Bafilipi 4

Malailile amwi

1Nkaako nobakwesu, bayandika, mbeyeeya bandikkomanisya, alimwi mbelisumpwida, amwiime cakuzyandamana mu Mwami nobayandwa bangu.

2Lino ndabakumbila ba Yuwodiyasi a Sintike kuti bamvwane mu Mwami. 3Alimwi ndakukumbila ayebo omubelesima mwini-mwini kuti ubagwasye bamakaintu aaba, nkaambo bakabeleka kapati antoomwe andime mukumwaya Makani Mabotu. Alimwi bakabeleka a Kilementi ababelesima bamwi bali aamazina aalembedwe mubbuku lyabuumi.

4Amusekelele mu Mwami lyoonse, alimwi ndati, amusekelele! 5Bantu boonse abazibe kulibombya kwanu. Mwami uli aafwiifwi. 6Mutalibiliki acintu niciba comwe pe, pele lyoonse amukumbile akoombookela Leza nzyomubula amoyo wakulumbaizya. 7Eelyo luumuno luzwa kuli Leza lwiinda busongo boonse luyoobamba myoyo yanu amiyeeyo yanu yoonse muli Kilisito Jesu.

8Kumananino nobakwesu, amuyeeye zibotu azitembaulika zyoonse zili zyakasimpe, zilemekeka, ziluleme, zisalala, zyeebesi, alimwi azyabulemu.

9Amutobele nzimwakaiya akutambula kuzwa kulindime antoomwe anzimwakamvwa kulindime anzimwakabona nkecita. Eelyo Leza uupa luumuno uyooba aandinywe.

Ulalumba nkaambo kacipego cabo

10Ndasekelela kapati mu Mwami kuti ono nikwainda ciindi cili mbocibede mwatalika alimwi kubonesya kuti mulandiyeeya. Mwakali kundiyeeya ncobeni, pele mwakabula ciindi cakutondezya boobo. 11Nsyaambi eezi mbuli kutongooka kuti kuli ncebulide pe, nkaambo ndakaiya kuti kufumbwa ncejisi ncecico. 12Ndilizi bucete mbobubede alimwi akuba azinji mbokubede. Muli zyoonse ndakaziba maseseke aakukkuta akwiilala, kuba azinji akubula. 13Ndakonzya kucita zintu zyoonse nkaambo Kilisito nguundipa nguzu.

14Nikuba boobo mwakacita kabotu mukundigwasya mumapenzi aangu. 15Alimwi nywebo no Bafilipi, mulizi nobeni kuti mumazuba mataanzi aakukambauka Makani Mabotu ciindi ncindakazwa ku Masedoniya kaatakwe mbungano iimbi yakali kundigwasya mukubbadela akutambula, ndinywe buyo nyolikke. 16Ciindi nindakali ku Tesalonika mwakanditumina zyakuligwasya ciindi aciindi. 17Kutaamba kuti ndiyanda zipego zyanu buyo, pele ndiyanda kuti mmulelekwe akaambo kabwaabi bwanu. 18Ndakazitambula zyoonse aboobo zyandizulila. Ndilijisi zyoonse nzyendiyanda ono, nkaambo ndakatambula kuli Epafuloditasi zipego eezyo nzimwakanditumina. Ncipego cabweema bubotu, cili mbuli cipaizyo citambulika cibotezya Leza. 19Eelyo Leza wangu uyoomupa zyoonse nzyomubula mukweendelana abuvubi bwakwe bwamubulemu buli muli Kilisito Jesu. 20Leza Taata alemekwe lyoonse alyoonse. Akube boobo!

Kujuzya kwamamanino

21Amubajuzye basalali boonse muli Kilisito Jesu. Bakwesu boonse balaandime balamujuzya. 22Basyomi boonse balamujuzya, kwaambisya aabo babeleka muŋanda ya Muleli Mupati. 23Luse lwa Mwami Jesu Kilisito lube aandinywe nyoonse.

Currently Selected:

Bafilipi 4: Tonga96

Highlight

Copy