Mateyo 27

Jesu mbwaakabetekwa a Pilato

(Maako 15.1; Luka 23.1-2; Joni 18.28-32)

1Lino nibwakaca, bapaizi basilutwe boonse abapati ba Bajuda bakapangana kuti bajaye Jesu. 2Nkabela bakaanzya Jesu akumutola, bamupa mumaanza aa Pilato mweendelezi, wakazwa ku Loma.

Judasi mbwaakalisina

(Milimo 1.18-19)

3Lino Judasi ooyo wakamwaaba, naakabona kuti Jesu wapegwa mulandu walufu, wakeempa akuboozya mali aansiliva aali makumi otatwe kubapaizi basilutwe akubapati ba Bajuda wati, 4“Ndabisya kwaaba muntu uutakwe mulandu.” Balo bakaamba kuti, “Ino tutyani swebo? Makani aako omwini.” 5Judasi wakasowa mali aansiliva ansi muŋanda ya Leza, wakazwa, wainka waakulisina. 6Bapaizi basilutwe nibakabweza mali aansiliva aayo bakati, “Takweelede kuti twaabike muciyobwedo, nkaambo mali aamalowa.” 7Aboobo bakabuzyanya, bamane bakaauzya muunda wamubumbi, kuti kabazikkila mumo beenzu. 8Nkaako ooyo muunda ucitegwa muunda wamalowa ambuli sunu. 9Mpoonya cakacitika eeco cakaamba musinsimi Jelemiya naakati, “Eelyo bakabweza mali aansiliva aali makumi otatwe, muulo wayooyo wakabikkilidwe muulo a Baisilayeli, 10nkabela bakaula muunda wamubumbi mbubonya mbuli Mwami Leza mbwaakandilailila.”

Pilato mbaakabuzya Jesu

(Maako 15.2-5; Luka 23.3-5; Joni 18.33-38)

11Lino bakaimika Jesu kumbele lyamweendelezi, mweendelezi wakamubuzya kuti, “Sena ndonduwe Mwami wa Bajuda?” Jesu wakati kulinguwe, “Waamba.” 12Pele nibakamutamikizya bapaizi basilutwe abapati ba Bajuda taakwe naakaingula pe. 13Mpawo Pilato wakati kulinguwe, “Sena totumvwide twaambo toonse ntobakwaamba?” 14Pele taakwe naakamwiingula, niliba ijwi lyomwe buyo, aboobo mweendelezi wakagambwa kapati.

Jesu mbwaakapegwa mulandu walufu

(Maako 15.6-15; Luka 23.13-25; Joni 18.39—19.16)

15Ciindi ca Pobwe lya Kwiindilila mweendelezi wakalizibide kubaangunwida bantu, kufumbwa mwaange ooyo ngubakayanda. 16Ciindi eeco kwakali umwi mwaange wakalaampuwo mbi, uutegwa Balabbasi. 17Nibakabungene, Pilato wakati kulimbabo, “Ino nguni ngomuyanda kuti ndimwaangunwide, Balabbasi antela Jesu uutegwa Munanike wa Leza?” 18Nkaambo wakalizi kuti akaambo kamunyono bakamuleta kulinguwe. 19Pilato naakakkede acuuno calubeta, mukaintu wakwe wakatumya jwi kulinguwe lyakuti, “Utabi ncocita amuntu ooyo mululami, nkaambo ndapenga kapati akaambo kanguwe muciloto.” 20Lino bapaizi basilutwe abapati ba Bajuda bakakombelezya bantu kuti bakumbile Balabbasi, Jesu ajaigwe. 21Alimwi mweendelezi wakati kulimbabo, “Ino nguuli aakati kabo bobilo ngomuyanda kuti ndimwaangunwide?” Bakati, “Balabbasi.” 22Pilato wakati kulimbabo, “Ino mmucite buti Jesu uutegwa Munanike?” Boonse bakati, “Akankaminwe aciingano.” 23Mpawo wakati “Ino kayi, mbubi nzi mbwaacita?” Bakoongololesya kabati, “Akankaminwe aciingano.”

24Aboobo Pilato naakabona kuti taakwe cintu ncaakali kukonzya kucita, akuti kuyanda kuba lupyopyongano wakabweza maanzi akusamba mumaanza bantu kabalangilide wati, “Nsikwe mulandu wabulowa bwamuntu ooyu uululeme. Amucite ncomuyanda nobeni.” 25Lino bantu boonse bakavuwa kuti, “Naa mulandu uube kulindiswe akubana besu.” 26Nkabela wakabaangunwida Balabbasi, naakamana kukwabbauzya Jesu wakamwaaba kuti akankaminwe aciingano.

Jesu mbwaakakankaminwa aciingano

(Maako 15.16; Joni 19.2-3)

27Mpoonya basilumamba bakanjizya Jesu muŋanda ya mweendelezi akubunganya mpi yoonse yazinguluka Jesu. 28Mpawo bakamusamununa akumusamika jansi lisalala pyu. 29Bakaluka musini wamamvwa bamusamika kumutwe, akumufumbatisya lubu mujanza lyalulyo. Eelyo bakamufugamina bamusabwida bati, “Wabonwa O Mwami wa Bajuda.” 30Nkabela bakamuswida mate, eelyo bakabweza lubu bamuumya amutwe. 31Nibakamana kumuseka, bakamusamununa jansi eelyo, bamusamika zisani zyakwe mwini, bakamutola kuyoomukankamina aciingano.

Jesu mbwaakakankaminwa aciingano

(Maako 15.21-32; Luka 23.26-43; Joni 19.17-27)

32Lino nibakazwa bakajana mwaalumi uutegwa Saimoni uuzwa ku Sailini. Mwaalumi ooyu bakamusungilizya kuyumuna ciingano ca Jesu. 33Nibakasika kubusena butegwa Gologota, “Nkokwaamba kuti, Busena bwakapapa kamutwe” 34bakamupa waini uuvweledwe ndulwe kuti anywe, pele naakalabila wakakaka kunywa. 35Lino nibakamukankamina aciingano, bakaabana zisani zyakwe akati kabo kwiindila mukuuma cisolo. 36Mpoonya bakakkala ansi bamulindilila nkukonya ooko. 37Atala aamutwe wakwe bakalemba majwi aatondezya ncibakamujaila, aati, “Ooyu ngu Jesu Mwami wa Bajuda.” 38Aawo kwakali bambwidwe babbi bobilo, umwi kululyo umwi kulumwensi. 39Bantu bakali kwiinda aawo bakali kugunya-gunya mitwe, 40baamba bati, “Wali kuti ulakonzya kumwaya ŋanda ya Leza akwiiyakulula mumazuba otatwe. Nkooko kolifutula lwako omwini, kuti koli Mwanaa Leza koseluka aciingano.” 41Mbubonya oobo abalo bapaizi basilutwe abamayi ba Mulawo alimwi abapati ba Bajuda bakamuseka bakati, 42“Wakali kufutula bamwi, pele walo takonzyi kulifutula. Tee ngo Mwami wa Isilayeli, aaseluke kuzwa aciingano kuti tumuzuminine. 43Ulasyoma muli Leza akwaamba kuti, ‘Ndi Mwanaa Leza.’ Leza aamununune, kuti naa kamuyanda.” 44Abalo babbi bakabambwidwe aciingano bakali kumusampaula mbubonya buyo.

Jesu mbwaakafwa

(Maako 15.33-41; Luka 23.44-49; Joni 19.28-30)

45Lino nikwakaba aacilungu-lungu kusikila aacilangankumo kwakali mudima uusiya mbi koonse-koonse. 46Nicatikakkwane maola otatwe Jesu wakoongolola ajwi pati wati, “Eli, Eli lama sabakatani?” Nkokuti, “Leza wangu, Leza wangu, wandisiila nzi?” 47Bamwi babo bakaimvwi munsi-munsi nibakamvwa boobo bakati, “Ooyo muntu wiita Elija.” 48Umwi wabo wakatijaana, wabweza nsinsa, wiizuzya ndulwe, wiibikka alubu, wamupa kuti anywe. 49Pele bamwi bakati, “Mulindile, tubone naa Elija ulasika kuzoomufutula.” 50Alimwi Jesu wakoompolola ajwi pati, eelyo wakafwa.

51Mpoonya-mpoonya cisitilizyo camuŋanda ya Leza cakayauka muzibeela zyobilo, kuzwa ajulu do ansi. Nyika yakazungaana kapati, myaala yakaanduka. 52Zyuumbwe zyakajaluka, nkabela bantu banji bakali kusyoma Leza bakabuka kuzwa kubafu. 53Bakazwa muzyuumbwe, eelyo Jesu naakabuka kuzwa kubafu, bakainka mumunzi uusalala oomo mubakabonwa abantu banji.

54Lino silutwe wabasilumamba abaabo mbaakali aabo kulangilila Jesu, nibakabona kuzungaana kwanyika azyakacitika, bakayoowa kapati bati, “Ncobeni, ooyu wali Mwanaa Leza.”

55Alaale kwakali bakaintu banji, bakali kulangilila. Mbambabo bakali kutobela Jesu kuzwa ku Galilii akumugwasya. 56Akati kabo kwakali Maliya waku Magadala, a Maliya banyina Jemusi a Josefa, alimwi abanyina bana ba Zebedii.

Kuzikkwa kwa Jesu

(Maako 15.42-47; Luka 23.50-56; Joni 19.38-42)

57Lino nikwakaba kumangolezya, kwakasika kuli Pilato umwi muntu uutegwa Josefa. Wakali muvubi uuzwa ku Alimatiya, awalo wakali muccilili wa Jesu. 58Muntu ooyu wakakumbila mutumba wa Jesu. Mpawo Pilato wakalailila kuti bamupe mutumba ooyo. 59Mpoonya Josefa, wakauputaila mumulembo uutuba, 60akuulazika mucuumbwe cakwe mwini, cipya ncaakakolwede mumwaala. Wakakunkulisya bbwe pati amulyango wacuumbwe, wainka. 61Maliya waku Magadala a Maliya umwi bakaliko ooko, kabakkede kulangana aacuumbwe.

Balindizi bacuumbwe ca Jesu

62Nibwakaca mu Buzuba bwa Kulyookezya butegwa Sabata, bapaizi basilutwe a Bafalisi bakabungana kuli Pilato 63akuti, “Mwami, tulayeeya mbuli mubeji uulya mbwaakaamba kacipona wakati, ‘Aakumana mazuba otatwe njoobuka alimwi.’ 64Nkaambo kaako lailila kuti cuumbwe cilindilwe mane kusikila mazuba otatwe ainde. Ambweni inga basikwiiya bakwe bayoosika akumubba, bamana baambile bantu kuti, ‘Wabuka kuzwa kubafu.’ Eelyo lucengo lwabili luyoobija kwiinda lutaanzi.” 65Amvwe boobo Pilato wakati kuli mbabo, “Mulijisi balindizi basilumamba, Kamuya mukacibambisye mbuli mbomukonzya.” 66Aboobo bakainka akuyoocibambisya cuumbwe akusinka-sinka bbwe basiya balindizi.

Currently Selected:

Mateyo 27: Tonga96

Highlight

Copy