प्रेरितों भूमिका
भूमिका
प्रेरितों रे कामो रा वर्णन लूका रचित सुसमाचारो ते आगला वर्णन ए। इजी रा खास मकसद ये बताणा ए कि यीशुए खे शुरूओ रे मानणे वाल़े पवित्र आत्मा री अगुवाईया रे, यीशुए रे बारे रे सुसमाचारो खे यरूशलेम, यहूदिया, सामरिया और तरतिया रे छोरा तक किंयाँ पऊँछाया 1:8। ये मसीही आन्दोलनो रा खुलासा ए जो यहूदी लोका बीचे शुरू ऊआ और बढ़ी की सारे देशो रे लोका रा विश्वास बणीगा। लेखक इजी गल्ला रा बी त्यान राखोआ कि तेसखे पढ़ने वाल़ेया खे ये निश्चा ऊई जाओ कि मसीही लोक रोमी साम्राज्य रिया तंईं एक विद्रोही राजनैतिक शक्ति नि थी और मसीही विश्वास यहूदी धर्मो री पूर्ति था।
प्रेरितों रे कामो री कताबा खे तीन पाअगो रे बांडी सकोए, जो लगातार बढ़दे क्षेत्रो खे दखाओआ, जिदे यीशु मसीह रे सुसमाचारो रा प्रचार करना और कलीसिया बनाणा : (1) यीशुए रे स्वर्गो रे जाणे ते बाद यरूशलेमो रे मसीही आन्दोलनो री शुरूआत; (2) पलस्तीनो रे ओरी पाअगा रे इजी रा प्रसार और (3) भूमध्य सागरो रे देशो रे रोम तक इजी रा प्रसार।
प्रेरितों रे कामो री एक खास खासियत ए पवित्र आत्मा रा काम करना। से पिन्तेकुसो रे दिने यरूशलेमो रे कट्ठे ऊए रे विश्वासिया पाँदे बड़ी सामर्था साथे उतरोआ और एते कताबा रे लिखी री घटणा रे बखते मण्डल़िया और अगुवे रा मार्गदर्शन करोआ और तिना खे सामर्थ देओआ। प्रेरितों रे कामा रे दित्ते रे कई उपदेशा रे शुरूआतो रे मसीही संदेशो रा सार प्रस्तुत करी राखेया और इदे लिखी री घटणा विश्वासिया री जिन्दगिया रे और मण्डल़िया री सहभागिता रे एते संदेशो री सामर्था खे प्रगट करोई।
रूप-रेखा
गवाईया री खातर त्यारी 1:1-26
क-यीशुए री आखरी आज्ञा और प्रतिज्ञा 1:1-14
ख-यहूदा रा वारिस 1:15-26
यरूशलेमो रे गवाई 2:1-8:3
यहूदिया और सामरिया रे गवाई 8:4-12:25
पौलुसो रा सेवाकार्य 13:1-28:31
क-पईली प्रचारो रा सफर 13:1-14:28
ख-यरूशलेमो रे सम्मेलन 15:1-35
ग-दूजी प्रचारो रा सफर 15:36-18:22
घ-तीजे प्रचारो रा सफर 18:23-21:16
च-यरूशलेम, कैसरिया और रोमो रे बंदी पौलुस 21:17-28:21
Currently Selected:
प्रेरितों भूमिका: BGHNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.