Maako 11

Jesu mbwaakanjila mu Jelusalemu

(Mateyo 21.1-11; Luka 19.28-40; Joni 12.12-19)

1Lino nibakaswena aafwiifwi a Jelusalemu, bakasika kuminzi ya Betefage a Betani, bakasika kucilundu camisamu ya oliva. Jesu wakatuma basikwiiya bobilo. 2Wakabalailila kuti, “Kamuya kumunzi uulya ngomubwene. Mwaakunjila buyo, muyoojana mwanaa mbongolo uutanatantidwe muntu, ulisungidwe. Mukamwaangunune akumeleta. 3Kwaakuba muntu uuti kamubuzye kuti ‘Ino mucitila nzi oobu?’ Mukaingule kuti, ‘Mwami ulamuyanda, alimwi ulamupilusya onoono.’”

4Eelyo bakainka kumunzi ooko, baakujana mwanaa mbongolo ulaangidwe anze, kumbali aamulyango waŋanda munsi aanzila. Nibakasika bakamwaangununa. 5Eelyo bamwi bantu bakaimvwi ambali bakababuzya kuti, “A! Mucita nzi, mwaangununa mwanaa mbongolo?”

6Bakabaambila mbubonya mbuli mbwaakabalailila Jesu. Aboobo bakabazumizya. 7Nkabela bakaleta mwanaa mbongolo kuli Jesu, mpoonya babikka majansi aabo alinguwe, Jesu wakatanta. 8Bantu banji bakayala majansi aabo mumugwagwa, alimwi bakakwapula tusanzu twazisamu akutuyala munzila. 9Bantu bakali kweenda kumbele abaabo bakali kumutobela, bakatalika koongolola akulumbaizya Leza bati, “Leza aalumbaizigwe! Ulilelekedwe ooyo uuboola muzina lya Mwami Leza. 10Leza aleleke bwami buboola bwataata Devedi sikale wesu! Alumbwe Leza kujulu!”

11Jesu naakanjila mu Jelusalemu, wakainka akuyoonjila muŋanda ya Leza, wakalanga-langa zintu zyoonse. Pele nkaambo kakuti kwakalisiide kale, wakazwa akuunka kumunzi muniini wa Betani antoomwe abasikwiiya bali kkumi ababili.

Makani aamukuyu

(Mateyo 21.18-19)

12Nibwakaca, bakazwa ku Betani, Jesu wakafwa nzala. 13Wakabona mukuyu aalaale wakavwevwede matu manji, nkabela wakainka kuti akabone naa kuli nkuyu. Pele naakasika munsi, wakajana taakwe nkuyu, matu buyo, nkaambo ciindi cankuyu tiicakanasika. 14Jesu wakasinganya mukuyu ooyo akuti, “Kutakabi muntu uulya nkuyu kuzwa kulinduwe.”

Abalo basikwiiya bakwe bakamumvwa naakaamba oobo.

Jesu mbwaakatanda basimakwebo

(Mateyo 21.12-17; Luka 19.45-48; Joni 2.13-22)

15Nibakanjila mu Jelusalemu, Jesu wakaya kuŋanda ya Leza, watanda bantu boonse bakali kuuzya akuula oomo, wakatingamuna matebule aabasikucincana mali, azyuuno zyabaabo bakali kuuzya nkwilimba. 16Alimwi taakwe naakazumizya muntu naba omwe kuti ainde kayumwide cintu mulubuwa lwaŋanda ya Leza. 17Amane wakaiisya bantu kuti, “Mumalembe kulembedwe kuti Leza wakati, ‘Ŋanda yangu iyooitwa kuti niŋanda yakukombela kwabantu boonse.’ Pele nywebo mwiicita ciyubilo cababbi!”

18Bapaizi basilutwe abamayi ba Mulawo bakacimvwa cakacitika, aboobo bakatalika kuyandaula nzila yakujaya Jesu. Pele bakali kuyoowa, nkaambo nkamu yoonse yabantu yakali kukankamana kukwiisya kwakwe.

19Kumangolezya Jesu abasikwiiya bakwe bakazwa mu Jelusalemu.

Ciiyo cijatikizya mukuyu wakayuma

(Mateyo 21.20-22)

20Nibwakaca cifumo-fumo, kabaya bweenda munzila, bakabona kuti mukuyu ngwaakasinganya uliyumide cwaa kusikila kumiyanda. 21Pita wakaibaluka cakacitika, nkabela wakati kuli Jesu, “Kolanga Mufundisi, mukuyu uulya ngookasinganya wayuma ntaa!”

22Jesu wakabavwiila kuti, “Amuyeeye eeci! Kuti naa kamusyoma muli Leza, 23inga mulakonzya kwaambila cilundu eeci kuti, ‘zyuka awo mpobede, uliwaale mulwizi.’ Kuti kamutazumbauzyi mumyoyo yanu, pele kamusyoma amoyo oonse kuti eeco ncomwaamba cilacitika, nkasimpe inga cilacitika. 24Nkaako ndamwaambila kuti ciindi ncimukomba kuli Leza akukumbila cintu, amusyome kuti mulicitambwide kale, zyoonse muyoozipegwa ncobeni. 25Alimwi lyoonse nomukomba, kamubalekelela boonse kufumbwa mbomuli aamulandu ambabo, mwacita boobo Uso uuli kujulu akamulekelele zibi zyanu. 26Nkaambo kuti nywebo tamubalekeleli bantu bali aamilandu kuli ndinywe, awalo Uso uuli kujulu takooyoomulekelela milandu yanu.”

Jesu mbwaakabuzigwa zyanguzu zyakwe

(Mateyo 21.23-27; Luka 20.1-8)

27Bakabweeda ku Jelusalemu. Jesu naakali kweendeenda muŋanda ya Leza, kwakasika bapaizi basilutwe abamayi ba Mulawo abapati ba Bajuda, 28bakamubuzya kuti, “Ino nguni uukucitya zintu eezi? Alimwi nguni uukupa bulelo bwakucita zintu boobu?”

29Jesu wakabavuwa kuti, “Ndilamubuzya buyo mubuzyo omwe. Mwandipandulwida, ambebo ndamwaambila wakandipa bulelo bwacita zintu eezi. 30Amundaambile, nguni wakatuma Joni kuti abbapatizye, ngu Leza naa mbantu? Amundaambile!” 31Bakatalika kukazyanya muli cabo kuti, “Ino twaambe buti? Kuti naa twaamba kuti, ‘Leza nguwakumutuma’ ulaamba kuti, ‘Ino kayi mwakalekela nzi kumusyoma Joni?’ 32Pele sena twaambe kuti, ‘Mbantu?’” Bakayoowa kwaamba oobo, nkaambo bantu boonse bakali kusyoma kuti Joni wakali musinsimi mwini. 33Bakamuvuwa Jesu kuti, “Tatuzi.” Jesu wakati kuli mbabo, “Nkokuti, ambebo nsikoomwaambila naa mbulelo nzi mbwecitya zintu eezi.”

Currently Selected:

Maako 11: Tonga96

Highlight

Copy