Intembauzyo 9
9
Lwiimbo lwa Devedi, mweendelezi aimbye bwiimbwa lwiimbo lwalufu lwamwana mulombe
1Njoolumba Mwami Leza amoyo wangu woonse.
Njookanana maleele aakwe oonse.
2Njookondwa akusekelela mulinguwe.
Njotembaula zina lyakwe, uusumpukide.
3Basinkondoma bapilukila musule, balalebwa, akuloba kumbele lyako.
4Nkaambo watondezya kuti nnyina mulandu,
wakkala acuuno cako, wabeteka cabuluzi.
5Watapatila bamasi, wanyonyoona basizibi,
waziminganya zina lyabo akutamani.
6Basinkondoma bamaninina, banyonyooka cakutabonwa,
minzi yabo waizyula, taakwe uuciyooiyeeya.
7Pele Leza nkwali lyoonse.
Wakkazika cuuno cakwe kuti abeteke.
8Ulabeteka nyika mubululami,
ulakosweda bantu milandu cakutasalulula.
9Leza ngamayubilo aabapenzegwa,
mayubilo muciindi camapenzi.
10Boonse bazi zina lyako balakusyoma, nkaambo yebo,
O Mwami Leza, tolekelezyi baabo bakuyandaula.
11Amutembaule Mwami Leza, uulaacuuno cabwami mu Ziyoni.
Amwaambilizye milimo yakwe akati kabamasi.
12Ooyo uusubula batila bulowa, nguubayeeya,
tabalubi bapengede pe.
13Kobona, O Mwami Leza, basinkondoma mbobandipenzya.
Kondeengelela undigwisye kundomo zyamasumo aabo.
14Kuti ndaambilizye ntembauzyo zyako zyoonse,
mumilyango mipati yamunzi wa Ziyoni,
nkekondedwe mulufutuko lwako.
15Bamasi bawida mudindi ndibakasya, kakole kasisidwe
nkibakateya kajata maulu aabo beni.
16Leza walibonya mukubeteka kwakwe kululeme.
Wateya sizibi mumilimo yamaanza aakwe mwini.
Kweendelana a Higiyoni
17Basizibi bayoopilusigwa kwacivumwe,
abamasi boonse bakaka Leza.
18Nkaambo bacete tabakooyoolubwa lyoonse,
kulangila kwabapengede takukafwidilili pe.
19Nyamuka, O Mwami Leza, muntu atazundi, beteka bamasi kumbele lyako.
20Ubayoosye O Mwami Leza, bamasi bazibe kuti mbantu buyo.
Currently Selected:
Intembauzyo 9: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
