लूका 4

यीशु री परीक्षा

(मत्ती 4:1-11; मरकुस 1:12,13)

1यीशु बपतिस्मा लैणै थऊँ बाद पवित्र आत्मा सितै भरी करी यरदन नदी थऊँ फिरू अतै चाळी दिन तक आत्मा रै चलाणै सितै सो बियावान मन्ज फिरदा रैऊ 2अतै शैतान तैहा जगह तसेरी परीक्षा करदा रैऊ, चाळी दिन तक कुछ भी ना खाणै री व्जहा थऊँ तैसिओ भूख लगी। 3फिरी शैतान तैस जो बलणा लगा, “अगर तू प्रमात्मैं रा पुत्र हा ता, ऐस पत्थरा जो बल कि, रोटी बणी गा।” 4यीशुऐ तैस जो जवाव दिता, “शास्‍त्रा मन्ज लिखुरा, ‘मणु जो जिन्दा रैहणै तांई रोटी ही जरूरी नियां।’”#व्य. 8:3. 5फिरी शैतान यीशु जो लेई गो अतै संसारा रै नजारै जो दसी करी बलणा लगा, 6“अऊँ ऐस संसारा रा पुरा हक्क अतै वैभव तिजो दी दिला, क्ओकि ऐह सब मिन्जो दितुरा, अतै अऊँ जैसियो चाऊ तैसिओ दी सकदा। 7अगर तू मिन्जो मन्ना अतै मेरी पूजा करा ता ऐह सब कुछ तेरा भूच्ची गाणा।” 8यीशुऐ तैस जो जवाव दिता, “पवित्रग्रन्था मन्ज लिखुरा कि ‘तू प्रभु प्रमात्मैं री ही पूजा कर अतै सिर्फ तैस जो ही मन्‍नु कर।’”#व्य. 6:13-14.

9ता शैतान यीशु जो यरूशलेम जो लेई गो अतै मन्दरा री उच्ची जिनी चून्डी पुर खडेरी दिता, अतै बल्लू, “अगर तू प्रमात्मैं रा पुत्र हा ता अपणै आपा जो ऐठी थऊँ फैंकी दे। 10क्ओकि शास्‍त्र मन्ज लिखुरा कि, ‘प्रमात्मैं अपणै स्वर्गदूता जो हूक्म दिणा कि सो तिजो बचाई लैन, 11अतै तियां तिजो हत्थै हत्थ चुकी लैणा करखी ईयां ना भोआ कि तेरै पैरा मन्ज पत्थरा सितै ठोकर लगा।’”#भज. 91:11-12. 12यीशुऐ तैस जो जवाव दिता, “शास्‍त्रा मन्ज ईयां लिखुरा कि, ‘तू अपणै प्रमात्मैं री परीक्षा मत लैन्दा।’”#व्य. 6:16. 13ता जैहणै शैतान यीशु री परीक्षा लेई बैहु ता नोए मौके री भाळा मन्ज कुछ टैमां तांई तैस जो छड़ी करी चली गो।

यीशु रै सेवा कम्मा री शुरूआत

(मत्ती 4:12-17; मरकुस 1:14,15)

14यीशु पवित्र आत्मा री सामर्थ सितै भरी करी अपणै गलील परदेसा जो फिरी आ अतै तसेरै ईणै री खबर चौं कनारी भूच्ची गैई 15सो यहूदी रै सभागार मन्ज प्रचार करना लगा अतै सब मणु तसेरी खराई करदै थियै।

यीशु रा अपणै ही ग्राँ नासरत मन्ज अनादर

(मत्ती 13:53-58; मरकुस 6:1-6)

16यीशु नासरत ग्राँ मन्ज फिरी आ जेठी सो पळुरा थू, अतै अपणै रीति-रवाजा रै मुताबक सो विश्रामदिन यहूदी रै सभागार मन्ज गो अतै पवित्रशास्त्र जो पढ़नै तांई ऊठु। 17तैस जो भविष्‍यवक्ता यशायाह री कताब पढ़नै तांई दिती। तिनी कताबा जो खोलू अतै ऐह पढ़ी करी हुणाऊ कि

18“प्रभु प्रमात्मैं रा आत्मा मिन्जो पुर हा,

तिनी मिन्जो पुर अभिषेक करूआ कि अऊँ गरीबा जो सुसमाचार हूणाऊ,

अतै तिनी मिन्जो भैजुरा कि शैतान री कैद मन्ज फसुरै मणु जो छुटकारै रा

अतै अंधे जो तंयारी हाख्री खोलणै रा सुसमाचार प्रचार करू#यशा. 58:6; यशा. 61:1-2.

अतै मणु रै सतऊरै जो छुड़ाऊँ,

19अतै प्रभु प्रमात्मैं री कृपा अतै दया रै टैमां रा प्रचार करूं।”

20ता तूणा पढ़नै थऊँ बाद यीशुऐ कताब बन्द करीके सेवका रै हथै पकड़ाई दिती अतै बैही गो। यहूदी सभागार रै सबी मणु री नजरा तैस पुर लगुरी थी। 21ता यीशु तियां सितै बलणा लगा, “अज तून्दै हुणदै ही पवित्रग्रन्था रा ऐह बचन पुरा भुआ।” 22सब मणु तैस जो सराऊ करदै थियै अतै सो तसेरै मुआँ थऊँ निकळदै बचना जो हुणी करी हैरान थियै। सो बलणा लगै, “ऐ ता यूसुफ रा पुत्र हा।”#लूका 2:42; भज. 45:2.

23यीशुऐ तियां जो बल्लू, “मिन्जो पता हा तूसु मिन्जो पुर ऐह पखैण जरूर दिणा कि, ‘ओ बैईदा पैहलै अपणै आपाओ ता ठीक करी लै!’ जैडा कुछ अहै हुणुरा कि तैंई कफरनहूम नगर मन्ज कमऊरा तिनां जिन्‍ना ऐठी अपणै देशा मन्ज भी कम्मा।”

24“अऊँ तूसु सितै सच बलदा कि, कोई भी भविष्‍यवक्ता अपणै देशा जो छड़ी करी बाकी सब जगह मान सम्मान पान्दा हा। 25अतै ऐह गप्‍प भी सच हा कि, एलिय्याह भविष्‍यवक्ता रै टैमैं साढ़ै त्राई साला तिकर अम्बर बन्द रैऊ मतलब बरखा ना भूई अतै पूरै इस्त्राएल देशा मन्ज अकाल पैऊ, तैस टैमैं मती भारी विधवा तैस देशा मन्ज थी।#1 राजा 17:1; 1 राजा 18:1. 26पर एलिय्याह सैदा नगरा रै सारफत ग्राँ री गैर यहूदी विधवा जो छड़ी करी कसी होरी बलै ना भैजू।#1 राजा 17:9. 27ईयां ही एलीशा भविष्‍यवक्ता रै टैमैं भी इस्त्राएल मन्ज मतै भारी कोढ़ी थियै, पर प्रमात्मैं सीरिया देशा रै गैर यहूदी नामान कोढ़ी जो छड़ी करी होर कोई ठीक ना करू।”#2 राजा 5:1-14.

28बस तूणा हुणदै ही यहूदी रै सभागार मन्ज जैतूणै भी थियै सो गुस्सै भूच्ची गै 29अतै उूठी करी यीशु जो अपणै पहाड़ी शहरा थऊँ बाहर कडी करी रिड़ी री कनारी लेई गै ताकि तैठी थऊँ तैसिओ थला जो फैंकी दीन। 30पर सो तियां थऊँ निकळी करी चली गो।

दुष्‍टात्माग्रस्त मणु जो ठीक करना

(मरकुस 1:21-28)

31फिरी यीशु गलील परदेसा रै कफरनहूम ग्राँ मन्ज आये। सो विश्रामदिन यहूदी रै सभागार मन्ज मणु जो उपदेश दिच्छु करदा थू। 32मणु तसेरै उपदेशा जो हुणी करी हैरान भूच्ची गै कजो कि तसेरा उपदेश अधिकारा सोगी भुन्दा थू। 33यहूदी रै सभागार मन्ज अक्क मणु थू जैस मन्ज दुष्‍टात्मा थी। सो जोरा सितै बलणा लगा, 34“हे यीशु नासरी, असिओ तिजो सितै कै कम? कै तू असिओ खत्म करना आ? अऊँ जाणदा हा कि तू कुण हा? तू प्रमात्मैं रा पवित्र पुत्र हा।” 35यीशुऐ तैसिओ झिड़की करी बल्लू, “चुप रैह, अतै ऐस मणु थऊँ निकळी गा।” ता तैस मणु जो दुष्‍टात्मा सबी मणु रै सामणै मरोड़ी करी थलै फैंकू अतै कोई नूकसान करूरै बगैर तैस थऊँ निकळी गैई। 36ऐह हेरी करी सबी जो बड़ी हैरानी भूई अतै सो अप्पू मन्ज गल्ला करना लगै कि, “ऐह किन्है ताकतवर अतै सामर्थी बचन हिन? ऐह अधिकार अतै सामर्थ सोगी दुष्‍टात्मा जो हूक्म दिन्दा, अतै सो कणैणा मन्‍नी करी मणु थऊँ नकैई गान्दी!” 37यीशु रै नां री चर्चा पूरै गलील परदेसा मन्ज फैली गई।

पतरस री हहुआ अतै होर कई मणु जो ठीक करना

(मत्ती 8:14-17; मरकुस 1:29-34)

38यीशु यहूदी रै सभागार थऊँ नकैई करी शमौन रै घरा जो गो। तैस टैमैं शमौन री हहुआ जो बुखार चढुरा थू। ता तियैं तैस सितै बिनती करी। 39यीशु तसारै नेड़ै गो अतै बुखारा जो फटकार लाई अतै तसारा बुखार उतरी गो। सो तैहणै ही उूठी अतै तसेरी सेवा करना लगी पैई।

40संझा रै टैमैं जैस कसी रै घरै अगर कोई बमार थियै ता मणु तियां जो यीशु बलै लेई आये अतै यीशुऐ अक्की अक्की मणु पुर हथ रखी करी ठीक करू। 41अतै दुष्‍टात्मा भी डडदी अतै ऐह बल्‍दी कि, “तू प्रमात्मैं रा पुत्र हा,” मतै मणु थऊँ निकळी गैई पर यीशु तियां जो फटकारदा थू अतै कणैणा ना दिन्दा थू, कजो कि सो जाणदी थी कि यीशु ही मसीह हा।

यहूदी रै सभागार मन्ज प्रचार करना

(मरकुस 1:35-39)

42जैहणै भ्याग भूई ता यीशु तैठी थऊँ नकैई करी अक्क सुनसान जगहा जो गो फिरी भी मणु री भीड़ तैस जो तोपदी तसेरै पचूँह चली आई। तैस जो ऐह बल्ली करी रोकणा लगी कि असु जो छड़ी करी मत गच्छैं। 43पर यीशुऐ तियां सितै बल्लू, “हेरा! मिन्जो दुऐ शहरा मन्ज भी गिचीकरी प्रमात्मैं रै राज्य रा सुसमाचार हुणाणा जरूरी हा क्ओकि अऊँ ऐस कमां तांई ही भैजुरा हा।”

44इन्‍नी साहबै सो गलील परदेस रै सब यहूदी रै सभागार मन्ज प्रचार करदा रैऊ।

Currently Selected:

लूका 4: GBKNT

Highlight

Copy