मरकुस 13
13
मन्दरा रै विनाश री भविष्यवाणी
(मत्ती 24:1,2; लूका 21:5,6)
1जैहणै यीशु मन्दरा थऊँ निकलणा लगु ता तसेरै अक्की चेलै तैसिओ बल्लू, “हे गुरू, हेर, ऐह किनै अदभुत पत्थर अतै किनै छैळ भवन हिन!”
2यीशुऐ तैस सोगी बल्लू, “तुहै जैड़ै ऐह सब बड़ै बड़ै भवन हेरदै हिन ऐह पत्थर पुर पत्थर ना बचणै सब ढायै गाणै।”
मुसिवता अतै क्लेश
(मत्ती 24:3-14; लूका 21:7-19)
3जैहणै सो जैतून रै पहाड़ा पुर मन्दरा रै सामणै बैहुरा थू, ता पतरस, याकूब, यूहन्ना अतै अन्द्रियास तैसिओ एकान्त मन्ज नि करी पुछणा लगै, 4“असिओ दस कि ऐह मन्दरा रै भवन रै पैणै री गल्ला कैहणै भूणी? अतै जैहणै ऐह गल्ला पूरी भूणा लगणी ता तैस दिना री कै पछैण भुणीआ?”
5यीशु तियां सितै बलणा लगा, “चौकनै रेय्आ कि कोई तुसिओ ईयां गल्ला थऊँ ना भटका। 6मतै मणु ईच्ची करी मेरा नां लेई करी बलणा, ‘अऊँ मसीहा हा!’ अतै मतै मणु जो तियां भटकाणा। 7जैहणै तुहै लड़ाई, या लड़ाई री अफवाह हुणन, ता डरदै मत क्ओकि ईयां गल्ला रा भूणा जरूरी हा, पर तैस टैमैं अन्त ना भूणा। 8क्ओकि अक्क जाति पुर दूई जाति, अतै अक्की राज्य दूये राज्य पुर चढ़ाई करनी हा। कई जगह हिल्लण भूणै, अतै कई जगह अकाल पैणै। ऐह ता दुखा री शुरूआत ही भुणीआ।” #यिर्म. 6:24.
9“पर तुहै अपणै बारै मन्ज सावधान रेय्आ क्ओकि मणु तुसिओ यहूदी महासभा मन्ज घसिटणा। यहूदी रै सभागार मन्ज मारनै हिन, अतै मिन्जो तांयें हाकमा अतै राजा रै सामणै खडेरणै हिन। ऐह तूसु तांयें मेरै बारै मन्ज तियां जो दसणै रा मौका भूणा। 10पर जरूरी हा कि सुसमाचार पैहलै सब जाति मन्ज प्रचार करया गच्छा। 11जैहणै तियां तुसिओ महासभा मन्ज घसिटणा, ता ऐह चिन्ता मत करदै कि तूसु कै बलणा। जैडा कुछ तैहा घड़ी मुँ तुसिओ दसणा सो ही बलै; क्ओकि बलणै बाळै तुहै ना, पर पवित्र आत्मा हा।”
12“भाई जो भाई मारनै तांयें सौंपणा, पिता जो पुत्रा मारनै तांयें सौंपणा, बच्चै माता पिता रै विरोधा मन्ज उूठी करी तियां जो मरवाई दिणा। #लूका 21:16; मीका 7:6. 13अतै मेरै नां री वजह थऊँ सबी मणु तूसु सोगी बैर करना; पर जैस अपणी मौत तक धीरज रखणा, तसेरा ही उद्धार भूणा।”
महासंकट-काल
(मत्ती 24:15-28; लूका 21:20-24)
14“अक्क दिन जैहणै तुहै तैहा घृणित चिज जैड़ी विनाश करदी हा, मन्दरा मन्ज खडुरै हेरन, जठेरै बारै मन्ज दानिय्येल भविष्यवक्तै बलुरा थू। तैहणै सोची लैं कि टैमं चली आ। (पढ़नैवाळा समझणै री कोशिश करा कि अऊँ कै लिखणा लगुरा) तैहणै जैड़ै यहूदिया परदेस मन्ज हिन सो पहाडा जो नह्ही गान।#दानि. 9:27; दानि. 12:11. 15ठेरैतांये अपणा टैमं मत बर्बाद करदै जैड़ै छपरा पुर भून सो अपणै घरा थऊँ कुछ लैणै तांयें थला जो ना ओसन अतै ना ही अन्दरा जो गान। 16जैड़ै बगड़ी मन्ज भून सो अपणा कपडा लैणै तांयें पचूँह ना फिरन। 17तियां दिन मन्ज जैड़ी गर्भवती अतै दुध पयाणै बाळी माता भोली तियां पुर हाय! क्ओकि तियां तांयें नहणा कैतना मुसकिल भूणा। 18अतै प्रार्थना करा कि ऐह सर्दी रै मौसम मन्ज ना भोआ। 19क्ओकि तैस टैमैं ऐसा भारी क्लेश भूणा, जैडा ना ता संसार रै शुरूआत थऊँ अज तक भुआ अतै ना ही भूणा।” #मत्ती 24:21.
20“प्रमात्मैं अपणै चुणुरै मणुओ जैड़ै तैस पुर विस्वास करदै हिन, तियां तांयें ईयां दिना जो घटाई दिता; ना ता सब मणु मरी गान्दै। 21तैस टैमैं अगर कोई तूसु सोगी बला, ‘हेरा, मसीह ऐठीआ,’ या ‘हेरा, ओठीआ,’ ता विस्वास मत करदै। 22क्ओकि झूठै मसीह अतै झूठै भविष्यवक्ता भी भूणै हिन, अतै तियां चिन्ह अतै अनोखै कम करीके दसणै अतै भूच्ची सका ता सो चुणुरै मणु जो भी प्रमात्मैं रै रस्तै थऊँ भरमाई दीन। #मत्ती 24:24. 23पर तुहै चौकनै रेय्आ; हेरा, मैंई तुसिओ सब गल्ला भूणै थऊँ पैहलै ही दस्सी दिती हिन।”
मणु रै पुत्रा रा पुनरागमन
(मत्ती 24:29-31; लूका 21:25-28)
24“तियां दिना मन्ज, तैस क्लेश थऊँ बाद”
“सूरज नैहरा भूच्ची गाणा,
अतै चद्रमां री लौ चली गाणीआ।”
25“अम्बरा थऊँ तारै टिरना लगी पैणा;
अतै अम्बरा री सब चिजा हिलाई गाणी हिन।” #प्रका. 6:13; यशा. 34:4.
26“ता सबी मणु रै पुत्रा जो बड़ी सामर्थ अतै महिमा सोगी बदळा मन्ज ईन्दै हेरना। #दानि. 7:13; प्रका. 1:17. 27तैस टैमैं तैस अपणै स्वर्गदूता जो भैजी करी, धरती रै ऐस कनारै थऊँ लेई करी अम्बरा रै दूये कनारै तक, अपणै चुणुरै मणु जो कठेरना हा।” #व्य. 30:4; मत्ती 24:31.
अंजीरा रै रूखा रा उदाहरण
(मत्ती 24:32-35; लूका 21:29-33)
28“अंजीरा रै रूखा थऊँ ऐह उदाहरण सिखा, जैहणै तठेरी डाली कोमल भूच्ची गान्दी हिन, अतै पत्तै निकलणा लगदै हिन; ता तुहै जाणी लैन्दै कि गर्मी नेड़ै हिन। 29ऐस तरीकै जैहणै तुहै ईयां गल्ला जो भुन्दा हेरन ता तुहै जाणी लेय्आ तसेरा दुआ आगमन नजदीक हा, बल्कि सो बड़ा नजदीक हा। 30अऊँ तूसु सोगी सच बलदा कि जैहणै तक ऐह गल्ला भूच्ची ना गाहली, तैहणै तक तूसु ना मरना। 31अम्बर अतै धरती टळी सकदै हिन पर मेरी ऐह सब कणैऊरी गल्ला कदी भी ना टलणी।” #यशा. 40:8; लूका 21:33.
जागदै रेय्आ
(मत्ती 24:36-44)
32“तैस दिन या तैहा घड़ी रै बारै मन्ज कोई ना जाणदा, ना स्वर्गा रै स्वर्गदूत अतै ना पुत्र पर सिर्फ पिता जाणदा। 33ता ‘जागदै रेय्आ अतै प्रार्थना करदै रेय्आ’ क्ओकि तुहै ना जाणदै कि सो टैमं कैहणै चली ईणा। 34ऐह तैस टैमां साईयें भूणा, जिंआं परदेसा जो गान्दै टैमैं मालक अपणै घरा जो छड़ी करी अपणै नौकरा जो हूक्म दि गच्छा अतै हरेक जो तसेरा कम दस्सी गच्छा, अतै द्धारपाला जो जागदा रैहणै री आज्ञा दी गान्दा।”
35“ठेरैतांये जागदै रेय्आ, क्ओकि तुहै ना जाणदै कि घरा रै मालका कैहणै ईच्ची रैहणा, संझा या अध्धी राती या कुक्कड़ा री बाँग दिणै रै टैमैं भ्यागा ही। 36ऐसा ना भोआ कि सो अचानक ईच्ची रेय्आ अतै तुसिओ सुतुरा हेरा। 37जैडा अऊँ तूसु सोगी बलदा, सो ही सबी सोगी बलदा जागदै रेय्आ!”
Currently Selected:
मरकुस 13: GBKNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.