लूका 6:27-49
लूका 6:27-49 DOG
“लेकन आऊँ तुसें सुनने आले गी आखना ऐं के अपने दुश्मनें कन्ने प्यार करो; जेड़े थुआड़े कन्ने नफरत करन, उन्दा पला करो। जेड़े तुसेंगी शाप दिंदे न, उनेंगी सीस दियो, जेड़े थुआड़े कन्ने बुरा सलूक करदे न उन्दे लेई प्रार्थना करो जेड़ा कोई थुआड़े एक पासे महू उपर चपेड़ मारे, ओसदी बक्खी दुआ बी फेरी दियो, ते जेड़ा तेरा चोगा खुस्सी लै, उसी कोरता लेने लेई बी नेई रोक। जे कोई तेरे थमां केश मंगै, उसी देई दे; ते जेड़ा कोई थुआड़ी चीज खुस्सी लै, ओदे कोलां नेई मंग। ते जियां तोस चांदे ओ के लोग थुआड़े कन्ने करन, तोस बी उन्दे कन्ने इयां गै करो। जेकर तोस अपने प्यार रखने आले कन्ने प्यार करो, तां एदे च थुआड़ी के बड़याई? किके पापी बी अपने प्यार करने आले कन्ने प्यार करदे न। जेकर तोस अपने पलाई करने आलें कन्ने गै पलाई करदे ओ, तां थुआड़ी के बड़याई? किके पापी बी ऐसा गै करदे न। जेकर तोस उसी दुआर दियो, जेस कोलां पी लेनें दी आस रखदे ओ, तां थुआड़ी के बडयाई? किके पापी पापियें गी दुआर दिन्दे न, के उनां गै पी बापस लैंन। लेकन अपने दुश्मनें कन्ने प्यार करो, ते पलाई करो, ते दुआर देईयै पी लेने दी मेद नेई रखयो, ते दुआर दियो; ते थुआड़े लेई बड़ा फल ओग; ते तोस परमप्रधान दे बच्चे ओगे, किके ओ उन्दे उपर बी जेड़े शुकर नेई करदे ते बुरें दे उपर ते बी दयालु ऐ। जियां थुआड़ा पिता दयालु ऐ, उयांगै तोस बी दयालु बनो। “दोष नेई लाओ, ते थुआड़े उपर बी दोष नेई लाया जाग। कसुरबार नेई आखो, तां तुसेंबी कसुरबार नेई आख्या जाग। माफ़ करो, तां तुसेंगी बी माफ़ कित्ता जाग। दया करो, तां तुसेंगी बी दिता जाग। लोग थुआड़ी गोदी च पूरा-पूरा नापिऐ ते दबाई-दबाईयै, ते लाई-लेईयै ते उबरदा-उबरदा थुआड़ी गोद च पागन, किके जेस नाप कन्ने तोस नापदे ओ, उसै नाप कन्ने थुआड़े लेई नापया जाग।” पी ओनें उनेंगी एक मसाल सनाई “के अन्नां, दुए अन्नें गी रस्ता दसी सकदा ऐ? के ओ दुए खड़े च नेई डीगगन? चेला अपने गुरु थमां बड़ा नेई, लेकन जेड़ा पूरा सेध ओग, ओ अपने गुरु आला लेखा ओग। तू अपने प्रा दी अखी च तेनके गी कि दिखना ऐं? ते अपनी गै अख दे लट्ठा नेई लबदा? ते अगर तू अपनी गै अखी दा लट्ठा नेई दिखदा, तां अपने प्रा गी कियां आखी सकना ऐ, ‘ए परा, रुकी जा तेरी अखी चा तेनका कढी ओड़ा?’ ए कपटी, पैलैं अपनी अख चा लट्ठा कड़, पी जेड़ा तेनका तेरे प्रा दी अखी च ऐ, उसी छैल तरीके कन्ने दिखियै कढी सकगा। “कोई छैल बूट्टा नेई, जेड़ा नकमा फल दियै, ते नां गै कोई नकमा बूट्टा ऐ, जेड़ा छैल फल दियै। अर एक बूट्टा अपने फल कन्ने पंछानया जन्दा ऐ; लोग चुड़ीयें चा अंजीर दे फल नेई चुगदे, ते नां झड़बेरी थमां अंगुर। पला मनुक्ख अपने मन दे पले पंडार थमां पलीयां गल्लां कढदा ऐ; ते बुरा मनुक्ख अपने मन दे बुरे पंडार थमां बुरीयां गल्लां कढदा ऐ; किके जेड़ा मन च परोचे दा ऊऐ, ऊऐ मुं चा निकलदा ऐ। “जेलै तोस मेरा आखा नेई मनदे ते कि मिगी ‘ए प्रभु, ए प्रभु,’ आखदे ओ? जेड़ा कोई मेरे कोल ओंदा ऐ, ते मेरीयां गल्लां सुनीयै उनेंगी मनदा ऐ, आऊँ तुसेंगी दसना के ओ केस आला लेखा ऐ? ओ ओस मनुक्ख आला लेखा ऐ, जेनें अपना कर बनांदे बेलै जमीन च ढूगी कढी यै पत्थर उपर मनैद ते पाई, ते जदू आड़ आया तां पानी दियां टकरां ओदे कर गी लगियाँ; ते ओ उसी लाई नेई सकीयां किके ओ पक्का बने दा हा। लेकन जेड़ा सुनीयै नेई मनदा, ओ ओस मनुक्ख आला लेखा ऐ, जेनें मिट्टी उपर बगैर नीं दे कर बनाया, जदू आड़ आया ते टकरां लगियाँ ते ओ टेईयै सत्यानाश ओई गीया।”