Zekaliya 12
12
Munzi wa Jelusalemu mbuuyoovunwa
1Ngaaya majwi aa Mwami Leza ngaakaamba azya Isilayeli. Mwami Leza, uulandabwide majulu uubikkide ntalisyo yanyika, wakalenga muuya wamuntu mumuntu ulati, 2“Ndiyanda kuti ndicite kuti Jelusalemu ibe nkomeki iiyoocita kuti bantu boonse babazingulukide bakakolwe. Cisi ca Juda ciyoosinkilizigwa awalo munzi wa Jelusalemu mbubonya. 3Mubuzuba oobo misyobo yoonse yamunyika niyoobungana antoomwe kuti baulwane, njoocita kuti Jelusalemu ukabe mbuli mwaala uutazyuliki kumisyobo yoonse. Boonse aabo basoleka kuuzyula bakalicise beni. 4Mubuzuba oobo njoonyonganya mabbiza oonse cakuti batanti bawo bayooboneka mbuli bantu bacinkukide, mbwaamba Mwami Leza. Ndinooyoolangilila musyobo wa Juda, pele mabbiza oonse aabamasi njooasofwaazya. 5Ndendilyo bapati bacisi ca Juda nibayooti mumyoyo yabo, ‘Bantu bamu Jelusalemu bali aanguzu, nkaambo Mwami Leza Singuzuzyoonse ngu Leza wabo.’
6“Mubuzuba oobo njoocita basololi bacisi ca Juda babe mbuli lukaye mukati kankuni, babe mbuli munzenge akati kamisunta. Bayoosyukuta bantu boonse, babazingulukide kumabazu oonse, pele Jelusalemu unoocikkede mpoonya aawo mpuubede.
7“Mwami Leza uyoosaanguna kuvuna zilawo zya Juda, kutegwa bulemu bwamusyobo wa Devedi abwabantu bakkala mu Jelusalemu butakomeni kwiinda bwabantu bamu Juda. 8Mubuzuba oobo Mwami Leza uyookwabilila bantu bakkala mu Jelusalemu, kutegwa bateteete akati kabo bakabe anguzu mbuli bwakabede Devedi, bamusyobo wa Devedi bayooba mbuli bantu basolwedwa amungelo wa Mwami Leza, mbuli Leza lwakwe mwini. 9Mubuzuba oobo njoonyamuka kuti nkanyonyoone misyobo yoonse eeyo iilwana Jelusalemu.
10“Njootilila bamusyobo wa Devedi abantu bakkala mu Jelusalemu muuya waluse awabukombi. Bayoondilanga, mebo ngubakayasa akuyoondilila mbuli muntu mbweema mwanaakwe omwe buyo, akweema mbubonya mbuli muntu mbwaema mwanaakwe wakusaanguna. 11Mubuzuba oobo kuyooba kulila kupati mu Jelusalemu, kuyooba kulila kuli mbuli kwa Hadadilimoni mucibanda ca Megido. 12Kuyooba kulila munyika, ciinga cimwi acimwi cilikke, abalo bakaintu babo banoolila balikke. Baciinga camusyobo wa Devedi abakaintu babo, baciinga caluzubo lwa Natani abakaintu babo, 13baciinga camusyobo wa Levi abakaintu babo, baciinga ca Syimeyi abakaintu babo, 14abaziinga zimwi zyoonse abakaintu babo.
Currently Selected:
Zekaliya 12: Tonga96
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Tonga Bible © United Bible Societies, 1994.