Mateyo 4

Jesu mbwaakatepaulwa a Saatani

(Maako 1.12-13; Luka 4.1-13)

1Lino Jesu wakasololelwa a Muuya Uusalala munkanda kuti akasunkwe a Siluuni. 2Wakaliimya kulya kwamazuba amasiku aali makumi one, nkaako wakafwa nzala. 3Eelyo sikusunka wakasika kulinguwe akuti, “Kuti naa koli Mwanaa Leza ncobeni, ambila mabwe aaya kuti abe zinkwa.” 4Pele walo wakati, “Kulilembedwe kuti, ‘Muntu taponi acinkwa cilikke, pele ulapona amajwi oonse aazwa kuli Leza.’” 5Mpoonya Siluuni wakainka anguwe ku Jelusalemu, munzi uusalala, watanta anguwe ansonje ya Ŋanda ya Leza. 6Wakati kulinguwe, “Kuti naa koli Mwanaa Leza ncobeni koliwaala ansi! Tee kayi kulilembedwe kuti,

‘Leza uyoolailila bangelo bakwe,

nkabela bayookukwaba amaanza aabo kuti utacisi cituta cako abbwe.’”

7Mpawo Jesu wakamwiingula kuti, “Ndizi, pele kulilembedwe kuti, ‘Utasunki Mwami Leza wako!’” 8Nkaako Siluuni wakainka anguwe kucilundu cilamfu kapati. Wakamutondezya zisi zyoonse zyanyika abulemu bwazyo 9wati, “Zyoonse eezi inga ndakupa, kuti naa wavuntama akundikomba.” 10Mpoonya Jesu wakati kulinguwe, “Kozwa Saatani! Nkaambo kulilembedwe kuti, ‘Uleelede kukomba Mwami Leza wako, walo alikke ngoelede kumanina milimo.’” 11Aboobo Siluuni wakazwa, eelyo bangelo bakaboola, bakutaukila Jesu.

Jesu mbwaakatalika milimo yakwe mu Galilii

(Maako 1.14-15; Luka 4.14-15)

12Lino Jesu naakamvwa kuti Joni wakaangwa wakaakukkala munyika ya Galilii. 13Wakasiya munzi wa Nazaleta waya kumunzi wa Kapenaumu wakali kumbali lyalwizi lwa Galilii muzisi zya Zebuluni a Nafutali. 14Nkaambo mbombubo mbwaakaambide musinsimi Izaya kuti,

15“Ocisi ca Zebuluni acisi ca Nafutali kuya kulwizi,

mutala lya Jolodani.

Yebo o Galilii wabamasi!

16Bantu bakali kukkala mumudima bakabona mumuni mupati,

abaabo bakakkede munyika yacimvule calufu, mumuni wakabamunikila.”

17Kutalikila waawo Jesu wakakambauka wakati, “Amweempe nkaambo bwami bwakujulu bwaswena.”

Jesu mbwaakaita bazubi banswi bone

(Maako 1.16-20; Luka 5.1-11)

18Ciindi naakali kweenda ankomwe yalwizi lwa Galilii, wakabona Saimoni, wiitwa kuti Pita a Andulu munyina, kabawaala kanyandi mumaanzi. Nkaambo bakali bazubi. 19Eelyo wakati kulimbabo, “Amunditobele, kuti nkamucite bazubi babantu.” 20Mpoonya aawo bakasiya tunyandi twabo, bamutobela. 21Eelyo naakazwa ooko, wakabona abambi babunyina bobilo, Jemusi, mwanaa Zebedii a Joni mwanookwabo, kabali mubwato a Zebedii wisi kabasuma-suma tunyandi twabo, mpoonya wakabaita. 22Mpoonya-mpoonya bakasiya bwato awisi, bamutobela.

Jesu mbwaakaiisya akukambauka akusilika

(Luka 6.17-19)

23Lino Jesu wakeenda mucisi coonse ca Galilii kaiisya muzikombelo zya Bajuda akukambauka Makani Mabotu aazyabwami bwakujulu, kumwi ooku kasilika malwazi amaciswe oonse aakabajisi. 24Aboobo mpuwo yakwe yakasika a Musiliya yoonse. Bakamuletela baciswa banji bakali aamaciswe aaindene-indene, basikasuntu abayuminide mibili boonse buyo wakabaponya. 25Nkaako makamu aabantu akamutobela kuzwa ku Galilii, ku Minzi iili kkumi, Jelusalemu, Judiya akuzwa mutala lya Jolodani.

Currently Selected:

Mateyo 4: Tonga96

Highlight

Copy