मत्ती 24

मन्दरा रै विनाश री भविष्‍यवाणी

(मरकुस 13:1-2; लूका 21:5-6)

1जैहणै यीशु मन्दरा थऊँ निकळी करी चलूरा थू, ता तसेरै चेलै मन्दरा री कलाकारी दसणै तांयें तैस बलै आये। 2तिनी तियां सितै बल्लू, “तुहै ऐह सब हेरू करदै हिन ना! अऊँ तूसु सोगी सच बलदा, ऐड़ी पत्थर पुर पत्थर भी ना टिकणा जैडा ढाणा निय्आ।”

मुसिवता अतै क्‍लेश

(मरकुस 13:3-13; लूका 21:7-19)

3जैहणै सो जैतून पहाड़ा पुर बैहुरा थू, ता चेलै एकान्त मन्ज तैस बलै ईच्ची करी बल्लू, “असिओ दस्सा कि ऐह गल्ला कैहणै भूणी? तून्दै ईणै रा अतै संसारा रै अन्त री कै नशाणी भुणीआ?”

4यीशुऐ तियां जो जवाव दिता, “चौकनै रेय्आ! कोई तुसिओ भटका ना, 5क्ओकि मतै सारै ऐसै भूणै कि जिंआ मेरै नां थऊँ ईच्ची करी बलणा, ‘अऊँ मसीहा हा’, अतै मतै जो भटकाणा। 6तूसु लड़ाई या झगड़ै री अफवाह हुणनी, ता डरदै मत क्ओकि ईआंरा भूणा जरूरी हा, पर तैस टैमैं अन्त ना भूणा। 7क्ओकि जाति पुर जाति अतै राज्य पुर राज्य चढ़ाई करनी, अतै जगह जगह अकाल पैणै, अतै हिल्‍लण भूणै। 8इन्या सबी गल्ला री शुरूआत ईयां भुणीआ, जियां बच्चा जमणै री पीड़ा रै टैमं भून्दिआ।”

9“ता क्‍लेश दिणै तांयें तियां तुसिओ पकड़ाणा, अतै तुसिओ मारी दिणा, अतै मेरै नां री वजह थऊँ सबी जाति रै मणु तूसु सोगी बैर रखणा। 10ता मतै मणु विस्वास करना छड़ी दिणा, अतै अक्की दूये जो पकड़वाणा, अतै अक्की दूये सितै बैर रखणा। 11मतै सारै भविष्‍यवक्ता ईणै, अतै मतै जो भरमाणा। 12अधर्म रै बदणै थऊँ मतै विस्वासी अक्की दूये सोगी प्रेम ना करना, 13पर जैस अन्त तक धीरज रखणा, तसेरा ही उद्धार भूणा। 14अतै राज्य रा ऐह सुसमाचार पूरै संसार मन्ज प्रचार करया गाणा, कि सब जाति पुर गवाही भोआ, तैहणै संसारा रा अन्त चली ईणा।”

महासंकट री शुरूआत

(मरकुस 13:14-23; लूका 21:20-24)

15“ठेरैतांये जेहा उजाड़णैवाळी घृणित चिजा जो पवित्र जगह पुर तुहै खडुरै हेरन, जठेरी चर्चा दानिय्येल भविष्‍यवक्तै करूरी हा (जैडा पढ़ा, सो समझा), 16ता जैड़ै यहूदिया मन्ज हिन सो पहाड़ा जो नह्ही गान। 17जैड़ै छपरा पुर हिन, सो अपणै घरा जो समान लैणा ना ओसन।”

18“जैड़ै बगड़ी मन्ज हिन, सो अपणै कपड़ै लैणा पिचो ना फिरन। 19तियां दिन मन्ज जैड़ी गर्भवती अतै दुध पयाणै बाळी माता भोली तियां पुर हाय! हाय! 20प्रार्थना करा कि तुसिओ सर्दी मन्ज या विश्रामदिन मन्ज नहणा ना पैय्आ। 21क्ओकि तैस टैमैं ऐसा भारी क्‍लेश भूणा, जिन्‍ना ना ता संसार रै शुरूआत थऊँ अज तक भुआ अतै ना ही भूणा। 22अगर प्रभु तियां दिन जो ना घटान्दा ता सब मणु मरी गान्दै, पर तियां चुणुरै री वजह थऊँ सो दिन घटाई दिणै। 23तैस दिन अगर कोई तूसु सोगी बला, ‘हेरा, मसीह ऐठीआ! या ओठीआ!’ ता विस्वास मत करदै।”

24“क्ओकि झूठै मसीह अतै झूठै भविष्‍यवक्ता भी भूणै हिन, अतै मतै चिन्ह, अतै अनोखै कम करीके दसणै कि अगर भूच्ची सका ता चुणुरै जो भी भरमाई दीन। 25हेरा, मैंई तूसु सोगी सब गल्ला पैहलै थऊँ ही दस्सी दितुरी हिन।”

26“ठेरैतांये अगर ऐह तूसु सोगी बलन, ‘हेरा, सो बणा मन्ज हिन’, ता बाहर मत निकळी गान्दै; या ‘हेरा, सो कोठै मन्ज हिन’, ता विस्वास मत करदै। 27क्ओकि जिंआ बिजळी पूर्वा थऊँ नकैई करी पश्‍चिम तक चमकदी हा अतै मणु तैतिओ हेरदै हिन, तियां ही मणु रै पुत्रा जो इंदै हेरना। 28जैहणै मुँ दोबारा फिरी ईणा ता सबी जो आसानी सोगी पता लगी गाणा। जियां जैड़ी मुरदा भुन्दा तैड़ी इल्लणी भुन्दी।”

मणु रै पुत्रा रा पुनरागमन

(मरकुस 13:24-27; लूका 21:25-28)

29“तियां दिन मन्ज क्‍लेश थऊँ बाद

सूरज नैहरा भूच्ची गाणा,

अतै चन्द्रमा री लौ चली गाणीआ,

अतै तारै अम्बरा थऊँ पैई गाणै।

अम्बरा री शक्ति हिलाई गाणी।”

30“ता मणु रै पुत्रा रा चिन्ह अम्बरा मन्ज हुजणा हा, अतै ता धरती रै सब कुला रै मणु हिक्का जकणी; अतै मणु रै पुत्रा जो बड़ी सामर्थ अतै महिमा सोगी अम्बरा रै बदळा पुर इन्दै हेरना। 31तैस बाजै री बड़ी आवाज सोगी धरती पुर स्वर्गदूता जो भैजणा, अतै तियां धरती रै ऐस कनारै थऊँ दूये कनारै तक, पूरै संसार रै चुणुरै मणु जो इकट्ठा करना।”

अंजीरा रै रूखा रा उदाहरण

(मरकुस 13:28-31; लूका 21:29-33)

32“अंजीरा रै रूखा थऊँ ऐह उदाहरण सिखा जैहणै तठेरी डाली कोमल भूच्ची गान्दी अतै पत्तै निकलणा लगदै, ता तुहै जाणी लैन्दै कि गर्मी रै दिन नेड़ै हिन। 33ऐस तरीकै जैहणै तुहै ईयां गल्ला जो हेरन, ता ऐह जाणी लेय्आ कि यीशु रा दुआ आगमन नजदीक हा। 34अऊँ तूसु सोगी सच बलदा कि जैहणै तक ऐह गल्ला पूरी ना भूच्ची गान, तैहणै तक ऐसा पीढ़ी खत्म ना भूणा। 35अम्बर अतै धरती टळी सकदै हिन, पर मेरी गल्ला कदी भी ना टलणी।”

जागदै रेय्आ

(मरकुस 13:32-37; लूका 17:26-30,34-36)

36“तैस दिन अतै तैहा घड़ी रै बारै मन्ज कोई ना जाणदा, न स्वर्गा रै स्वर्गदूत अतै ना पुत्र, पर सिर्फ पिता। 37जिंआ नूह रै दिन थियै, तियां ही मणु रै पुत्रा रा ईणा भी भूणा। 38क्ओकि जिंआ जल-प्रलय रै पैहलै दिन मन्ज, जैस दिन तक नूह जहाजा पुर ना चढु, तैस दिन तक मणु खान्दै पिन्दै रैह, अतै तियां मन्ज बैह भुन्दै थियै। 39अतै जैहणै तक जल-प्रलय ईच्ची करी ईयां सबी जो लुढाई ना लेई गो, तैहणै तक तियां जो पता ना लगु; तियां ही मणु रै पुत्रा भी ईणा। 40तैस टैमैं बगड़ी मन्ज दोई मणु भूणै, अक्क लेई लैणा अतै दूये जो छड़ी दिणा। 41दोई जनानी चक्की चलाऊँ करदी भोली, अक्क लेई लैणी हा दुई छड़ी दिणिआ।”

42“ठेरैतांये जागदै रेय्आ, क्ओकि तुहै ना जाणदै कि तून्दा प्रभु कैहणै ईणा। 43पर तुहै ऐह गप्‍प जाणी लेय्आ कि अगर घरा रै मालका जो पता भोआ कि चोरा कैहणै चोरी करना ईणा ता तैस जागदै रैहणा, अतै अपणै घरा मन्ज चोरी ना भूणा दिणी। 44ठेरैतांये तुहै भी तैयार रेय्आ, क्ओकि जैस घड़ी रै बारै मन्ज तुहै सोचदै भी ना हिन, तैहा ही घड़ी मणु रै पुत्रा ईच्ची रैहणा।”

विस्‍वासा लायक अतै दुष्‍ट दास

(लूका 12:41-48)

45“अतै सो विस्वास लायक अतै अक्‍लमंद दास कुण हा, जसेरा मालक तैस जो अपणै नौकरा-चाकरा पुर चौंकीदार बणाऊ कि टैमां पुर तियां जो खाणै जो देय्आ? 46धन्य हा सो दास, जैस जो तसेरा मालक इन्‍नी साभै कम करदा ईच्ची करी हेरा। 47अऊँ तूसु सोगी सच बलदा, तैस मालका सो दास अपणी पूरी जायदात पुर अधिकारी बणाई दिणा। 48पर जे सो दुष्‍ट दास सोचणा लगा कि हल्ली तिकर मालका रै ईणै जो देर हा, 49अतै अपणै दासा जो मारा जक्का, अतै खाई पी करी मतबाळा रैहणा लगी पेआ। 50ता तैस दासा रा मालक ऐसै टैमैं फिरी ईणा, जैहणै तैस दासा जो मालका री भाळ भी ना भूणी, अतै ऐसी घड़ी जैतिओ सो जाणदा भी ना भोआ। 51ता मालका तैस दासा जो भारी ताड़ना दिणिआ अतै सो तैस कपटी मन्ज गिणया गाणा, अतै तैहा जगह भैजणा जैड़ी सिर्फ रूणा अतै दन्द पीणै हिन।”

Currently Selected:

मत्ती 24: GBKNT

Highlight

Copy