तिन्नैं ज़िम्मींदारै तिंयां टैहलू च़िकै और कोई पाऐ मारी और कोई लै दैनअ पात्थरो ढो। 36तेखअ छ़ाडै तेऊ आपणैं होर बी खास्सै टैहलू अंगूरा चोल़दै पर तिन्नैं ज़िम्मींदारै किअ तिन्नां संघै बी तिहअ ई।
37 “खिरी छ़ाडअ तेऊ आपणअ शोहरू तिन्नां ज़िम्मींदारा सेटा लै कि मेरै शोहरूओ ता हेरनअ तिन्नां अदर करी। 38पर तिन्नैं किअ तेऊ शोहरू भाल़ी आप्पू मांझ़ै इहअ जोग ‘अह ता तेऊओ आद-लुआद आसा! एछा, अह पाणअ हाम्हां मारी तेखअ हणअ एऊ अंगूरे बगिच़ै दी म्हारअ ई कबज़अ।’ 39तिन्नैं बी काढअ सह अंगूरे बगिच़ै का बागै और सह पाअ मारी।
40 “तै ऐबै ज़ांऊं अंगूरे बगिच़ेओ मालक एछणअ ता तिन्नां ठेकै लणै आल़ै ज़िम्मींदारा संघै सोठा कि तेऊ किज़ै करनअ?”
41तिन्नैं बोलअ, “तेऊ करनै तिंयां बूरै लोगा ज़िहै मारी खतम और अंगूरे बगिच़ेओ ठेकअ दैणअ तेऊ होरी लै। ज़ुंण हर सिज़नै ठीक बगती तेऊ लै अंगूरे फसल चोल़ी दैए।”
42ईशू बोलअ तिन्नां लै, “तम्हैं कै कधि पबित्र शास्त्रा दी इहअ निं पहल़अ आथी,
‘ज़हा पात्थरा लै राज़ मिस्त्री इहअ बोलअ, “अह निं किछ़ू कामों आथी”,
सह पात्थर बणांअ परमेशरै कूणींए ज़ान?
अह हुअ तेऊए मरज़ी दी,
और अह आसा म्हारी आछी दी नुआहरी।’
43 “तैही बोला हुंह तम्हां लै कि स्वर्गो राज़ करनअ तम्हां का दूर और सह दैणअ होरी ज़ातीए इहै लोगा लै ज़ुंण तेऊए मरज़ी दी च़ले। 44ज़ुंण एसा ज़ानीं प्रैंदै पल़े, तेऊए हणीं छ़णीं-छ़णीं और ज़हा प्रैंदै अह ज़ान पल़े तेऊओ हणअ च़ूर।”
45बडै परोहितै और फरीसी मणछ गऐ ऐहा कथ्या समझ़ी कि अह आसा लागअ द म्हारै बारै बोलदअ। 46तिन्नैं च़ाहअ त इहअ कि अह ढाकणअ हाम्हां पर तिधी डरै तिंयां लोगा का; किल्हैकि तिंयां मना तै ईशू परमेशरो गूर।
Currently Selected:
मत्ती 21: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
