Mateyo 28

Jesu mbwaakabuka kuzwa kubafu

(Maako 16.1-10; Luka 24.1-12; Joni 20.1-10)

1Lino Buzuba bwa Kulyookezya butegwa Sabata nibwakamana, bucica buyo, mubuzuba butaanzi bwamvwiki Maliya waku Magadala aumwi Maliya bakainka kuyoolanga cuumbwe. 2Mpawo kwakaba muzumo mupati wanyika, nkaambo mungelo wa Mwami wakaseluka kuzwa kujulu, wakasika wakunkulisya bbwe akukkala ali ndilyo. 3Ciwa cakwe cakali mbuli lulabo, zyakusama zyakwe zyakali kutuba buu. 4Akaambo kakuyoowa kapati, balindizi bakakankama akuba mbuli bantu bafwide.

5Lino mungelo wakati kubakaintu nibakasika, “Mutayoowi, nkaambo ndilizi kuti muyandaula Jesu wakakankaminwa aciingano. 6Tako kuno, wabuka mbubonya mbuli mbwaakaamba. Kamuza mubone mpaakalede. 7Lino kamuya cakufwambaana mukaambile basikwiiya kuti wabuka kuzwa kubafu, alimwi ulamusaangunina kuya ku Galilii ooko nkomuyoomubonena. Muyeeye mbwindamwaambila” 8Bakaintu bakazwa kufwambaana kucuumbwe kabayoowede ooku kabakondedwe kapati! Bakatijaanina kuyooambila basikwiiya bakwe. 9Jesu wakabaswaana akwaamba kuti, “Mwapona.” Balo bakaswena akumujata kumaulu, bamukomba. 10Mpoonya Jesu wakati kulimbabo, “Mutayoowi, kamuya mukaambile bakwesu kuti baye ku Galilii ooko nkobayoondiswaanganyina kuti tukabonane.”

Kwaamba kwabalindizi

11Lino kabaciya buya, bamwi babalindizi bakanjila mumunzi akwaambila bapaizi basilutwe nzyoonse zyakacitika. 12Nkabela nibakabungana antoomwe abapati akubuzyanya-buzyanya, bakapa basilumamba mali manji, 13bakati, “Amwaambile bantu kuti, ‘Basikwiiya bakwe basika masiku akumubba nitwacili koona.’ 14Kuti naa eeci cimvwigwe kumweendelezi tulamukombelezya kuti mutajani mulandu.” 15Aboobo bakatola mali aayo akucita mbubonya mbuli mbubakalaililwa. Nkabela makani aaya mbwaamwaikide mbubonya oobo aakati ka Bujuda nikuba kusikila sunu.

Jesu mbwaakatuma basikwiiya bakwe

(Maako 16.14-18; Luka 24.36-49; Joni 20.19-23; Milimo 1.6-8)

16Lino basikwiiya bali kkumi aumwi bakainka ku Galilii, kucilundu ooko Jesu nkwaakabalaililide. 17Nibakamubona bakamukomba, pele bamwi bakacili kudonaika. 18Mpawo Jesu wakasika akuti kulimbabo, “Ndapegwa nguzu zyoonse kujulu alimwi aansi. 19Nkaambo kaako kamuya mukaiisye bantu bamisyobo yoonse, mukababbapatizye muzina lya Taata alya Mwana alya Muuya Uusalala. 20Mukabaiisye kuti babambe makani oonse ngindamulailila. Mebo ndili aanywebo lyoonse, mane kusikila kumamanino aanyika.”

Currently Selected:

Mateyo 28: Tonga96

Highlight

Copy