यूहन्ना 6

पंज जार लोकें गी रुट्टी खलानी

1इनें गल्लां हां बाद, यीशु गलील दी चील मतबल तिबिरियास चील दे ओस पार चली गीया। 2ते एक बड़ी पीड़ ओदे पिछें चलन लगी पेई, किके जेड़े चमत्कारी कम्म ओ बमारें उपर दसदा हा। ओ उनेंगी दिख्दे हे 3ओस बेलै यीशु पाड़ी उपर चढ़ीयै अपने चेलें कन्ने उत्थें बैठी गीया। 4यहूदीयें दा फसह दा त्यार नेड़े हा।

5ओस बेलै यीशु ने अपनी अखीयाँ कन्ने दिख्या के एक वड्डी पीड ओदे कोल आवा करदी ऐ, ते फिलिप्पुस गी पूछया, “अस इंदे खाणे बास्तै रुट्टी कुथ्थुं दा मुलैं लेई औचे?” 6ओनें ए गल्ल उसी परखने आस्ते बोली ही, किके ओ अप्पुं जानदा हा के ओ के करग। 7फिलिप्पुस ने जबाब दिता, “दो सौ दीनार दी रुट्टी बी इंदे आसतै पूरी नेई ओनी के उन्दे च अर एक गी थुड़ी-थुड़ी मिली जाग।” 8ओदे चेलें बिचा एक शमौन पतरस दे प्रा अन्द्रियास ने उसी आखया, 9“इत्थैं एक मूंडा ऐ, जेदे कोल जौ दी पंज रुट्टीयाँ ते दो मछयाँ न, पर इन्नें लोकें लेई ओ केछ बी नेई ऐ न?” 10यीशु ने आखया, “लोकें गी बाली ओड़ो” उत्थें बड़ा काह हा। ते लोक जिन्दे च मडदें दी गेनती लग-पग पंज जार ही, ओ बैठी गै। 11ओस बेलै यीशु ने रुट्टीयाँ लेईयां, ते परमेसर दा शुकर करियै, चेलें गी दितीयां तां के ओ बैठने आलें गी बंडी ओडन; ते उयांगै मछीयां बिचा जिनियां ओ चांदे हे बंडी ओड़ीयां। 12जेलै लोक खाईयै रजी गै, तां ओनें अपने चेलें गी आखया, “बचे दे टुकड़ें किट्ठे करी लियो ते केछ बी सुटया नेई जा। 13ते एसकरी उनै किट्ठे कित्ते, जौ दी पंज रुट्टीयें दे टुकड़े जेड़े खाणे आलें कोलां बची दे हे, उनै बारां टोखरियां परीयां। 14ओस बेलै जेड़ा चमत्कार ओसने दसया उसी ओ लोक दिखियै आखन लगे के ओ पविखवक्ता जेड़ा दुनियां च औने आला हा पक्का ओईयै।”

15“यीशु गी पता चली गीया के ओ उसी राजा बनाने लेई पकड़ना चांदे न, पी ओ पाड़ी उपर कल्ला चली गीया।”

यीशु दा पानी उपर चलना

16जेलै शाम ओई, तां ओदे चेलें गलील दी चील दे कंडै गै, 17ते किशती च बेईयै चील दे दुए पार कफरनहूम जान लगे। ओस बेलै नहेरा आई गेदा हा, ते यीशु तकर उन्दे कोल नेई आएदा हा। 18तेज बड़े तफान दे कारन चील च लैरां चडना लगयां। 19जेलै ओ किशती गी चलांदे-चलांदे त्रै जां चार मील दे लग-पग अगें निकली गै, तां उनै यीशु गी चील उपर चलदे ते अपनी किशती आली बखी औंदे दिख्या, ते ओ डरी गै। 20यीशु ने उनेंगी आखया “आऊँ आं, डरयो नेई।” 21ओस बेलै ओ उसी किशती च लैंन लेई त्यार ओए, ते फोरन ओ किशती उसै जगै उपर पूजी जिथें गी ओ जा दे हे।

लोग यीशु दी ढूंढ़ च

22अगलै धयाड़ै ओस पीड़ ने, जेड़ी चील दे ओस पार खड़ोती दी ही, ऐ दिखया के इत्त्थैं एक किशती गी छुड़ीयै ओर कोई निकी किशती नेई ही, ते यीशु अपने चेलें कन्ने ओस किशती उपर नेई चडया, लेकन सेरफ ओदे चेलें गै गेदे हे। 23तां बी ओर निकियाँ किशतीयां तिबिरियास शैर थमां गालील चील दे कोल आईयां, जित्थै उनै परमेसर दा शुकर करियै रुट्टी खादी ही। 24जेलै पीड ने दिख्या के यीशु इत्त्थैं नेई ऐ, ते नां ओदे चेलें, तां लोक निकी-निकी केश्तीयें च चढ़ीयै यीशु गी तुपदे-तुपदे कफरनहूम शैर च पूजे।

यीशु जीनें दी रुट्टी

25ते लोकें चील दे दुए पार यीशु कन्ने मिलीयै आखया, “ए गुरु तू इत्त्थैं कदुं आया?” 26यीशु ने उनेंगी जबाब दिता, “आऊँ थुआड़े कन्ने सच-सच आखना ऐं, तोस मिगी एस लेई नेई तुपदे के तुसें चमत्कार दिखे, लेकन एस आसतै तुपा दे ओ के तोस रुट्टी खाईयै त्रेपत ओए। 27ओस नाश ओनें आले पोजन आसतै मेंनत नेई करो, लेकन ओस पोजन आसतै जेड़ा मेशा दी जिंदड़ी तकर रौग, जिसी मनुक्ख दा पुत्तर तुसेंगी देग, किके प्यो, मतबल परमेसर ने ओदे उपर गै मोर लाइ दित्ती ऐ। 28एस करियै उनै उसी आखया, परमेसर दा कम्म करन लेई अस के करचै?” 29यीशु ने उनेंगी जबाब दित्ता “परमेसर दा कम्म ए ऐ, के तोस ओदे उपर जिसी ओसने पेजा ऐ ओस उपर विश्वास करो।” 30ओस बेलै उनै उसी आखया, “पी तू केड़ा चमत्कार दसना ऐं के असुसी दिखियै तेरे उपर विश्वास करचै?” तू केडा कम्म दसना ऐं? 31साड़े बजुर्गे जगल च मन्ना खादा, ते जियां लिखा ऐ, “परमेसर ने उनेंगी खाणे आसतै सोर्ग चा रुट्टी दिती।” 32यीशु ने उनेंगी आखया, आऊँ तुसेंगी सच-सच आखना ऐं के मूसा ने तुसेंगी ओ रुट्टी सोर्ग चा नेई दिती, लेकन मेरा पिता तुसेंगी सच्ची रुट्टी सोर्ग चा दिंदा ऐ। 33किके परमेसर दी रुट्टी ओ गै, जेड़ी सोर्ग चा उत्तरीयै दुनिया दे लोकें गी जांन दिन्दी ऐ। 34ओस बेलै उनै उसी आखया, “प्रभु, ऐ रुट्टी असेंगी मेशा दिंदा रो।”

35यीशु ने उनेंगी आखया, “जिंदु दी रुट्टी आऊँ आं; जेड़ा मेरे कोल ओंदा ऐ, ओ कदें पुखे दा नेई रौग, जेड़ा मेरे उपर विश्वास करग, ओ कदें तरैह दा नेई रौग। 36लेकन मैं तुसेंगी आख्या, के तुसें मिगी दिखी बी लेत्ता ऐ, तां बी विश्वास नेई करदे। 37जे केछ पिता मिगी दिंदा ऐ, मेरे कोल ओंदा ऐ, जेड़ा कोई मेरे कोल आग उसी आऊँ कदें नेई कढगा 38आऊँ अपनी मरजी कन्ने नेई, लेकन अपने पेजने आले दी मरजी पूरी करन लेई सोर्गा चा उतरा ऐं। 39मेरे पेजने आले दी मरजी ए ऐ के जे केछ ओसने मिगी दित्ता ऐ, ओदे बिचा केछ बी नेई गवाह लेकन उसी ऐन्त दे ध्याडें पी जिन्दा करां। 40किके मेरे पिता दी मर्जी ए ऐ, के जेड़ा कोई पुत्तर गी दिखै, ते ओस उपर विश्वास करै, ओ मेशा दी जिंदड़ी पाग, ते आऊँ उसी खीरी दे ध्याडें च पी जिन्दा करगा।

41“ओस बेलै एस गल्ल उपर यहूदी पला-बुरा आखन लगे, किके येशु ने आखे दा हा, जेड़ी रुट्टी सोर्ग चा उत्तरी ऐ, ओ आऊँ आं।” 42ते ओ आखन लग्गे, “के ए युसूफ दा पुत्तर यीशु नेई, एदे मां-प्यो गी अस जांनदयां न? तां ओ कि आखदा ऐ के आऊँ सोर्ग चा उतरा ऐं?” 43यीशु ने उनेंगी जबाब दित्ता, अप्पुं-पिछें नेई बुड़बड़ाओ। 44मेरे कोल कोई नेई आई सकदा, जेलै तकर प्यो, जेस ने मिगी पेजा ऐ, उसी अपने कोल खिची नेई लै; ते आऊँ उसी खीरी दे ध्याडें जिन्दा करगा। 45पविखवक्तें दे लेख च ए लिखा ऐ, ओ सब परमेसर थमां सखाए दे ओगन। जेस कुसे पिता कोलां सुना ऐ ते सिखया ऐ, ओ मेरे कोल ओंदा ऐ। 46ए नेई के कुसे पिता गी दिख्या ऐ, लेकन जेड़ा परमेसर थमां ऐ, सेरफ उसै पिता गी दिख्या ऐ। 47आऊँ तुसेंगी सच-सच आखना ऐं के जेड़ा कोई विश्वास करदा ऐ, मेशा दी जिंदड़ी ओदी गै। 48जिंदु दी रुट्टी आऊँ आं। 49थुआड़े बजुर्गे जंगल च मन्ना खादा, ते ओ मरी गै। 50ए ओ रुट्टी ऐ जेड़ी सोर्ग चा उत्तरदी ऐ तां जे मनुक्ख ओदे चा खा ते नेई मरे। 51जिंदु दी रुट्टी जेड़ी सोर्ग चा उत्तरी ऐ, आऊँ आं। जेड़ा कोई एस रुट्टी गी खाग तां ओ मनुक्ख मेशा जिन्दा रौग; ते जेड़ी रुट्टी आऊँ दुनियां दे जीनें लेई देगा ओ मेरा शरीर ऐ।

52एस गल्ल उपर यहूदी अप्पुं-पिछें लड़ना लगे, “ए मानु कियां असेंगी अपना मांस खाणे गी देई सकदा ऐ?” 53यीशु ने आख्या, “आऊँ तुसेंगी सच-सच आखया ऐ, जेलै तकर मनुक्ख दे पुत्तर दा मांस नेई खाओ ते ओदा लहू नेई पीयो, थुआड़े च जिन्दडी नेई। 54जेड़ा कोई मेरा मांस खन्दा ते मेरा लहू पिन्दा ऐ, मेशा दी जिंदड़ी ओदी गै, ते आऊँ खीरी ध्याडें पी उसी जिंदा करगा। 55किके मेरा मांस तां सेई च खाणे आली चीज ऐ ते लहू सेई च पीने आली चीज ऐ। 56जेड़ा कोई मेरा मांस खन्दा ते लहू पिन्दा ऐ, ओ मेरे च बना रौंदा ऐ ते आऊँ ओदे च। 57जियां जिंदे पिता ने मिगी पेजया, ते आऊँ पिता दे कारन जिन्दा ऐं, उयांगै ओ बी जेड़ा बी मिगी खाग, ओ मेरे कारन जिन्दा रौग। 58जेड़ी रुट्टी सोर्ग चा उतरी ओ इयै, बजुर्गें आला लेखा नेई के खादी ते मरी गै; जेड़ा कोई ए रुट्टी खाग ओ मेशा लेई जिन्दा रौग। 59ए गल्लां ओनें कफरनहूम शैर दे एक प्रार्थनाकार च शिखया दिन्दे आखीयां।”

मेशा दी जिन्दडी दे वचन

60एसकरी ओदे चेलें चा मतें सारें ए सुनीयै आख्या, “ए तां बड़ी कठोर शिखया ऐ; इसी कोन मन्नी सकदा ऐ?” 61यीशु ने अपने मन च ए गल्ल समझी लेई, के मेरे चेलें अप्पुं-पिछें एस गल्ल उपर बुड़बड़ा दे न, उन्दे कोलां पूछया, “के एस गल्ल थमां तुसेंगी ठोकर लगदी ऐ? 62ते जेकर तोस मनुक्ख दे पुत्तर गी जिथें ओ पैलैं हा, उनेंगी उपरेई जनदे दिखगे, तां के ओग? 63आत्मा तां जांन देने आली ऐ, जिंदु दा कोई फायदा नेई। जेड़ायां गल्लां मैं थुआड़े कन्ने बोलियां न, ओ आत्मा ते जिन्दडी न। 64लेकन थुआड़े बिचा केछ ऐसे न जेड़े विश्वास नेई करदे। किके यीशु तां पैलैं गै जानदा हा के जेड़े विश्वास नेई करदे, ओ कोन न; ते कोन मिगी पड़काग। 65ते ओनें आख्या, एस करियै मैं तुसेंगी आख्या हा, के जेलै तकर पिता थमां कुसे गी वरदान नेई मिलन, अतुं तकर ओ मेरे कोल नेई आई सकदा।”

पतरस दा विश्वास

66एस गल्ल उपर ओदे चेलें बिचा मते सारे बापिस चली गै ते दवारै यीशु कन्ने नेई गै। 67यीशु ने ओनें बारें गी बोलया, “के तोस बी जाना चान्दे ओ?” 68शमौन पतरस ने जबाब दित्ता, “ए प्रभु, अस कोदे कोल जाचै? मेशा दी जिंदड़ी दियां गल्लां तां तेरे गै कोल न। 69ते असैं विश्वास कित्ता, ते जानि गै न के परमेसर दा पवित्र जन तू ऐ। 70यीशु ने जबाब दिता, के मैं तुसें बारें चेलें गी नेई चुनयां? लेकन पी बी थुआड़े बिचा एक शतान ऐ। 71ए गल्ल ओनें शमौन इस्करियोती दे पुत्तर यहूदा दे बारै च आखी, किके उवै जेड़ा उनै बारें चेलें बिचा एक हा, जेड़ा यीशु गी पड़कान लेई त्यार हा।”

Currently Selected:

यूहन्ना 6: DOG

Highlight

Copy