लुका 22

ईशूए खलाफ छ़ल़

(मत्ती 26:1-5; मरकुस 14:1,2; युहन्ना 11:45-53)

1आखरी रोटीओ थैर ज़हा लै ओवार्णैओ थैर बोला, सह आसा त नेल़। 2बडै परोहित और शास्त्री आसा तै एसा गल्ले ताका दी कि ईशू पाणअ हाम्हां किहअ करै मारी पर तिंयां डरा तै लोगा का।

यहूदो छ़ल़-कपट

(मत्ती 26:14-16; मरकुस 14:10-11)

3तेखअ राख्स बस्सअ करोती गराऊंओ यहूदा दी, ज़ुंण ईशूए बारा च़ेल्लै मांझ़ै एक त। 4तेऊ की बडै परोहिता और पहरीए सरदारा संघै गल्ला बाता कि किहअ करै दैणअ ईशू तिन्नें हाथै। 5तिंयां हुऐ बडै खुश और तिन्नैं किअ तेऊ लै ढबै दैणैंओ बाहिदअ। 6तेऊ तिन्नें गल्ला मनी और सह लागअ मोक्कै भाल़अ कि बाझ़ी हाल्लअ-गोल्लअ पाई बझ़ैल़णअ ढाकणैं ईशू तिन्नें हाथै।

च़ेल्लै संघै ओवार्णे थैरो भोज़

(मत्ती 26:17-25; मरकुस 14:12-21; युहन्ना 13:21-30)

7येरुशलेम नगरी गअ त आखरी रोटीओ थैर बी नेल़ एछी, ज़ेथ दी ओवार्णैओ मिम्मूं बल़ी करनअ ज़रूरी हआ त। (लुआह 12:3,6,8,14) 8तेखअ बोलअ ईशू आपणैं च़ेल्लै पतरस और युहन्ना लै, “डेओआ, मुल्है करा खाणां लै ओवार्णे थैरो भोज़ तैर।” 9तिन्नैं पुछ़अ ईशू का, “तूह किधी च़ाहा कि हाम्हैं एता बणांए?”

10ईशू बोलअ तिन्नां लै, “नगरी लै डेओआ तिधी भेटणअ तम्हां एक मणछ तेऊ हणअ पाणींओ घल़अ च़कअ द, तम्हैं लागै तेऊ पिछ़ू हांढदै। 11तेखअ सह ज़हा घरा लै डेओए तेऊ घरे मालका लै बोलै तम्हैं कि गूरू बोला इहअ कि तेरी पाहुंणेंए पांड किधी आसा? ज़िधी हुंह आपणैं च़ेल्लै संघै ओवार्णे थैरो भोज़ खाई सकूं? 12तेऊ रहैऊंणीं तम्हां का एक सज़ाऊई दी पांड और तिधी बणांऐं तम्हैं ओवार्णे थैरो भोज़।” 13तिंयां बी नाठै और ज़िहअ ईशू बोलअ तिन्नां लै त, तिन्नैं किअ तिहअ ई और ओवार्णे थैरो भोज़ किअ तैर।

प्रभू-भोज़

(मत्ती 26:26-30; मरकुस 14:22-26; 1 कुरिन्थी 11:23-25)

14ज़ांऊं बगत हुअ ता ईशू शधाणूं संघै तिन्नां मांझ़ै रोटी खांदअ बेठअ। 15ईशू तिन्नां का बोलअ, “हुंह च़ाहा इहअ कि दुख भुगतणै का पैहलै करूं तम्हां संघै हुंह ओवार्णे थैरो भोज़। 16किल्हैकि हुंह खोज़ा तम्हां का सत्त कि ज़ेभै तैणीं सह परमेशरे राज़ा दी पूरअ नां होए तेभै तैणीं निं मुंह अह कधि खाणअ।”

17ईशू च़कअ अंगूरे रसा करै भरअ द बतिल्लू संघा परमेशरो शूकर करी बोलअ, “एऊ ढाका और आप्पू मांझ़ै बांडा। 18हुंह बोला तम्हां लै इहअ कि ज़ेभै तैणीं परमेशरो राज़ निं एछे, तेभै तैणीं निं मुंह कधि अंगूरो रस झुटणअ।” 19तेखअ च़की ईशू रोटी और परमेशरो शूकर करी करै दैनी चोल़ी करै तिन्नां लै इहअ बोली, “अह आसा मेरी देही, ज़ुंण मंऐं तम्हां लै दैनी, मुंह आद करना लै करै तम्हैं इहअ ई।” 20इहअ ई करै अंगूरे रसा करै भरअ द एक होर बतिल्लू हाथै ढाकी करै ईशू बोलअ, “अह बतिल्लू आसा मेरै लोहू दी परमेशरे मणछा लै नऊंईं करार। अह बहाऊंणअ तम्हां मांझ़ै कई मणछे पाप माफ करना लै बल़ीदान करी करै। (लुआह 24:8; 1 कुरिन्थी 11:25; मत्ती 26:28; जकर्याह 9:11)

21 “पर हेरा, ज़हा हुंह ढाकणैं बझ़ैल़णअ सह आसा सह ज़ुंण इधी मुंह संघै आसा। (भज़न 41:9) 22किल्हैकि हुंह मणछो शोहरू ता आसा तेता लै ई छ़ांटअ द पर तेऊ मणछा लै एछणी खरी! ज़हा हुंह ढाकणैं बझ़ैल़णअ।” 23तेखअ लागै तिंयां आप्पू मांझ़ै पुछ़-ज़ाच़ करदै कि हाम्हां मांझ़ै कुंण आसा ज़ुंणी अह काम आसा लाअ द करी?

बडी पदबी कसरी आसा

24तिंयां च़ेल्लै लागै आप्पू मांझ़ै हठल़दै कि हाम्हां मांझ़ै बडअ कुंण आसा? 25तेऊ बोलअ तिन्नां लै इहअ, “होरी ज़ातीए मुखियै करा तिन्नां प्रैंदै राज़, और ज़ुंण तिन्नां प्रैंदै हक डाहा तिंयां पजैल़ा होरी लोगा मांझ़ै आपणैं बारै एही गल्ला कि हाम्हैं ई आसा तम्हां लै मज़त करनै आल़ै।

26 “पर तम्हैं निं इहै हई, पर ज़ुंण तम्हां मांझ़ै बडअ होए, सह हऐ सोभी का होछ़अ और ज़ुंण प्रधान आसा, सह बणैं टैहलू ज़िहअ। 27किल्हैकि बडअ कुंण आसा, सह ज़ुंण रोटी खांदअ बेठअ द आसा; या सह ज़ुंण सेऊआ करा? सह ज़ुंण रोटी खांदअ बेठअ द आसा? पर हुंह आसा तम्हां मांझ़ै टैहलू ज़िहअ।

28 “पर तम्हैं आसा तिंयां ज़ुंण मेरी परिक्षा दी हर बगत मुंह संघै रहै। 29ज़िहअ मेरै बाप्पू परमेशरै मुल्है एक राज़ पाठ आसा डाहअ द। 30तिहअ ई डाहा हुंह तम्हां लै बी ताकि तम्हैं मेरै राज़ा दी मुंह संघै मेरी मेज़ा दी खाआ-पिआ। इधी तैणीं कि राज़गादी दी बेशी करै इस्राएले बारा गोत्रो न्याय करे।

पतरसे हुधणें बारै गल्ला प्रगट करनी

(मत्ती 26:31-35; मरकुस 14:27-31; युहन्ना 13:36-38)

31 “शमौन, शमौन, भाल़, राख्सै मांगै तम्हैं परमेशरा का ताकि तम्हां गिंहूं ज़िहै मांडे। 32पर मंऐं की ताल्है अरज़ कि तेरअ मुंह दी विश्वास करनअ निं लोल़ी घट हुअ और ज़ांऊं तूह बापस फिरे, ता आपणैं इना साथी भाई करै हेर सभाल़ करी करै पाक्कै।”

33पतरसै बोलअ ईशू लै, “हे प्रभू, हुंह आसा ताह संघै कैद खानै दी डेऊणा लै बी तैर और हुंह सका तेरी तैणीं आपणीं ज़ान बी दैई।”

34पर ईशू बोलअ तेऊ लै, “हे पतरस, हुंह बोला ताल्है इहअ कि आझ़ एसा ई राची मुर्गै दूई बारी बाशणैं का पैहलै हुधणअ तूह मेरै बारै चिई बारी।”

ढबैओ थैलू, झ़ोल़ी और तलबार

35तेखअ पुछ़अ ईशू तिन्नां का, “ज़धू मंऐं तम्हां लै ढबैओ थैलू, झ़ोल़ी और पोलल़ै बाझ़ी छ़ाडै तै, तधू कै तम्हां किछ़ू गल्ले कामीं हुई ती?”

तिन्नैं दैनअ ज़बाब, “हाम्हां निं किछ़ू गल्ले कामीं पल़ी।”

36ईशू बोलअ तिन्नां लै, “ऐबै ज़हा का ढबैओ थैलू होए सह पाऐ तेऊ संघा और झ़ोल़ी बी। तेखअ ज़हा का तलबार निं आथी, सह पाऐ आपणअ च़ोल़अ बेच़ी और तेता करै लऐ तलबार। 37किल्हैकि हुंह बोला तम्हां लै कि अह ज़ुंण लिखअ द आसा, कि ज़ुल्म करनै आल़ै संघै गिणअ। सह आसा मुंह दी पूरअ हणअ ज़रूरी। किल्हैकि मेरै बारै शास्त्रा दी लिखी गल्ला आसा पूरी हणैं आल़ी।” (गलाती 3:13; 2 कुरिन्थी 5:21; याशायाह 53:12)

38तिन्नैं बोलअ ईशू लै, “प्रभू, भाल़ इधी आसा हाम्हां का दूई तलबारा।”

ईशू बोलअ, “ईंयां आसा बतेर्ही।”

जैतून धारा दी ईशूए प्राथणां

(मत्ती 26:36-46; मरकुस 14:32-42)

39तेखअ नाठअ ईशू तिधा का बागै निखल़ी जैतून धारा लै ज़िहअ सह धैल़ कई बारी डेओआ त और च़ेल्लै बी नाठै तेऊ पिछ़ू। 40तिधी पुजी करै बोलअ ईशू आपणैं च़ेल्लै लै इहअ, “प्राथणां करा, ताकि तम्हैं परिक्षा दी पल़ी करै पाप नां करे।” 41तेखअ नाठअ आप्पू तिन्नां का ज़ुदअ ज़िहअ संघा लागअ एही प्राथणां करदअ,

42 “हे परमेशर ज़ै हई सके ता; तै कर मुखा एसा घल़ी एऊ दुखा दूर। तैबी ज़िहअ हुंह च़ाहा तिहअ निं पर ज़िहअ तूह च़ाहा तिहअ लोल़ी हुअ।” 43तेखअ शुझुअ ईशू का स्वर्गा का एक स्वर्ग दूत, सह दैआ त ईशू लै शगती। 44ईशू हुअ बडअ भारी दुखी और तेभी रहअ प्राथणां करदअ लागी तेऊओ प्रसिन्नअ ज़ाण्हूंअ तेऊ का इहअ कि बडै-बडै लोहूए टिप्पै लागै धरनीं पल़दै।

45ईशू प्राथणां का उझ़ुअ और दुखी हई करै च़ेल्लै सेटा लै नाठअ पर तिंयां तै सुत्तै दै, तेऊ बोलअ तिन्नां लै, “तम्हैं किल्है आसा सुत्तै दै? 46खल़ै उझ़िआ, प्राथणां करा ताकि परिक्षा दी पल़ी करै तम्हैं पाप नां करे।”

ईशू धोखै करै ढाकणअ

(मत्ती 26:47-56; मरकुस 14:43-50; युहन्ना 18:3-12)

47ईशू त इहअ बोलदअ ई लागअ द कि तिधी आऐ बडै भारी खास्सै लोग। तिन्नां बारा मांझ़ै ज़हा नांअ यहूदा त, सह आसा त तिन्नां लोगा आजू-आजू और सह आअ ईशू सेटा लै संघा दैनअ ईशू लै गलेटै माख्खू। 48ईशू बोलअ तेऊ लै, “हे यहूदा, माख्खू दैई करै आसा तंऐं लाअ द हुंह मणछो शोहरू ढाकणैं बझ़ैल़ी?”

49च़ेल्लै ज़ांऊं भाल़अ कि आजू कै आसा ऐबै हणैं आल़अ, तिन्नैं बोलअ, “हे प्रभू तूह कै बोला हाम्हैं तलबार च़लाऊमैं?” 50तिन्नां मांझ़ै बाही एकी माहा परोहिते टैहलू लै तलबारा करै और तेऊओ दैहणअ कान शोटअ धरनीं।

51एता लै बोलअ ईशू, “हुअ इहअ निं करा” और ईशू लाअ तेऊओ कान बापस और सह हुअ राम्बल़अ। 52तेखअ ईशू बडै परोहिता लै और मांदरे पहरी, मुखियै लै ज़ुंणी राची तिंयां घेरै तै, तिन्नां लै बोलअ, “तम्हैं कै हुंह डाकू समझ़अ कि मुंह ढाकदै आसा तलबारा और शोठै पाई निखल़ै दै? 53हुंह ता हर धैल़ै तम्हां संघा मांदरै शिक्षा दैआ त, तेभै किल्है निं हुंह तम्हैं ढाकअ? पर अह आसा थारअ बगत और न्हैरै दी काम करनै आल़ै राख्सो हक।”

पतरसो हुधणअ

(मत्ती 26:57,58,59-75; मरकुस 14:53,54,66-72; युहन्ना 18:12-18,25-27)

54तिन्नैं किअ ईशू कैद संघा निंयं तिन्नैं सह माहा परोहिते घरा लै। पतरस बी नाठअ तिन्नां पिछ़ू-पिछ़ू। 55माहा परोहिते खोल़ै तै लोग आग ज़ाल़ी करै फेर बेठै दै और पतरस बी बेठअ तिन्नां मांझ़ै आगी नैथदअ। 56एकी टैहलू बेटल़ी भाल़अ सह आगीए प्रैशै दी बेठअ द सह लागी तेऊ बाखा राम्बल़ै करै भाल़ी संघा बोलअ तेसा इहअ, “अह बी ता तेऊ संघै त।”

57पतरस हुधूअ इहअ बोली, “हे ज़नानी, हुंह निं तेऊ बछ़ैणदअ बी आथी।”

58थोल़ी घल़ी बाद बोलअ एकी होरी तेऊ लै, “तुबी ता तिन्नों साथी आसा भाल़ी?” पतरस हुधूअ भी और तेऊ बोलअ, “तूह कै मणछ आसा, हुंह निं आथी सह।”

59कोई थोल़ी घल़ी बाद बोलअ एकी होरी मणछै सह पाक्कअ बछ़ैणीं करै, “अह भाल़अ सच्च़ी मंऐं तिन्नां संघै किल्हैकि अह आसा गलील लाक्कै का।” 60पर पतरस लागअ इहअ बोलदअ, “आरा भाई थोघ निं तूह कै गल्ल बोला?” पतरस त बोलदअ ई लागअ द कि तेभी बाशअ मुर्गअ।

61तेखअ भाल़अ प्रभू पतरसा बाखा संघा फिरी पतरसा ईशूए सह गल्ल आद, “आझ़ मुर्गै दुजी बारी बाशणैं का पैहलै हुधणअ ताह मेरै बारै चिई बारी।” 62सह नाठअ तिधा का बागै संघा लागअ सह हिंह करै लेरा लांदअ।

ईशूओ फिरी एछणअ

(मत्ती 26:67,68; मरकुस 14:65)

63ज़ुंणी मणछै ईशू ढाकी त डाहअ द, तिंयां लागै ईशूए सुहांगा करदै और तेऊ च़िकदै। 64तेखअ ढोपी तिन्नैं ईशूए आछी संघा लागै इहअ बोलदै, “एसा गल्ला कर प्रगट कि ताल्है कुंणी बाही।” 65संघा लागै तिंयां तेऊ लै बूरी-बूरी गल्ला बोलदै और तेऊए निंदा करदै।

माहा सभा दी ईशू

(मत्ती 26:59-66; मरकुस 14:55-64; युहन्ना 18:19-24)

66ज़ांऊं राच भैई ता लोगे मुखियै, बडै परोहित, शास्त्री हुऐ कठा और तिन्नैं निंयं ईशू आपणीं माहा सभा दी और पुछ़अ, 67“ज़ै तूह मसीहा आसा, तै बोल हाम्हां का।”

ईशू बोलअ तिन्नां लै, “ज़ै हुंह तम्हां का बोलूं तै निं तम्हां विश्वास करनअ। 68ज़ै हुंह पुछ़ूं, तै निं तम्हां ज़बाब दैणअ। 69पर एभा पोर्ही रहणअ हुंह मणछो शोहरू सर्वशक्तिमान परमेशरे दैहणीं बाखा बेशी।” (मरकुस 14:62; भज़न 110:1)

70एसा गल्ला शूणीं तिन्नैं सोभी ईशू लै बोलअ, “तेरअ कै मतलब, तूह परमेशरो शोहरू आसा?”

ईशू बोलअ, “तम्हैं आसा लागै दै आप्पू बोलदै, किल्हैकि हुंह आसा।” 71तेखअ बोलअ तिन्नैं सोभी, “ऐबै निं हाम्हां कोही गवाहीए ज़रुरत आथी, किल्हैकि हाम्हैं शूणअ आपणैं कानै एऊए मुंहां का।”

Currently Selected:

लुका 22: OSJNT

Highlight

Copy