Bafilipi 1

1Ndiswe ba Paulu a Timoti babelesi ba Kilisito Jesu, tulamujuzya nyoonse nobasyomi bamuli Kilisito Jesu, bali mu Filipi, antoomwe abaalu abakutausi. 2Leza Taata a Mwami Jesu Kilisito amubede aaluse akumupa luumuno.

Paulu mbwaakakombela babali

3Ndalumba Leza wangu lyoonse nendimuyeeya. 4Ciindi coonse nendimukombela, ndalumba Leza cakukondwa, 5nkaambo kazyoonse nzimwakacita mukundigwasya kumwaya Makani Mabotu kuzwa nimwakaatambula kusikila sunu. 6Alimwi ndilisinizizye kuti Leza wakatalisya mulimo mubotu ooyu mulindinywe uluuindilizya akuyooumanizya mubuzuba Jesu Kilisito aakuboola. 7Ndeelede kuti mmuyeeye boobo nywebo nyoonse nkaambo ndilamuyandisisya kapati nywebo nomwakatambula luse lwa Leza mbulindime, ndi mubwaange aneli mukukwabilila akuyumya Makani Mabotu. 8Leza ulizi kuti ndimusukeme nyoonse aluyando lwini luli mbuli lwa Kilisito Jesu.

9Ndakomba kuti mukomene mukuyanda, kuziba, akumvwisya koonse. 10Ndendilyo nomutizibe kusala ziyandika kapati, eelyo mulalondoka akubula kampenda nimulindila buzuba Jesu Kilisito aakuboola. 11Alimwi buumi bwanu bulatondezya micito iiluleme iizwa kuli Jesu Kilisito kuti boonse balemeke akulumbaizya Leza.

Kulindime buumi ngu Kilisito

12Ndiyanda kuti muzibe, nobakwesu, kuti eezyo zyakandicitikila zyakagwasya kapati kumwaisya Makani Mabotu. 13Aboobo balizi boonse balindizi baŋanda yamwami abamwi kuti ndaangidwe nkaambo ka Kilisito. 14Nkaambo kakuti ndimwaange, bakwesu banji bakaba basicamba kusyoma Mwami akukambauka Majwi aa Leza cakutayoowa.

15Nkobali bamwi bakambauka zya Kilisito nkaambo kamunyono akuyanda kukazyanya, pele nkobali bakambauka amyoyo mibotu. 16Aaba mbabamukambauka caluyando, alimwi balizi kuti Leza wakandipa mulimo wakukwabilila Makani Mabotu. 17Bamwi tabakambauki zya Kilisito camasimpe. Mbaasikuliyanda alimwi bayanda kundiyungizizya mapenzi mubwaange bwangu.

18Ino ntyani? Nikuba kuti kabakambauka cakuupaupa aameso nikuba mulusinizyo, kunyina mbocibede kufumbwa buyo kuti kabakambauka zya Kilisito. Ncenciceeco ncekkomanina. 19Iiyi, aboobo ndinoociya bukkomana. Nkaaambo ndizi kuti kwiindila mukukomba kwanu akugwasya kwa Muuya wa Jesu Kilisito njooangununwa. 20Ndalindila amoyo woonse kuti nsikooyoofwa nsoni pe. Pele njandisisya kapati kuti lyoonse ndibe aacamba akulemeka Kilisito amubili wangu, nikuba kubuumi nikuba kulufu. 21Ino buumi ninzi kulindime? Nkaambo Kilisito ulaandime, eelyo kufwa nimpindu mpati. 22Kuti naa kupona kukundipa ciindi cakubeleka milimo iitondezya micelo, nsizi ncenga ndasala. 23Ndajata maanka-maanka. Kuyandisya kwangu nkwakuunka kuli Kilisito, kayi ncibotu kwiinda! 24Pele nkaambo kandinywe cileelede kuti nkecipona. 25Aawo nsidonaiki pe, alimwi ndizi kuti ndinoocipona akukkala anywebo nyoonse, kuti lusyomo lwanu lukomene akumukondelezya. 26Aboobo ndazoosika kulindinywe, muzooba aazyakulikankaizizya muli Kilisito nkaambo kandime.

27Lino cipati ncakuti bukkale bwanu bweendelane a Makani Mabotu aaamba zya Kilisito. Nikuba kuti mboole kuzoomubona, naa nkeli kulaale, njanda kuti ndimvwe kuti mulizuunyene amoyo omwe. Alimwi njanda kuti ndimvwe kuti muli aamuzeezo omwe alimwi akuti mulagwasyanya kukwabilila lusyomo ndomujisi mu Makani Mabotu. 28Mutalekeleli basinkondonyoko kuti bamukonge nikuba munzila iili buti. Eezi ziyootondezya kuti balo bayoonyonyoonwa pele nywebo muyoofutulwa. Leza nguutikamucitile eezi, 29nkaambo wamupa ciindi kutali cakubelekela Kilisito buyo mukusyoma pele amukumupengela. 30Aboobo nywebo mulwana nkondo njiyonya njimwakabona nkelwana, alimwi njecilwana aono mbuli mbomumvwide.

Currently Selected:

Bafilipi 1: Tonga96

Highlight

Copy