लूका 8

यीशु अतै तसेरै चेलै

1ऐत थऊँ बाद यीशु शहरा-शहरा अतै ग्राँ-ग्राँ मन्ज प्रमात्मैं रै राज्य रा सुसमाचार हुणाणा लगु अतै बारह चेलै भी तैस सोगी भुन्दै थियै। 2तियां सोगी कुछ ऐसी जनानी भी थी जियां थऊँ दुष्‍टात्मा नकैऊरी थी अतै कुछ बीमारी थऊँ ठीक भच्छुरी थी, जियां कि मरियम जेहा जो मगदलीनी #8:2 मगदलीनी मरियम मगदल ग्राँ री थी, ठेरैतांये तैहा जो मरियम मगदलीनी बलदै थियै।भी बलदै थियै। तैहा थऊँ सत दुष्‍टात्मा नकैऊरी थी। 3अतै राजा हेरोदेस रै खजांची जसेरा नां खुजा थू तसेरी घरावाळी जसारा नां योअन्ना थू, सो भी तियां सोगी थी। फिरी सुसनाह अतै होर मती जनानी तियां सोगी थी। ऐह सब जनानी अपणी धना-दौलता सितै यीशु अतै तसेरै चेलै री सेवा करदी थी।

बी बाणैवाळै रा उदाहरण

(मत्ती 13:1-9; मरकुस 4:1-9)

4जैहणै शहरा अतै ग्राँ रै मणु री बड़ी भीड़ किटठी करी यीशु बलै आई ता तिनी तियां जो ऐह उदाहरण हुणाऊ। 5“अक्क बी बाणैबाळा बी बाणा निकळू। ता बान्दै-बान्दै कुछ बी बीड़ा पुर पै अतै पैरा थलै चली गै अतै अम्बरा रै पखेरू ईच्ची करी तियां जो चुगी गै। 6कुछ बी पथरीली जमीना पुर पै अतै जैड़ी तियां जो मिट्टी ना मुळन री वजह थऊँ हुक्की गै। 7कुछ बी झिन्ड़ा मन्ज पै पर झिन्ड़ै सो मोटिणा ना दितै। 8कुछ बी खरी जमीना पुर पै अतै जम्‍मी करी सौ गुणा फसल दिती।” ऐह हुणाई करी तिनी जोरा सितै वल्‍लु, “ऐसा गल्ला जो ध्याना सितै कन्‍ना खोली करी हुणी लेय्आ।”

उदाहरण रा उदेश्य

(मत्ती 13:10-17; मरकुस 4:10-12)

9तसेरै चेलै तैस थऊँ पूच्छु कि ऐस उदाहरण रा कै मतलब हा? 10यीशुऐ जवाव दिता, “तुसिओ प्रमात्मैं रै राज्य रै भेदा जो जाणनै री अक्ल दितुरीआ पर बाकी मणुओ ऐह भेद उदाहरण सितै समझाणा पैन्दै,” ठेरैतांये कि :

“सो हेरी करी भी ना समझी पान

अतै हुणी करी भी ना समझी पान।”#मत्ती 4:11; यशा. 6:9-10.

बी बाणै बाळै उदाहरण रा अर्थ

(मत्ती 13:18-23; मरकुस 4:13-20)

11“ऐस उदाहरण रा मतलब ऐह हा कि, बी प्रमात्मैं रा बचन हा। 12बीड़ा पुर पेऊरा बी तियां मणु सैई हा जैड़ै बचना ता हुणदै हिन, पर शैतान ईच्ची करी बचना जो तंयारै मनां थऊँ कड्ड़ी दिन्दा, क्ओकि सो सोचदा करखी ईयां ना भोआ कि विस्वास करीके सो उद्धार ना पाई लैन। 13पथरीली जमीना पुर पेऊरा बी तियां मणु सैईऐ हा जैड़ै बचन जो हुणी करी खुशी सितै मनी ता लैन्दै पर जैहणै परीक्षा री घड़ी इन्दीआ ता सो प्रमात्मैं रै बचना पुर भरोसा करना छड़ी दिन्दै। 14जैडा बी झिन्ड़ा मन्ज पेऊरा तियां मणु सांईयै हा जैड़ै बचन जो हुणदै पर संसारा री चिन्ता अतै धन-दौलत री चिन्ता, अतै जिन्दगी रै सुखा-विलास मन्ज फसी करी कदी भी विस्‍वासा मन्ज पक्कै ना भुन्दै 15पर खरी जमीना पुर पेऊरा बी तियां मणु सैई हा जैड़ै भलै अतै खरै मना सितै बचना जो हुणी करी पक्कै विस्वासी वणदै अतै खरा फळ लैईन्‍दै।

दीयै रा उदाहरण

(मरकुस 4:21-25)

16“कोई भी मणु दीयै जो बाळी करी टोकरू थलै ढ़की करी अतै ना ता मन्जै थलै रखदा, पर उच्ची जगह पुर रखदा ताकि अन्दरा जो ईणै बाळैओ लौ भोआ। 17जो कुछ लुकाऊरा अतै जो कुछ भी नैहरै मन्ज कमाऊरा सो सब सामणै ईणा। 18क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ।”

यीशु री माता अतै भाई

(मत्ती 12:46-50; मरकुस 3:31-35)

19यीशु री माता अतै हल्का भाई तैस वलै आये पर भीड़ तूणी भारी थी कि सो यीशु सोगी मुळी ना सकै। 20कुणकी यीशु सितै वल्‍लु, “तेरी माता अतै भाई बाहर खडुरै तिजो सोगी मुळना चाहन्दै।” 21ऐह हुणी करी यीशुऐ तियां जो वल्‍लु, “मेरी माता अतै मेरै भाई ता ऐह सब मणु हिन जैडा प्रमात्मैं रा बचन हुणी करी तैतिओ मन्दै।”

तूफान जो शान्त करना

(मत्ती 8:23-27; मरकुस 4:35-41)

22अक्क दिन यीशुऐ किस्ती पुर बैही करी अपणै चेलै जो वल्‍लु, “अईआ अहै झीला रै पारीयें कनारी चलदै।” ता सो सब किस्ती मन्ज बैही करी पारा जो चली पै। 23पर जैहणै चेलै किस्ती चलाऊँ करदै थियै, ता यीशु सोई गो अतै हेरदै-हेरदै ही झीला मन्ज तूफान चली आ, डरोणी लैहरा आई अतै किस्ती पाणी सितै भरीणा लगी पैई, चेलै मुसकल मन्ज फसी गै। 24ता तियैं यीशु वलै गिच्ची करी सो जगाऊ अतै वलु, “स्वामी! स्वामी! अहै डुबणा लगी पै।” ता तिनी ऊठीकरी तूफाना जो अतै लैहरा जो झिड़कू अतै सो सब कुछ थमी करी शान्त भूच्ची गो। 25ता तिनी तियां थऊँ पूछु, “तून्दा विस्वास कड्ड़ी थू?” सो ड़री करी अप्पू मन्ज बलणा लगै, “ऐह किना मणु हा, कि जैडा तूफाना जो अतै लैहरा जो हूक्म दिन्दा अतै सो सेरी हुणदै हिन?”

दुष्‍टात्मा रै सताऊरै मणु जो ठीक करना

(मत्ती 8:28-34; मरकुस 5:1-20)

26फिरी सो गिरासेनियों नां रै देशा मन्ज पुजु जैडा कि गलील नां री झीला रै सामणै हा। 27जैहणै सो किस्ती थऊँ ओसु ता तैड़ीआ रा अक्क मणु जैस मन्ज दुष्‍टात्मा थी, तियां जो मुळु, तिनी कैईआ दिना रै घर-वार छडुरै थियै अतै नंगा भूच्ची करी कब्रिस्तान मन्ज रैहन्दा थू। 28सो यीशु जो हेरी करी जोरा सितै बकी नकैऊ अतै तसेरै पैरा पकडी करी जोरा सितै बलणा लगा, “हे परमप्रधान प्रमात्मैं रै पुत्र यीशु! तू मिन्जो थऊँ कै चाहन्दा? मेरी तिजो सितै ऐह बिनती हा कि मिन्जो तू दुख मत दिन्यै।” 29क्ओकि यीशुऐ तैस टैमैं दुष्‍टात्मा जो तैस मणु थऊँ नकैणै रा हूक्म दिता थू, कओकि सो दुष्‍टात्मा तैसिओ घड़ी-घड़ी मरोडदी रैहन्‍दी थी। हालांकि मणु तैसिओ हँगला सितै बनी करी तसेरै पैरा मन्ज बेड़ी पाई दिन्दै थियै, फिरी भी सो इआं त्रोड़ी दिन्दा थू अतै अबै दुष्‍टात्मा तैसिओ सुनसान जगह मन्ज भटकान्दी रैहन्‍दी थी। 30यीशुऐ तैस थऊँ पूच्छु, “तेरा नां किआ?” तिनी वलु, “सेना,” क्ओकि तैस मणु मन्ज कई दुष्‍टात्मा थी। 31तिईयें यीशु सितै ऐह बिनती करी कि असिओ अथाह कुण्ड़ मन्ज गाणै रा हूक्म मत दिन्दा। 32तैड़ी उच्चै जिन्‍नै टिलै पुर सूअंरा री गुआली चरू करदी थी, ठेरैतांये तियैं तैस सोगी बिनती करी कि असिओ ईयां मन्ज गाणा दे, ता यीशुऐ तिआंओ गाणा दिता। 33अतै सो दुष्‍टात्मा तैस मणु थऊँ नकैई करी सूंरा जो हच्ची गई अतै सूंर भूती करी तैठी झीला मन्ज डुब्‍बी मरै।

34गुआलु ऐह हेरी करी नह्ही गै अतै ग्राँ अतै शहरा मन्ज गिच्ची करी ऐह गल्ला हुणाई, 35ग्राँ अतै शहरा रै मणु ऐसा घटना जो हेरना चली आये ता तैठी तियैं सो मणु जैस थऊँ दुष्‍टात्मा निकळुरी थी, यीशु रै पैरा मन्ज तैठी कपड़ै लाई करी शान्त बैहुरा हेरू। ऐह सब हेरी करी सो डरी गै। 36जियें सो ठीक भुन्दा हेरूरा थू तियैं होरी मणु जो दस्सु कि ऐह दुष्‍टात्मा रा सताऊरा मणु कियां ठीक भुआ। 37ता गिरासेनियों देशा रै मणुऐ यीशु सोगी बिनती करी कि ऐसा जगहा छड़ी करी ऐठी थऊँ चली गा, क्ओकि सो बडै़ डरी गच्छुरै थियै।

यीशु चेलै सोगी किस्ती पुर बैही करी तैठी थऊँ चली पैऊ। 38जैस मणु थऊँ दुष्‍टात्मा नकैऊरी थी तैस सोगी बिनती करना लगा कि, मिन्जो भी अप्पू सोगी ईणा दे, पर यीशुऐ सो ऐह बलीकरी फेरी दिता कि, 39“अपणै घरै गिचीकरी अपणै मणु जो दस्स कि तिजो पुर दया करीके प्रमात्मैं तिजो तांयै किनै कम करै हिन।” ता सो जैड़ै कम यीशुऐ तैस सितै करूरै थियै तंयारै बारै मन्ज ग्राँ अतै शहरा मन्ज गिच्ची करी दसणा लगु।

याईर री मरूरी कुल्ळी अतै अक्क रोगण जनानी

(मत्ती 9:18-26; मरकुस 5:21-43)

40जैहणै यीशु फिरी करी आ ता मणु तैस सोगी बड़ी खुशी सितै मुळै क्ओकि सो सब तसेरी भाळा बैहुरै थियै। 41तैहणै ही याईर नां रा अक्क मणु जैडा यहूदी रै सभागार रा सरदार थू, यीशु रै पैरै पैई करी बिनती करना लगु, कि मेरै घरा जो चला, क्ओकि तसेरी बारह साला री अक्‍को ही अक्क कुल्ळी मरनै बाळी थी।

42जैहणै यीशु तसेरै घरा जो चली पैऊ ता मणु री बड़ी भारी भीड़ धक्‍का-मुक्‍की करदी तैस पुर चड़ी चलुरी थी। 43तैसा भिड़ा मन्ज अक्क इन्‍नी जनानी थी जेहा जो बारह साला थऊँ खून चलनै री बीमारी थी अतै मुल्ख पैहै खर्चणै थऊँ वाद भी कोई डाक्टर, बैईद तैहाओ ठीक ना करी सकूरा थू, 44सो आई अतै तसेरै कपड़ै रै पल्लै जो छुई लैऊ ता तियां ही तसारा खून चलना बन्द भूच्ची गो। 45यीशुऐ पूच्छु, “मेरै पलै सितै हत्थ कुणी लाऊआ?” सब मणु अक्की दुऐ जो हेरना लगै, ऐह हेरी करी चेलै बलणा लगै, “हे स्वामी, भीड़ ता तिजो ऊपरा जो चड़ी चलुरी हा, हथ्‍थ कस लाणा?” 46पर यीशुऐ वल्‍लु, “ठीक हा! पर फिरी भी कुणकी मेरै कपड़ै सितै हत्थ लाऊआ, क्ओकि मिन्जो महसुस भुआ कि मिन्जो थऊँ सामर्थ निकळी हा।” 47ता सो जनानी ऐह जाणी करी कि अऊँ यीशु री नजरा थऊँ ज्यादा देर न लुक्‍की सकदी ता सो ड़रदी-सैहमदी आई अतै तसेरै पैरै पैई करी सबी मणु रै सामणै यीशु जो सब हाल सच-सच दसी दिता। 48यीशुऐ तैहा जो वलु, “पुत्री तेरै विस्वासै तिजो ठीक करू हा अतै अबै शान्ती सोगी चली गा।”

49सो बल्लू ही करदा थू कि, यहूदी रै सभागार थऊँ अक्क मणु ईच्ची करी याईर सितै बलणा लगा, “तेरी कुल्ळी मरी गई हा अतै अबै गुरू जो होर परेशान मत करै।”

50यीशुऐ ऐह हुणी करीके जवाव दिता, “मत डर, पर जे विस्वास रखला ता सो बची सकदिआ।”

51याईर रै घरै गिच्ची करी यीशुऐ अपणै चेलै पतरस, यूहन्‍ना, याकूब अतै कुल्ळी रै माँ-बुड़ै जो छड़ी करी होर कोई भी अन्दर ना ईणा दिता। 52सब मणु कुल्ळी तांई रूणा-पीटिणा लगुरै थियै, पर यीशुऐ वल्‍लु, “रूणा-पीटिणा बन्द करा, ऐह मरूरी निआ ऐह ता सुतुरी हा।”

53तसेरी यहा गल्ला हुणी करी सब मणु हासणा लगै क्ओकि सो जाणदै थियै कि ऐह मरी गच्छुरीआ। 54पर तिनी तैहा कुल्ळी रा हत्थ पकडु अतै तैहा जो हक्क पाई करी वल्‍लु, “ओ कुल्ळीए ऊठी भो।” 55ता सो जिन्दी भूच्ची करी ऊठी बैही। ता यीशुऐ हूक्म दिता, “ऐसाओ कुछ खाणैओ देआ।” 56तहारै कुल्ळी रै माँ-बुड़ै बड़ै हैरान भुएै पर यीशुऐ तिआंओ टणकाई करी वल्‍लु, “ऐह जैडा कुछ भी भुआ हा ठेरा कसिओ पता न लगणा चहिन्दा।”

Currently Selected:

लूका 8: GBKNT

Highlight

Copy