लूका 22

यीशु जो मारनै री योजना

(मत्ती 26:1-5; मरकुस 14:1,2; यूहन्‍ना 11:45-53)

1बिना अखमीरी रोटी रा त्यौहार भूणैवाळा थू, जैतियो फसह रा त्यौहार भी बलदै थियै; 2प्रधान याजक अतै शास्त्री ऐस सोच-विचार मन्ज रैहन्दै थियै कि यीशु जो कियां जानी थऊँ मारन, पर सो मणु थऊँ डरदै थियै।

यहूदा नां रा धोखेवाज चेला

(मत्ती 26:14-16; मरकुस 14:10,11)

3फिरी शैतानै यीशु रा यहूदा इस्करियोती नां रा अक्क चेला भटकाऊँ। 4यहूदै प्रधान याजक अतै तंयारै नेता सोगी सोच-विचार करू कि सो यीशु जो कियां पकड़ाई सकदा। 5तियैं बड़ै खुश भूच्ची करी यहूदा जो बचन दिता कि जे तू यीशु जो पकड़ाई दिला ता अहै तिजो पैसै दिल्लै। 6यहूदा मन्‍नी गो अतै यीशुओ पकड़ाणै रा मौका तोपणा लगा कि जैहणै भीड़ ना भोली तैहणै यीशु तंयारै हत्थै पकड़ाई दिणा।

चेलै सोगी फसह रै त्यौहारा रा आखरी भोज

(मत्ती 26:17-25; मरकुस 14:12-21; यूहन्‍ना 13:21-30)

7फिरी फसह रा त्यौहार चली आ, ऐस त्यौहारा बाळै दिन मणु भेडू रा बलिदान करदै थियै। 8यीशुऐ पतरस अतै यूहन्‍ना जो ऐह बल्लू; “गच्छा सबी तांयें फसह री तैयारी करा।” 9तियैं यीशु थऊँ पूछु, “तू कड़ी चाहन्दा कि अहै तिजो तांयें फसह तैयार करन?”

10यीशुऐ जवाव दिता, “यरूशलेम मन्ज तून्दै पैर पान्दै हि अक्क मणु पाणी रा घडा चुकुरा तुसिओ मुळना। जैस घरा मन्ज सो गच्छा; तुहै तसेरै पिचै चली गच्छैं। 11ता तैस घरा रै मालका सितै बल्लैं कि ‘अहै यीशुऐ तिजो थऊँ पुछणै जो भैजै हिन कि तिजो बलै परौणै जो रैहणै रा कमरा कुण जिन्‍ना हा, जैड़ी यीशु अपणै चेलै सोगी फसह खाई सका?’ 12तैस तुसिओ बोढ़ीओ लेई गाणा जैड़ी अक्क कमरा पैहला थऊँ ही सजाई करी थैऊँरा भूणा; तूसु तांयें सो ही जगह भूणी हा अतै तैड़ी ही तुहै फसह तैयार करै।”

13ता चेलै तैस नगरा जो गै, अतै तियैं सब कुछ यीशु रै कणैणै रै मुताबक हेरू अतै फसह तैयार करू।

प्रभु भोज

(मत्ती 26:26-30; मरकुस 14:22-26; 1 कुरिन्थियों 11:23-25)

14जैहणै त्यौहारा रा टैमं चली आ ता, यीशु अपणै बारह प्रेरिता सोगी खाणा बैईठा। 15ता यीशुऐ अपणै चेलै सोगी बल्लू, “मेरी बड़ी तमन्ना थी कि अऊँ दुख भोगणै अतै मरनै थऊँ पैहलै ऐह फसह रा खाण तूसु सोगी खाऊँ। 16क्ओकि अऊँ तूसु सोगी बलदा जैहणै तक प्रमात्मैं रै राज्य मन्ज ऐस त्यौहारा रा मकसद पुरा ना भूच्ची गाला तैहणै तक ऐह फिरी कदी ना खाणा।”

17ता यीशु दाखरस सितै भरूरा कटोरा लैऊ अतै प्रमात्मैं रा धन्यवाद करू अतै बल्लू, “ऐतिओ लेय्आ अतै अप्पू मन्ज बण्ड़ी करी पी लेआ। 18क्ओकि अऊँ तूसु सोगी बल्‍दा कि जैहणै तिकर प्रमात्मैं रा राज्य ना चली अईआ, तैहणै तक मुँ दाखरस कदी ना पीणा।”

19फिरी तिनी रोटी लेई, अतै प्रमात्मैं रा धन्यवाद करीके त्रोड़ी अतै चेलै जो ऐह बल्ली करी दिती कि, “ऐह मेरा शरीर हा जैडा कि तूसु तांयें दितुरा मिन्जो याद रखणै तांयें ऐस कमां करू करै।”

20इन्‍नी साहबै यीशुऐ खाणै थऊँ बाद कटोरै जो भी ऐह बल्ली करी चेलै जो दिता कि, “ऐह दाखरस रा कटोरा मेरै तैस खूना मन्ज जैडा कि तूसु तांयें बहाऊरा, अक्क नौआ वायदा हा। 21पर हेरा, मिन्जो पकड़ाणै बाळा ता मिन्जो सोगी रोटी खाऊ करदा। 22क्ओकि मणु रै पुत्रा सोगी ता प्रमात्मैं री इच्छा रै मुताबक ईयां ही भूणा, पर मिन्जो पकड़ाणै बाळै पुर बड़ा बुरा टैमं ईणै बाळा हा!”

23ता चेलै अप्पू मन्ज अक्की दुयेओ पुछणा लगै कि असु मन्ज ऐसा कुण हा जैस ऐह कम कमाणा?

अक्की दुऐ री सेवा करा

24ता फिरी तैड़ी चेलै मन्ज बैहंस-बाजी शुरू भूच्ची गई, कि असु मन्ज मोट्आ कुण हा। 25ता यीशुऐ चेलै सितै बल्लू, “ऐस दुनिया रै राजा अतै बड़ै-बड़ै नेता लोग अपणै मणु पुर हक्क जमांदै हिन, अतै तियां जो मणु उपकार करनै बाळै बलदै हिन। 26पर तुहै इन्या मत बणदै; अतै तूसु मन्ज जैडा मोट्आ भुला सो हल्कै साईयें अतै जैडा प्रधान भुला सो सेवक बणा। 27क्ओकि मोट्आ कुणआ, जैडा खाणा बैहुरा सो या जैडा सेवा करू करदा सो? कै मोट्आ सो निआ जैडा खाणा बैहुरा? पर अऊँ ता तूसु मन्ज सेवक बणा। 28तुसै सो हिन, जैड़ै मेरी परीक्षा रै टैमैं मेरी सोगी-सोगी रैह; 29अतै जियां मेरै पितै मिन्जो तांयें अक्क राज्य दितुरा, तिआंई अऊँ भी तूसु तांयें अक्क राज्य दिन्दा, 30ताकि तुहै मेरै राज्य मन्ज मिंजो सोगी बैही करी खान-पीण ही ना, बल्कि सिंहासना पुर बैही करी इस्त्राएल रै बारह गोत्रा रा न्याय भी करन।”

पतरस रै मुकरनै री भविष्‍यवाणी

(मत्ती 26:31-35; मरकुस 14:27-31; यूहन्‍ना 13:36-38)

31“शमौन, हे शमौन! हेर, शैतानै तूसु मणु जो प्रमात्मैं थऊँ मँगी लैऊरा हा कि सो तूसु जो कणका सैईये फटका 32पर मैंई तेरै तांयें प्रमात्मैं सितै प्रार्थना करीआ कि तेरा विस्वास कमजोर ना भोआ; अतै जैहणै तू पच्छतावा करा ता तू अपणै विस्वासी भाई जो भी विस्वास मन्ज पक्का बणाई सका।”

33पर पतरस बलणा लगा, “हे प्रभु, अऊँ तिजो सोगी जेला मन्ज गाणा ता छड़ पर मरनै जो भी तैयार हा।”

34यीशुऐ बल्लू, “ओ पतरसा, अऊँ तिजो सोगी बल्‍दा कि अज कुक्कड़ा री बाँग दिणै थऊँ पैहलै तुद त्राई बरी मिन्जो ना पछैन्णा, तुद बलणा कि अऊँ तिजो ना जाणदा।”

बटुआ, झोल्ळी अतै तलवार

35फिरी यीशुऐ चेलै सितै बल्लू, “जैहणै मैंई तुसिओ बटुए, झोल्ळी, अतै बिना जुटै रा सुसमाचार करनै तांयें भैजु थू। ता कै तुसिओ कसकि चिजा री कमी भूई थी?” तियैं बल्लू, “कसी भी चिजा री कोई कमी ना भूई।”

36ता यीशुऐ फिरी चेलै सितै बल्लू, “पर अबै जैस बलै बटुए भून सो बटुए लेआ अतै जैस वलै झोल्ळी ना भोआ सो झोल्ळी लेआ, अतै जैस वलै तलवार ना भोआ सो अपणै चोळा बेचीकरी तलवार खरीदी लेआ। 37क्ओकि अऊँ तूसु सोगी सच बलदा, कि पवित्रग्रन्था मन्ज मिन्जो तांयें लिखुरा सो पुरा भूणा चहिन्दा।”

“पवित्रग्रन्था मन्ज लिखुरा कि ‘तसेरी गिणती अपराधी सोगी भुणीआ’ ऐसी गल्ला सच मन्ज पूरी भूच्छु करदी हिन।”#गला. 3:13; 2 कुरि. 5:21; यशा. 53:12.

38तियैं बल्लू, “हेर प्रभु, ऐठी दोई तलवारा हिन यीशुऐ बल्लू बड़ी हिन।”

जैतून रै पहाड़ा पुर यीशु री प्रार्थना

(मत्ती 26:36-46; मरकुस 14:32-42)

39ता फिरी यीशु तैस कमरै थऊँ नकैई करी रोजा सैईये जैतून नां रै पहाड़ा जो गो। तसेरै चेलै भी तैस सोगी चली पै। 40तैहा जगह पुजीकरी यीशुऐ चेलै जो बल्लू, “प्रार्थना करा की तुन्दी कोई परीक्षा ना भोआ।” 41यीशु अप्पू तियां थऊँ थोड़ी दूर गिच्ची करी पैरा रै भारै बैही करी प्रार्थना करना लगु, 42“हे पिता, अगर तू चाह ता ऐस दुखा रै कटोरै जो मिन्जो थऊँ दूर करी लेआ, तांभी मेरी ना पर तेरी ही इच्छा पूरी भोआ।” 43ता तैहणै स्वर्गा थऊँ अक्क स्वर्गदूत सामणै आ अतै तिनी यीशु जो ताकत दिती। 44यीशु बड़ा ही परेशान भूच्ची करी प्रार्थना करना लगा, सो ऐतना आत्मा मन्ज दुखा सितै भरी करी प्रार्थना करना लगु, अतै यीशु रा पसीना ईयां निकलणा लगा जिंआ कि खून टपकणा लगुरा भोआ। 45फिरी सो प्रार्थना थऊँ ऊठु अतै अपणै चेलै बलै ईच्ची करी तियां जो सुसति मन्ज सून्‍दा हेरू। 46ता यीशुऐ चेलै जो बल्लू, “तुसै सुतुरै कजो हिन? उठा, प्रार्थना करा कि तुन्दी कोई परीक्षा ना भोआ।”

यीशु जो धोखै सितै पकड़ाई दिता

(मत्ती 26:47-56; मरकुस 14:43-50; यूहन्‍ना 18:3-12)

47यीशु तूणा बल्लू ही करदा थू कि, तैठी अक्क बड़ी भारी भीड़ आई अतै यीशु रै बाहरा चेलै थऊँ, जैसेरा नां यहूदा थू, तंयारी अगो-अगो चलूरा थू। सो यीशु बल्लै आ ताकि सो यीशु रा पोक्कु लेई सका। 48पर यीशुऐ तैस सोगी बल्लू, “ओ यहूदा, कै तू पोक्कु लेई करी मणु रै पुत्रा जो पकड़ाऊ करदा?”

49जैड़ै यीशु रै सोगी थियै तियां हेरू कि ऐठी ता कुछ होर ही भूणै बाळा, ता सो बलणा लगै, “हे प्रभु कै अहै तलवार चलान?” 50पर तियां थऊँ अक्की चेलै तलवार चलाई करी महायाजक रै अक्की दासा रा कन ही कटी दिता।

51ऐह हेरी करी यीशुऐ बल्लू, “अबै बस करा! अतै यीशुऐ तसेरा कन छुई करी ठीक करी दिता।” 52ता यीशुऐ प्रधान याजका, मन्दरा रै पैहरैदारा रै नेता अतै स्याणै धर्मी मणु सितै, जैड़ै कि यीशु जो पकड़ना छूरै थियै, बल्लू, “कै तुसै मिन्जो डाकू समझी करी तलवारा अतै होठे लेई करी पकड़ना आये हिन? 53जैहणै जे अऊँ मन्दरा मन्ज तूसु सोगी हर बेलै थू, तैहणै ता तुसै मिन्जो सोगी हत्थ ना लऊ। पर ऐह तून्दा टैमं हा कि जैहणै शैतान राज्य करदा।”

पतरस रा इन्कार

(मत्ती 26:57,63-75; मरकुस 14:53,54,66-72; यूहन्‍ना 18:12-18,25-27)

54जैड़ै यीशु जो पकड़ना छूरै थियै तियैं यीशु पकडु अतै लेई गै। अतै महायाजक रै घरा मन्ज आये। पतरस दूर-दूर रैई करी यीशु रै पिछै-पिछै आ। 55पर मणु जैहणै अँगणा मन्ज अगी जळाई करी तठेरी चौं कनारी बैहै ता पतरस भी तियां सोगी बैही गो।

56अगी री लौई मन्ज अक्की नौकरैणी पतरस तैठी बैहुरा हेरू। तैसै तसेरी कनारी हेरी करी बल्लू, “ऐह मणु भी यीशु सोगी थू।”

57पर पतरस ना करीके बलणा लगा, “ओ जनानी, अऊँ ऐस मणु जो ना जाणदा।”

58थोड़ी देरी बाद अक्क होर मणु पतरस जो हेरी करी बलणा लगा, “तू भी ता यीशु री टोली थऊँ अक्क हा।” पर पतरसै बल्लू, “ओ भलया माणसा अऊँ सो नियां जैडा तू मिन्जो समझू करदा।”

59कोई ज्यादा देर ना भूई थी कि अक्क होर मणु बड़ा जोर दी करी बलणा लगा, “जरूर ऐह मणु यीशु सोगी थू। क्ओकि हेरा ऐह ता गलीलवासी हा।”

60पर पतरसै बल्लू, “ओ भलया मणुआ, अऊँ ना जाणदा तू कसेरै बारै मन्ज गप्‍प करू करदा।” सो हल्ली गप्‍प करू ही करदा थू कि तैस टैमैं कुक्कड़ै बाँग दी दिती। 61अतै यीशुऐ पतरसा री कनारी नजर लाई करी हेरू। ता पतरसा जो यीशु रा बलुरा बचन याद आ कि, “अज कुक्कड़ा रै बाँग दिणै थऊँ पैहलै तुद मेरा त्राई बरी इन्कार करना।” 62तूणा याद ईन्दै सितै ही सो बाहरा जो चली गो अतै फुटी-फुटी करी रूणा लगू।

यीशु रा अपमान

(मत्ती 26:67,68; मरकुस 14:65)

63जियां मणुऐ यीशु जो पकडुरा थू सो तसेरी बेईज्ती करीके तैसिओ मारना लगै। 64यीशु री हाख्री पुर पट्टी बन्‍नी करी पुछणा लगै, “भविष्‍यवाणी कर कि तिजो कुणी मारूआ?” 65अतै तियैं मणुऐ यीशु री निन्दा करनै तांई कई बुरी-बुरी गल्ला बल्ली।

महासभा रै सामणै यीशु

(मत्ती 26:59-66; मरकुस 14:55-64; यूहन्‍ना 18:19-24)

66जैहणैं दिन भुआ ता प्रधान याजक, धर्मशास्त्री अतै मणु रै स्याणै नेता री सभा भूई अतै सो यीशु जो अपणी यहूदी सभा मन्ज लेई गै। 67तियैं पूछु, “असु जो दस कि तू मसीह हा कि कुण हा?” यीशुऐ बल्लू, “जे अऊँ तूसु जो बल्लू ता तूसु मेरा विस्वास ना करना। 68अतै जे अऊँ पूछु ता तूसु जवाव ना दिणा। 69पर अजा थऊँ बाद सर्वशक्तिमान प्रमात्मैं मणु रै पुत्र जो अपणी सज्जी कनारी बहालना।”#मर. 14:62; भज. 110:1. 70सो सब बलणा लगै, “ता कै तू प्रमात्मैं रा पुत्र हा?” यीशुऐ बल्लू, हाँ अऊँ हा। 71ता तियैं बल्लू, “अबै असु जो कसी भी किस्‍मां रै सबूता री जरूरत नियां। अहै खुद सेरै मुऐ ऐह सब गल्ला हुणी हिन।”

Currently Selected:

लूका 22: GBKNT

Highlight

Copy